Virkis- og venjingarstova

Á Lágargarði er virkis- og venjingarstova, har møguleiki er fyri at gera ymiskt handaligt, at vera saman við øðrum og at gera styrkjandi venjingar. Opið er gerandisdagar kl 9-16.

Tilboðini á Virkis- og venjingarstovuni á Lágargarði er til húsfólk á Lágargarði og heimabúgvandi sjálvhjálpnar pensjónistar. Pensjónistar, sum ynskja at koma á Virkis- og venjingarstovuna, skulu vera sjálvhjálpnir, og verða førir fyri at taka virknan lut í ymsu tilboðunum. Søkt verður um at verða upptikin á Virkis- og venjingarstovuna við at fylla út umsóknarblað, sum er HER

Virkisstovan er opin gerandisdagar kl. 09.00-16.00
Venjing er gerandisdagar kl. 10.00-12.00 og kl. 14.30-15.30
Gerandisdagurin á Virkis- og venjingarstovuni byrjar kl. 09.00 við morgundrekka, har vit práta og hugna okkum.

Felags rørsla er í samkomuhøllini gerandisdagar kl. 09.40. Lurtað verður eftir andakt aftaná. Eisini er møguleiki fyri at fara á Virkisstovuna at gera ymiskt handaligt, práta við fólk, lurta eftir upplestri ella spæla ymisk spøl. Til ber eisini at venja í venjingarhøllini.

Kl. 12.00-13.00 er møguleiki fyri at keypa døgurða í matarhøllini, og eftir hetta ber til at halda áfram við frítíðarítrivi ella at hvíla. Seinnapartsdrekka er kl. 14.00.

Vit gera ymiskt prýði til páskar, jólagávur og –prýði, hava olympskir leikir, halda føstulávint, flaggdagshald, eins og hugnaløtur eru javnan. Á jólum hava vit jólaborðhald, og um várið hava vit árligu útferðina.

Handaligu tilboðini eru: hondarbeiði av ymiskum slag, veving, arbeiða á træverkstaðnum, rippa húkar, tøva, mála, seyma. Eisini eru vit opin fyri øðrum tilboðum.

Á Virkis- og venjingarstovuni arbeiða ergo- og fysioterapeutar, pædagogur, skræddari og heilsurøktari.

Vit samstarva við hýruvognsfelag, og er møguleiki at koma í hýruvognsskipanina. Tey, ið hava tørv, kunnu søkja um at nýta koyriskipanina hjá Tórshavnar Kommunu. Meira fæst at vita HER

Annan hvønn hósdag er gudstænasta kl. 15.00 í Samkomuhøllini. Afturat hesum hava vit nógv ymisk tiltøk, sum eru at síggja á netsíðuni www.lagargardur.fo

Kunna teg nærri
Røktar- og umlættingarheimið Lágargarður
Stoffalág 84
Postboks 1188
110 Tórshavn

Telefon 35 67 88
Fax 31 44 95

T-postur: lagargardur@torshavn.fo
Netsíða: lagargardur.fo

Matartænastan
Góður kostur er alneyðugur. Her fáa tygum at vita, hvussu tygum kunnu bíleggja døgurða frá Lágargarði. Umsóknarblað og leiðbeining um tilmelding, sjúkrakost, kostnað og gjald: Tilmeldingarseðil til matartænastuna.pdf