Demenstilboð 67+

Tilboð til fólk við demens og teirra avvarðandi

Demens er ein sjúka, sum tað ber til at liva leingi og væl við. Hóast hetta síggja vit ofta, at menniskju, ið hava fingið staðfest eina demenssjúku, taka seg burtur úr virkna gerandislívinum, tí tey óttast at møta øðrum, tá ið t.d. minnið er farið at bila. Sjálvt um vantandi minni kann ávirka gerandisdagin, ber væl til við rættari hjálp at hava eitt gott lív.

Demens er ein sjúka í heilanum. Fyrsta ábendingin um sjúkuna er, at minnið bilar. Tað verður trupult at minnast, hvat hendi í gjár, hvat júst er blivið sagt, hvar lyklarnir liggja ella hvør júst ringdi.

Harafturímóti kann tað vera lætt at minnast, hvat hendi fyrr í tíðini á barna- og ungdómsárum.

Tú kanst lesa meira um sjúkueyðkenni við demens HER.

Tað er týdningarmikið at viðurkenna, at hevur tú fingið demenssjúku, hava tú og tíni nærmastu tørv á hjálp og ráðgeving.

Við rættari hjálp kanst tú hava góðar tíðir við virðismiklum løtum.

Vend tær til Heilsu- og umsorganartænastuna

Heilsu- og umsorganartænastan hevur starvsfólk við servitan um demens, sum kunnu vísa tær á, hvørji tilboð verða veitt til borgarar við demens og teirra avvarðandi.

Vil tú frætta frá starvsfólki, sum hevur vitan um demens, ber til at ringja til Heilsuhúsið tel 302000 ella at skriva ein teldupost til heilsuhusid@torshavn.fo

Starvsfólk í móttøkuni tekur ímóti boðunum og beinir teg víðari til rætta viðkomandi ella gevur boðini víðari til rætta starvsfólkið, sum so setir seg í samband við teg aftur innan fyri stutta tíð.

Heilsu- og umsorganatænastan bjóðar
Heilræði: Heimavitjan og/ella telefonráðgeving.

Starvsfólk hjá Heilræði eru sjúkrarøktarfrøðingar, sum gera heimavitjanir og bjóða heilsusamrøðu og prát um gerandisdagin og støðuna heima. Sjúkrarøktarfrøðingarnir kunnu

• koma á heimavitjan
• tosa um støðuna, lurta, stuðla og ráðgeva
• vísa á tilboð í kommununi

Tú ert vælkomin at hava onkran av tínum nærmastu við til samrøðuna.

Ráðgeving: Hevur tú spurningar um demens, ber eisini til at fáa vegleiðing og ráðgeving gjøgnum eina telefonsamrøðu.

Visitasjón: Er tørvur á heimarøkt, sjúkrarøkt, ergoterapi, fysioterapi, búplássi o.a. kemur ein visitator heim til tín og ger eina tørvsmetan. Sí meira HER.

Undirvísing: Skipað verður javnan fyri undirvísing fyri avvarðandi, tað vil siga makum og børnum hjá fólki, sum hava demens.

Dagtilboð: Dagtilboð er á Stjørnulon og á Tjarnarlon til fólk við demens: Sí meira HER.

Umlætting: Til ber hjá fólki 67+ at fara til umlætting á umlættingarheiminum, Boðanesheiminum og Lágargarði. Sí meira HER.

Búpláss: Búeindir fyri fólk við demens eru á Vallalíð, Boðalon á Boðanesheiminum, Heimarastovu á Lágargarði og Kristianslon á Tjarnagarði.

Venjingartilboð: Skipað verður fyri venjing til heimabúgvndi borgarar við demens á Tjarnagarði.

Samsýning at ansa eldri óhjálpnum heima:
Samsýning fyri at ansa eldri og óhjálpnum heima hevur til endamáls at tryggja, at tann óhjálpni fær støðuga røkt og hjáveru soleiðis, at hann kann verða verandi heima heldur enn á røktarheimi. Sí meira HER.
Minnist tú ikki væl?
So er hjálp at fáa, tá ið tú:

• ert farin at gloyma
• varðar av einum, sum er farin at gloyma
• tørvar at tosa við onkran, sum veit um sjúkueyðkennini við sjúkuni demens, og hvussu farast skal at
• tørvar at vita, hvussu tú á bestan hátt ert um ein, sum hevur sjúkuna demens
• tørvar at vita, hvørji tilboð Heilsu- og umsorganartænastan hjá Tórshavnar kommunu hevur at bjóða fólki við demens og teirra avvarðandi
Kunna teg nærri
Heilsuhúsið
Tórsgøta 25
100 Tórshavn

Tel 30 20 00
T-postur: heilsuhusid@torshavn.fo
Alzheimerfelagið
Alzheimerfelagið
Íslandsvegur 10C
100 Tórshavn
Tel. 78 80 12
T-postur: alzheimer@alzheimer.fo
Netsíða: alzheimer.fo