Heilsu- og umsorganartænastan

Í Heilsu- og umsorganartænastuni starvast umleið 550 fólk ella 375 ársverk. Starvsfólkini hava ymiskar heilsuútbúgvingar eitt nú sjúkrarøktarfrøðingar, heilsurøktarar, heilsuhjálparar, kost- og føðslufólk, fysioterapeutar og ergoterapeutar. Eisini starvast fólk við øðrum yrkisligum útbúgvingum umframt ófaklærd í tænastuni. Í umsitingini eru skrivstovufólk, fulltrúar og fólk við akademiskari útbúgving.

Uppgávur gerandis
Starvsfólkini arbeiða á eldrabústovnum, stórkøki og smærri køkum, sambýlum, virkis- og venjingarstovum, dagtilhaldum, tilhaldum, umlætting, endurvenjingarstovum, í venjingarhallum, heimatænastuni við sjúkrarøkt og heimahjálp, heimavitjanartænastuni og í umsitingini.

Tey veita ráðgeving og vegleiðing, røkt, viðgerð og umsorgan til búfólk, heimatænastu, sjúkrarøkt, heimahjálp umframt syrgja fyri máltíðum til fólk á eldrabústovnum og heimabúgvandi. Eisini er heimavitjanartænasta og viðgerðarstova.

Tórshavnar kommuna hevur 203 røktarbúpláss, 11 umlættingarpláss og 5 pláss til samdøgursendurvenjing. Í miðal vitja sjúkrarøktarfrøðingar í miðal 220 heimabúgvandi fólk, og 260 fólk fáa heimahjálp. Umleið 164 heimabúgvandi fáa døgurða av Lágargarði (tøl fyri 2016).

Umsitingin hevur um hendi øll fíggjarviðurskifti, dygdarmenning, at upptaka búfólk, at viðgera ansingarsamsýningar, at gera vegleiðingar av ymsum slag, at gera greiningar og hagtøl, svara kærum og umbønum um innlit v.m. og er stuðlandi í mun til raksturin.

Verkætlanir
Heilsu- og umsorganartænastan arbeiðir við nógvum ymiskum verkætlanum, ið bæði eru grundfestar í umsitingini og tvørtur um eindirnar. Nevnast kunnu ymsar menningarætlanir so sum heilivágstoymi, nøgdsemiskanningar, demenssamskiparaútbúgvingar, politikkir og mannagongdir, skrásetingar, fíggjarstýring v.m.

Hvønn veg gongur menningin í Heilsu- og umsorganartænastuni?

Alsamt størri dentur verður lagdur á at menna og samskipa tænasturnar til borgaran, so borgarin kann liva eitt virkið lív so leingi sum gjørligt. Hetta er í samsvari við eldrapolitikk býráðsins frá 11. desember 2014, har dentur verður lagdur á at veita heilsustimbrandi tilboð og tænastur. Hetta skal m.a. gerast við, at heimatænastan verður styrkt og lýkur tørv borgarans, her undir fyribyrging, heilsustimbran og endurvenjing. Vælferðartøkni er eisini ein partur av framtíðini.

Arbeitt verður áhaldandi við, at eldraøkið verður skynsamari og betri stýrt fíggjarliga - umframt at umsitingarligi parturin verður bygdur upp til tess at tryggja greiðar og lættar mannagongdir og haldgóða fyrisiting.

Avbjóðingar
Økt trýst er á eldrarøktina, tí lutfalsliga nógvir føroyingar komandi árini gerast eldri. Mett verður, at talið á fólkum 80 ár og eldri tvífaldast næstu 15 árini, samstundis sum færri fólk eru í arbeiðsførum aldri. Í 2015 vóru 5 fólk í arbeiðsførum aldri fyri hvørt fólkið á eftirløn, í 2030 verða væntandi 3 fólk í arbeiðsførum aldri fyri hvønn borgara á eftirløn. Dentur verður lagdur á at útvega nýggjar bústaðarmøguleikar, sum eru lagaðir til umstøðurnar hjá teimum eldru - eitt nú eldraíbúðir av ymsum slag, samstundis sum samanhangur er millum politisk mál og mið og fíggjarligar raðfestingar.

Umframt fleiri røktaríbúðir komandi árini, er eisini tørvur á fleiri búplássum bæði til fólk við demenssjúku og til fólk, sum hava stóran tørv á røkt. Harafturat er stórur tørvur á fleiri stutttíðarplássum og plássum til endurvenjing. Somuleiðis er tørvur á at endurbyggja ótíðarhóskandi røktareindir.