Endurvenjing


Endurvenjingin er eitt tilboð, har fólk venja 2 ferðir um vikuna á Boðanesheiminum. Vant verður í 1 tíma hvørja ferð. Eitt skeið varir í 3 mánaðir. Vit meta um likamligu støðuna hjá øllum, áðrenn tey koma á endurvenjingarskeið. Likamliga metingin kannar tørvin hjá tí einstaka umframt, at mett verður um, hvørjar førleikar viðkomandi hevur. Síðani verða (SMART) mál sett fyri at gera greitt, hvat endamálið við endurvenjingini er. Tað verða gjørdar ymiskar royndir við byrjan og enda – og onkuntíð tá ið viðkomandi er komin hálva leið, t.v.s. aftaná 1½ mánað. Hetta verður gjørt til tess at vita, hvørt tað gongur rætta vegin, hvørt tillagingar skulu gerast til venjingina – umframt at eggja tann einstaka at halda áfram.

Úrslit
Tað sæst skjótt nokkso stórur munur á, hvat fólk kundu áðrenn, og hvat tey so kunnu aftaná at hava vant eina tíð.

Í miðal hava tey seinastu 130 fólkini, sum hava verið til endurvenjing, fingið hesi úrslit:

34% framgongd í 6 minuttir gongutest (Hvussu langt tey klára at ganga uppá 6 min)

59% framgongd í reisa/seta seg test (Hvussu ofta tey klára at reisa/seta seg uppá 30 sek)

19% framgongd í “Timed up and go” (Hvussu skjótt tey klára at reisa seg frá einum stóli, ganga 2.5 metur, og síðani seta seg niður aftur á stólin – Testin sigur serliga nakað um dynamiska javnvág, eksplosiva styrki, vanda fyri fall)