Dagstovnurin í Øksnagerði


Á stovninum eru 4 stovur. Hesar eru: Lonin, stór barnagarðsstova við uml. 30 børnum í 3-7 ára aldri. Fjósið, vøggustova við 13 børnum í 0-3 ára aldri. Tippið, vøggustova við 13 børnum í 0-3 ár. Bólið, serstova við uml. 7 børnum í aldrin um 3-7 ár. Í alt eru tað 26 starvsfólk knýtt at stovninum.

Endamálsorðing
Starvsfólkini hava í felag valt tríggir málsetningar, sum vit vilja arbeiða miðvíst við. Hesir eru:

At varðveita og menna foreldrasamstarvið og samstarvið á stovninum. Hetta inniber millum annað: Felags virksemi millum starvsfólk, foreldur og børn. Felags virksemi millum børn á stovninum. Hækka fakliga støðið millum starvsfólkið.

At varðveita og styrkja sjálvsvirðið hjá barninum. Hetta inniber millum annað at vit arbeiða við viðurkennandi námsfrøði. At børnini fáa hóskandi avbjóðingar.

At varðveita og styrkja tann sosiala førleikan hjá børnunum. Hetta inniber millum annað at vit stuðla børnunum í at hjálpa hvørjum øðrum. At skapa eitt jaligt umhvørvi, har barni kennir seg at hoyra til bólkin/stovuna/stovnin. At geva rúm fyri ymiskleika. At stuðla børnunum í at knýta vinarbond.

Okkara menningarætlan fatar um hesi øki: Persónlig menning, sosialir førleikar, málslig menning, náttúra, mentan, kroppur og rørsla.

Vit leggja stóran dent á at fáa rørslur til at vera ein natúrligan part av gerandisdegnum hjá børnunum.

Gerandisdagurin
Allar stovurnar lata upp kl. 7.30, og tann fyrsta tíman opna vit í saman í Rættini, sum er okkara felagsrúm.
Kl. 16.00-17.00 skiftast báðar vøggustovurnar um at lata aftur, soleiðis at øll vøggustovubørnini og starvsfólkini uppá skift eru í tí eini vøggustovuni síðsta tíman av degnum í eina viku í senn. Stovnurin letur aftur kl. 17.00.

Í gongini á hvørjari stovu er ein talva / dagbók, har vit hvønn dag skriva nakað av tí, sum vit hava gjørt tann dagin. Eisini verður talvan nýtt til ymisk boð.

Vit hava ymiskar siðir og tiltøk í gjøgnum eitt ár. Vit meta tað vera týdningarmikið, at tiltøk ganga aftur, og at børnini kenna og kunnu gleða seg til hesi. Flestu tiltøkini eru knýtt at høgtíðum. Móti sumri fer stovnurin eina felags útferð, har vit stuttleika okkum saman ein heilan dag. Og í mai mánaði fara vit eina útferð í blandaðum bólkum.

Bólið
Bólið er ætlað børnum, sum hava ávísar kontakt- og/ella samskiftistrupulleikar. Stovan er ætlað teimum børnum, sum hava tørv á einum forútsigiligum gerandisdegi í einum skipaðum umhvørvi, tørv á miðvísari mál- og samskiftisstimbran, tørv á at royna seg í samspæl við onnur børn - í tann mun, tey megna. Stovan er normerað til 7 børn í aldrinum 3-7 ár.

Serstakir dagar
Tann 3. september hevur stovnurin føðingardag, og hendan dagin halda vit saman við børnunum. Eisini eru foreldrafundur, foreldra viðtalur, foreldrakaffi, garðdagur, summarveitsla, jólahugni til jólar, føstulávintshald og ymisk onnur tiltøk í gjøgnum árið.

Stovnurin hevur árliga stongt hesar dagar: Skírhósdag, langa fríggjadag, 2. páskadag, Flaggdagin, Dýra biðidag, Kristi himmalsferðardag, 2. hvítusunnudag, Grundlógardagin 5. juni frá kl. 12.00, Jólaaftan, 1. og 2. jóladag, nýggjársaftan og nýggjársdag. Umframt hesar dagar hava vit stongt tríggjar vikur um summari, í viku 29, 30 og 31.

Tórshavnar kommuna gevur teimum børnum, hvørs foreldur hava tørv á tí, eitt ansingartilboð hesa tíðina. Minst ein dagstovnur í økinum er opin, um tørvur er á tí. Um jóltíðir hava vit stongt allar gerandisdagar millum jól og nýggjár.

Árliga hevur stovnurin tveir ráðleggingardagar, har námsfrøðiligt arbeiði verður lagt til rættis. Hesar dagar eru starvsfólkini til arbeiðis uttan børn, so tá taka vit ikki ímóti børnum.

 

 

 

 

 

Kunna teg nærri
Dagstovnurin í Øksnagerði
Øksnagerði 1
100 Tórshavn

Tel. 30 22 60
Fartel. 21 99 59

T-postur: soleydh@torshavn.fo
Netsíða: oksnagerdi.fo

Leiðari: Sóleyð Í. Hermansen
Upplatingartíðir: frá kl. 7.30-17.00

Tel stovur:
Lonin 25 08 61
Fjósið 25 08 62
Tippið 25 08 64
Bólið 25 08 68