bústaður og bygging

Á hesari síðuni finnur tú alt tilfar um húsabygging. Tú kanst søkja um byggiloyvi ella kunna teg um útstykkingar og grundøki í Tórshavnar kommunu. Her standa eisini reglurnar fyri út- og umbygging.

Byggiloyvi
Áðrenn bygt verður, skal umsókn um byggiloyvi sendast byggideildini hjá kommununi til góðkenningar. Farast kann ikki undir bygging, fyrrenn byggiloyvi fyriliggur. Tað er umráðandi, tá ið søkt verður um byggiloyvi til nýbygging og/ella umbygging, at fólk við neyðugum førleika gera tekningar og útrokningar. Tað eru arkitektar, byggifrøðingar, verkfrøðingar, teknikarar ella onnur, sum byggivaldið heldur hava nóg holla vitan og kunnleika.

Byggideildin hevur byggieftirlitið undir hond og viðger allar umsóknir, sum koma inn.

Øll bygging í kommununi skal fara fram eftir reglunum í byggisamtyktini, sum er galdandi fyri tey ymsu økini í kommununi.

Tá ið húsini eru liðug, sýnir byggideildin tey saman við Brunaeftirlitinum, so ein byggiváttan kann verða givin. Hetta er ein váttan, sum sigur, at húsini eru gjørd sum ásett í byggiloyvinum. Tá ið henda váttan er givin, kunnu lánistovnarnir avgreiða endaligu fíggingina av byggingini.

Faldari um sethúsabygging


Faldarin um sethúsabygging er til tín, sum hevur í hyggju at lata byggja hús. Her eru frágreiðing og vegleiðing um, hvussu farið verður fram, tá ið søkt verður um byggiloyvi. Les faldaran á netinum HER ella í pdf HER