22. juni 2017
Hanus Joensen frá sum skúlastjóri
Móttøka var í dag seinnapartin fyri Hanusi Joensen, sum nú leggur frá sær sum skúlastjóri í Skúlanum á Fløtum og fer í starv hjá Mentamálaráðnum. Nógv fólk var komið saman og fleiri røður vórðu hildnar. Annika Olsen, borgarstjóri, segði m.a.:

- Heimsgitni entreprenørurin og stovnarin av Apple, Steve Jobs, segði, at hjá kreativum fólki var ofta torført at siga, hvat kreativitetur var. Tí kreativitetur er at síggja tað sjálvsagda í røttum samanhangi.

- Tann kreativi megnar at sameina sínar royndir við nýggjar avbjóðingar og finna loysnir, onnur aftaná halda vera sjálvsagdar.

- Hetta rann mær til hugs, nú vit heiðra Hanusi Joensen. Tú kanst seta nógv spjøldur á Hanus - lærari, hondbóltsspælari, telvari, kórleiðari, urguspælari, íverksetari, ársins leiðari, ja, og sjálvandi skúlastjóri - men í mínum hugaheimi kemur hann altið at standa sum ein kreativur og fyrimyndarligur leiðari.

- Uttan at fara í smálutir um alt annað, so havi eg hug at nevna verkætlanina "Litir í leiki" sum eitt dømi.

- Henda næmingaundirvísing í tónleiki við innlæring av vanligum fólkaskúlagreinum er onki minni enn ein varði í námsfrøðiligum menningararbeiði.

- Hetta samstarv millum musikkskúla og fólkaskúla er ikki minni áhugavert, nú nýggi Musikkskúlin kemur at liggja skamt frá Skúlanum á Fløtum.

- Sum eg skilji hevur verið gleðiligt at síggja, hvussu gagnlig verkætlanin hevur verið fyri menningina hjá næmingunum.

---

- Í øðrum høpi hevur Hanus eisini víst stóran kreativitet. Hann hevur fostrað framúr talent ofta undir ofta vánaligum kørmum í Kommunuskúlanum.

- Tey teljast mong, ið minnast Hanus við takksemi sum ein á øllum økjum fyrimyndarligan leiðara.

- Tað eru skjótt 45 ár síðan, at Hanus tók læraraprógv og byrjaði sítt virki á Felagsskúlanum á Oyrarbakka.

- Síðan kom hann spakuliga suður hendavegin, var fyrstilærari í Kollafirði til hann fyri 20 árum síðan tók við sum skúlastjóri í Tórshavnar kommunuskúla.

- Seinnu árini hevur Hanus enn einaferð víst síni kreativu evni við at taka á seg uppgávuna at sameina Venjingarskúlan og Kommunuskúlan.

- Hetta er eitt avbera stórt arbeiði, sum umfatar útivið 800 næmingar við einum hópi av fjølbroyttum tilboðum umframt - vit kunnu úr rúgvuni nevna Lopfjølina, fótbóltsskúlan og fjarlestur.

- Eg síggi, at Miðlabólkurin á Skúlanum á Fløtum sigur um leiðslustílin hjá Hanusi, at hann umfatar opinleika fyri nýggjum møguleikum, íverksetan, kveikjan og kreativitet.

- Leiðslan hevur við hepnari hond sett út í kortið og hevur saman við fjøltáttaða starvsfólkahópinum lagt lunnar undir ein spildurnýggjan skúla.

---

- Skúlin á Fløtum hevur verið ein tungur burður. Og tey vóru mong, ið hildu samanleggingina vera eina vanlukku.

- Men eisini her gekk Hanus á odda og heitti á foreldur at vísa tolsemi og vælvilja, tí alt var í tryggum hondum.

- Hetta er ein skúli, vit vænta okkum nógv av. Okkara uppgáva sum politikkarar er at skapa karmarnar, men tit skapa innihaldið.

- Og har hevur tú Hanus gingið á odda.

- Tí er tað eitt sindur sorgblítt at vera her í dag og uppliva, at tú leggur frá tær, nú vit leggja fundamentið til nýggja Skúlan á Fløtum.

- Taka vit ta persónligu síðuna av Hanusi, so er ongin ivi, at hann hevur fylt sera nógv í míni familju.

- Beiggi mín, Martin Karl, hevur nú í mong ár starvast í Kommunuskúlanum og nú í Skúlanum á Fløtum, og tað er ikki ein einasti døgverðabiti farin niðurum, uttan at Hanus ikki hevur verið róstur upp til skýggja.

- So tað verður tómligt hjá honum, nú Hanus fer í annað starv.

---

- Pakistanski nobelprísvinnarin Malala segði einans 15 ára gomul, at "ein bók, ein blýantur, eitt barn og ein lærari kunnu broyta heimin".

- Í dag heiðra vit einum lærara, sum hevur gjørt mun, sum hevur skapt broytingar.

- Góði Hanus.

- Eg skal at enda takka tær fyri trúfasta tænastu fyri Tórshavnar kommunu og bý.

- Takk fyri alt tað góða, tú hevur lagt í nógvar árgangir av børnum okkara, takk fyri tín fyrimyndarliga stíl og einastandandi evni at finna loysnir, segði Annika Olsen at enda, áðrenn hon handaði Hanusi Joensen gávu frá Tórshavnar kommunu.