27. juli 2010
Eitt brak av eini ólavsøkukonsert!
So er ólavsøkukonsertin á trappuni. Hvør bólkur kemur at spæla í umleið hálvan tíma. Endaliga skráin og lýsing av teimum luttakandi er her:

Útipallur:
Crawling blue kl. 20.00 – 20.30
Jens Marni kl. 21.00 – 21.30
The Ghost kl. 21.45 – 22.05
BET YOU ARE WILLIAM kl. 22.15 – 22.45
Guðrið Hansdóttir kl. 23.05 – 23.35
DÚNÉ kl. 00.30 – 01.45
Páll Finnur Páll kl. 02.15


Reinsaríið:
Grandma´s Basement
Hamferð


Dúné - høvuðsnavnið á Ólavsøkukonsertini
Dúné kom brakandi inn á danska tónleikapallin í 2008. Hetta árið vann Dúné allar tær størstu virðislønirnar innan danskan tónleik: P3 Guld, Gaffa Prísin og tríggjar Danish Music Awards (Besta nýggja navn, Ársins bólkur og Ársins rokkútgáva), umframt at debutfløgan, We Are In There You Are Out Here, bleiv kosin besta útgávan av tónleikablaðnum Soundvenues.

Og so tað løgnasta av øllum: Hetta var, meðan bólkurin enn var ein studentaskúlabólkur! Bólkurin ger longu aftur um seg, gav í fjør út róstu fløguna Enter Metropolis, sum teir nú eru á konsertferð við. 


Jens Marni og Páll Finnur Páll
Jens Marni fór frá Kjølum via All That Rain og Showmonnum til Dans Melodi Grand Prix og nú á ólavsøkukonsert. Studentaskúlabólkurin úr Hoydølum Páll Finnur Páll gjørdist ein stór landaplága og fer eisini á ólavsøkupallin.

Jens Marni hevur roynt tað heila. Besti sangari í 2008 og Planet Award, Ársins CD og so Grand Prix. Studentaskúlabólkurin úr Hoydølum gav fløgu út, tá vóru tað Páll, Finnur, Páll, Ísak og Høgni. 3 fløgur við ótaldum landaplágum er tað vorðið til. Ein framúr konsertbólkur sum veruliga setur stemning í. 


Undirbeat við Sunnevu og Kasper
Sunneva Háberg skipar fyir Undirbeat, har høvuðs-DJ verður Kasper Bjørke.

Kasper Bjørke er ikki hvør sum helst, Hann hevur framleitt tónleik saman við Anders Trentemøller, er viðurkendur sum framleiðari á altjóða stigi og hevur verið sera vælumtóktur saman við Tomas Barfod í disco-house-duettini Filur.

Fyrsta album hansara In Gumbo kom í 2007, tað seinna kom nú í február í ár – Standing on top of Utopia.


Ghost á Ólavsøkukonsertini
Tað nýggjasta frá fyrireikarunum av ólavsøkukonsertini er, at The Ghost fara at spæla á konsertini. The Ghost hava akkurát givið út nýggja fløgu, sum kallast ”War Kids” og eru júst komnir heim av turné í Týskalandi og Eysturríki. The Ghost hevur eisini fingið ein plátusáttmála í Onglandi.