15. desember 2017
Verulig ferð setast á bústaðarbyggingina
Verulig ferð verður nú sett á bústaðabygging í Tórshavnar kommunu. Hetta er ein liður í at loysa ta positivu avbjóðing, ið stendst av fólkavøkstrinum.

Herfyri vórðu 22 grundøki lýst til sølu á Hamrabøi Kollafirði, 5 grundøki verða gjørd í Nólsoy, og í gjárkvøldið varð avrátt at selja 4 grundøki í Kaldbak fyri marknaðarprís.

Í gjárkvøldið samtykti býráðið eisini einmælt at taka av tilboði um at gera 45 grundøki aftrat omanfyri Argjahamar við Klingurstjørn.

Privata bústaðarbyggingin í Tórshavnar kommunu er stór í løtuni. Men ferð er eisini komin á kommunalu útstykkingarnar. Arbeitt verður samstundis saman við fleiri privatum stovnum og feløgunum um ein nýggjan leist í sambandi við íbúðabygging.

Avrátt var í gjárkvøldið eisini at senda bústaðarpolitikkin hjá kommununi til hoyringar (sí aðra grein), umframt at onnur uppskot um broytingar av byggisamtyktum, sum eru ávegis, benda á, at fleiri uppskot um bústaðabygging eru ávegis.