Endurnýtslan

Á hesari síðuni finnur tú alla kunning um ruskinnsavning til húsarhald og endurnýtslu. Er posin ikki heintaður, kanst tú ringja til IR Lastbilar tel. 30 20 15 ella 77 11 50. Burturkast, sum ikki stavar frá privatum húsarhaldum, er vinnuburturkast og gjaldsskyldugt.


Endurnýtslan á Hjalla er opin:
mán.-hós. kl.8-17
frí. kl. 10-17
ley. kl.10-17 (Bara privat burturkast)

Innsavnan
Húski í Tórshavnar kommunu hava skyldu til at skilja burturkastið í samsvari við endurnýtsluskipanirnar hjá kommununi. Málið er, at alt, sum kann endurnýtast, skal skiljast frá tí vanliga húsarhaldsruskinum.
Húsarhaldsrusk verður heintað eina ferð um vikuna, pappír og papp sættu hvørja viku.

Fyri at fáa ruskposar, skal húskið vera skrásett í fólkayvirlitinum í kommununi. Er húskið ikki skrásett í fólkayvirlitinum, ber til at fáa hetta gjørt í Snarskivuni. Ert tú skrásettur í fólkayvirlitinum, men enn manglar ruskposar, skalt tú seta teg í samband við ruskinnsavningina hjá Tórshavnar kommunu, telefon 30 20 15, ella 77 11 50, sum ber ruskposarnar út.

Ruskposar til húsarhald
Burturkast, ið ikki er vandamikið og ikki kann endurnýtast, verður latið í gráa posan, ið verður heintaður hvørja viku. Hetta er til dømis: matleivdir, blæður, skitið papp osv.

Tvær ferðir um árið - í apríl og oktober - fáa øll húski í Tórshavnar kommunu borið eina rullu við 28 gráum ruskposum. Hesir posar skulu røkka í eitt hálvt ár. Húski við fimm fólkum ella fleiri fáa tvær rullur.
Fólk ella húski, ið hava tørv á fleiri posum, ella sum ikki eru skrásett í kommununi, kunnu keypa serligar kommunalar ruskposar í handlunum. Hesir, eru merktir við bláari áskrift „VINNUBURTURKAST“. Bæði at heinta og beina burtur posarnar er íroknað keypsprísinum fyri vinnuposarnar.

Posin skal standa í stativi, og rundan um stativið skal vera ljóst og reint. Alt burturkast skal vera í plastposa, áðrenn tað verður koyrt í tann gráa posan. Blæur, bind o.t. skulu vera í afturlatnum plastposa. Hvassir lutir skulu ballast væl inn, so at ruskinnsavnararnir ikki fáa skaða. Tá ið 20 sentimetrar eru upp til posakjaftin ella posin vigar 20 kilo, má ikki koyrast meira í hann.

Er posin í tínum húsarhaldi av misgáum ikki heintaður, kanst tú ringja til ruskinnsavningina (IR Lastbilar), tel 77 11 50. Leiðin hjá ruskinnsavnaranum til stativið skal vera trygg og í mesta lagi 20 metrar. Ofta settir spurningar frá borgarum, kanst tú lesa meira um HER

Posi til vandamikið burturkast
Saman við rullum við húsarhaldsposum, fáa húski kláran posa til vandamikið burturkast. Posin er merktur “VANDAMIKIÐ BURTURKAST”. Tá ið posin skal heintast, skal hann setast við síðuna av vanliga ruskposanum, so verður hann heintaður samstundis sum vanligi posin.

Kemur vandamikla burturkastið í bland við vanliga burturkastið, kann tað elva til stóran skaða á fólk og náttúru. Tí er tað strangliga bannað at koyra slíkt burturkast í gráa posan.

Vandamikið burturkast er til dømis lutir og evni so sum battarí, lágorkuperur, blýleivdir, eiturevni, máling, olja, sýrur og lútir.

Tú kanst eisini lata vandamikið burturkast ókeypis inn til endurnýtslurnar í kommununi. Fyri at tryggja tey, sum taka ímóti burturkastinum, er neyðugt at merkja burturkastið, og lata íløt væl aftur, áðrenn hetta verður sent til burturbeiningar.

Grøna ílatið
til papp og pappír verður heintað sættu hvørja viku. Álmanakkin sæst HER Øll í kommunu fáa eitt ókeypis grønt ílat, sum kann heintast á Hjalla, har Tinghúsið heldur til. Turt og reint pappír kann endurnýtast og verður koyrt í tað grøna ílatið.

Blankar lýsingar, litrík vikubløð og rútabrævbjálvar, kornfleykspakkar o.t. (grátt papp) kunnu endurnýtast. Lýsingabløð, sum eru pakkað inn í plastikk, skulu takast úr plastikkinum, áðrenn tey verða koyrd í grøna ílatið.

Pappír og papp, sum hevur nortið við mat ella sápu, ber ikki til at endurnýta og verður beint burtur saman við vanliga burturkastinum. T.d. margarinpappír, papptallerkar, sápupakkar og tílíkt.

Grøna ílatið skal standa við síðuna av vanliga ruskílatinum og skal vera lætt atkomiligt. Tað kann setast í t.d. eina garasju ella kjallara, men neyðugt er at seta tað útum, tá ið tað skal tømast. Ílatið kann festast, so tað ikki fýkur í vindinum.

Í fleiri íbúðarbygningum í kommununi, t.d. í Berjabrekku og undir Fjalli, eru húskini felags um grønu íløtini. Í Nólsoy, Hesti og einstøkum øðrum økjum í kommununi hevur kommunan ikki sett í verk skiljingarskipan til pappír og papp, av tí at undirstøðukervið ikki loyvir tí.


Endurnýtslan
Annað privat burturkast, sum ikki fatar um innheintingarskipanina umframt vinnuburturkast, verður latið inn á móttøkustøðum. Er talan um sera stórar nøgdir ella sera stórar lutir, eiga fólk at tosa við Endurnýstluna á Hjalla.

Í Tórshavnar kommunu eru trý móttøkustøð:
• Endurnýtslan á Hjalla
• Endurnýtslan í Kollafirði (Bara privat burturkast)
• Endurnýtslan í Nólsoy (Bara privat burturkast)

Yvirlit yvir endurnýtsluplássið á Hjalla sært tú HER


Burturkast frá umvælingum
Burturkast frá smærri umvælingum (nøgdir undir 2 m3) í egnum bústaði kann avhendast á Endurnýtsluni í einum vanligum bili við lítlum anhangara (totalvekt av bili í mesta lagi 3500 kg, totalvekt av anhangara í mesta lagi 750 kg, og samlað totalvekt fyri bil + anhangara í mesta lagi 3500 kg). Hetta er ókeypis.

Burturkast, sum verður latið inn á kommunal móttøkupláss við akførum yvir 3500 kg ella við anhangarum størri enn 750 kg, verður altíð roknað sum vinnuburturkast og er gjaldsskyldugt.

Burturkast frá nýbygging og størri umbyggingum/umvælingum av privatum og vinnuligum bygningum, verður roknað sum vinnuligt burturkast.

Vinnuligar fyritøkur kunnu lata inn burturkast til Endurnýtsluna á Hjalla, silohøllina á Brennistøðini, jarnplássið á Hjalla og tyrvingarplássið í Húsahaganum. Leygardagar taka móttøkuplássini hjá kommununi ikki ímóti vinnuburturkasti, men einans privatum burturkasti.


Urtagarðsburturkast og mold
Til ber at lata urtagarðsburturkast inn á Endurnýtsluni. Hetta er ókeypis. Er skøra uppí urtagarðsburturkastinum, verður hetta latið til burturkast at brenna - hetta fyri at fyribyrgja at skøran spjaðir seg.

Mold í lítlum nøgdum kann fara á Endurnýtsluna á Hjalla, har urtagarðsburturkast verður burturbeint. Mold í stórum nøgdum er vinnuburturkast og eigur at fara beinleiðis í moldgoymsluna í Villingardali.

Á moldgoymsluni ber til at keypa mold. Til ber at venda sær til moldgoymsluna tel. 30 20 42 ella Snarskivuna tel. 30 20 10.

Kostnaðurin, uttan MVG, at keypa mold er :
• 100 kr/m3 fyri skilda mold (grót størri enn uml. 5 cm er skilt frá)
• 28 kr/m3 fyri óskilda mold

Burturkast at tyrva
Sumt burturkast, ið ikki má brennast, verður tyrvt. Hetta kann vera trýstviðgjørdur viður, gips, bjálving (glas- og steinull), evni við PVC-innihaldi, asbest, eternit og tílíkt.
Tyrvingarøkið í Húsahaganum tekur fyrst og fremst móti tilfari frá vinnuni. Privatborgarar kunnu lata tilfar til tyrving í bingjurnar hjá Endurnýtsluni.

Jarn og metall
Privatborgarar og akfør undir 3500 kg skulu koyra jarnburturkast í bingjur á Endurnýtsluni. Jarnplássið á Hjalla tekur ímóti akførum yvir 3500 kg. Bilvrak skulu altíð latast inn á jarnplássið - bæði vinnulig bilvrak og privat bilvrak.

Skrottjarnið skal vigast á vektini hjá Endurnýtlsuni við innkoyringina til rusksiloina. Minni nøgdir (upp til 200 kg) kunnu vigast á plattavekt. Skrottið verður vigað á veg inn áðrenn avskiping og á veg út aftan á avskiping. Er okkurt at spyrja um, kanst tú gera vart við teg á Endurnýtsluni ella ringja 30 20 40. Jarnburturkastið frá vinnuni verður latið inn á jarnplássið, t.d. stórir jarnlutir so sum bingjur, gravimaskinur og flakalinjur. Eisini verður tikið ímóti bingjum við blandaðum jarnburturkasti so sum billutir og annað tílíkt. Sí reglugerð HER

Endurnýtslan letur pening fyri gamalt jarn og onnur sløg av metallum, t.d. kopar og aluminium. Fyri at skrottið kann bólkast í ávísan vørubólk, skal tað vera sama slag. Eru fleiri sløg blandaði saman (t.d. jarn og aluminium), verður alt skrottið bólkað í bólkin við minsta gjaldinum. Sí prísskrá HER

Tinghúsið á Hjalla
Hevur tú gamlan húsbúnað, lampur ella annað innbúgv, sum tú vilt av við, men sum er ov gott at koyra burtur? So kanst tú lata hetta í bingjuna hjá Dugna. Hervið stuðlar tú arbeiðinum hjá Dugna, hugsar um umhvørvi okkara og minkar um dálkingina.


 Allir lutir verða eftirkannaðir og vaskaðir, áðrenn teir fara inn í handilin.



Peningurin, sum kemur inn fyri søluna, fer til arbeiðið hjá Dugna, ið hjálpir fólki við førleikamenning. Vitja síðu hjá Tinghúsinum á Facebook her.


Avroð og upptøka eftir slakt og veiðu
Kríatúr skulu vera avlíva og sundurlimað, áðrenn tey koma til Kommunalu Brennistøðina á Hjalla. Likamslutir frá kríatúrum skulu ikki viga meiri enn umleið 20 kg fyri at tryggja, at tað verður brent.

Avroð, slakt og fiskaslógv verður latið í bingju “At brenna” á Endurnýtsluni. Tó kann fiskaslógv gravast niður á egnari grund, treytað av, at hetta ikki er til heilsuvanda ella ampa hjá grannum og umhvørvi.
Upplatingartíðir
Endurnýtslan á Hjalla
Mán.-hós. kl. 8-17
Frí. kl. 10-17
Ley. kl. 10-17 (privat burturkast)

Tinghúsið á Hjalla
Mán - frí : kl. 13-17
Ley: kl. 10-14 (síðsta ley. í mðr.)

Endurnýtslan í Kollafirði
Mikudag kl. 17-20
Leygardag kl. 13-17

Jarnplássið á Hjalla
Mán - hós : kl. 08-16
Frí: kl. 10-16

Tyrvingarplássið í Húsahaganum
Mán - hós kl. 08-16
Frí: kl.10-16

Brennistøðin (silohøllin)
Mán - hós kl. 08-16
Frí. kl. 10-16

Endurnýtslan í Nólsoy
Mikudag frá kl. 17 - 20
Leygardag frá kl. 14 - 17
Spurningar
Hevur tú spurningar viðvíkjandi innsavning av gráa posanum ella grønu spannini, kanst tú venda tær til:

IR Lastbilar
Tel. 77 11 50
Ofta settir spurningar
Eg havi ongar ruskposar fingið, hvørji ráð eru til at taka?
Eg havi ongar ruskposar eftir, hvar kann eg fáa fleiri?
Hvussu fáa vit ruskposar, nú vit eru flutt í kommununa?
Vit hava tørv á fleiri posum, tí vit eru so nógv í húsi. Kunnu vit fáa fleiri ruskposar?
Kann eg brúka aðrar posar enn teir frá Tórshavnar kommunu?
Ruskið hjá mær bleiv ikki tikið seinastu viku, hvat skal eg gera til tess at fáa hetta í rættlag?
Eg leigi eitt kamar í kommununi, ber til hjá mær at fáa ruskposar?