Mentanarvirðislønir M. A. Jacobsens

Talan er um tríggjar virðislønir: Fyri fagurbókmentir, yrkisbókmentir og mentanaravrik. Ein nevnd við fimm limum umboðandi býráðið, Fróðskaparsetrið og Rithøvundafelagið, ger av, hvør fær virðislønirnar. Nevndin hevur heimild til at lata færri enn tríggjar virðislønir og eisini onga at lata.

Yvirlit við øll, sum hava fingið mentanarvirðisløn M. A. Jacobsens, sæst her.

Virðislønin varð fyrstu ferð latin í 1958. Tað var Rithøvundafelagið, sum heitti á Tórshavnar býráð um at stovna eina árliga bókmentavirðisløn. Virðislønin skuldi bera navn eftir mentamannin Mads Andrias Jacobsen, ið m.a. var rithøvundur, lærari, bókavørður og borgarstjóri í Havn.

Fyrstu nógvu árini æt virðislønin Bókmentavirðisløn M.A. Jacobsens, og talan var bara um eina virðisløn. Í 1996 varð reglugerðin broytt, soleiðis at 3 virðislønir kundu latast, og navnið varð broytt til Mentanarvirðislønir M.A. Jacobsens.

Virðislønirnar, ið eru 35.000 kr. hvør, verða vanliga handaðar tann 17. september, á føðingardegi Mads Andrias Jacobsens, ella um tað mundið. Mentanarvirðislønir M.A. Jacobsens verða latnar á hvørjum ári. Í ár verða virðislønirnar handaðar í Reinsarínum hósdagin 20. oktober kl. 17.

BarnaMENTANARheiðursløn Tórshavnar býráðs

Barnamentanarheiðursløn Tórshavnar býráðs verður latin sama dag sum Mentanarvirðislønir M.A. Jacobsens. Í ár verður tað hósdagin 20. oktober kl. 17. Í ár verða heiðurslønirnar handaðar í Reinsarínum.

Tvær virðislønir kunnu latast, men nevndin hevur eisini heimild til bert at lata eina ella onga. Virðislønirnar eru 35.000 kr. hvør.

Í nevndini fyri heiðurslønina eru fimm limir, sum umboða býráðið, Býarbókasavnið og skúlabókavørðirnar í kommunalu skúlunum.

Barnamentanarheiðursløn Tórshavnar býráðs varð latin fyrstu ferð í 1976. Tá var heitið Barnabókaheiðursløn.