Eins og fyriskrivað í 10. grein í grindakunngerðini er tað sýslumaðurin, saman við grindaformonnunum, sum hoyra hvalvágni til, ið skulu stíla fyri nær og hvar grindin skal verða hildin til, og hvussu fram skal verða farið við drápinum.
Formannsbátarnir skulu hava flagg uppi og rópara.
Grindin eigur, sambært gomlum siði, at verða løgd still, áðrenn hildið verður til. Skal ferð fáast á grindina, er neyðugt at leggja hana stilla á passandi dýpi uttan fyri eina linju millum Argjahøvda og Eystara mola helst uttan fyri grótkastið á Argjum.
Meðan grindin liggur, sí skjal II, skipa bátar seg eftir boðum frá grindaformonnunum. Teir størru bátarnir og skipini, sum eru hóskilig til sleiping, skulu tá liggja uttast og forða og annars útinna boðini, ið givin verða, sí skjal III, og tí ræður um at lurta eftir boðum á kanal 8 ella gjøgnum rópara.
Bátar, sum koma, aftan á at grindin er løgd still, skulu ansa eftir ikki at órógva grindina. Liggur grindin innarliga, skulu hesir bátar halda seg innan fyri eina linju millum molan og ískaiina. Teir kunnu so koma uppí, tá grindin verður hildin til.
Eingin bátur ella skip má fara inn um formannsbátarnar, uttan at tað er álagt av grindaformanni.
Tá menn á sandinum eru klárir, halda formannsbátarnir grindini til. Eingin grindabátur má tá vera so nær formannsbátunum, at hesir ikki óhindraðir kunna snara í bæði borð og harvið óhindraðir halda grindini til.
Mint verður á, at ikki er loyvt at høgga og skera á háls úr báti, fyrr enn grinda¬formenninir hava givið boð, og at hesi boð ikki skulu gevast, fyrr enn eingi útlit eru fyri, at grindamenninir á sandinum fáa hendur á hvalirnar.
Brot móti boðum og forboðum koma undir bót vísandi til 27. grein.
Teir bátar, ið bróta boð frá grindaformonnunum ella sýslumanninum, og sum fáa skaða av teirri orsøk, skulu ikki rokna við at fáa endurgjald fyri skaða.
|