Skipan av grindadrápi í Havn

Sýslumaðurin hevur grindadráp um hendi. Uppgávan hjá fyrisitingini er at samstarva við sýslumannin og grindaformenninar um mannagongdir og at skipa grindadrápið.


Grindaboð
Sýslumaðurin, Snarskivan, grindaformenninir, álitisgrindamenninir fáa grindaboðini sum skjótast soleiðis, at drápið kann verða so væl skipað, sum til ber.

Tá ið sýslumaðurin fær grindaboðini, boðar hann í arbeiðstíð Snarskivuni frá og aftaná arbeiðstíð sløkkiliðsstøðini frá, og syrgja tey fyri, at boðini verða givin víðari sum skjótast.

Fyrireiking á sandinum
Grindaformaður á sandinum stílar - saman við álitisgrindamonnum og sløkkiliðsmonnum - fyri girðing og at fólk halda seg uttan fyri hesa og ansar eftir, at kvirt er á sandinum og gevur boð um, nær tíð er at fara oman á sandin at skera á háls. Endi við endurskinum verður spentur fram við landinum undir sjúkrahúsinum, har steinar liggja.

Nakrir av álitisgrindamonnunum eru í froskmannabúna og hjálpa til við at seta á hvalir, tá ið sleipað verður.
Grindaformenn
Tiltaksgrindaformenn
Álitisgrindamenn á sandinum
Ferðslan
Løgreglan ansar eftir, at ferðslan kann ganga, sum hon skal fyrst og fremst eftir landssjúkrahúsvegnum, men eisini eftir øðrum vegum har um leið, har fólk seta bilar frá sær og/ella steðga á at hyggja.

Grindarakstur
Fyri ikki at pøsa grindina, og fyri at grindin skal vera so góður matur, sum gjørligt, er umráðandi ikki at reka hana ov harðliga. Tað er týdningarmikið fyri drápið at spekja grindina við so spakiligum og hóvligum rakstri, sum til ber og bert at brúka ekkolodd, astikk og annað eftir boðum frá grindaformonnunum, men annars eiga allir grindabátar at hava fastakast.

Tilmeldingin á sandinum
Grindamenn á sandinum melda seg til hjá uppskrivarum, sum eru í vesti við áskrift “uppskrivari”.

Fyri at vissa seg um, at tú er skrivaður upp, verða grindamenn bidnir um at stilla seg í røð við uppskrivararnar.

Tá tilmeldingin er liðug, skulu uppskrivararnir alt fyri eitt, uttan drál, flýggja sýslumanninum listarnar til drápspart. Tá uppskrivingin er um at vera liðug, eigur ein av uppskrivarunum at fara til sýslumannin við listum fyri at fáa gongd á skrivingina og fyri at gera sítt til, at seðlarnir kunnu koma skjótt út.

Uppskrivararnir hjálpa skrivifólkunum at lesa nøvnini.

Sleip
Grindaformenninir biðja sum vant egnaðar bátar at taka sær av sleipi, men knípir við luttøku, verður álagt bátum at sleipa, áðrenn teir verða skrivaðir upp.

Fyri at fáa bátarnar skjótt út aftur frá kaiini, eru stroppar klárir, tá tikið verður ímóti hvalunum. Flaki liggur við kaiina, har menn hjálpa at taka ímóti. Hivast má ikki við togi ella neilonendum.
Grindin kemur til drepning
Drápið
At melda bát til
Tilmeldingin fer fram umborð á Pressaranum ella øðrum egnaðum báti, sum liggur við vestaru boyuna uttan fyri oljutangarnar. Eru líkindini ikki til vildar, liggur hann á øðrum hóskandi plássi longri inni.

Tilmeldingin byrjar eftir boðum frá grindaformonnunum. Tilmeldað verður við bæði borð, bátarnir skulu tí koma í tveimum røðum vestanífrá. 3 mans, sum eru í vesti við áskrift “uppskrivari” skriva upp.

Bátar verða uppskrivaðir við havnakenningarmerki, navni, bátastødd, bátaánara og tali av grindamonnum. Í grindareglugerðini § 3, stk. 3, stendur “Bátur, sum fer í grind, skal vera merktur við havnakenningartekni”. Bátur uttan havnakenningartekin skal venda sær til sýslumannin.

Tá tilmeldingin er liðug, skulu uppskrivararnir uttan drál flýggja sýslumanninum listarnar til drápspart og medvirka til, at seðlarnir koma skjótt út. Uppskrivararnir hjálpa skrivifólkunum at lesa bátanumrini/bátanøvnini.

Vakt, uppfisking og skipan av kaiøki o.a.
Grindaformaður setir vaktarmenn/hjálparfólk, sum eru í vesti við áskrift “hjálparfólk”, tá tað sæst, at grindin er komin í Sandagerði.

Av trygdar- og reinførisávum sperra vaktarmenninir av fyri óviðkomandi, spula, áðrenn hvalirnir verða heysaðir og spula av og á, meðan koyrt verður við trukkunum. Hvalirnir eiga ikki at leggjast ov tætt.

Vaktarmenninir opna allar hvalirnar, so teir ikki spillast. Eru stundir til tess, taka teir innanúr, so hvalirnir kølna skjótari, og grindin verður so góður matur sum til ber.

Merking
Grindaformaður stílar fyri merking í raðfylgju og skundar undir hana sum mest, um neyðugt við eyka fólki. Umráðandi er at flýggja sýslumanninum seðlarnar sum skjótast.

Seðlar
Seðlarnir koma út hjá Magn á Vestaru Bryggju.
Grindabátar
Havnakenningartekin er ein fortreyt fyri at fara í grind. Hetta fæst ókeypis við at venda sær til:

Føroya Skipaskráseting
Sigmundargøta 13
Postboks 264
110 Tórshavn
tel 35 60 10
Fráboðan um grindaskaða
Grindaskaði á bát, t.e. skaði á bát, sum eftir boðum frá grindaformanni hevur tikið lut í sjálvum drápinum, skal fráboðast grindaformanni beinan vegin, drápið er av, og bátar hava útinnt tað, ið sýslumaður og/ella grindaformenn hava givið boð um, men innan uppskriving av bátum.

Skaðasýnismaðurin sýnir skaðan sum skjótast.

Skaði á landi skal somuleiðis fráboðast skaðasýnismanninum. Boð um skaða á landi kunnu eisini latast grindaformanni. Skaðasýnismaðurin er altíð at hitta á býráðsskrivstovuni hálvan tíma, áðrenn seðlarnir koma út.