Á øðrum sinni letur Tórshavnar kommuna eina serliga umhvørvisvirðisløn í sambandi við umhvørvisvikuna, sum verður 10. til 16. mai 2010. Virðislønin verður latin onkrum, ið hevur gjørt okkurt serligt fyri umhvørvið. Freistin at innstilla fólk er 1. mai.
Umhvørvisviðurslønin, sum er áljóðandi 10.000 krónur, kann latast einum stovni, virki, felagi, bólki ella einstaklingi í Tórshavnar kommunu.
Hugsanin er, at fólk skulu innstilla onkran, tey halda hava uppiborið eitt herðaklapp fyri okkurt gott umhvørvisarbeiði ella -átak, og eisini ber til at innstilla seg sjálvan til virðislønina.
Nógvar orsøkir kunnu vera til eina innstilling, so sum orkusparandi tiltøk, varandi orka, skiljing av burturkasti, endurnýtsla, kunning um umhvørvisvernd, dálkingarfyribyrgjandi átøk, vistfrøðilig átøk, umhvørvisvinarlig ferðsla og mangt annað.
Bert hugflogið setur markið, tí øll eru vælkomin at venda sær til Tórshavnar kommunu við innstillingum til Umhvørvisvirðislønina, tí jú fleiri eru at velja ímillum, jú betur er.
Oyðublað til innstillingina kann takast niður her ella ber til at venda sær til Snarskivuna, telefon 30 20 10. Innstillingarnar skulu vera Tórshavnar kommunu í hendi í seinasta lagi 1. mai og skulu sendast til Tórshavnar kommunu, Heilsu- og umhvørvisdeildin, postboks 32, 110 Tórshavn.
|