23. juni 2017
Fegnast um kanning av bústaðatørvinum
- Vit í Tórshavnar kommunu fegnast um, at løgmaður nú er frammi við ætlanum um at gera eina veruliga kanning av bústaðatørvinum í Føroyum. Ásannandi, at tørvurin er størstur í høvuðsstaðarøkinum, so ynskja vit sjálvsagt tætt samstarv á hesum øki, sigur Annika Olsen, borgarstjóri.

- Sera nógv virksemi er á bústaðarmarknaðinum í høvuðsstaðnum í løtuni. Lestraríbúðir eru nú um at verða lidnar í Kommunuskúlanum, eins og eldraíbúðir verða bygdar saman við Bústøðum. Harumframt fara privat nú undir at byggja stórt tal av lestraríbúðum.

- Risastóra kombineraða vinnu- og bústaðaútbyggingin við Karlamagnusarbreyt í Hoyvík fer at nøkta ein stóran part av tørvinum á íbúðum. Har er stór bygging í gongd, og tilsamans verða yvir 300 fjølbroyttar íbúðir í økinum. Her byggja Bústaðir eisini íbúðir til fólk við serligum tørvi.

- Omanfyri Rólantsgøtu hevur kommunan selt 12 grundstykki. Á Argjahamri verða gjørd 100 grundøki byggiklár, sum øll eru seld. Á 24 stykkjum Oman Gil verður nú bygt. Og vit hava júst samtykt at selja um 100 grundøki í Dalinum Langa í Hoyvík. Tað, sum vit higartil kenna til hesa bústaðabygging er, at hon er sera fjølbroytt, frá sethúsum og raðhúsum til stórar og smáar íbúðir.

- Umframt hetta verða fleiri bæði kommunalar og privatar útstykkingar framdar. Ein leyslig meting vísir, at verða allar byggiætlanir framdar, sum bíða eftir góðkenning, ella hava fingið loyvi, so verða 11 til 1200 búeindir aftrat tøkar í Havn innanfyri trý ár.

- Men fyri ein part av borgarunum verður prísurin altíð ein trupulleiki. Um talan verður um at byggja heilt bíligar ella sosialar íbúðir, so má hetta gerast í samstarvi millum tað almenna, kommununa og eitt nú verka- og tryggingarfeløg.

- Vit ásanna, at tørvurin er størstur í høvuðsstaðarøkinum, og tí fara vit at taka stig til at bjóða løgmanni og landsstýriskvinnuni í almannamálum til fundar, nú løgmaður hevur boðað frá eini tørvskanning. Vit vilja samstarva fult út um at loysa tann tørv, sum kanningin fer at vísa, sigur Annika Olsen, borgarstjóri.