Búmerkið


Búmerkið er talið 100, ið er aldurin, sum fólkavalda Tórshavnar kommuna kann hátíðarhalda í 2009.

Fyrri rundingur er sjónarringurin og alt tað, sum sjónligt er. Seinni rundingur er víðkaði sjónarringurin, heimsfevnandi sjónarvinkulin, ið grípur framtíðina.

Reyða og bláa litin kenna vit úr kortum, ímyndandi hav og land. Somu litir, reytt, blátt og hvítt, kenna vit úr tjóðskaparligu flagglitunum, men eisini í búmerkinum hjá Tórshavnar kommunu, ið er hamari Tórs.

Reyði liturin bendir á vøkstur og framgongd, men eisini passjón og útferðarhug, meðan blái liturin stendur fyri ró og dýpd.

Lesa vit búmerkið frá vinstru mót høgru, síggja vit fyrst talið hundrað, men eisini hamara Tórs, almenna búmerkið hjá Tórshavnar kommunu.

Hamarin er reyður og høggur í bláu rundingarnar, ið til samans eru talið hundrað.

Vit kunnu eisini skoða hamara Tórs úr erva og lata hann skera út í bláa havið við Havnina.

Vit kunnu fara enn nærri og síggja at reyði hamarin er býurin og hvíta nevið er gamla Havnin – Tinganes – ið rakar út í bláu vágna og skilir vøtnini.

Vit kunnu verða enn málvísari og siga, at reyði hamarin er pílurin, ið peikar fram og ber boð um, at her er vøkstur, framgongd og trivnaður.

Samstundis er hamarin, ella reyði pílurin, bundin at havinum, sum í øldir hevur verið inn- og útgongdin í Havnini.

Bláa havið fyllir nógv hjá fólki í Tórshavnar kommunu. Flestu hava útsýni yvir fjørðin og síggja lættliga fyri sær mánan yvir Nólsoyarfjørð, sum vit syngja og siga søgur um.
Søguligt baksýni
Við danskari ríkisdagslóg frá 1866 gjørdist Havnin fyrsta kommunan í Føroyum. Millum teir seks stýrislimirnar var fútin, ið hevði fastan sess. Les meira