Leysgangandi djór og kríatúr

Um tú eigur kettu, er tað umráðandi, at kettan er í hálsbandi. Kettur, sum ikki hava hálsband og spjaldur, tatovering ella mikrochip, verða avlívaðar beinavegin, tá tær verða tiknar upp av løgregluni.

Um tú ber eyga við leysgangandi kettu við ongum hálsbandi, skalt tú boða kommununi frá.

boða frá kettu

Hevur tú hund, skalt tú syrgja fyri, at hundurin hevur hálsband og spjaldur frá tí, hann er 4 mánaðir gamal. Á spjaldrinum skal standa navn og bústað hjá eigara.

Fyri at halda býin reinan heita vit á teg um at brúka serligan posa til hundalortar. Posarnir verða útflýggjaðir í Snarskivuni og eru eisini at fáa í serligum stativum í fríøkjum, m.a. í Havnardali, Svartafossi og Sandagerði. Posarnir fáast eisini til keyps í handlunum.

Harafturat mást tú syrgja fyri, at hundurin ikki gongur leysur. Um hundurin gongur leysur og verður tikin upp av løgregluni, fært tú álagt eina bót, sum skal gjaldast, tá ið tú kemur eftir hundinum.

Er hundurin ikki heintaður innan 3 dagar eftir upptøku, verður hundurin avlívaður ella avhendur. Tú kanst kunna teg nærri um hundalógina niðanfyri.

Løgtingslóg um hundar (logir.fo)

Upptikin leysgangandi seyður verður seldur á uppboði eftir 8 dagar, meðan ross verða seld eftir 14 dagar. Hetta sambært girðingarlógini. Tú kanst kunna teg nærri um lógina her:

Girðingarlógin (logir.fo)

Dunnur, hønur og gæs mugu ikki ganga leys í tættbygdum øki. Hetta er serliga við atliti at ferðslutrygd og galdandi lógum um girðingar. Um dunnur, hønur ella gæs verða upptikin av løgregluni, verða tey seld á uppboði eftir 8 dagar.

Um tú ber eyga við leysgangandi dunnur, hønur ella gæs, kanst tú preia okkum. Tú kanst harafturat venda tær til Djóraverndarfelagið.

boða frá hønum, gásum og dunnum

Leiðbeining um leysgangandi djór (umsitin av Djóraverndarfelagnum)

Um tú ber eyga við deyðum djóri á almennum øki, eitt nú á vegi, skalt tú boða kommununi frá.

boða frá deyðum djóri á almennum øki