Býlingshúsið millum Gilja

Millum Gilja
188 Hoyvík
Tel. 21 74 96

Dagstovnaleiðari: Katrin Helgadóttir
Tel. 21 74 96
katrinhe@torshavn.fo

Lurta

Býlingshúsið millum Gilja

Býlingshúsið millum Gilja hevur pláss fyri 47 børnum í aldrinum 0-6 ár. Hesi ganga á trimum ymiskum stovum. Tær eru vøggustovan Reiðrið og barnagarðsstovurnar Látrið og Rókin. Á stovninum starvast seks námsfrøðingar og seks hjálparfólk.

Børnini hava sera góðar karmar at mennast og læra bæði uttandura og innandura. Vit hava eitt innandura øki, har vit millum annað hava eitt kveikjandi ítrivsrúm, har børnini kunnu mála og skapa ymiskar lutir. Og vit hava eitt uttanduraøki við spæliplássi við sandkassa, leikum, reiggju, súkklum og klatritorni. Vit leggja stóran dent á, at økið er opið, so øll børnini sleppa at ferðast frítt runt og spæla har, sum tey vilja.

Eisini vitja vit javnan vøkru økini við Svartafoss, Hoydalsánna, Villingadalin og hugtakandi djóraøkið hjá Petur Noll, sum øll liggja stutta leið frá stovninum.    

Harumframt er gott busssamband til og frá stovninum, og ókeypis busskoyringina brúka vit ofta til túrar oman í Býarbókasavnið, Grasagarð og aðrar túrar runt í býnum.



Um Býlingshúsið millum Gilja
Upplatingartíðir

Mánadag til fríggjadag frá kl. 7.30 til kl. 17.

Samband

Dagstovnaleiðari

Katrin Helgadóttir
Tel. 21 74 96
katrinhe@torshavn.fo

Reiðrið

Tel. 25 08 43

Látrið

Tel. 25 08 41

Rókin

Tel. 25 08 55

Afturlatingardagar í 2022
  • Allar vanligar halgidagar og serstakar merkisdagar – stovnurin stongdur
  • Skírhósdag til 2. páskadag 14. – 18. apríl – stovnurin stongdur
  • Flaggdagin 25. apríl – stovnurin stongdur
  • Dýra biðidag 13. mai – stovnurin stongdur
  • Kristi himmalsferðardag 26. mai – stovnurin stongdur
  • Grundlógardag 5. juni ­– stovnurin stongdur frá kl. 12
  • Summarfrítíð vika 29, 30 og 31 – møguleiki fyri at melda til samanlagt virksemi
  • Ólavsøkuaftan 28. juli – stovnurin opin til kl. 12
  • Ólavsøkudag 29. juli – stovnurin stongdur
  • Jólafrítíð 24. desember 2022 – 1. januar 2023 – stovnurin stongdur
  • Stovnurin hevur tveir ráðleggingardagar um árið. Hesar báðar dagar er stovnurin stongdur. Tað er ymiskt, nær ráðleggingardagarnir eru, men foreldur fáa boð í seinasta lagi seks vikur frammanundan

SAMANLAGT VIRKSEMI

Samanlagt virksemi vil siga, at dagstovnarnir í Tórshavnar kommunu leggja sítt virksemi saman, soleiðis at ein dagstovnur er opin í frítíðartíðini.

Hevur tú tørv á tí, kann títt barn sostatt fáa pláss í samanlagda virkseminum í summarfrítíðini, tá stovnarnir annars eru stongdir.

FREISTIR AT BIÐJA UM PLÁSS Í SAMANLØGDUM VIRKSEMI:

Summarfrítíð 2022: 1. juni 2022

Gev gætur, at heldur tú ikki freistina, kunnu vit ikki tryggja tínum barni pláss í samanlagda virkseminum.

Hevur tú tørv á plássi í samanløgdum virksemi, kanst tú kunna teg nærri og søkja her:

Samanlagt virksemi í frítíðarskeiðum

Vitja okkum

Tað er ein stór avgerð at velja stovn til sítt barn, og tískil eru tit altíð vælkomin at vitja okkum.

Ring til Katrin á tel. 21 74 96 ella send ein teldupost til katrinhe@torshavn.fo fyri at avtala eina vitjan.

Matur og drekka

Vit meta tað vera okkara ábyrgd, saman við foreldrunum, at stuðla børnunum at hava góðar kostvanar. Børnini skulu hava matpakka við hvønn dag, og vit ynskja, at matpakkin inniheldur heilsugóðan og mettandi mat.

Vit bjóða øllum børnunum mjólk og millummála á stovninum. Vit hava eina fasta matarætlan fyri hvønn mánaða. Til millummála hava vit til dømis heimabakað breyð ella bollar, suppu ella rugbreyð við viðskera.

Vit brúka boðtalvuna í gongini til at boða frá um serligar dagar, tá børnini ikki skulu hava matpakka við.

Í samband við føðingardagar sleppa børnini at bjóða góðgæti, kaku og annað søtt.

Trygdarskeið

Vit skipa javnan fyri trygdarskeiðum til starvsfólk okkara. Vit høvdu skeið bæði í 2018 og 2019. Fyrstuhjálparskeiðið og brandskeiðið verður endurnýggjað í 2020, tá Korona loyvir tí.

Foreldraráð

Vit skipa foreldraráðið fyri at styrkja trivnaðin og sambandið millum starvsfólk, heim, foreldur og børn á stovninum.

Sum limur í foreldraráðnum kanst tú gera títt fyri, at stovnurin er eitt gott stað at vera. Tú fært ávirkan og innlit í gerandisdagin á stovninum og í námsfrøðiliga leistin. Sum limur í foreldraráðnum ert tú eisini hugskotsgevi og ert við til at kjakast um menningina og átøk á stovninum.

Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Sí á korti

Námsfrøðiligur leistur
Soleiðis arbeiða vit

Gerandisdagurin

Gerandisdagurin hjá okkum er ein blandingur av skipaðum ítrivi, rutinum, spontaniteti og nógvum spæli.

Allar tríggjar stovurnar hava samling kl. 9.30 við sangi ella søgum og eini lýsing av degnum.

Síðani fara stovurnar í gongd við tað, sum tær hava lagt til rættis fyri dagin. Hetta kann til dømis vera túrar, skapandi ítriv, spæl úti í barðinum, innandura ítriv ella frítt spæl.

Børnini eta síðan matpakka. Børnini á øllum stovum sita til borðs við 4-5 øðrum børnum og einum vaksnum. Hetta er ein hugnalig løta, har nógv gott prát kemur burturúr.

Aftan á matpakka fara tey yngstu børnini út í vognin at sova. Hini fara út at spæla.

Vit bjóða millummála umleið kl. 14.

Hvønn fríggjadag hava vit felags samling, har vit syngja og spæla sangspøl. Stovurnar skiftast um at skipa fyri hesi løtuni.

NÁMSFRØÐILIGA ARBEIÐIÐ

Okkara arbeiði tekur støði í dagstovnalógini og námsfrøðiligu stevnumiðunum hjá Mentamálaráðnum. Hesi áseta endamálið við virkseminum á stovninum, og vit nýta hesi til at gera námsætlanir til teir ymisku aldursbólkarnar; 0-3 ár, 3-5 ár og 6 ár.

Námsætlanirnar og arbeiðið sum heild er grundað á menningina hjá einstaka barninum. Nøkur hugtøk, ið hava nógv at siga í okkara arbeiði, eru:

  • Relatiónir - Hetta er fortreytin fyri at menna børnini. Hjá okkum er tað tann vaksni, ið hevur ábyrgdina av at skapa eina jaliga og tætta relatión til barnið. Vit leggja stóran dent á at møta barninum, har tað er í síni menning. Vit stuðla barninum í at skapa relatiónir við onnur børn við at hjálpa teimum í spælinum og vísa á møguleikar at loysa møguligar tvístøður
  • Viðávirkan - Tað er umráðandi fyri okkum, at barnið hava ávirkan á sín gerandisdag, tí fleiri teirra eru á stovni í fleiri tímar hvønn dag. Hetta kemur til sjóndar við at vit, so vítt gjørligt, ganga teirra áhugamálum og ynskjum á møti, til dømis, um onkur vil eta matpakka uttanfyri, ella um onkur ikki hevur hug at fara við á túr
  • Ymiskleiki - Vit síggja ymiskleikan hjá børnum og vaksnum sum eina styrki, ið er við til at menna okkara fatan av hvørjum øðrum. Hetta meta vit vera við til at skapa ein meira fjøltáttaðan felagsskap, har vit læra av hvørjum øðrum og mennast
  • Nærvera - Tað er umráðandi, at starvsfólkini eru nærverandi saman við børnunum, so barnið merkir, at tann vaksni er áhugaður í tí, og at barnið altíð veit, at ein vaksin er har. Nærveran er grundarlagið fyri at skapa relatiónina til barnið
  • Gjøgnumskygni - Vit vilja, at námsfrøðiliga arbeiðið skal vera skilligt, og at foreldrini altíð skilja, hví vit arbeiða, sum vit gera

Stovnurin er lítil, og hetta eyðkennir og styrkir barnafelagsskapin. Børnini hava atgongd til hvønn annan og hava lætt við at spæla saman í blandaðum aldursbólkum.

Vit meta, at tað er í spælinum, at børnini mennast og læra. Tískil eru vit upptikin av spælinum og áhugamálunum hjá børnunum. Vit innrætta rúmini eftir teirra tørvum við at skapa smá læringsrúm. Hetta meta vit vera umráðandi fyri, at børnini sleppa at "folda seg út".

Vit hava eitt tætt og gott samstarv við Barna- og ungdómsdeildina hjá Tórshavnar Kommunu og við Sernám.

TILTØK

Vit skipa fyri ymiskum tiltøkum í gjøgnum árið, millum annað jólahaldi, føstulávint, garðdegi og sirkus. Vit boða foreldrunum frá í góðari tíð frammanundan.

FORELDRASAMSTARV

Vit leggja stóran dent á at hava eitt opið og mennandi samstarv við foreldrini. Vit bjóða foreldrunum foreldraviðtalur eina ferð um árið, og vit leggja upp til, at foreldrini práta við starvsfólkið ella leiðaran um okkurt er áfatt, ella um tey eru stúrin um eitthvørt.

Hvørji eru vit?

Vit eru 12 starvsfólk, seks námsfrøðingar og seks hjálparfólk, ið dagliga starvast í Býlingshúsinum millum Gilja.

Starvsfólkahópurin er væl blandaður og hevur nógva vitan, royndir og resursur sínamillum. Hetta er ein styrki í arbeiðinum við børnunum og skapar gott grundarlag fyri samstarvi og vitanarskifti, sum eru týðandi amboð í okkara arbeiði.

Vit hava starvsfólkafund hvønn mánaða. Tá taka vit ymisk evni upp til námsfrøðiligt kjak og undran. Hetta stuðlar upp undir, at starvsfólkini koma tættari at hvørjum øðrum og hava lættari við at skilja hvønn annan og egnu praksis.

ForeldraGluggin
Hvat er ForeldraGluggin?

ForeldraGluggin er ein ókeypis app til snildfon, sum tú kanst brúka, um tú ert foreldur at dagstovnabarni í Tórshavnar kommunu.

Tænastan fevnir um dagstovnarnar og frítíðarskúlarnar í kommununi og verður brúkt til samskifti millum foreldur og dagstovn. Í ForeldraGlugganum kallar stovnurin til dømis inn til foreldraviðtalur og kunnar um gerandisdagin, og tað er somuleiðis her, tú boðar frá feriu:

  • foreldur kunnu fylgja við í gerandisdegnum hjá børnunum
  • foreldur kunnu skráseta frí og frítíð hjá barninum
  • foreldur og stovnur kunnu senda boð sínámillum
  • stovnurin kann skjótt og lætt kalla inn til foreldraviðtalur og tiltøk
  • foreldur fáa trygga atgongd til myndir og filmsbrot av barninum

Appin er royndarkoyrd á úrvaldum stovnum, og nú verður fyrsta verkætlanarstig so líðandi sett í verk á øllum dagstovnum í kommununi.

Hví brúka vit ForeldraGluggan?

So hvørt sum Føroyar vórðu raktar av Covid-19 aldunum í fjør, gjørdist tað kommununi greitt, at okkum tørvar ein skjótan og tryggan samskiftisfarveg, sum er felags fyri alt dagstovnaøkið: boðini og tilmælini til foreldur vóru mong, og tey broyttust ofta. Talan var eisini mangan um bráðfeingisboð, ið vóru umráðandi at fáa skjótt út til øll foreldur.

Harafturat kom nýggja dátuverndarlógin í gildi í januar 2021, og sambært henni eiga vit øll at tryggja okkum, at persónsupplýsingar og myndir verða handfarnar á so tryggan hátt sum gjørligt.


Tín persónligi gluggi

ForeldraGluggin verður tó ikki bara settur í verk fyri at geva stovnum ein farveg til bráðfeingisboð og tilmæli til foreldur. ForeldraGluggin er eisini partur av talgildingarætlanini hjá kommununi, sum millum annað hevur til endamáls at hækka kommunala tænastustøðið. Ítøkiliga er ForeldraGluggin, soleiðis sum orðið leggur upp til, ein lættur snarvegur hjá tær, sum ynskir at fáa skjótt og ómakaleyst innlit í gerandisdagin hjá tínum barni.

Tað er ein kend avbjóðing millum foreldur, at tað kann vera trupult at fáa rættiligt innlit í tann ofta stóra partin av gerandisdegnum, børnini eru á stovni. Børnini eru ikki altíð før fyri sjálvi at velja úr rúgvuni av upplivingum og greiða frá hendingunum í einum degi á stovni. Og foreldur hava viðhvørt knappa tíð at tosa og hyggja at myndum, tá tey koma eftir børnum sínum.

Higartil hava dagstovnar havt boðtalvur, facebookbólkar og teldur við myndum í gongini fyri at kunna foreldur um virksemið á stovninum. Dagstovnarnir hava eisini brúkt gott gamalt munnligt samskifti. ForeldraGluggin kemur ikki í staðin fyri munnliga samskiftið, men letur upp fyri fleiri miðvísum samskiftismøguleikum, soleiðis at tú sum foreldur hevur lætta atgongd til mangt av tí í gerandisdegnum, sum tú og barnið kunnu hava gagn av at tosa um.

Taka vit hesa skipanina til okkum og læra okkum at brúka hana miðvíst, so bæði skipar og tryggjar hon samskiftið fyri okkum og kann samstundis vera við til at tryggja trivnaðin og sambandið millum foreldur og barn.

Hvussu stovni eg ForeldraGluggan?

Soleiðis gert tú, um tú frammanundan hevur skrásett fartelefon og teldupost í BARN-skipanini

Hevur tú frammanundan skrásett títt fartelefonnummar og tín teldupostbústað í BARN-skipanini, kann stovnsleiðarin senda tær ein teldupost við einum leinki, tá ið barnið byrjar á stovninum.

Í teldupostinum stendur:

»Góði brúkari av ForeldraGlugganum

Fyri at kunna rita inn á ForeldraGluggan, skalt tú stovna brúkaranavn og loyniorð. Trýst á leinkið og vel brúkaranavn og loyniorð«

Tá ið tú trýstir á leinkið í teldupostinum og ritar inn, fært tú eina QR-kotu, sum tú skannar við snildfonini. So verður ForeldraGluggin tikin niður á tína telefon.

Tá tú hevur gjørt hetta, kanst tú fara til stig 4 í vegleiðingini niðanfyri.

Fært tú ikki ein teldupost sendandi, mást tú sjálv stovna teg sum brúkara. Tað gert tú við at fylgja stig 1-3 í vegleiðingini niðanfyri.

Soleiðis gert tú, um tú ikki hevur skrásett fartelefon og teldupost í BARN-skipanini, ella um tú ikki fært teldupost frá stovninum

1. Stovna teg sum brúkara

Fært tú ikki ein teldupost sendandi við einari QR-kotu, mást tú sjálv stovna teg sum brúkara fyri at brúka ForeldraGluggan. Tað gert tú í bókingarskipanini BARN. Tað tekur áleið ein minutt at stovna seg sum brúkara.

Tú ritar inn í bókingarskipanina BARN við tínum Samleika. Hevur tú ikki fingið tær Samleikan, kanst tú bíleggja tær hann á heimasíðuni hjá Samleikanum. Tú ritar inn í bókingarskipanina BARN her:

RITA INN Í BARN-SKIPANINA

Fá tær Samleikan (samleikin.fo)

Tá tú hevur ritað inn í BARN-skipanina, skalt tú trýsta á spjaldrið við tínum egna navni. Hevur tú foreldramyndugleikan yvir barninum, eigur tú at síggja teigin »Stovna ForeldraGluggan« í høgra bredda niðanfyri á síðuni:

Her skalt tú:

  • velja eitt brúkaranavn
  • velja eitt loyniorð
  • upplýsa títt fartelefonnummar, sum verður brúkt, tá tú tekur appina í nýtslu fyrstu ferð

2. Tak appina niður á snildfonina

Far inn á App Store (um tú hevur iPhone) ella GooglePlay (um tú hevur Android) og leita eftir »ForeldraGluggin«. Tak síðan appina niður.

3. Skriva brúkaranavn og loyniorð

Tá ið tú hevur tikið appina niður, trýstir tú á appina fyri at lata hana upp. Nú verður tú biðin um at skriva brúkaranavnið og loyniorðið, tú valdi tær í BARN-skipanini.

Tá tú hevur tøppað brúkaranavnið og loyniorðið inn, fært tú eini SMS-boð sendandi við einum trygdartali, sum tú skalt tøppa inn.

SMS-boðini við trygdartali verða bara send fyrstu ferðina, tú ritar inn - aftaná hetta tørvar tær bara at nýta brúkaranavnið og loyniorðið, tú valdi tær í BARN-skipanini.

4. Vel títt barn í appini og fyll kartotekskortið út

Hevur tú fleiri børn á stovni, sært tú byrjanarstavirnar hjá hvørjum barni í appini. Tú kemur inn á einstaka barnið við at trýsta á runda ikonið við byrjanarstavunum í.

Nú trýstir tú niðast høgrumegin á ikonið »Meira«.


Síðan trýstir tú á »kartotekskort« næstniðast í valmyndini.


Her svarar tú spurningum um títt barn og velur, hvørji loyvi tú vilt lata. Gev gætur, at hesar upplýsingarnar eru neyðugar fyri at skipanin riggar og handfer upplýsingarnar rætt.

Á kartotekskortinum kanst tú velja, um tú vilt lata stovninum ymiskar fulltrúir ella ikki. Tað eru fulltrúir til:

  • at fara útferðir
  • svimja undir námsfrøðiligum eftirliti
  • at barnið kann koyrast í privatbili, lógliga íbundið trygdarbelti
  • at barnið, sambært munnligari avtalu, kann avheintast av øðrum

Somuleiðis kanst tú geva fulltrúir til myndir og video alt eftir, hvat tú ynskir. Tú kanst velja, um:

  • øll foreldur at børnum á stovuni hjá barninum skulu kunna síggja myndir og filmar av tínum barni
  • øll foreldur at børnum á stovninum hjá barninum skulu kunnu síggja myndir og filmar av tínum barni
  • myndir og filmar av barninum skulu kunna vísast á almennu heimasíðuni hjá stovninum

Aðrar upplýsingar skulu eisini gevast, um serlig viðurskifti og atlit skulu takast til sjúkur, kost, lívsneyðugan heilivág og ovurviðkvæmi.

Somuleiðis verður tú biðin um at upplýsa:

  • tryggingar
  • kunning um barnið
  • kunning um familjuna
Soleiðis fært tú appina á føroyskum

Tú kanst velja at brúka appina á føroyskum. Ynskir tú tað, skalt tú fara til »generelt« í stillingunum á sjálvari telefonini, velja »Sprog og område« og velja »føroyskt« sum mál.

Tú mást somuleiðis ansa eftir, at føroyskt eisini stendur ovast undir »foretrukken sprogrækkefølge« í yvirskipaðu stillingunum.

Soleiðis boðar tú frá frí og frítíð

Fyri at kunna leggja arbeiðið til rættis á stovnunum, ynskja vit, at tú boðar frá, nær barnið heldur frí. Hesum boðar tú frá í ForeldraGlugganum.

Soleiðis boðar tú frá:

1. Lat ForeldraGluggan upp og rita inn

2. Trýst á »meira« niðast í høgra horni


3. trýst á »Frí og frítíð«


4. syrg fyri at swipe-knøtturin ovast er grønur


5. Vel fyrsta og seinasta dag í álmanakkanum og trýst á flugubeinið ovast í høgra horni

So er frítíðin skrásett. Hevur tú eina viðmerking til tína fráboðan, kanst tú skriva hana í teigin niðast. Minst til at trýsta á flugubeinið, tá tú ert liðug.

Hvar samskifta vit um hvat?

UPPSLØG

Í uppsløgunum finnur tú kunning um gerandisdagin á stovninum. Tað kunnu vera lýsingar av námsfrøðiliga gerandisdegnum, tiltøk ella ítriv, sum fara fram í nærmastu framtíð, áheitanir um at hava regnklæðir við og tílíkt. Tað ber ikki til at gera viðmerkingar til uppsløg.


BOÐ

Undir Boð sært tú samskiftið við ein ella fleiri úrvaldar móttakarar. Her hevur tú møguleika fyri at svara boðunum. Tað kann til dømis vera eini boð, har starvsfólkini ynskja at gera avtalu um eina foreldraviðtalu, ella tað kann vera eini boð við einum stuttum spurningi.

Tá tú sendir eini boð til starvsfólkini á dagstovninum, verða boðini send til felags postkassan hjá stovninum. Øll viðkomandi starvsfólk eru knýtt at hesum postkassanum, og tey kunnu sostatt svara tínum boðum.

Tað ber ikki til at senda boð til onnur foreldur á stovninum.


ÁLMANAKKI

Í álmanakkanum sært tú millum annað tiltøkini á stovninum, til dømis foreldrafundir, jólahald, páskahald og tílíkt. Her sært tú eisini, um tú ert boðin til foreldraviðtalu.


MYNDASAVN

Í myndaskjáttuni sært tú allar tær mappur og myndir, sum eru deild við teg. Í mappuni »Myndir av tær og tínum børnum« verða allar myndir og øll filmsbrot savnað, sum hava títt barn frámerkt á teimum.

Eg síggi ikki mítt barn í ForeldraGlugganum

Títt barn verður stovnað sjálvvirkið í ForeldraGlugganum við upplýsingum úr fólkayvirlitinum. Sostatt eru tað bara foreldur við foreldramyndugleika, sum síggja upplýsingar um barnið.

Sært tú ikki barnið í ForeldraGlugganum kanst tú:

  • spyrja stovnin, um barnið er skrásett í einari stovu á stovninum. Tá ið dagstovnurin hevur skrásett barnið í einari stovu, verður barnið sjónligt í appini, og tú kanst fylla kartotekskortið og tínar sambandsupplýsingar út

Sært tú ikki barnið, hóast barnið er skrásett á einari stovu, kanst tú:

  • kanna um foreldramyndugleikin er rætt skrásettur í fólkayvirlitinum. Hetta gert tú við at ringja til fólkayvirlitið á tel. 30 20 10.
Hevur tú aðrar spurningar um ForeldraGluggan?

Hevur tú fleiri spurningar um, hvussu tú skrásetur ella brúkar ForeldraGluggan, so finnur tú ofta settar spurningar og svar á síðu okkara um ForeldraGluggan. Har kanst tú eisini lesa brúkaratreytirnar.

TEMA - ForeldraGluggin

Dagligt samskifti
Boðtalva

Hvør stova hevur eina talvu, har starvsfólkini skriva foreldrunum boð og greiða frá degnum.

Eftirlit og dygd
Námsfrøðilig dygd

Ein dygdarmennari úr Barna- og ungdómsdeildini hjá Tórshavnar kommunu kemur við jøvnum millumbilum út á dagstovnarnar í kommununi at eygleiða námsfrøðiliga innihaldið og umstøðurnar, sum námsfrøðiliga arbeiði fer fram í.

Dygdarmennarin samskiftir síðan við dagstovnaleiðaran og starvsfólkini um sínar eygleiðingar, og funnið verður fram til ítøkiligar menningarmøguleikar.

Talan er um skipaðar eygleiðingar (KIDS), sum skulu vera við til at tryggja, at vit framhaldandi arbeiða við, og savna okkum um, námsfrøðiligu dygdina á hvørjum einstøkum dagstovni. KIDS er eitt viðurkent og granskingargrundað amboð til eftirmeting og menning av námsfrøðiligu dygdini á dagstovnum.

Eygleiðingarnar eru innanhýsis arbeiðsamboð til einstaka stovnin at brúka í sínum menningararbeiði.

Eftirlit við spæliplássi

Triðja hvørt ár skipar kommunan fyri einari kanning av trygdarviðurskiftunum á øllum dagstovnaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Seinasta trygdareftirlit fór fram í 2018. Næsta eftirlitið verður í 2021.

Kommunalu húsavørðarnir hava dagliga eftirlitið við spæliplássunum.

Lyklatøl
Pláss á stovninum

Býlingshúsinum millum Gilja hevur pláss fyri 12 vøggustovubørnum og 35 barnagarðsbørnum.

Gjald og uppskriving til stovnspláss
Bóka pláss

Tú nýtir talgildu bókingarskipanina BARN, tá tú skalt bóka dagstovnapláss.

Fyri at nýta bókingarskipanina, skalt tú rita inn við Samleikanum, sum er ein trygg innritingarskipan. Hevur tú ikki Samleikan, kanst tú bíleggja tær hann her:

Fá tær Samleikan (samleikin.fo)

Bókingarskipanin er somuleiðis knýtt at postskipanini MínBoks. Tú fært atgongd til tína MínBoks, tá tú hevur fingið Samleikan.

Hevur tú ikki møguleika fyri at nýta bókingarskipanina BARN, kanst tú fylla umsóknarblaðið niðanfyri út og lata tað inn á Snarskivuni á Vaglinum í Tórshavn. Tú noyðist tá at vera til staðar í Snarskivuni, meðan skipanin leitar eftir stovnsplássi fyri teg. Finnur skipanin hóskandi pláss, mást tú taka av stovnsplássinum og vátta beinanvegin. Orsøkin er, at eitt pláss, sum er tøkt, kann verða bókað hvørja løtu av foreldrum, sum sjálvi bóka pláss í skipanini.

Bóka pláss

Umsókn um pláss á dagstovni

Upptøkureglur

Her kanst tú kunna teg um galdandi reglurnar fyri upptøku av børnum til dagstovnarnar í Tórshavnar kommunu.

Upptøkureglur

Dagstovnagjøld

Gjøldini fyri dagstovnapláss sært tú her:

Dagstovnagjøld

Frípláss

Sum foreldur kunnu tit søkja um fíggjarligt frípláss til barnið.

Hvørt frípláss verður játtað, og hvussu nógv verður játtað, veldst um tykkara inntøku. Tú kanst kunna teg nærri á síðu okkara um frípláss.

Søk um frípláss

Uppsøgn

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp stovnspláss