Dagstovnurin á Hamrinum

Glyvursvegur 50
160 Argir
Tel. 32 20 03
soleys@torshavn.fo

Dagstovnaleiðari: Sóley Samuelsen
Tel. 21 43 57
soleys@torshavn.fo

Lurta

Dagstovnurin á Hamrinum

Kongavarðar og náttúruumhvørvið spæla stóran leiklut í mentanini á Dagstovninum á Hamrinum. Hetta sæst aftur í okkara búmerki, sum ímyndar ein varða. Spæliplássið er hagin, og omanfyri standa Kongavarðar so ernir og hyggja oman yvir okkara spæl. Ofta gongur leiðin niðan til teirra, og teir eru sjónligasta eyðkennið í nærumhvørvinum, tí er einki meira hóskandi enn ein varði.

Umframt at varðin er ein vegvísari, ið heldur tær á rættari leið, tá tú ferðast gjøgnum hagan og gjøgnum lívið, so er varðin eisini ímyndin av at skapa ein leið saman, ið hvør einstakur setur sín dám á. Tá vit koma framvið, leggja vit ein stein á varðan og eru við til at byggja eina felags leið til onnur at fylgja. Varðin er soleiðis altíð til staðar í gerandisdegnum. Vit mennast og ferðast saman við børnunum, meðan vit tryggja okkum, at tey ikki villast. Samstundis skilja vit eisini týdningin av, at tey sjálvi ganga hvør sína leið.

Í búmerkinum er eisini umsorganin. Í steinunum sæst ímyndin av eini kvinnu, ið situr við krosskastaðum beinum og einum smábarni í føvninginum. Hetta er tryggleikin, vit skapa fyri børnini. Vit hava tíð til børnini, tá tey hava tørv á okkum. Búmerkið lýsir væl arbeiðið, ið merkir gerandisdagin á Dagstovninum á Hamrinum. Vit liggja høgt og hava besta útsýni yvir býin. Okkara tættasti granni er Skúlin á Argjahamri.

Dagstovnurin liggur mitt í einum hugvekjandi náttúruumhvørvi, har hagin og óslætta lendið stimbra kropsligu menningina hjá barninum. Hetta umhvørvið er eisini innbjóðandi til spæl, spennandi rannsóknarferðir og at fordjúpa seg. Veðrið er skiftandi og sansastimbrandi. Her eru blómur, hagalyngur, grót, vatn, smákykt, seyður, varðar og óendaliga nógv annað hjá børnunum at uppliva. Eingin dagur er líka.

Á Dagstovninum á Hamrinum eru tvær vøggustovur, sum eita Ljósástova og Glyvursstova. Reynsstova og Rossástova eru barnagarðsstovur, meðan tey seks ára gomlu, Spírarnir, húsast í Risastovu. Stovnurin er frá 2003 og hevur góðar umstøður bæði inni og úti.

Í løtuni ganga 80 børn á Dagstovninum á Hamrinum, og her starvast 12 námsfrøðingar, 12 hjálparfólk og eitt køksfólk.



Um Dagstovnin á Hamrinum
Upplatingartíðir

Mánadag til fríggjadag frá kl. 7.30 til kl. 17.

Samband

Dagstovnaleiðari

Sóley Samuelsen
Tel. 21 43 57 ella 32 20 03
soleys@torshavn.fo

Ljósástova (vøggustova)

Tel. 29 00 60

Glyvursstova (vøggustova)

Tel. 29 00 61

Reynsstova (barnagarðsstova)

Tel. 29 00 63

Rossástova (barnagarðsstova)

Tel. 29 00 62

                       

Spírar (stova til seks ára gomul)

Tel. 29 00 64

Afturlatingardagar í 2022
  • Allar vanligar halgidagar og serstakar merkisdagar – stovnurin stongdur
  • Skírhósdag til 2. páskadag 14. – 18. apríl – stovnurin stongdur
  • Flaggdagin 25. apríl – stovnurin stongdur
  • Dýra biðidag 13. mai – stovnurin stongdur
  • Kristi himmalsferðardag 26. mai – stovnurin stongdur
  • Grundlógardag 5. juni ­– stovnurin stongdur frá kl. 12
  • Summarfrítíð vika 29, 30 og 31 – møguleiki fyri at melda til samanlagt virksemi
  • Ólavsøkuaftan 28. juli – stovnurin opin til kl. 12
  • Ólavsøkudag 29. juli – stovnurin stongdur
  • Jólafrítíð 24. desember 2022 – 1. januar 2023 – stovnurin stongdur
  • Stovnurin hevur tveir ráðleggingardagar um árið. Hesar báðar dagar er stovnurin stongdur. Tað er ymiskt, nær ráðleggingardagarnir eru, men foreldur fáa boð í seinasta lagi seks vikur frammanundan

SAMANLAGT VIRKSEMI

Samanlagt virksemi vil siga, at dagstovnarnir í Tórshavnar kommunu leggja sítt virksemi saman, soleiðis at ein dagstovnur er opin í frítíðartíðini.

Hevur tú tørv á tí, kann títt barn sostatt fáa pláss í samanlagda virkseminum í summarfrítíðini, tá stovnarnir annars eru stongdir.

FREISTIR AT BIÐJA UM PLÁSS Í SAMANLØGDUM VIRKSEMI:

Summarfrítíð 2022: 1. juni 2022

Gev gætur, at heldur tú ikki freistina, kunnu vit ikki tryggja tínum barni pláss í samanlagda virkseminum.

Hevur tú tørv á plássi í samanløgdum virksemi, kanst tú kunna teg nærri og søkja her:

Samanlagt virksemi í frítíðarskeiðum

Vitja okkum

Tit eru altíð vælkomin at vitja okkum.

Ring til Sóley Samuelsen á tel. 21 43 57 ella send ein teldupost til soleys@torshavn.fo fyri at avtala eina vitjan.

Matur og drekka

Gerandisdagar hava børnini matpakka við heimanífrá.

Stovnurin bjóðar frukt, mjólk og millummála hvønn dag. Vit hava eitt køksfólk, sum ger millummála til okkara fýra ferðir um vikuna.

Vit royna at hava ein mettandi og heilsugóðan millummála. Kortini er eisini rúm fyri, at vit fáa okkum kakao, køku ella annað leskiligt av og á.

Viðhvørt bjóða vit døgurða á stovninum, til dømis, tá vit fletta, til jóla, føstulávint ella í samband við onkra verkætlan. Viðhvørt hava stovurnar eisini kalt borð ella okkurt líknandi. Tá boða vit foreldrunum frá frammanundan.

Trygdarskeið

Stovnurin hevur tilbúgvingarætlan viðvíkjandi til eldsbruna. Vit hava brandvenjing og endurskoða javnan tilbúgvingina. Seinasta brandvenjing var í september 2019.

Foreldraráð

Vit skipa foreldraráðið fyri at styrkja trivnaðin og sambandið millum starvsfólk, heim, foreldur og børn á stovninum.

Sum limur í foreldraráðnum kanst tú gera títt fyri, at stovnurin er eitt gott stað at vera. Tú fært ávirkan og innlit í gerandisdagin á stovninum og í námsfrøðiliga leistin. Sum limur í foreldraráðnum ert tú eisini hugskotsgevi og ert við til at kjakast um menningina og átøk á stovninum.

Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Sí á korti

Námsfrøðiligur leistur
Soleiðis arbeiða vit

TAKA ÍMÓTI BØRNUM

Vit taka ímóti børnum millum kl. 7.30 - 9.30. Eftir hetta byrjar ávikavist ætlaða og spontana virksemið.

Tit eru vælkomin at koma við børnunum aftan á kl. 9.30, men í tílíkum føri er umráðandi, at tit boða stovuni frá.

GÓÐAN MORGUN OG FARVÆL

Vit leggja stóran dent á at taka væl ímóti børnum og foreldrum um morgnarnar. Tað er umráðandi, at tit foreldur geva tykkum stundir at siga barninum farvæl.

NÁMSFRØÐILIGA ARBEIÐIÐ

Hugburðurin handan okkara námsfrøðiliga arbeiði er viðurkennandi námsfrøði. Børnini verða hoyrd, vird og sædd. Vit leggja stóran dent á jaliga samskiftið. Tað vil siga, at starvsfólk okkara eru professionell, samstarvshugað, opin og taka ábyrgd.

Dagstovnurin á Hamrinum er eitt felagshús, og tað merkir, at børnini kunnu vitja og skapa vinarbond á øllum stovum. Felagsverkætlanir, felagsverkstøð á jólum ella páskum og sangløtur eru ein natúrligur partur av árinum. Hetta kann til dømis snúgva seg um rúmdarferðir, djór ella ein "túr" til Japan.

Somuleiðis leggja vit dent á inklusjón; at vit síggja barnið frá sínum sterku síðum. Hetta merkir, at starvsfólk eru nærverandi og týðilig í sínum samskifti við barnið. Vit meta, at øll børn hava rætt til at vera partur av felagsskapinum, fáa vinarbond og góð sambond á ein inkluderandi hátt.

Vit hava ta áskoðan, at børn í stóran mun læra við at spæla. Gjøgnum spæl styrkir barnið sínar sosialu førleikar, innlivingarevni, skapanarevnini og lærir meira um seg sjálvt. Tað vil siga, at spælið er persónsskapandi. Tí er eisini avgerandi, at børnini fáa umstøður at fordjúpa seg í spælinum, og at vit vaksnu stuðla teimum við at hjálpa teimum at skapa karmarnar, vegleiða og geva teimum frið.

ÍTRIV

Vit arbeiða miðvíst við skapandi tilgongdini; at børnini sleppa at bera seg fram og skapa á ymsar hættir. Av tí sama hava børnini atgongd til nógv ymiskt tilfar her á stovninum, ið stimbrar skapanarhugin.

Vit hava atgongd til høllina í Skúlanum á Argjahamri eina ferð um vikuna. Tá kunnu børnini brúka sínar grovrørslur. Børnini sleppa at renna, royna ymiskar forðabreytir, bóltspøl, fimleik og annað.

Sangur, rím, gátur, skemtisøgur og orðatøk eru eisini partur av gerandisdegnum. Við hesum kunnu børn og vaksin hava tað stuttligt saman. Hetta virkar eisini til at stimbra málsligu fatanina og menna orðatilfeingið hjá børnunum.

TILTØK

Opið hús

Hvør stova bjóðar inn til sín og skipar fyri onkrum aktivitet ella verkstaði, til dømis vøddamýking, diskotek ella at perla. Børnini kunnu sjálvi velja, hvørja stovu, tey vitja, og hvønn aktiviteti, tey vilja taka lut í.

Heyst

Vit fletta, tilgera matin frá flettingini og eta ein góðan heystardøgurða saman.

Jól

Vit fara til jólagudstænastu saman við hinum dagstovnunum á Argjum. Stovnurin bjóðar góðan jóladøgurða. Jólafest er eisini fastur táttur.

Føstulávint

Starvsfólk spæla sjónleik fyri børnunum. Vit fara upp á gólv og sláa tunnu úti á stovunum. Stovnurin bjóðar døgurða.

Páskir

Vit gera páskaprýði og hugna um á stovninum.

Sirkus

Spírarnir framføra sirkus fyri øllum børnunum á stovninum.

Garðdagur

Vit bjóða foreldrum til garðdag. Vit gera ymiskt úti í garðinum og prýða um.

Verkætlanir

Stovurnar hava viðhvørt okkurt ítriv ella evni, sum tær leggja serligan dent á í eina tíð. Hetta fyri at skapa forvitni, hugflog og djúphugsni hjá børnunum.

FORELDRASAMSTARV

Um heystið hava vit ein felags foreldrafund, har vit fyrst hittast til ein viðkomandi fyrilestur. Aftaná fara øll inn á stovurnar, har vit kunna foreldur um okkara virksemi og um ymisk praktisk viðurskifti.

Byrjanarviðtalur hava vit eftir tørvi. Byrjanarviðtalan er ein viðtala, har tit kunnu práta við okkum um fyrstu tíðina hjá barninum í vøggustovu ella barnagarði.

Vit hava foreldraviðtalu eina ferð um árið. Tá kunnu tit práta við okkum um heildarmenningina og trivnaðin hjá tykkara barni. Foreldraviðtalur eru vanliga um várið.

Nakrar ferðir um árið bjóða vit morgunmat ella drekkamunn inni á stovuni. Tá kunnu børn og vaksin hugna sær saman, og tit fáa høvi til at práta við hini foreldrini. Vit seta uppslag á talvuna í gongini um, nær hetta verður.

Hvørji eru vit?

Á stovninum starvast 24 starvsfólk.

ForeldraGluggin
Hvat er ForeldraGluggin?

ForeldraGluggin er ein ókeypis app til snildfon, sum tú kanst brúka, um tú ert foreldur at dagstovnabarni í Tórshavnar kommunu.

Tænastan fevnir um dagstovnarnar og frítíðarskúlarnar í kommununi og verður brúkt til samskifti millum foreldur og dagstovn. Í ForeldraGlugganum kallar stovnurin til dømis inn til foreldraviðtalur og kunnar um gerandisdagin, og tað er somuleiðis her, tú boðar frá feriu:

  • foreldur kunnu fylgja við í gerandisdegnum hjá børnunum
  • foreldur kunnu skráseta frí og frítíð hjá barninum
  • foreldur og stovnur kunnu senda boð sínámillum
  • stovnurin kann skjótt og lætt kalla inn til foreldraviðtalur og tiltøk
  • foreldur fáa trygga atgongd til myndir og filmsbrot av barninum

Appin er royndarkoyrd á úrvaldum stovnum, og nú verður fyrsta verkætlanarstig so líðandi sett í verk á øllum dagstovnum í kommununi.

Hví brúka vit ForeldraGluggan?

So hvørt sum Føroyar vórðu raktar av Covid-19 aldunum í fjør, gjørdist tað kommununi greitt, at okkum tørvar ein skjótan og tryggan samskiftisfarveg, sum er felags fyri alt dagstovnaøkið: boðini og tilmælini til foreldur vóru mong, og tey broyttust ofta. Talan var eisini mangan um bráðfeingisboð, ið vóru umráðandi at fáa skjótt út til øll foreldur.

Harafturat kom nýggja dátuverndarlógin í gildi í januar 2021, og sambært henni eiga vit øll at tryggja okkum, at persónsupplýsingar og myndir verða handfarnar á so tryggan hátt sum gjørligt.


Tín persónligi gluggi

ForeldraGluggin verður tó ikki bara settur í verk fyri at geva stovnum ein farveg til bráðfeingisboð og tilmæli til foreldur. ForeldraGluggin er eisini partur av talgildingarætlanini hjá kommununi, sum millum annað hevur til endamáls at hækka kommunala tænastustøðið. Ítøkiliga er ForeldraGluggin, soleiðis sum orðið leggur upp til, ein lættur snarvegur hjá tær, sum ynskir at fáa skjótt og ómakaleyst innlit í gerandisdagin hjá tínum barni.

Tað er ein kend avbjóðing millum foreldur, at tað kann vera trupult at fáa rættiligt innlit í tann ofta stóra partin av gerandisdegnum, børnini eru á stovni. Børnini eru ikki altíð før fyri sjálvi at velja úr rúgvuni av upplivingum og greiða frá hendingunum í einum degi á stovni. Og foreldur hava viðhvørt knappa tíð at tosa og hyggja at myndum, tá tey koma eftir børnum sínum.

Higartil hava dagstovnar havt boðtalvur, facebookbólkar og teldur við myndum í gongini fyri at kunna foreldur um virksemið á stovninum. Dagstovnarnir hava eisini brúkt gott gamalt munnligt samskifti. ForeldraGluggin kemur ikki í staðin fyri munnliga samskiftið, men letur upp fyri fleiri miðvísum samskiftismøguleikum, soleiðis at tú sum foreldur hevur lætta atgongd til mangt av tí í gerandisdegnum, sum tú og barnið kunnu hava gagn av at tosa um.

Taka vit hesa skipanina til okkum og læra okkum at brúka hana miðvíst, so bæði skipar og tryggjar hon samskiftið fyri okkum og kann samstundis vera við til at tryggja trivnaðin og sambandið millum foreldur og barn.

Hvussu stovni eg ForeldraGluggan?

Soleiðis gert tú, um tú frammanundan hevur skrásett fartelefon og teldupost í BARN-skipanini

Hevur tú frammanundan skrásett títt fartelefonnummar og tín teldupostbústað í BARN-skipanini, kann stovnsleiðarin senda tær ein teldupost við einum leinki, tá ið barnið byrjar á stovninum.

Í teldupostinum stendur:

»Góði brúkari av ForeldraGlugganum

Fyri at kunna rita inn á ForeldraGluggan, skalt tú stovna brúkaranavn og loyniorð. Trýst á leinkið og vel brúkaranavn og loyniorð«

Tá ið tú trýstir á leinkið í teldupostinum og ritar inn, fært tú eina QR-kotu, sum tú skannar við snildfonini. So verður ForeldraGluggin tikin niður á tína telefon.

Tá tú hevur gjørt hetta, kanst tú fara til stig 4 í vegleiðingini niðanfyri.

Fært tú ikki ein teldupost sendandi, mást tú sjálv stovna teg sum brúkara. Tað gert tú við at fylgja stig 1-3 í vegleiðingini niðanfyri.

Soleiðis gert tú, um tú ikki hevur skrásett fartelefon og teldupost í BARN-skipanini, ella um tú ikki fært teldupost frá stovninum

1. Stovna teg sum brúkara

Fært tú ikki ein teldupost sendandi við einari QR-kotu, mást tú sjálv stovna teg sum brúkara fyri at brúka ForeldraGluggan. Tað gert tú í bókingarskipanini BARN. Tað tekur áleið ein minutt at stovna seg sum brúkara.

Tú ritar inn í bókingarskipanina BARN við tínum Samleika. Hevur tú ikki fingið tær Samleikan, kanst tú bíleggja tær hann á heimasíðuni hjá Samleikanum. Tú ritar inn í bókingarskipanina BARN her:

RITA INN Í BARN-SKIPANINA

Fá tær Samleikan (samleikin.fo)

Tá tú hevur ritað inn í BARN-skipanina, skalt tú trýsta á spjaldrið við tínum egna navni. Hevur tú foreldramyndugleikan yvir barninum, eigur tú at síggja teigin »Stovna ForeldraGluggan« í høgra bredda niðanfyri á síðuni:

Her skalt tú:

  • velja eitt brúkaranavn
  • velja eitt loyniorð
  • upplýsa títt fartelefonnummar, sum verður brúkt, tá tú tekur appina í nýtslu fyrstu ferð

2. Tak appina niður á snildfonina

Far inn á App Store (um tú hevur iPhone) ella GooglePlay (um tú hevur Android) og leita eftir »ForeldraGluggin«. Tak síðan appina niður.

3. Skriva brúkaranavn og loyniorð

Tá ið tú hevur tikið appina niður, trýstir tú á appina fyri at lata hana upp. Nú verður tú biðin um at skriva brúkaranavnið og loyniorðið, tú valdi tær í BARN-skipanini.

Tá tú hevur tøppað brúkaranavnið og loyniorðið inn, fært tú eini SMS-boð sendandi við einum trygdartali, sum tú skalt tøppa inn.

SMS-boðini við trygdartali verða bara send fyrstu ferðina, tú ritar inn - aftaná hetta tørvar tær bara at nýta brúkaranavnið og loyniorðið, tú valdi tær í BARN-skipanini.

4. Vel títt barn í appini og fyll kartotekskortið út

Hevur tú fleiri børn á stovni, sært tú byrjanarstavirnar hjá hvørjum barni í appini. Tú kemur inn á einstaka barnið við at trýsta á runda ikonið við byrjanarstavunum í.

Nú trýstir tú niðast høgrumegin á ikonið »Meira«.


Síðan trýstir tú á »kartotekskort« næstniðast í valmyndini.


Her svarar tú spurningum um títt barn og velur, hvørji loyvi tú vilt lata. Gev gætur, at hesar upplýsingarnar eru neyðugar fyri at skipanin riggar og handfer upplýsingarnar rætt.

Á kartotekskortinum kanst tú velja, um tú vilt lata stovninum ymiskar fulltrúir ella ikki. Tað eru fulltrúir til:

  • at fara útferðir
  • svimja undir námsfrøðiligum eftirliti
  • at barnið kann koyrast í privatbili, lógliga íbundið trygdarbelti
  • at barnið, sambært munnligari avtalu, kann avheintast av øðrum

Somuleiðis kanst tú geva fulltrúir til myndir og video alt eftir, hvat tú ynskir. Tú kanst velja, um:

  • øll foreldur at børnum á stovuni hjá barninum skulu kunna síggja myndir og filmar av tínum barni
  • øll foreldur at børnum á stovninum hjá barninum skulu kunnu síggja myndir og filmar av tínum barni
  • myndir og filmar av barninum skulu kunna vísast á almennu heimasíðuni hjá stovninum

Aðrar upplýsingar skulu eisini gevast, um serlig viðurskifti og atlit skulu takast til sjúkur, kost, lívsneyðugan heilivág og ovurviðkvæmi.

Somuleiðis verður tú biðin um at upplýsa:

  • tryggingar
  • kunning um barnið
  • kunning um familjuna
Soleiðis fært tú appina á føroyskum

Tú kanst velja at brúka appina á føroyskum. Ynskir tú tað, skalt tú fara til »generelt« í stillingunum á sjálvari telefonini, velja »Sprog og område« og velja »føroyskt« sum mál.

Tú mást somuleiðis ansa eftir, at føroyskt eisini stendur ovast undir »foretrukken sprogrækkefølge« í yvirskipaðu stillingunum.

Soleiðis boðar tú frá frí og frítíð

Fyri at kunna leggja arbeiðið til rættis á stovnunum, ynskja vit, at tú boðar frá, nær barnið heldur frí. Hesum boðar tú frá í ForeldraGlugganum.

Soleiðis boðar tú frá:

1. Lat ForeldraGluggan upp og rita inn

2. Trýst á »meira« niðast í høgra horni


3. trýst á »Frí og frítíð«


4. syrg fyri at swipe-knøtturin ovast er grønur


5. Vel fyrsta og seinasta dag í álmanakkanum og trýst á flugubeinið ovast í høgra horni

So er frítíðin skrásett. Hevur tú eina viðmerking til tína fráboðan, kanst tú skriva hana í teigin niðast. Minst til at trýsta á flugubeinið, tá tú ert liðug.

Hvar samskifta vit um hvat?

UPPSLØG

Í uppsløgunum finnur tú kunning um gerandisdagin á stovninum. Tað kunnu vera lýsingar av námsfrøðiliga gerandisdegnum, tiltøk ella ítriv, sum fara fram í nærmastu framtíð, áheitanir um at hava regnklæðir við og tílíkt. Tað ber ikki til at gera viðmerkingar til uppsløg.


BOÐ

Undir Boð sært tú samskiftið við ein ella fleiri úrvaldar móttakarar. Her hevur tú møguleika fyri at svara boðunum. Tað kann til dømis vera eini boð, har starvsfólkini ynskja at gera avtalu um eina foreldraviðtalu, ella tað kann vera eini boð við einum stuttum spurningi.

Tá tú sendir eini boð til starvsfólkini á dagstovninum, verða boðini send til felags postkassan hjá stovninum. Øll viðkomandi starvsfólk eru knýtt at hesum postkassanum, og tey kunnu sostatt svara tínum boðum.

Tað ber ikki til at senda boð til onnur foreldur á stovninum.


ÁLMANAKKI

Í álmanakkanum sært tú millum annað tiltøkini á stovninum, til dømis foreldrafundir, jólahald, páskahald og tílíkt. Her sært tú eisini, um tú ert boðin til foreldraviðtalu.


MYNDASAVN

Í myndaskjáttuni sært tú allar tær mappur og myndir, sum eru deild við teg. Í mappuni »Myndir av tær og tínum børnum« verða allar myndir og øll filmsbrot savnað, sum hava títt barn frámerkt á teimum.

Eg síggi ikki mítt barn í ForeldraGlugganum

Títt barn verður stovnað sjálvvirkið í ForeldraGlugganum við upplýsingum úr fólkayvirlitinum. Sostatt eru tað bara foreldur við foreldramyndugleika, sum síggja upplýsingar um barnið.

Sært tú ikki barnið í ForeldraGlugganum kanst tú:

  • spyrja stovnin, um barnið er skrásett í einari stovu á stovninum. Tá ið dagstovnurin hevur skrásett barnið í einari stovu, verður barnið sjónligt í appini, og tú kanst fylla kartotekskortið og tínar sambandsupplýsingar út

Sært tú ikki barnið, hóast barnið er skrásett á einari stovu, kanst tú:

  • kanna um foreldramyndugleikin er rætt skrásettur í fólkayvirlitinum. Hetta gert tú við at ringja til fólkayvirlitið á tel. 30 20 10.
Hevur tú aðrar spurningar um ForeldraGluggan?

Hevur tú fleiri spurningar um, hvussu tú skrásetur ella brúkar ForeldraGluggan, so finnur tú ofta settar spurningar og svar á síðu okkara um ForeldraGluggan. Har kanst tú eisini lesa brúkaratreytirnar.

TEMA - ForeldraGluggin

Dagligt samskifti
Heimasíða

Tú kanst kunna teg nærri um dagstovnin á heimasíðu okkara.

Heimasíðan hjá Dagstovninum á Hamrinum

Á heimasíðu okkara finnur tú nógvar hentar upplýsingar. Her finnur tú millum annað okkara námsætlan, mannagongdir, starvsfólkayvirlit, teldupost, telefonnummur og kunning annars.

Vit leggja eisini javnan myndir út á heimasíðuna frá dagliga virkseminum og felagstiltøkum.

Instagram

Á heimasíðu okkara finna tit eisini faldaran og slóðina til okkara Instagram-brúkara, har tit kunnu síggja myndir.

Heimasíðan hjá Dagstovninum á Hamrinum

Dagstovnurin á Hamrinum á Instagram

Boðtalva

Allar stovur hava eina boðtalvu í gongini. Her síggja tit kunning til foreldur. Hetta kann verða kunning um virksemið á stovuni, kunning frá stovninum ella onkur áminning. Viðhvørt eru eisini myndir.

Eftirlit og dygd
Námsfrøðilig dygd

Ein dygdarmennari úr Barna- og ungdómsdeildini hjá Tórshavnar kommunu kemur við jøvnum millumbilum út á dagstovnarnar í kommununi at eygleiða námsfrøðiliga innihaldið og umstøðurnar, sum námsfrøðiliga arbeiði fer fram í.

Dygdarmennarin samskiftir síðan við dagstovnaleiðaran og starvsfólkini um sínar eygleiðingar, og funnið verður fram til ítøkiligar menningarmøguleikar.

Talan er um skipaðar eygleiðingar (KIDS), sum skulu vera við til at tryggja, at vit framhaldandi arbeiða við, og savna okkum um, námsfrøðiligu dygdina á hvørjum einstøkum dagstovni. KIDS er eitt viðurkent og granskingargrundað amboð til eftirmeting og menning av námsfrøðiligu dygdini á dagstovnum.

Eygleiðingarnar eru innanhýsis arbeiðsamboð til einstaka stovnin at brúka í sínum menningararbeiði.

Eftirlit við spæliplássi

Triðja hvørt ár skipar kommunan fyri einari kanning av trygdarviðurskiftunum á øllum dagstovnaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Seinasta trygdareftirlit fór fram í 2018. Næsta eftirlitið verður í 2021.

Kommunalu húsavørðarnir hava dagliga eftirlitið við spæliplássunum.

Lyklatøl
Pláss á stovninum

Dagstovnurin á Hamrinum hevur pláss fyri 12 vøggustovubørnum og 20 barnagarðsbørnum. Harafturat hava vit Spírarnar, sum er stovan fyri tey seks ára gomlu.

Gjald og uppskriving til stovnspláss
Bóka pláss

Tú nýtir talgildu bókingarskipanina BARN, tá tú skalt bóka dagstovnapláss.

Fyri at nýta bókingarskipanina, skalt tú rita inn við Samleikanum, sum er ein trygg innritingarskipan. Hevur tú ikki Samleikan, kanst tú bíleggja tær hann her:

Fá tær Samleikan (samleikin.fo)

Bókingarskipanin er somuleiðis knýtt at postskipanini MínBoks. Tú fært atgongd til tína MínBoks, tá tú hevur fingið Samleikan.

Hevur tú ikki møguleika fyri at nýta bókingarskipanina BARN, kanst tú fylla umsóknarblaðið niðanfyri út og lata tað inn á Snarskivuni á Vaglinum í Tórshavn. Tú noyðist tá at vera til staðar í Snarskivuni, meðan skipanin leitar eftir stovnsplássi fyri teg. Finnur skipanin hóskandi pláss, mást tú taka av stovnsplássinum og vátta beinanvegin. Orsøkin er, at eitt pláss, sum er tøkt, kann verða bókað hvørja løtu av foreldrum, sum sjálvi bóka pláss í skipanini.

Bóka pláss

Umsókn um pláss á dagstovni

Upptøkureglur

Her kanst tú kunna teg um galdandi reglurnar fyri upptøku av børnum til dagstovnarnar í Tórshavnar kommunu:

Upptøkureglur

Dagstovnagjøld

Gjøldini fyri dagstovnapláss sært tú her:

Dagstovnagjøld

Frípláss

Sum foreldur kunnu tit søkja um fíggjarligt frípláss til barnið.

Hvørt frípláss verður játtað, og hvussu nógv verður játtað, veldst um tykkara inntøku. Tú kanst kunna teg nærri á síðu okkara um frípláss.

Søk um frípláss

Uppsøgn

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp stovnspláss