Dagstovnurin á Velbastað

Norðuri á Heyggi 55
176 Velbastaður
Tel. 32 81 21
torahj@torshavn.fo  

Dagstovnaleiðari: Beinta Sørensen
Tel. 22 16 90
beintaso@torshavn.fo

Lurta
Til lesiveik

Dagstovnurin á Velbastað

At koma á Dagstovnin á Velbastað er sum at koma í annan heim. Hetta er eitt friðsælt stað, sum hevur eitt róligt huglag við hópin av møguleikum hjá børnum og vaksnum at mennast í.

Dagstovnurin liggur í náttúruvøkrum umhvørvi oman fyri bygdina Velbastað, og vakra útsýnið yvir fjørðin og Heyst, Koltur og Sandoy ger umhvørvið heilt serligt.

Í garðinum hava vit hugnaliga smáttu við grúgvu, haga við stórum steinum, eina hóskandi á til børnini at spæla í og bálpláss. Her er graslíkisvøllur til ymisk bólt- og felagsspøl og slætt øki til súkklur og mánabilar. Í garðinum er eisini skreiðibreyt, reiggjur, ymiskar uttanduraleikur, høsnahús, veltur, bátar og mangt annað, ið hoyrir einum garði til.

Okkara garður gevur børnunum ríkar møguleikar at sansa, granska og at nýta og kenna kroppin á ymiskan hátt. Børnini kunnu klúgva, reiggja, súkkla, ganga á ójøvnum lendi og spæla við vatn, sand, mold, vøkstur og smákykt.

Á henda hátt leggur umhvørvið í okkara garði upp til, at børnini hava møguleika at granska kykt, djór og teirra ringrásir, at merkja kroppin í ymisku skiftandi árstíðunum og at taka atlit til náttúruna. Her hava børnini góðar umstøður at spæla við sínar vinir.

Innandura hevur hvør stova tvey rúm, køk, egna inngongd og stór rúmlig vátrúm. Vøggustovan, barnagarðsstovurnar og frítíðarstovan eru innrættaðar til spæl og virksemi, ið hóskar til barnabólkarnar. Soleiðis gevur innandura umhvørvið børnunum ríkar møguleikar at menna forvitnið og at granska saman við hinum børnunum.

Umframt hetta hava vit ein træverkstað, har børnini kunnu skapa ymiskt úr ymsum áhugaverdum tilfari. Vit hava eisini eina stóra høll, sum er góð til rørslu, plásskrevjandi spæl, framførslur av ymiskum slag og aðrar spennandi felags verkætlanir.

Á stovninum starvast bæði námsfrøðingar og hjálparfólk. Dagstovnurin er skipaður soleiðis, at í løtuni eru 13 børn í vøggustovuni Rókini. Barnagarðsstovurnar Urðin og Víkin hava pláss fyri 15 børnum, og frítíðarskúlin hevur pláss fyri ellivu børnum. Hesi tølini kunnu broytast gjøgnum árið.



Um Dagstovnin á Velbastað
Upplatingartíðir

Mánadag til fríggjadag frá kl. 7.30 til kl. 17.

Samband

Dagstovnaleiðari

Beinta Sørensen
Tel. 22 16 90
torahj@torshavn.fo

 

Vøggustovan Rókin

Tel. 21 81 37

 

Barnagarðsstovan Urðin

Tel. 22 81 32

 

Barnagarðsstovan Víkin           

Tel. 21 81 36

 

Frítíðarskúlin Fløtan

Tel.  21 81 31

Serligir dagar

Vit hava lagt okkum eftir at hava nakrar serligar dagar á stovninum. Hesir dagar eru:

  • Jólahald í desember
  • Føstulávint
  • Dagurin áðrenn páskafrítíðina, tá vit rulla páskaregg
  • Garðdagur saman við foreldrunum
  • Blómudagur saman við ommum og abbum
Afturlatingardagar í 2021
  • Allar vanligar halgidagar og serstakar merkisdagar – stovnurin stongdur
  • Skírhósdag til 2. páskadag 1. – 5. apríl – stovnurin stongdur
  • Kristi himmalsferðardag 13. mai – stovnurin stongdur
  • Grundlógardag 5. juni ­– stovnurin stongdur
  • Summarfrítíð vika 29, 30 og 31 – møguleiki fyri at melda til samanlagt virksemi
  • Ólavsøkuaftan 28. juli – stovnurin opin til kl. 12
  • Ólavsøkudag 29. juli – stovnurin stongdur
  • Jólafrítíð 24. desember 2021 – 3. januar 2022 – stovnurin stongdur
  • Stovnurin hevur tveir ráðleggingardagar um árið. Hesar báðar dagar er stovnurin stongdur. Tað er ymiskt, nær ráðleggingardagarnir eru, men foreldur fáa boð í seinasta lagi seks vikur frammanundan

 

SAMANLAGT VIRKSEMI

Samanlagt virksemi vil siga, at dagstovnarnir í Tórshavnar kommunu leggja sítt virksemi saman, soleiðis at ein dagstovnur er opin í frítíðartíðini.

Hevur tú tørv á tí, kann títt barn sostatt fáa pláss í samanlagda virkseminum í summarfrítíðini, tá dagstovnurin á Velbastað er stongdur.

 

FREISTIR AT BIÐJA UM PLÁSS Í SAMANLØGDUM VIRKSEMI:

Summarfrítíð 2021 – 4. juni

 

Gev gætur, at heldur tú ikki freistina, kunnu vit ikki tryggja tínum barni pláss í samanlagda virkseminum.

Hevur tú tørv á plássi í samanløgdum virksemi, kanst tú kunna teg nærri og søkja her:

Samanlagt virksemi í frítíðarskeiðum

Vitja okkum

Tit eru altíð vælkomin at vitja okkum á dagstovninum á Velbastað.

Ring til Tóru á tel. 271055 ella send ein teldupost til torahj@torshavn.fo fyri at avtala eina vitjan.

Matur og drekka

Við okkara matmentan leggja vit dent á at góðan matsið og royna at gera borðhaldið hugnaligt, prátingarsamt og gott, soleiðis at hýrurin er góður, tá vit sita til borðs.

Børnini skulu hava matpakka við hvønn dag. Aftur við matpakkanum bjóða vit børnunum mjólk og vatn at drekka. Eisini læra vit tey at vaska hendur áðrenn og aftan á, vit eta.

Tit foreldur ráða yvir matpakkanum hjá barni tykkara, men vit mæla til, at matpakkin er føðslugóður. Stovnurin bjóðar heimagjørdan millummála, sum vit gera okkum ómak at matgera saman við børnunum. Vit bjóða eisini mjólk og aloftast eitt sindur av frukt fyrrapart. 

Í framtíðini fara vit sum grønur stovnur at leggja okkum eftir, at maturin so frægt, sum gjørligt, er vistfrøðiligur.

Vit royna altíð at gera heilsugóðan mat á stovninum. Hetta kann til dømis vera heimabakað breyð, bollar, havragreytur og frukt.

Trygdarskeið

Stovnurin skipaði fyri einum fyrstuhjálparskeiði í oktober 2018. Vit bjóða javnan hetta skeiðið, soleiðis at øll kunnu luttaka. Av tí sama er ymiskt, nær starvsfólkini hava verið á skeiðnum.

Vit hava ikki havt brandskeið síðstu árini, men fara á brandskeið til heystar.

Foreldraráð

Tit foreldur skulu altíð kenna tykkum vælkomin at venda tykkum til okkum við tykkara sjónarmiðum og uppskotum. Okkara endamál er at gera okkara besta til frama fyri tykkum og tykkara barn. Tí gleða vit okkum til eitt gott samstarv.

Vit skipa foreldraráðið fyri at styrkja trivnaðin og sambandið millum starvsfólk, heim, foreldur og børn á stovninum.

Sum limur í foreldraráðnum kanst tú gera títt fyri, at stovnurin er eitt gott stað at vera. Tú fært ávirkan og innlit í gerandisdagin á stovninum og í námsfrøðiliga leistin. Sum limur í foreldraráðnum ert tú eisini hugskotsgevi og ert við til at kjakast um menningina og átøk á stovninum.

Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Sí á korti

Námsfrøðiligur leistur
Soleiðis arbeiða vit

Á dagstovninum á Velbastað tekur námsfrøðin støði í áhugamálunum og tonkunum hjá barninum. Á henda hátt arbeiða vit saman við børnunum í einari samstarvandi tilgongd. Hjá okkum fáa børnini møguleika at mennast í einum fólkaræði, har tey hava ávirkan á egið lív og kunnu vera við til at mynda virksemið í egnum gerandisdegi. Vit stremba eftir, at børnini fáa eina fatan av, at vit taka tey í álvara, og at tey kunnu uppliva seg sum luttakarar í egnum gerandisdegi og sostatt eisini uppliva seg sum nakað bæði fyri seg sjálvi og onnur.

Vit fagna felagsskapinum og vinaløgunum. Vit taka øll ábyrgd og vísa, at vit eru góð við hvønn annan. Vit sýna blíðskap, eru til reiðar at hjálpa, og vit hava ein góðan samverutóna.

Í okkara námsfrøðiliga arbeiði leggja vit dent á, at børnini fáa møguleika at fáa frið og hugsavna seg. Vit stremba eftir at arbeiða við eini barnamentan, har spælið hjá børnunum er teirra menningarmiðdepil. Tí eggja vit børnunum til spæl, meðan vit vaksnu skipa okkum í mun til, hvar børnini eru, og hvørjum, tey hava tørv á.

Fyri at útinna hetta í verki hava allir námsfrøðingar á dagstovninum fyrireikingartíð, har teir fara burtur frá sínum arbeiði í 1,5 tíma um vikuna. Harafturat hava vit námsfrøðingafundir eina ferð um vikuna og stovufundir aðru hvørja viku.

 

GRØNUR STOVNUR

Seinastu fýra árini hava vit á Dagstovninum á Velbastað arbeitt miðvíst fyri at gerast ein grønur stovnur. Vit eru tí tilvitað um at skilja burturkast, hava eina sankutøðskipan og gera nógv burtur úr at endurnýta og minka um okkara plastnýtslu. Og so hava vit eisini hønur.

Hvørt ár velja vit eitt ella fleiri nýggj grøn øki at leggja dent á, og í ár ætla vit okkum at seta sjóneykuna á vistfrøðiligan mat.

 

LESANDI

Hvørt ár hava vit fleiri lesandi á stovninum. Hesi koma bæði frá Fróðskaparsetri Føroya og úti úr heimi. Vit taka við gleði og stoltleika ímóti lesandi, tí okkum dámar at taka við nýggjari læru og avbjóðingum. Hetta gevur okkum eisini møguleika fyri at halda okkum til alt tað, ið rørir seg á námsfrøðiliga økinum og á henda hátt menna okkara fakliga kunnleika. Fakligur kunnleiki skal menna okkum, soleiðis at vit kunna seta okkum visjónir og skapa dygdargóðar karmar til tykkara børn.

 

INNKOYRING

Tað er ein stór broyting, tá barn tykkara byrjar á dagstovni. Tí er umráðandi, at innkoyringin verður so rólig, sum til ber, og at bæði barnið og tit kenna tykkum trygg við nýggju støðuna. 

Foreldur eru við, tá barnið byrjar á dagstovninum. Hetta gevur foreldrunum møguleika at síggja, hvussu gerandisdagurin hjá barninum fer at síggja framyvir.

Vit leggja dent á, at fyrsta tíðin skal vera rólig og merkt av nærveru. Soleiðis arbeiða vit fyri, at tykkara barn fær eina friðarliga byrjan og kann skapa sær yvirlit fyrstu tíðina.

Fortreytin fyri, at barnið fær ein góðan gerandisdag, er, at vit frá byrjan koma at kenna hvønn annan ordiliga væl. Tí seta vit starvsfólk av til innkoyring av barninum. Foreldrini avtala innkoyringina í samráð við starvsfólkini á stovuni.

Starvsfólkini koma við sínum drúgvu royndum á økinum at leggja tíðina við innkoyringini til rættis. Summi børn hava tørv á longri innkoyring, meðan onnur eru meira klár at trína inn í nýggju tilveruna.

Vit vilja, at tit foreldur eru tøk vikuna aftan á innkoyringina, og at tykkara barn hevur stuttar dagar, soleiðis at tað fær eina so góða byrjan, sum gjørligt. Vit viðmæla, at barnið ta fyrstu tíðina aftan á innkoyring er á stovni frá kl. 9 – 14.

FORELDRASAMSTARV

Tað eru altíð foreldrini, sum eiga ábyrgdina av egnum barni. Tí skulu starvsfólkini hava eitt tætt samstarv við foreldur og kunna tey um, hvørji endamál, vit hava, og hvørjar tankar, okkara námsfrøðiliga arbeiði er grundað á.

Foreldur skulu altíð sleppa at vera spyrjandi og undrast.

Endamálið við samstarvinum millum foreldur og okkum skal vera, at vit læra meira um menningina hjá barninum. Vit mugu ongantíð taka ábyrgdina frá foreldrunum, men skulu mennast saman við barninum sum miðdepil. Foreldraábyrgdin eigur at vera ein sterkur og berandi liður í okkara samfelagi.

Hvørji eru vit?

Vit eru ein blandaður hópur av góðum starvsfólki á stovninum. Summi okkara hava nógv ár á baki, onnur eru júst komin til rættis. Summi hava drúgvar námsfrøðiligar royndir, meðan onnur eru lesandi ella í starvslæru.

Felags fyri okkum øll er kortini, at okkum dámar okkara arbeiði,  og vit gleða okkum at taka ímóti tykkara børnum.

Hjá okkum starvast fýra námsfrøðingar, átta hjálparfólk og tríggir avloysarar.

ForeldraGluggin
Hvat er ForeldraGluggin?

ForeldraGluggin er ein ókeypis app til snildfon, sum tú kanst brúka, um tú ert foreldur at dagstovnabarni í Tórshavnar kommunu.

Tænastan fevnir um dagstovnarnar og frítíðarskúlarnar í kommununi og verður brúkt til samskifti millum foreldur og dagstovn. Í ForeldraGlugganum kallar stovnurin til dømis inn til foreldraviðtalur og kunnar um gerandisdagin, og tað er somuleiðis her, tú boðar frá feriu: 

  • foreldur kunnu fylgja við í gerandisdegnum hjá børnunum
  • foreldur kunnu skráseta frí og frítíð hjá barninum
  • foreldur og stovnur kunnu senda boð sínámillum
  • stovnurin kann skjótt og lætt kalla inn til foreldraviðtalur og tiltøk
  • foreldur fáa trygga atgongd til myndir og filmsbrot av barninum

Appin er royndarkoyrd á úrvaldum stovnum, og nú verður fyrsta verkætlanarstig so líðandi sett í verk á øllum dagstovnum í kommununi.

Hví brúka vit ForeldraGluggan?

So hvørt sum Føroyar vórðu raktar av Covid-19 aldunum í fjør, gjørdist tað kommununi greitt, at okkum tørvar ein skjótan og tryggan samskiftisfarveg, sum er felags fyri alt dagstovnaøkið: boðini og tilmælini til foreldur vóru mong, og tey broyttust ofta. Talan var eisini mangan um bráðfeingisboð, ið vóru umráðandi at fáa skjótt út til øll foreldur.

Harafturat kom nýggja dátuverndarlógin í gildi í januar 2021, og sambært henni eiga vit øll at tryggja okkum, at persónsupplýsingar og myndir verða handfarnar á so tryggan hátt sum gjørligt. 


Tín persónligi gluggi

ForeldraGluggin verður tó ikki bara settur í verk fyri at geva stovnum ein farveg til bráðfeingisboð og tilmæli til foreldur. ForeldraGluggin er eisini partur av talgildingarætlanini hjá kommununi, sum millum annað hevur til endamáls at hækka kommunala tænastustøðið. Ítøkiliga er ForeldraGluggin, soleiðis sum orðið leggur upp til, ein lættur snarvegur hjá tær, sum ynskir at fáa skjótt og ómakaleyst innlit í gerandisdagin hjá tínum barni.

Tað er ein kend avbjóðing millum foreldur, at tað kann vera trupult at fáa rættiligt innlit í tann ofta stóra partin av gerandisdegnum, børnini eru á stovni. Børnini eru ikki altíð før fyri sjálvi at velja úr rúgvuni av upplivingum og greiða frá hendingunum í einum degi á stovni. Og foreldur hava viðhvørt knappa tíð at tosa og hyggja at myndum, tá tey koma eftir børnum sínum.

Higartil hava dagstovnar havt boðtalvur, facebookbólkar og teldur við myndum í gongini fyri at kunna foreldur um virksemið á stovninum. Dagstovnarnir hava eisini brúkt gott gamalt munnligt samskifti. ForeldraGluggin kemur ikki í staðin fyri munnliga samskiftið, men letur upp fyri fleiri miðvísum samskiftismøguleikum, soleiðis at tú sum foreldur hevur lætta atgongd til mangt av tí í gerandisdegnum, sum tú og barnið kunnu hava gagn av at tosa um.

Taka vit hesa skipanina til okkum og læra okkum at brúka hana miðvíst, so bæði skipar og tryggjar hon samskiftið fyri okkum og kann samstundis vera við til at tryggja trivnaðin og sambandið millum foreldur og barn.       

Hvussu stovni eg ForeldraGluggan?

Soleiðis gert tú, um tú frammanundan hevur skrásett fartelefon og teldupost í BARN-skipanini

Hevur tú frammanundan skrásett títt fartelefonnummar og tín teldupostbústað í BARN-skipanini, kann stovnsleiðarin senda tær ein teldupost við einum leinki, tá ið barnið byrjar á stovninum. 

Í teldupostinum stendur: 

»Góði brúkari av ForeldraGlugganum

Fyri at kunna rita inn á ForeldraGluggan, skalt tú stovna brúkaranavn og loyniorð. Trýst á leinkið og vel brúkaranavn og loyniorð«

Tá ið tú trýstir á leinkið í teldupostinum og ritar inn, fært tú eina QR-kotu, sum tú skannar við snildfonini. So verður ForeldraGluggin tikin niður á tína telefon. 

Tá tú hevur gjørt hetta, kanst tú fara til stig 4 í vegleiðingini niðanfyri.

Fært tú ikki ein teldupost sendandi, mást tú sjálv stovna teg sum brúkara. Tað gert tú við at fylgja stig 1-3 í vegleiðingini niðanfyri.

 

Soleiðis gert tú, um tú ikki hevur skrásett fartelefon og teldupost í BARN-skipanini, ella um tú ikki fært teldupost frá stovninum

1. Stovna teg sum brúkara

Fært tú ikki ein teldupost sendandi við einari QR-kotu, mást tú sjálv stovna teg sum brúkara fyri at brúka ForeldraGluggan. Tað gert tú í bókingarskipanini BARN. Tað tekur áleið ein minutt at stovna seg sum brúkara.

Tú ritar inn í bókingarskipanina BARN við tínum Samleika. Hevur tú ikki fingið tær Samleikan, kanst tú bíleggja tær hann á heimasíðuni hjá Samleikanum. Tú ritar inn í bókingarskipanina BARN her: 

RITA INN Í BARN-SKIPANINA

Fá Samleikan (samleikin.fo) 

Tá tú hevur ritað inn í BARN-skipanina, skalt tú trýsta á spjaldrið við tínum egna navni. Hevur tú foreldramyndugleikan yvir barninum, eigur tú at síggja teigin »Stovna ForeldraGluggan« í høgra bredda niðanfyri á síðuni:

Her skalt tú:

  • velja eitt brúkaranavn
  • velja eitt loyniorð
  • upplýsa títt fartelefonnummar, sum verður brúkt, tá tú tekur appina í nýtslu fyrstu ferð

 

2. Tak appina niður á snildfonina

Far inn á App Store (um tú hevur iPhone) ella GooglePlay (um tú hevur Android) og leita eftir »ForeldraGluggin«. Tak síðan appina niður.

 

3. Skriva brúkaranavn og loyniorð

Tá ið tú hevur tikið appina niður, trýstir tú á appina fyri at lata hana upp. Nú verður tú biðin um at skriva brúkaranavnið og loyniorðið, tú valdi tær í BARN-skipanini. 

Tá tú hevur tøppað brúkaranavnið og loyniorðið inn, fært tú eini SMS-boð sendandi við einum trygdartali, sum tú skalt tøppa inn.

SMS-boðini við trygdartali verða bara send fyrstu ferðina, tú ritar inn - aftaná hetta tørvar tær bara at nýta brúkaranavnið og loyniorðið, tú valdi tær í BARN-skipanini.

 

4. Vel títt barn í appini og fyll kartotekskortið út

Hevur tú fleiri børn á stovni, sært tú byrjanarstavirnar hjá hvørjum barni í appini. Tú kemur inn á einstaka barnið við at trýsta á runda ikonið við byrjanarstavunum í. 

Nú trýstir tú niðast høgrumegin á ikonið »Meira«.


Síðan trýstir tú á »kartotekskort« næstniðast í valmyndini.


Her svarar tú spurningum um títt barn og velur, hvørji loyvi tú vilt lata. Gev gætur, at hesar upplýsingarnar eru neyðugar fyri at skipanin riggar og handfer upplýsingarnar rætt.

Á kartotekskortinum kanst tú velja, um tú vilt lata stovninum ymiskar fulltrúir ella ikki. Tað eru fulltrúir til:

  • at fara útferðir
  • svimja undir námsfrøðiligum eftirliti
  • at barnið kann koyrast í privatbili, lógliga íbundið trygdarbelti
  • at barnið, sambært munnligari avtalu, kann avheintast av øðrum

Somuleiðis kanst tú geva fulltrúir til myndir og video alt eftir, hvat tú ynskir. Tú kanst velja, um:

  • øll foreldur at børnum á stovuni hjá barninum skulu kunna síggja myndir og filmar av tínum barni
  • øll foreldur at børnum á stovninum hjá barninum skulu kunnu síggja myndir og filmar av tínum barni
  • myndir og filmar av barninum skulu kunna vísast á almennu heimasíðuni hjá stovninum

Aðrar upplýsingar skulu eisini gevast, um serlig viðurskifti og atlit skulu takast til sjúkur, kost, lívsneyðugan heilivág og ovurviðkvæmi.

Somuleiðis verður tú biðin um at upplýsa:

  • tryggingar
  • kunning um barnið
  • kunning um familjuna
Soleiðis fært tú appina á føroyskum

Tú kanst velja at brúka appina á føroyskum. Ynskir tú tað, skalt tú fara til »generelt« í stillingunum á sjálvari telefonini, velja »Sprog og område« og velja »føroyskt« sum mál.

Tú mást somuleiðis ansa eftir, at føroyskt eisini stendur ovast undir »foretrukken sprogrækkefølge« í yvirskipaðu stillingunum. 

Soleiðis boðar tú frá frí og frítíð

Fyri at kunna leggja arbeiðið til rættis á stovnunum, ynskja vit, at tú boðar frá, nær barnið heldur frí. Hesum boðar tú frá í ForeldraGlugganum.

Soleiðis boðar tú frá:

1. Lat ForeldraGluggan upp og rita inn

2. Trýst á »meira« niðast í høgra horni


3. trýst á »Frí og frítíð«


4. syrg fyri at swipe-knøtturin ovast er grønur


5. Vel fyrsta og seinasta dag í álmanakkanum og trýst á flugubeinið ovast í høgra horni

So er frítíðin skrásett. Hevur tú eina viðmerking til tína fráboðan, kanst tú skriva hana í teigin niðast. Minst til at trýsta á flugubeinið, tá tú ert liðug. 

Hvar samskifta vit um hvat?

UPPSLØG

Í uppsløgunum finnur tú kunning um gerandisdagin á stovninum. Tað kunnu vera lýsingar av námsfrøðiliga gerandisdegnum, tiltøk ella ítriv, sum fara fram í nærmastu framtíð, áheitanir um at hava regnklæðir við og tílíkt. Tað ber ikki til at gera viðmerkingar til uppsløg. 


BOÐ

Undir Boð sært tú samskiftið við ein ella fleiri úrvaldar móttakarar. Her hevur tú møguleika fyri at svara boðunum. Tað kann til dømis vera eini boð, har starvsfólkini ynskja at gera avtalu um eina foreldraviðtalu, ella tað kann vera eini boð við einum stuttum spurningi. 

Tá tú sendir eini boð til starvsfólkini á dagstovninum, verða boðini send til felags postkassan hjá stovninum. Øll viðkomandi starvsfólk eru knýtt at hesum postkassanum, og tey kunnu sostatt svara tínum boðum. 

Tað ber ikki til at senda boð til onnur foreldur á stovninum.


ÁLMANAKKI

Í álmanakkanum sært tú millum annað tiltøkini á stovninum, til dømis foreldrafundir, jólahald, páskahald og tílíkt. Her sært tú eisini, um tú ert boðin til foreldraviðtalu. 


MYNDASAVN

Í myndaskjáttuni sært tú allar tær mappur og myndir, sum eru deild við teg. Í mappuni »Myndir av tær og tínum børnum« verða allar myndir og øll filmsbrot savnað, sum hava títt barn frámerkt á teimum. 

Eg síggi ikki mítt barn í ForeldraGlugganum

Títt barn verður stovnað sjálvvirkið í ForeldraGlugganum við upplýsingum úr fólkayvirlitinum. Sostatt eru tað bara foreldur við foreldramyndugleika, sum síggja upplýsingar um barnið. 

Sært tú ikki barnið í ForeldraGlugganum kanst tú: 

  • spyrja stovnin, um barnið er skrásett í einari stovu á stovninum. Tá ið dagstovnurin hevur skrásett barnið í einari stovu, verður barnið sjónligt í appini, og tú kanst fylla kartotekskortið og tínar sambandsupplýsingar út

Sært tú ikki barnið, hóast barnið er skrásett á einari stovu, kanst tú: 

  • kanna um foreldramyndugleikin er rætt skrásettur í fólkayvirlitinum. Hetta gert tú við at ringja til fólkayvirlitið á tel. 30 20 10.
Hevur tú aðrar spurningar um ForeldraGluggan?

Hevur tú fleiri spurningar um, hvussu tú skrásetur ella brúkar ForeldraGluggan, so finnur tú ofta settar spurningar og svar á síðu okkara um ForeldraGluggan. Har kanst tú eisini lesa brúkaratreytirnar.

TEMA - ForeldraGluggin

Dagligt samskifti
Heimasíða

Tú kanst kunna teg nærri um dagstovnin á heimasíðu okkara.

Heimasíða hjá Dagstovninum á Velbastað 

Boðtalva og Facebook

Aftur at okkara heimasíðu hava vit eisini talvur hangandi í gongini. Her geva vit tykkum kunning og boð um gerandisdagin hjá tykkara barni. Vit vænta, at tit foreldur geva tykkum stundir til at steðga á og lesa hesa kunning.

Summar stovur hava eisini ein Facebookvanga. Facebookvangarnir eru stovnaðir eftir ynski frá foreldrunum fyri at fáa betri og skjótari kunning. Soleiðis kunnu foreldur, sum til dømis sigla úti, eisini betur fylgja við í gerandisdegnum hjá sínum børnum. Á vanganum lýsa stovurnar sítt námsfrøðiliga arbeiði við at vísa ymiskar støðumyndir og skriva um gerandisdagin.

Eftirlit og dygd
Námsfrøðilig dygd

Ein dygdarmennari úr Barna- og ungdómsdeildini hjá Tórshavnar kommunu kemur við jøvnum millumbilum út á dagstovnarnar í kommununi at eygleiða námsfrøðiliga innihaldið og umstøðurnar, sum námsfrøðiliga arbeiði fer fram í.

Dygdarmennarin samskiftir síðan við dagstovnaleiðaran og starvsfólkini um sínar eygleiðingar, og funnið verður fram til ítøkiligar menningarmøguleikar.

Talan er um skipaðar eygleiðingar (KIDS), sum skulu vera við til at tryggja, at vit framhaldandi arbeiða við, og savna okkum um, námsfrøðiligu dygdina á hvørjum einstøkum dagstovni. KIDS er eitt viðurkent og granskingargrundað amboð til eftirmeting og menning av námsfrøðiligu dygdini á dagstovnum.

Eygleiðingarnar eru innanhýsis arbeiðsamboð til einstaka stovnin at brúka í sínum menningararbeiði.

Eftirlit við spæliplássi

Triðja hvørt ár skipar kommunan fyri einari kanning av trygdarviðurskiftunum á øllum dagstovnaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Seinasta trygdareftirlit fór fram í 2018. Næsta eftirlitið verður í 2021.

Kommunalu húsavørðarnir hava dagliga eftirlitið við spæliplássunum.

Lyklatøl
Pláss á stovninum

Dagstovnurin á Velbastað hevur pláss fyri 12 vøggustovubørnum og 36 barnagarðsbørnum.

Gjald og uppskriving til stovnspláss
Bóka pláss

Tú nýtir talgildu bókingarskipanina BARN, tá tú skalt bóka dagstovnapláss.

Fyri at nýta bókingarskipanina, skalt tú rita inn við Samleikanum, sum er ein trygg innritingarskipan. Hevur tú ikki Samleikan, kanst tú bíleggja tær hann her:

Fá Samleikan

Bókingarskipanin er somuleiðis knýtt at postskipanini MínBoks. Tú fært atgongd til tína MínBoks, tá tú hevur fingið Samleikan.

Hevur tú ikki møguleika fyri at nýta bókingarskipanina BARN, kanst tú fylla umsóknarblaðið niðanfyri út og lata tað inn á Snarskivuni á Vaglinum í Tórshavn. Tú noyðist tá at vera til staðar í Snarskivuni, meðan skipanin leitar eftir stovnsplássi fyri teg. Finnur skipanin hóskandi pláss, mást tú taka av stovnsplássinum og vátta beinanvegin. Orsøkin er, at eitt pláss, sum er tøkt, kann verða bókað hvørja løtu av foreldrum, sum sjálvi bóka pláss í skipanini.

Bóka pláss

Umsókn um pláss á dagstovni

Upptøkureglur

Her kanst tú kunna teg um galdandi reglurnar fyri upptøku av børnum til dagstovnarnar í Tórshavnar kommunu:

Upptøkureglur

Dagstovnagjøld

Gjøldini fyri dagstovnapláss sært tú her:

Dagstovnagjøld

Frípláss

Sum foreldur kunnu tit søkja um fíggjarligt frípláss til barnið.

Hvørt frípláss verður játtað, og hvussu nógv verður játtað, veldst um tykkara inntøku. Tú kanst kunna teg nærri á síðu okkara um frípláss.

Søk um frípláss

Uppsøgn

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp stovnspláss