Frítíðarskúlin í Hoyvík

Frítíðarskúlin í Hoyvík letur upp eftir vanliga skúlatíð og er opin til kl. 17.

Frítíðarskúlaleiðari

Bjarni Beder
Tel. 21 47 89
bjarnibe@torshavn.fo

Frítíðarskúlin 1. og 2. flokkur

Tel. 21 27 29

Frítíðartilboðið 3. flokkur

Tel. 28 29 27

Serstovan í frítíðarskúlanum

Tel. 26 72 12

• Allar vanligar halgidagar – stovnurin stongdur
• Páskafrítíð 6. – 8. apríl – møguleiki fyri at melda til samanlagt virksemi í tríggjar dagar 
• Skírhósdag til 2. páskadag 9. – 13. apríl – stovnurin stongdur
• Dýra biðidag – stovnurin stongdur
• Grundlógardag 5. juni ­– stovnurin stongdur
• Summarfrítíð vika 26 og 27 – møguleiki fyri at melda til samanlagt virksemi
• Summarfrítíð vika 28 – 33 – stovnurin stongdur
• Heystfrítíð 10. oktober – 17. august – møguleiki fyri at melda til samanlagt virksemi
• Jólafrítíð 19. desember – 3. januar 2021 – stovnurin stongdur
• Hvørt ár hevur skúlin, sum frítíðarskúlin hoyrir til, tveir serstakar frídagar. Teir dagarnar hevur frítíðarskúlin víðkaða upplatingartíð frá kl. 7.45 til kl. 17
• Hvørt ár hevur frítíðarskúlin tveir ráðleggingardagar. Hesar báðar dagar er stovnurin stongdur. Ymiskt er, nær ráðleggingardagarnir eru, men foreldur fáa boð í seinasta lagi seks vikur frammanundan

SAMANLAGT VIRKSEMI

Samanlagt virksemi merkir, at frítíðarskúlarnir í Tórshavnar kommunu leggja sítt virksemi saman, soleiðis at ein frítíðarskúli er opin í frítíðartíðini.

Frítíðarskúlarnir hava samanlagt virksemi hesi tíðarskeið í 2020 og 2021:

• Heystfrítíð 12. – 16. oktober 2020
• Páskafrítíð 29. – 31. mars 2021
• Summarfrítíð 21. juni – 2. juli 2021

Hevur tú tørv á tí, kann títt barn sostatt fáa pláss í samanlagda virkseminum, tá frítíðarskúlin í Hoyvík er stongdur.

FREISTIR AT BIÐJA UM PLÁSS Í SAMANLØGDUM VIRKSEMI:

• Heystfrítíð 14. september 2020
• Páskafrítíð 1. mars 2021
• Summarfrítíð 2. mai 2021

Gev gætur, at heldur tú ikki freistina, kunnu vit ikki tryggja tínum barni pláss í samanlagda virkseminum.

Hevur tú tørv á plássi í samanløgdum virksemi, kanst tú kunna teg nærri og søkja her:

Samanlagt virksemi í frítíðartíð í frítíðarskúla

Frítíðarskúlin hevur námsfrøðiligt virksemi hvønn gerandisdag frá kl. 11 til kl. 17. Tit eru vælkomin at vitja okkum. Vit vilja fegin, at tit boða okkum frá frammanundan.

Ring til frítíðarskúlaleiðaran, Bjarna Beder, á tel. 21 47 89, ella send ein teldupost til bjarnibe@torshavn.fo við boðum um, nær tit ynskja at vitja stovnin.

Børnini skulu hava matpakka við í skúla og frítíðarskúla. Vit eta matpakka hvønn dag umleið kl. 11.20 í skúlastovuni. Fáa børnini frí í skúlanum kl. 11.20, hava starvsfólkini í frítíðarskúlanum ábyrgdina av matarsteðginum. Fáa børnini frí seinni, hava lærararnir ábyrgdina av matarsteðginum.

Hvønn dag bjóða vit børnunum millummála frá kl. 13.30 til kl. 14.30. Vit bjóða fjølbroyttan og heilsugóðan millummála, millum annað frukt, grønmeti, bakstur og heitar rættir. Børnini fáa vatn at drekka aftur við millummálanum.

Vit skipa fyri fyrstuhjálparskeiðum til okkara starvsfólk við umleið tvey ára millumbilum.

Flestu starvsfólkini hava eisini verið á skeið at brúka hjartastartaran, sum er á økinum.

Foreldraráðið skipa vit fyri at styrkja trivnaðin og sambandið millum starvsfólk, heim, foreldur og børn á stovninum.

Sum limur í foreldraráðnum kanst tú gera títt fyri, at stovnurin er eitt gott stað at vera. Tú fært ávirkan og innlit í gerandisdagin á stovninum og í námsfrøðiliga leistin. Sum limur í foreldraráðnum ert tú eisini hugskotsgevi og ert við til at kjakast um menningina og átøk á stovninum.

Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Tað er umráðandi, at barnið veksur upp í einum tryggum og mennandi umhvørvi. Við hesum í huga bjóða vit eitt fjølbroytt námsfrøðiligt virksemi.

Vit leggja dent á fría spælið, sum hoyrir heima í einum frítíðarskúla. Hetta merkir eisini, at sjálvlæra er ein partur av gerandisdegnum.

Harafturat skipa vit fyri hugvekjandi, námsfrøðiligum tilboðum og ítrivum. Vit skipa til dømis fyri:

• Rørsluítrivum. Vit skapa karmar og skipa fyri rørsluligum virksemi bæði í náttúruni, í hallunum, í grannalagnum og í FIMI, sum vit vitja regluliga. Vit leggja dent á, at rørsla gongur fyri seg sum spæl
• Verkstovum av ymiskum slag
• Løtum við tøkni og spæli. Børnini fáa møguleika at spæla teldu og Playstation í einum sosialum felagsskapi og undir skipaðum umstøðum. Vit gera eisini smáar filmar, sum børnini luttaka í
• Túrum
• Náttúruupplivingum og mongum øðrum

Í flestu førum gera børnini sjálvi av, um tey luttaka í ávísum virksemi.

TÁ BARNIÐ KEMUR Á STOVN

Í 1. og 2. flokki hava vit eitt skipað samstarv við skúlan. Vit koma eftir børnunum í skúlastovuni, tá skúladagurin er liðugur. Tá geva vit eisini børnunum viðkomandi kunning um dagsins virksemi. Lærarar siga í sínum lagi starvsfólki á frítíðarskúlanum frá skúladegnum.

NÁMSFRØÐILIGA ARBEIÐIÐ

Frítíðarskúlin í Hoyvík bjóðar øllum børnunum eitt trygt, mennandi, avbjóðandi, stuttligt og læruríkt umhvørvi. Her verður barnið virðismett.

Vit leggja dent á dygd, nærveru og yrkisføri.

Hvønn dag bjóða vit børnunum alskyns virksemi, og tey velja sjálvi, hvat tey hava hug til at gera.

FORELDRASAMSTARV

Á stovninum leggja vit dent á gott og trygt foreldrasamstarv. Samskiftið og samstarvið millum foreldur og starvsfólk hava stóran týdning fyri trivnaðin hjá barninum.

Á hvørjum ári bjóða vit foreldrum til foreldrasamrøðu. Við skúlaársbyrjan í august ella september hava vit felags foreldrafund fyri øllum foreldrum at børnum í frítíðarskúlanum.

Á stovninum arbeiða 15-16 starvsfólk. Talan er bæði um námsfrøðingar og hjálparfólk.

Tú kanst kunna teg nærri um frítíðarskúlan á okkara Facebooksíðu.

Frítíðarskúlin í Hoyvík á Facebook

Við inngongdina til frítíðarskúlan er ein boðbók og krosskipanin hjá stovninum.

Í boðbókini kunnu vit skriva bæði fastar avtalur og avtalur fyri dagin.

Ein dygdarmennari úr Barna- og ungdómsdeildini hjá Tórshavnar kommunu kemur hvørt ár út til frítíðarskúlarnar í kommununi at eygleiða námsfrøðiliga innihaldið og umstøðurnar, sum námsfrøðiliga arbeiðið fer fram í.

Talan er um eitt skipað eftirlit, sum skal tryggja dygdina á hvørjum einstaka frítíðarskúla. Dygdarmennarin samskiftir síðani við frítíðarskúlaleiðaran og starvsfólkini um sínar eygleiðingar og um menningarmøguleikarnar.

Triðja hvørt ár skipar kommunan fyri einari kanning av trygdarviðurskiftunum á øllum frítíðarskúlaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Seinasta trygdareftirlit fór fram í 2018. Næsta eftirlitið verður í 2021.

Kommunalu húsavørðarnir hava dagliga eftirlitið við spæliplássunum.

Frítíðarskúlin í Hoyvík og frítíðartilboðið til 3. flokk í Hoyvík hava pláss fyri ávikavist 96 og 48 børnum.

Tú skalt nýta talgildu bókingarskipanina BARN til at bóka frítíðarskúlapláss.

Fyri at nýta bókingarskipanina, skalt tú rita inn við MínLykil, sum er ein trygg innritingarskipan. Hevur tú ikki MínLykil frammanundan, kanst tú stovna tær lykilin her:

Stovna MínLykil (verður umsitið av Elektron)

Bókingarskipanin er somuleiðis knýtt at postskipanini MínBoks. Til ber at bóka pláss uttan MínBoks, men kommunan nýtir MínBoks til at senda tær boð um tøk pláss. Av tí, at hesi tilboðini skulu svarast innan fimm dagar, er tað eitt gott hugskot at fáa tær MínBoks.

Fyri at stovna MínBoks skalt tú fyrst fáa tær MínLykil. Síðan ber til at rita inn á MínBoks.

Hevur tú ikki møguleika fyri at nýta bókingarskipanina BARN, kanst tú fylla umsóknarblaðið niðanfyri út og lata tað inn á Snarskivuni á Vaglinum í Tórshavn.

Fært tú ikki nýtt talgildu bókingarskipanina, noyðist tú at vera til staðar í Snarskivuni, meðan skipanin leitar eftir stovnsplássi fyri teg. Tí finnur skipanin hóskandi pláss, mást tú taka av stovnsplássinum og vátta beinanvegin. Orsøkin er, at eitt pláss, sum er tøkt, kann verða bókað hvørja løtu av foreldrum, sum sjálvi bóka pláss í skipanini.

Skriva títt barn inn í frítíðarskúla 

Umsókn um pláss til frítíðarskúla 

Her kanst tú kunna teg um galdandi reglurnar fyri upptøku av børnum til frítíðarskúlarnar í Tórshavnar kommunu:

Upptøkureglur

Gjøldini fyri frítíðarskúlapláss sært tú her:

Gjøld fyri frítíðarskúla

Sum foreldur kunnu tit søkja um fíggjarligt frípláss til barnið.

Hvørt frípláss verður játtað, og hvussu nógv verður játtað, veldst um tykkara inntøku. Tú kanst kunna teg nærri á síðu okkara um frípláss.

Søk um frípláss

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp frítíðarskúla