Frítíðarskúlin við Løgmannabreyt

Karlamagnusarbreyt 47
188 Hoyvík

Leiðari: Bogi Hansen
Tel. 25 34 70
bogiha@torshavn.fo

Lurta
Til lesiveik

Frítíðarskúlin við Løgmannabreyt

Frítíðarskúlin við Løgmannabreyt er ein ítróttafrítíðarskúli. Vit arbeiða við støði í námsfrøðiliga leistinum, sum kallast »námsfrøðiligur ítróttur«. Vit eru ein ítróttastovnur, og spæl, rørsla og námsfrøðiligur ítróttur eru kjarnan í gerandisdegnum hjá børnunum. Vit leggja dent á, at børnini eru virkin og eygleiðandi, og at tað, sum vit gera saman, skal geva børnunum møguleika at vera spontan og virkin.

Frítíðarskúlin liggur við endan á Karlamagnusarbreyt, og vit eru grannar hjá Giza-vøllinum. Vit hava góðar innan- og uttandura hentleikar, til dømis atgongd til høll, svimjihøll og FIMI. Eisini hava vit eitt Kveikingarhús við verkstaði, málaraverkstaði og ítrivsrúmi.

Í løtuni ganga 111 børn úr 1.-3. flokki á stovninum. 3. flokkur heldur til í egnum hølum, meðan 1. og 2. flokkur halda til í Frítíðarskúlanum. Ábyrgdarpersónar eru knýttir at hvørjum floksstigi.

Í løtuni arbeiða 12 ágrýtin starvsfólk á stovninum. Hesi eru við í at seta dám á frítíðarskúlan og koma hvør við sínum persónliga íkasti, soleiðis at børnini fáa ein einastandandi gerandisdag við hópin av rørslugleði.

Vit arbeiða við námsfrøðiligum ítrótti, og okkara motto er: "Ítróttur, spæl og rørsla". Tað merkir eisini, at vit, sum starvast á stovninum, eru fyrimyndir. Vit kunnu ikki eggja børnunum til rørslugleði uttan at røra okkum sjálvi.

Vit eru ein 100% roykfríur stovnur.



Um frítíðarskúlan
Upplatingartíðir

Mánadag til fríggjadag frá kl. 11.20 til kl. 17.

Samband

Stovnsleiðari

Bogi Hansen
Tel. 25 34 70
bogiha@torshavn.fo  

 

Samskipari hjá 1. og 2. flokki

Tel. 25 08 37

 

Samskipari hjá 3. flokki (Klubb)

Tel. 25 08 29

Afturlatingardagar í 2021
  • Allar vanligar halgidagar – stovnurin stongdur
  • Páskafrítíð 27. mars – 5. apríl – møguleiki fyri at melda til samanlagt virksemi í tríggjar dagar
  • Dýra biðidag 30. apríl – stovnurin stongdur
  • Grundlógardag 5. juni – stovnurin stongdur
  • Summarfrítíð vika 25 og 26 – møguleiki fyri at melda til samanlagt virksemi
  • Summarfrítíð vika 27 til 32 – stovnurin stongdur
  • Heystfrítíð 9. oktober – 17. oktober – møguleiki fyri at melda til samanlagt virksemi
  • Jólafrítíð 22. desember – 4. januar 2022 – stovnurin stongdur
  • Hvørt ár hevur skúlin, sum frítíðarskúlin hoyrir til, tveir serstakar frídagar. Teir dagarnar hevur frítíðarskúlin víðkaða upplatingartíð frá kl. 7.45 til kl. 17
  • Hvørt ár hevur frítíðarskúlin sjálvur tveir ráðleggingardagar. Hesar báðar dagar er stovnurin stongdur. Tað er ymiskt, nær ráðleggingardagarnir eru, men foreldur fáa boð frá stovninum í seinasta lagi seks vikur frammanundan

 

SAMANLAGT VIRKSEMI

Samanlagt virksemi merkir, at frítíðarskúlarnir í Tórshavnar kommunu leggja sítt virksemi saman, soleiðis at ein frítíðarskúli er opin í frítíðartíðini.

Frítíðarskúlarnir hava samanlagt virksemi hesi tíðarskeið í 2021:

  • Páskafrítíð 29. – 31. mars 2021
  • Summarfrítíð 21. juni – 2. juli 2021
  • Heystfrítíð 11. – 15. oktober 2021

Hevur tú tørv á tí, kann títt barn sostatt fáa pláss í samanlagda virkseminum, tá Frítíðarskúlin við Løgmannabreyt er stongdur.

 

FREISTIR AT BIÐJA UM PLÁSS Í SAMANLØGDUM VIRKSEMI:

  • Páskafrítíð 14. mars 2021
  • Summarfrítíð 4. juni 2021
  • Heystfrítíð 1. oktober 2021

Gev gætur, at heldur tú ikki freistina, kunnu vit ikki tryggja tínum barni pláss í samanlagda virkseminum.

Hevur tú tørv á plássi í samanløgdum virksemi, kanst tú kunna teg nærri og søkja her:

Samanlagt viksemi í frítíðartíð í frítíðarskúla

Vitja okkum

Tit eru vælkomin at vitja okkum og hoyra meira um okkara gerandisdag.

Stovnssøkjandi foreldur kunnu seta seg í samband við stovnsleiðaran, Morten Hust Petersen. Send ein teldupost til mortenh@torshavn.fo.

Til ber at bíleggja tíð til eina vitjan og kunning um námsfrøðiliga arbeiðið fríggjadagar millum kl. 10 - 11.

Matur og drekka

Børnini skulu hava matpakka við hvønn dag í skúlatíðini.

Tá børnini fáa frí í skúlanum kl. 11.20, eta vit matpakka saman við børnunum í flokshølunum til kl. 11.40. Aftaná fara vit út til kl. 12.

Vit bjóða millummála hvønn dag frá kl. 14.30 til kl. 15.15. Tá fáa børnini sær at eta í matkrókinum.

Trygdarskeið

Vit eru javnan á fyrstuhjálparskeiði. Seinasta skeið var á vári 2019.

Harumframt hava vit javnan okkara egnu klintriskeið og lívbjargaraskeið fyri at tryggja okkum, at trygdin er í hásæti, tá vit sigla í kajakk, snorkla, klintra og síga.

Foreldraráð

Foreldraráðið skipa vit fyri at styrkja trivnaðin og sambandið millum starvsfólk, heim, foreldur og børn á stovninum.

Sum limur í foreldraráðnum kanst tú gera títt fyri, at stovnurin er eitt gott stað at vera. Tú fært ávirkan og innlit í gerandisdagin á stovninum og í námsfrøðiliga leistin. Sum limur í foreldraráðnum ert tú eisini hugskotsgevi og ert við til at kjakast um menningina og átøk á stovninum.

Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Sí á korti

Námsfrøðiligur leistur
Soleiðis arbeiða vit

Í frítíðarskúlanum við Løgmannabreyt raðfesta vit útilívið høgt. Í dagligdegnum eru øll børnini og meginparturin av starvsfólkunum úti á spæliplássinum frá kl. 11.30 til kl. 12 (aftan á vit hava etið matpakka). Tveir spælskiparar skipa fyri ymsum námsfrøðiligum ítróttavirksemi, sum børnini kunnu luttaka í. Vit brúka alt útiøkið hvønn dag, alt árið. Náttúran rundan um okkum er eisini karmur fyri spæl og læring.

Við okkara námsfrøðiliga skipaða virksemi vilja vit styrkja trivnaðin, heilsuna og menningina hjá børnunum. Hetta gera vit við útgangsstøði í einstaka barninum og í teimum vinabondum, børnini knýta. Vit nýta hugtakið "at øva seg" fyri at eggja hugin hjá børnunum at læra, mennast og gerast sjálvbjargin.

NÁMSFRØÐILIGUR ÍTRÓTTARSTOVNUR

Á einum námsfrøðiligum ítróttastovni eru ítróttur, spæl og rørsla ein natúrligur partur av gerandisdegnum. Her er ivaleyst av plássi at folda seg út bæði inni og úti. Fysisku karmarnir eru innrættaðir soleiðis, at børnini kunnu røra seg á ymsan hátt í øllum rúmum. Her er alt frá tí meira villa og aktiva spælinum til tað meira róliga spælið, sum krevur hugsavnan og frið.

Fysisku karmarnir skulu styðja møguleikunum hjá børnunum at læra og geva teimum avbjóðingar til bæði kropp og sinn. Rúmini verða smidliga innrættað, og innbúgvið verður javnan flutt runt, soleiðis at rúmini eru væl egnað til spæl og at geva børnunum íblástur. Vit raðfesta somuleiðis at skapa smá rúm í stóra rúminum, sum stimbra hugsavnan.

Í høllini er millum annað air-track, hjúlbretti, motorikkbanar, bóltar, togendar, rimar og klatriveggur. Uttanfyri hava vit millum annað reiggjur, sandkassa, balansusúkklur, brekkur, PANA-bana, FIFA-vøll og eina tjørn. Vit hava eisini vátdraktir, stivlabuksur og útgerð til klatring, so børnini hava hópin av avbjóðingum og møguleikum.

Tú kanst lesa meira um, hvat tað merkir at vera ein ítróttasertifiseraður frítíðarskúli her:

Ítróttasertifisering av frítíðarskúlanum við Løgmannabreyt

Hvørji eru vit?

Á okkara námsfrøðiliga ítróttastovni starvast 12 starvsfólk. Tey eru javnan á skeiði í námsfrøðiligum ítrótti.

Starvsfólkini luttaka í "Kroppur hermir eftir kroppi" og stuðla upp undir spæl og aktivitetir, sum bjóða kroppinum av.

Tey virka eftir hesum leiðreglum:

  • "Ganga frammanfyri", ið merkir at stýra spæligongdini
  • "Ganga við síðuna av", ið merkir, at tey eru stuðlandi í spælinum og luttaka
  • "Ganga aftanfyri", ið merkir, at tey eygleiða fyri at vita, um børnini brúka tað, tey hava lært frammanundan

Ein námsfrøðiligur ítróttastovnur hevur eina námsfrøðiliga mannagongd. Bæði rutinurnar, tað spontana virksemið og planløgdu aktivitetirnir viga líka nógv.

Námsfrøðiligu starvsfólkini skulu leggja dent á menningarmøguleikarnar og førleikarnar hjá barninum at bera seg sjálvt í lívinum.

Í vikuni skipa vit ymiskar afturvendandi aktivitetir, sum styðja teimum seks læruætlanarevnunum og leggja dent á tað sosiala, kropsliga, sálarliga ella ta kognitivu menningina.

Summi miða miðvíst eftir at læra umvegis tónleik og dans, meðan onnur læra við málsligari venjing ella rørslumenning.

Felags fyri øll er, at endamálið er rørslugleði.

ForeldraGluggin
Hvat er ForeldraGluggin?

ForeldraGluggin er ein ókeypis app til snildfon, sum tú kanst brúka, um tú ert foreldur at dagstovnabarni í Tórshavnar kommunu.

Tænastan fevnir um dagstovnarnar og frítíðarskúlarnar í kommununi og verður brúkt til samskifti millum foreldur og dagstovn. Í ForeldraGlugganum kallar stovnurin til dømis inn til foreldraviðtalur og kunnar um gerandisdagin, og tað er somuleiðis her, tú boðar frá feriu: 

  • foreldur kunnu fylgja við í gerandisdegnum hjá børnunum
  • foreldur kunnu skráseta frí og frítíð hjá barninum
  • foreldur og stovnur kunnu senda boð sínámillum
  • stovnurin kann skjótt og lætt kalla inn til foreldraviðtalur og tiltøk
  • foreldur fáa trygga atgongd til myndir og filmsbrot av barninum

Appin verður í løtuni royndarkoyrd á fleiri dagstovnum. Tá ið allir stovnar hava lært seg at brúka ForeldraGluggan, fara foreldur eisini at kekka børnini inn og út, tá tey koma og fara.

Hví brúka vit ForeldraGluggan?

So hvørt sum Føroyar vórðu raktar av Covid-19 aldunum í fjør, gjørdist tað kommununi greitt, at okkum tørvar ein skjótan og tryggan samskiftisfarveg, sum er felags fyri alt dagstovnaøkið: boðini og tilmælini til foreldur vóru mong, og tey broyttust ofta. Talan var eisini mangan um bráðfeingisboð, ið vóru umráðandi at fáa skjótt út til øll foreldur.

Harafturat kom nýggja dátuverndarlógin í gildi í januar 2021, og sambært henni eiga vit øll at tryggja okkum, at persónsupplýsingar og myndir verða handfarnar á so tryggan hátt sum gjørligt. 


Tín persónligi gluggi

ForeldraGluggin verður tó ikki bara settur í verk fyri at geva stovnum ein farveg til bráðfeingisboð og tilmæli til foreldur. ForeldraGluggin er eisini partur av talgildingarætlanini hjá kommununi, sum millum annað hevur til endamáls at hækka kommunala tænastustøðið. Ítøkiliga er ForeldraGluggin, soleiðis sum orðið leggur upp til, ein lættur snarvegur hjá tær, sum ynskir at fáa skjótt og ómakaleyst innlit í gerandisdagin hjá tínum barni.

Tað er ein kend avbjóðing millum foreldur, at tað kann vera trupult at fáa rættiligt innlit í tann ofta stóra partin av gerandisdegnum, børnini eru á stovni. Børnini eru ikki altíð før fyri sjálvi at velja úr rúgvuni av upplivingum og greiða frá hendingunum í einum degi á stovni. Og foreldur hava viðhvørt knappa tíð at tosa og hyggja at myndum, tá tey koma eftir børnum sínum.

Higartil hava dagstovnar havt boðtalvur, facebookbólkar og teldur við myndum í gongini fyri at kunna foreldur um virksemið á stovninum. Dagstovnarnir hava eisini brúkt gott gamalt munnligt samskifti. ForeldraGluggin kemur ikki í staðin fyri munnliga samskiftið, men letur upp fyri fleiri miðvísum samskiftismøguleikum, soleiðis at tú sum foreldur hevur lætta atgongd til mangt av tí í gerandisdegnum, sum tú og barnið kunnu hava gagn av at tosa um. Taka vit hesa skipanina til okkum og læra okkum at brúka hana miðvíst, so bæði skipar og tryggjar hon samskiftið fyri okkum og kann samstundis vera við til at tryggja trivnaðin og sambandið millum foreldur og barn.       

Hvussu stovni eg ForeldraGluggan?

Soleiðis gert tú, um tú frammanundan hevur skrásett fartelefon og teldupost í BARN-skipanini

Hevur tú frammanundan skrásett títt fartelefonnummar og tín teldupostbústað í BARN-skipanini, kann stovnsleiðarin senda tær ein teldupost við einum leinki, tá ið barnið byrjar á stovninum. 

Í teldupostinum stendur: 

»Góði brúkari av ForeldraGlugganum

Fyri at kunna rita inn á ForeldraGluggan, skalt tú stovna brúkaranavn og loyniorð. Trýst á leinkið og vel brúkaranavn og loyniorð«

Tá ið tú trýstir á leinkið í teldupostinum og ritar inn, fært tú eina QR-kotu, sum tú skannar við snildfonini. So verður ForeldraGluggin tikin niður á tína telefon. 

Tá tú hevur gjørt hetta, kanst tú fara til stig 4 í vegleiðingini niðanfyri.

Fært tú ikki ein teldupost sendandi, mást tú sjálv stovna teg sum brúkara. Tað gert tú við at fylgja stig 1-3 í vegleiðingini niðanfyri.

 

Soleiðis gert tú, um tú ikki hevur skrásett fartelefon og teldupost í BARN-skipanini, ella um tú ikki fært teldupost frá stovninum

1. Stovna teg sum brúkara

Fært tú ikki ein teldupost sendandi við einari QR-kotu, mást tú sjálv stovna teg sum brúkara fyri at brúka ForeldraGluggan. Tað gert tú í bókingarskipanini BARN. Tað tekur áleið ein minutt at stovna seg sum brúkara.

Tú ritar inn í bókingarskipanina BARN við tínum Samleika. Hevur tú ikki fingið tær Samleikan, kanst tú bíleggja tær hann á heimasíðuni hjá Samleikanum. Tú ritar inn í bókingarskipanina BARN her: 

RITA INN Í BARN-SKIPANINA

Fá Samleikan (samleikin.fo) 

Tá tú hevur ritað inn í BARN-skipanina, skalt tú trýsta á spjaldrið við tínum egna navni. Hevur tú foreldramyndugleikan yvir barninum, eigur tú at síggja teigin »Stovna ForeldraGluggan« í høgra bredda niðanfyri á síðuni:

Her skalt tú:

  • velja eitt brúkaranavn
  • velja eitt loyniorð
  • upplýsa títt fartelefonnummar, sum verður brúkt, tá tú tekur appina í nýtslu fyrstu ferð

 

2. Tak appina niður á snildfonina

Far inn á App Store (um tú hevur iPhone) ella GooglePlay (um tú hevur Android) og leita eftir »ForeldraGluggin«. Tak síðan appina niður.

 

3. Skriva brúkaranavn og loyniorð

Tá ið tú hevur tikið appina niður, trýstir tú á appina fyri at lata hana upp. Nú verður tú biðin um at skriva brúkaranavnið og loyniorðið, tú valdi tær í BARN-skipanini. 

Tá tú hevur tøppað brúkaranavnið og loyniorðið inn, fært tú eini SMS-boð sendandi við einum trygdartali, sum tú skalt tøppa inn.

SMS-boðini við trygdartali verða bara send fyrstu ferðina, tú ritar inn - aftaná hetta tørvar tær bara at nýta brúkaranavnið og loyniorðið, tú valdi tær í BARN-skipanini.

 

4. Vel títt barn í appini og fyll kartotekskortið út

Hevur tú fleiri børn á stovni, sært tú byrjanarstavirnar hjá hvørjum barni í appini. Tú kemur inn á einstaka barnið við at trýsta á runda ikonið við byrjanarstavunum í. 

Nú trýstir tú niðast høgrumegin á ikonið »Meira«.


Síðan trýstir tú á »kartotekskort« næstniðast í valmyndini.


Her svarar tú spurningum um títt barn og velur, hvørji loyvi tú vilt lata. Gev gætur, at hesar upplýsingarnar eru neyðugar fyri at skipanin riggar og handfer upplýsingarnar rætt.

Á kartotekskortinum kanst tú velja, um tú vilt lata stovninum ymiskar fulltrúir ella ikki. Tað eru fulltrúir til:

  • at fara útferðir
  • svimja undir námsfrøðiligum eftirliti
  • at barnið kann koyrast í privatbili, lógliga íbundið trygdarbelti
  • at barnið, sambært munnligari avtalu, kann avheintast av øðrum

Somuleiðis kanst tú geva fulltrúir til myndir og video alt eftir, hvat tú ynskir. Tú kanst velja, um:

  • øll foreldur at børnum á stovuni hjá barninum skulu kunna síggja myndir og filmar av tínum barni
  • øll foreldur at børnum á stovninum hjá barninum skulu kunnu síggja myndir og filmar av tínum barni
  • myndir og filmar av barninum skulu kunna vísast á almennu heimasíðuni hjá stovninum

Aðrar upplýsingar skulu eisini gevast, um serlig viðurskifti og atlit skulu takast til sjúkur, kost, lívsneyðugan heilivág og ovurviðkvæmi.

Somuleiðis verður tú biðin um at upplýsa:

  • tryggingar
  • kunning um barnið
  • kunning um familjuna

 

Soleiðis fært tú appina á føroyskum

Tú kanst velja at brúka appina á føroyskum. Ynskir tú tað, skalt tú fara til »generelt« í stillingunum á sjálvari telefonini, velja »Sprog og område« og velja »føroyskt« sum mál.

Tú mást somuleiðis ansa eftir, at føroyskt eisini stendur ovast undir »foretrukken sprogrækkefølge« í yvirskipaðu stillingunum. 

Soleiðis boðar tú frá frí og frítíð

Fyri at kunna leggja arbeiðið til rættis á stovnunum, ynskja vit, at tú boðar frá, nær barnið heldur frí. Hesum boðar tú frá í ForeldraGlugganum.

Soleiðis boðar tú frá:

1. Lat ForeldraGluggan upp og rita inn

2. Trýst á »meira« niðast í høgra horni


3. trýst á »Frí og frítíð«


4. syrg fyri at swipe-knøtturin ovast er grønur


5. Vel fyrsta og seinasta dag í álmanakkanum og trýst á flugubeinið ovast í høgra horni

So er frítíðin skrásett. Hevur tú eina viðmerking til tína fráboðan, kanst tú skriva hana í teigin niðast. Minst til at trýsta á flugubeinið, tá tú ert liðug. 

Hvar samskifta vit um hvat?

UPPSLØG

Í uppsløgunum finnur tú kunning um gerandisdagin á stovninum. Tað kunnu vera lýsingar av námsfrøðiliga gerandisdegnum, tiltøk ella ítriv, sum fara fram í nærmastu framtíð, áheitanir um at hava regnklæðir við og tílíkt. Tað ber ikki til at gera viðmerkingar til uppsløg. 


BOÐ

Undir Boð sært tú samskiftið við ein ella fleiri úrvaldar móttakarar. Her hevur tú møguleika fyri at svara boðunum. Tað kann til dømis vera eini boð, har starvsfólkini ynskja at gera avtalu um eina foreldraviðtalu, ella tað kann vera eini boð við einum stuttum spurningi. 

Tá tú sendir eini boð til starvsfólkini á dagstovninum, verða boðini send til felags postkassan hjá stovninum. Øll viðkomandi starvsfólk eru knýtt at hesum postkassanum, og tey kunnu sostatt svara tínum boðum. 

Tað ber ikki til at senda boð til onnur foreldur á stovninum.


ÁLMANAKKI

Í álmanakkanum sært tú millum annað tiltøkini á stovninum, til dømis foreldrafundir, jólahald, páskahald og tílíkt. Her sært tú eisini, um tú ert boðin til foreldraviðtalu. 


MYNDASAVN

Í myndaskjáttuni sært tú allar tær mappur og myndir, sum eru deild við teg. Í mappuni »Myndir av tær og tínum børnum« verða allar myndir og øll filmsbrot savnað, sum hava títt barn frámerkt á teimum. 

Eg síggi ikki mítt barn í ForeldraGlugganum

Títt barn verður stovnað sjálvvirkið í ForeldraGlugganum við upplýsingum úr fólkayvirlitinum. Sostatt eru tað bara foreldur við foreldramyndugleika, sum síggja upplýsingar um barnið. 

Sært tú ikki barnið í ForeldraGlugganum kanst tú: 

  • spyrja stovnin, um barnið er skrásett í einari stovu á stovninum. Tá ið dagstovnurin hevur skrásett barnið í einari stovu, verður barnið sjónligt í appini, og tú kanst fylla kartotekskortið og tínar sambandsupplýsingar út

Sært tú ikki barnið, hóast barnið er skrásett á einari stovu, kanst tú: 

  • kanna um foreldramyndugleikin er rætt skrásettur í fólkayvirlitinum. Hetta gert tú við at ringja til fólkayvirlitið á tel. 30 20 10.
Dagligt samskifti
Afturlatnir bólkar á Facebook

Hvørt floksstig hevur ein afturlatnan bólk á Facebook, sum vit brúka til kunning og samskifti.

Hesir bólkarnir eru bara til foreldur og avvarðandi.

Okkara almenna Facebooksíða

Vit hava eisini eina almenna síðu á Facebook. 

Frítíðarskúlin við Løgmannabreyt á Facebook

Eftirlit og dygd
Námsfrøðilig dygd

Ein dygdarmennari úr Barna- og ungdómsdeildini hjá Tórshavnar kommunu kemur við jøvnum millumbilum út á frítíðarskúlarnar í kommununi at eygleiða námsfrøðiliga innihaldið og umstøðurnar, sum námsfrøðiliga arbeiði fer fram í.

Dygdarmennarin samskiftir síðan við frítíðarskúlaleiðaran og starvsfólkini um sínar eygleiðingar, og funnið verður fram til ítøkiligar menningarmøguleikar.

Talan er um skipaðar eygleiðingar (KIDS), sum skulu vera við til at tryggja, at vit framhaldandi arbeiða við, og savna okkum um, námsfrøðiligu dygdina í hvørjum einstøkum frítíðarskúla. KIDS er eitt viðurkent og granskingargrundað amboð til eftirmeting og menning av námsfrøðiligu dygdini á dagstovnum og frítíðarskúlum.

Eygleiðingarnar eru innanhýsis arbeiðsamboð til einstaka stovnin at brúka í sínum menningararbeiði.

Eftirlit við spæliplássi

Triðja hvørt ár skipar kommunan fyri einari kanning av trygdarviðurskiftunum á øllum frítíðarskúlaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Seinasta trygdareftirlit fór fram í 2018. Næsta eftirlitið verður í 2021.

Kommunalu húsavørðarnir hava dagliga eftirlitið við spæliplássunum.

Lyklatøl
Pláss á frítíðarskúlanum

Frítíðarskúlin við Løgmannabreyt hevur pláss fyri umleið 110 skúlabørnum.

Gjald og uppskriving til pláss í frítíðarskúla
Bóka pláss

Tú nýtir talgildu bókingarskipanina BARN, tá tú skalt bóka dagstovnapláss.

Fyri at nýta bókingarskipanina, skalt tú rita inn við Samleikanum, sum er ein trygg innritingarskipan. Hevur tú ikki Samleikan, kanst tú bíleggja tær hann her:

Fá Samleikan

Bókingarskipanin er somuleiðis knýtt at postskipanini MínBoks. Tú fært atgongd til tína MínBoks, tá tú hevur fingið Samleikan.

Hevur tú ikki møguleika fyri at nýta bókingarskipanina BARN, kanst tú fylla umsóknarblaðið niðanfyri út og lata tað inn á Snarskivuni á Vaglinum í Tórshavn. Tú noyðist tá at vera til staðar í Snarskivuni, meðan skipanin leitar eftir stovnsplássi fyri teg. Finnur skipanin hóskandi pláss, mást tú taka av stovnsplássinum og vátta beinanvegin. Orsøkin er, at eitt pláss, sum er tøkt, kann verða bókað hvørja løtu av foreldrum, sum sjálvi bóka pláss í skipanini.

Bóka pláss

Umsókn um pláss á dagstovni

Upptøkureglur

Her kanst tú kunna teg um galdandi reglurnar fyri upptøku av børnum til frítíðarskúlarnar í Tórshavnar kommunu:

Upptøkureglur

Frítíðarskúlagjøld

Gjøldini fyri frítíðarskúlapláss sært tú her:

Gjøld fyri frítíðarskúla

Frípláss

Sum foreldur kunnu tit søkja um fíggjarligt frípláss til barnið.

Hvørt frípláss verður játtað, og hvussu nógv verður játtað, veldst um tykkara inntøku. Tú kanst kunna teg nærri á síðu okkara um frípláss.

Søk um frípláss

Uppsøgn

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp frítíðarskúla