Margarinfabrikkin

Magnus Heinasonar gøta
100 Tórshavn
Tel. 30 21 19 ella 29 21 17
fabrikkin@torshavn.fo  

Dagstovnaleiðari: Salua Manai
Tel. 28 21 19
salua@torshavn.fo

Lurta
Til lesiveik

Margarinfabrikkin

Margarinfabrikkin er eitt virkishús fyri børn og ung úr 3. flokki til og við 17 ár.

Vit liggja mitt í miðbýnum í Havn, og økið rundan um okkum er fult av lívi allan sólarringin. Vit liggja mitt ímillum barnafamiljur, eldri íbúgvar, mentanarhús og skrivstovubygningar. Tískil kennist kennist sum, at lív altíð er rundan um okkum.

Margarinfabrikkin er skipað við fleiri felagshølum í miðhæddini, meðan verkstøðini eru á loftinum.

Í Margarinfabrikkini starvast 20 starvsfólk við ymiskum útbúgvingum. Her eru bæði námsfrøðingar, sjúkrarøktarfrøðingar, lærarar, tónleikarar og lesandi innan sosialvísindi, námsfrøði og lærarayrkið.

Okkara høvuðsførleiki er at skapa, stimbra og eggja børnum og ungum til at finna og menna sínar gávur og at gerast sunn, glað og virkin menniskju.



Um Margarinfabrikkina
Upplatingartíðir

BØRN 3. TIL 6. FLOKK

Mánadag til hósdag frá kl. 12 til kl. 17

Fríggjadag frá kl. 11.30 til kl. 17

 

UNG ÚR 7. FLOKKI TIL OG VIÐ 17 ÁR

Mánakvøld til hóskvøld frá kl. 18 til kl. 22

Fríggjakvøld frá kl. 19 til kl. 01

Leygarkvøld frá kl. 20 til kl. 02

Samband

Dagstovnaleiðari

Salua Manai
Tel. 28 21 19
salua@torshavn.fo  

 

Margarinfabrikkin

Tel. 29 21 17 ella 30 21 19

fabrikkin@fabrikkin.fo

Afturlatingardagar í 2020
  • Allar vanligar halgidagar – stovnurin stongdur
  • Páskafrítíð 6. – 8. apríl – møguleiki fyri at melda til samanlagt virksemi í tríggjar dagar 
  • Skírhósdag til 2. páskadag 9. – 13. apríl – stovnurin stongdur
  • Dýra biðidag – stovnurin stongdur
  • Grundlógardag 5. juni ­– stovnurin stongdur
  • Summarfrítíð vika 26 og 27 – møguleiki fyri at melda til samanlagt virksemi
  • Summarfrítíð vika 28 – 33 – stovnurin stongdur
  • Heystfrítíð 10. oktober – 17. august – møguleiki fyri at melda til samanlagt virksemi
  • Jólafrítíð 19. desember – 3. januar 2021 – stovnurin stongdur
  • Hvørt ár hevur skúlin, sum frítíðarskúlin hoyrir til, tveir serstakar frídagar. Teir dagarnar hevur frítíðarskúlin víðkaða upplatingartíð frá kl. 7.45 til kl. 17
  • Hvørt ár hevur frítíðarskúlin tveir ráðleggingardagar. Hesar báðar dagar er stovnurin stongdur. Ymiskt er, nær ráðleggingardagarnir eru, men foreldur fáa boð í seinasta lagi seks vikur frammanundan

 

SAMANLAGT VIRKSEMI

Samanlagt virksemi merkir, at frítíðarskúlarnir í Tórshavnar kommunu leggja sítt virksemi saman, soleiðis at ein frítíðarskúli er opin í frítíðartíðini.

Frítíðarskúlarnir hava samanlagt virksemi hesi tíðarskeið í 2020 og 2021:

  • Heystfrítíð 12. – 16. oktober 2020
  • Páskafrítíð 29. – 31. mars 2021
  • Summarfrítíð 21. juni – 2. juli 2021

Hevur tú tørv á tí, kann títt barn sostatt fáa pláss í samanlagda virkseminum, tá Margarinfabrikkin er stongd.

 

FREISTIR AT BIÐJA UM PLÁSS Í SAMANLØGDUM VIRKSEMI:

  • Heystfrítíð 14. september 2020
  • Páskafrítíð 1. mars 2021
  • Summarfrítíð 2. mai 2021

 

Gev gætur, at heldur tú ikki freistina, kunnu vit ikki tryggja tínum barni pláss í samanlagda virkseminum.

Hevur tú tørv á plássi í samanløgdum virksemi, kanst tú kunna teg nærri og søkja her:

Samanlagt virksemi í frítíðartíð í frítíðarskúla

Vitja okkum

Øll eru hjartaliga vælkomin at vitja í Margarinfabrikkini. Starvsfólk eru altíð klár at taka ímóti tykkum í vanligu upplatingartíðini.

Tit noyðast ikki at ringja fyri at biðja um tíð. Men hava tit tørv á einum práti áðrenn vitjanina, eru tit vælkomin at venda tykkum til leiðaran, Saluu Manai. Send ein teldupost til salua@torshavn.fo ella ring á tel. 28 21 19. Til ber eisini at senda ein teldupost til fabrikkin@torshavn.fo ella ringja á tel. 29 21 17 ella 30 21 19.

Matur og drekka

Hvønn dag gera starvsfólkini børnunum millummála. Margarinfabrikkin hevur eina matarskipan, ið hevur eitt brúkaragjald. Tað vil siga, at børnini gjalda, hvørja ferð tey keypa sær millummála. Hvør máltíð kostar 7 kr., og hvørt barnið eigur ein part um dagin.

Børnini kunnu hava reiðan pening við, men limir kunnu eisini stovna eitt matkort. Tað vil siga, at foreldrini rinda eitt gjald á matkortið. Matkortið er eitt fysiskt kort, sum liggur í Margarinfabrikkini, og sum starvsfólkini umsita. Hendan møguleikan hava vit valt, so børnini ikki noyðast at hava reiðan pening við sær dagliga, og fyri at foreldrini kunnu kenna seg trygg við, at børnini fáa ein góðan millummála hvønn dag.

Vit leggja stóran dent á at geva børnunum ein mettandi millummála. Millummálin kann til dømis vera ymiskar suppur við breyði, heimagjørd eplapitsa, jogurt, havragrýn, nudlur við høsnasalati, sandwich ella grønmetisspjót.

Trygdarskeið

Hetta manglar

Foreldraráð

Foreldraráðið skipa vit fyri at styrkja trivnaðin og sambandið millum starvsfólk, heim, foreldur og børn á stovninum.

Sum limur í foreldraráðnum kanst tú gera títt fyri, at stovnurin er eitt gott stað at vera. Tú fært ávirkan og innlit í gerandisdagin á stovninum og í námsfrøðiliga leistin. Sum limur í foreldraráðnum ert tú eisini hugskotsgevi og ert við til at kjakast um menningina og átøk á stovninum.

Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Sí á korti

Námsfrøðiligur leistur
Soleiðis arbeiða vit

OKKARA NÁMSFRØÐILIGI HUGBURÐUR

Á Margarinfabrikkini eru vit skiljandi og rúma ymiskleika. Vit arbeiða tilvitað fyri at skapa jalig sambond og stimbra sjálvsvirðið hjá børnunum og teimum ungu. Vit syrgja fyri at hava tey ungu so nógv við í gerandisvirkseminum og fyriskipaðu tiltøkunum, sum gjørligt. Hetta gevur teimum virðismiklar upplivingar av at hepnast.

 

Vit brúka fjølbroytta kreativitetin á Margarinfabrikkini sum okkara týdningarmesta námsfrøðiliga amboð, tí hetta hjálpir at menna skapandi gávurnar hjá børnunum og teimum ungu.

 

Margarinfabrikkin er eitt lívligt hús. Vit hava bæði skipað og spontan tiltøk. Vit eru sannførd um, at tey bestu hugskotini koma frá sjálvum børnunum og teimum ungu. Tí lurta vit altíð eftir teimum. Fyri at ganga teimum á møti og tryggja, at tey fáa orðið, hava vit millum annað barnafund eina ferð um mánaðin. Barnafundurin er demokratiskt skipaður, og øll hava møguleika fyri at siga sína hugsan.

 

Vit leggja okkum eftir at bjóða ymiskar verkstovur og aktivitetir gjøgnum árið. Verkstovurnar eru flest allar í húsinum, meðan onkur einkultur aktivitetur er aðrastaðni. Dømi um verkstovur eru køksfabrikk, barnayoga, seiðaberg, hipp hopp, krea, drama, spurnakapping og svimjing.

Margarinfabrikkin skipar eisini fyri fleiri árligum, almennum tiltøkum fyri bæði børn og ung. Vit skipa til dømis fyri: 

  • Talent, sum er ein talentkapping fyri børn. Hendan kappingin plagar at vera um heystið
  • BarnaJól, sum er eitt tiltak, sum Margarinfabrikkin skipar fyri í samstarvi við Visit Tórshavn. Tá hava vit opið hús við ymiskum verkstovum
  • SEMENT, sum er ein tónleikakapping fyri ung og vaksin. Øll kunnu luttaka
  • UMHVØRVISVEIÐU og MENTANARVIKU hjá Tórshavnar kommunu, sum Margarinfabrikkin altíð hevur ein aktivan leiklut í. Til dømis bjóða vit dagstovnum og skúlum at luttaka á umhvørvisveiðu. Á umhvørvisveiðu sleppir at brúka tína orku og læra eitt sindur um plantur, trø, at skilja burturkast og mangt annað
  • SummarNám, sum er ein summarskúli. Tá summarfrítíðin byrjar, skipar Margarinfabrikkin hvørt ár fyri einum summarskúla, sum vit rópa SummarNám. SummarNám er fyrst og fremst eitt tilboð til limirnar í Margarinfabrikkini, men hvørt ár hava onnur børn eisini verið við

Umhvørvisveiðuna skipa vit sum eina postaveiðu við ymiskum spurningum, sum snúgva seg um evnini í umhvørvisvikuni.

Eitt av endamálunum við umhvørvisveiðuni er, at børnini og tey vaksnu, sum eru við, gerast tilvitað um náttúruna. Ein partur av tiltakinum er upplýsandi, men endamálið er eisini, at børnini og tey vaksnu kunnu fáa nøkur áhugaverd prát við á vegnum.

 

Í Margarinfabrikkini hava vit virðing fyri hvørjum øðrum og fyri Margarinfabrikkini. Hetta merkir, at vit raðfesta ein jaligan atburð móti hvørjum øðrum, og at vit eru góð við Margarinfabrikkina. Øll, sum eru í Margarinfabrikkini skula hava eina kenslu av, at húsið er eitt gott og trygt stað at vera.

 

OKKARA KJARNUVIRÐIR

Okkara kjarnuvirðir eru:

  • Rúm – vit hava stórt menniskjaligt innlit, sum ger, at vit hava pláss fyri ymiskleika í Margarinfabrikkini

  • Frælsi – vit hava ta hugsjón, at Margarinfabrikkin er eitt friðskjól hjá børnum og ungum, og tí skulu tey hava møguleikan at velja til og frá og harvið skapa og skipa sín egna gerandisdag og samleika

  • Skemt – vit nýta skemt sum eitt námsfrøðiligt amboð fyri at menna sambond við børnini og tey ungu. Vit hava eina spælandi lærutilgongd. Í Margarinfabrikkini hava vit tað stuttligt saman

  • Felagsskapur – menniskjað mennist best í samspæli við onnur. Vit halda, at øll børn og ung hava rætt til vinir. Í felagsskapinum minka vit um einsemi. Vit vilja, at felagsskapurin skal virka fyri, at vit øll, bæði børn, ung og vaksin, hava fokus á solidaritet heldur enn einstaklingadyrkan

  • Kveikjan – vit vilja fegin stimbra, eggja og inspirera børnini og tey ungu sum koma í Margarinfabrikkina til at menna síni evni og gerast sunn, glað og virkin menniskju. Vit ynskja at stuðla upp undir, at børnini og tey ungu finna megi til at møta avbjóðingum. Vit eru tilvitað um at leggja dent á styrkir heldur enn veikleikar

 

HVUSSU GERA VIT?

  • Vit geva børnum og ungum frælsi við ábyrgd, tí tey taka lut í at mynda Margarinfabrikkina. Samstundis tillaga vit krøv og væntanir til tann einstaka

  • Vit hava tann hugburð, at vit øll eru gimsteinar, og í Margarinfabrikkini sleppa allir gimsteinar at skína

  • Við okkara vitan og virðing fyri menniskjanum syrgja vit fyri at skapa umstøður og møguleikar fyri, at børnini og tey ungu kunnu gera sær sínar egnu royndir, so tey uppdaga sínar egnu styrkir

  • Vit tora nærveruna við at skapa tíð og pláss til tann einstaka

  • Vit leggja oyra til teirra søgur, sum vit hava æruna av at vera partur av

  • Vit skapa umstøður til djúphugsni og at vera í løtuni. Tilgongdin er fyri okkum enn virðismiklari enn úrslitið
Hvørji eru vit?

Á stovninum starvast 20 starvsfólk. Talan er um námsfrøðingar, sjúkrarøktarfrøðingar, lærarar, tónleikarar og lesandi innan sosialvísindi, námsfrøði og lærarayrkið.

Dagligt samskifti
Heimasíða

Tú kanst kunna teg nærri um dagstovnin á heimasíðu okkara.

Heimasíðan hjá Margarinfabrikkini 

Tú kanst eisini fylgja við á okkara Facebookvanga.

Margarinfabrikkin á Facebook

Har kanst tú lesa meira um okkara vikuliga virksemi, hvussu barnið gerst limur, kostnað og mangt annað.

Vit leggja javnan myndir, tíðindi og annað tilfar út á okkara heimasíðu og Facebookvanga.

Eftirlit
Námsfrøðiligt eftirlit

Ein dygdarmennari úr Barna- og ungdómsdeildini hjá Tórshavnar kommunu kemur hvørt ár út til frítíðarskúlarnar í kommununi at eygleiða námsfrøðiliga innihaldið og umstøðurnar, sum námsfrøðiliga arbeiðið fer fram í.

Talan er um eitt skipað eftirlit, sum skal tryggja dygdina á hvørjum einstaka frítíðarskúla. Dygdarmennarin samskiftir síðani við frítíðarskúlaleiðaran og starvsfólkini um sínar eygleiðingar og um menningarmøguleikarnar.

Eftirlit við spæliplássi

Triðja hvørt ár skipar kommunan fyri einari kanning av trygdarviðurskiftunum á øllum frítíðarskúlaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Seinasta trygdareftirlit fór fram í 2018. Næsta eftirlitið verður í 2021.

Kommunalu húsavørðarnir hava dagliga eftirlitið við spæliplássunum.

Lyklatøl
Pláss í Margarinfabrikkini

Frítíðarskúlin í Margarinfabrikkini hevur pláss fyri umleið 150 skúlabørnum.

Gjald og uppskriving til stovnspláss
Bóka pláss

Tú skalt nýta talgildu bókingarskipanina BARN til at bóka frítíðarskúlapláss.

Fyri at nýta bókingarskipanina skalt tú rita inn við MínLykil, sum er ein trygg innritingarskipan. Hevur tú ikki MínLykil frammanundan, kanst tú stovna tær lykilin her:

Stovna MínLykil (verður umsitið av Elektron)

Bókingarskipanin er somuleiðis knýtt at postskipanini MínBoks. Til ber at bóka pláss uttan MínBoks, men kommunan nýtir MínBoks til at senda tær boð um tøk pláss. Av tí, at hesi tilboðini skulu svarast innan fimm dagar, er tað eitt gott hugskot at fáa tær MínBoks.

Fyri at stovna MínBoks skalt tú fyrst fáa tær MínLykil. Síðan ber til at rita inn á MínBoks.

Hevur tú ikki møguleika fyri at nýta bókingarskipanina BARN, kanst tú fylla umsóknarblaðið niðanfyri út og lata tað inn á Snarskivuni á Vaglinum í Tórshavn.

Fært tú ikki nýtt talgildu bókingarskipanina, noyðist tú at vera til staðar í Snarskivuni, meðan skipanin leitar eftir stovnsplássi fyri teg. Tí finnur skipanin hóskandi pláss, mást tú taka av stovnsplássinum og vátta beinanvegin. Orsøkin er, at eitt pláss, sum er tøkt, kann verða bókað hvørja løtu av foreldrum, sum sjálvi bóka pláss í skipanini.

Skriva títt barn inn í frítíðarskúla 

Umsókn um pláss til frítíðarskúla

Upptøkureglur

Her kanst tú kunna teg um galdandi reglurnar fyri upptøku av børnum til frítíðarskúlarnar í Tórshavnar kommunu:

Upptøkureglur

Limagjald og brúkaragjøld annars

Árliga limagjaldið er 800 kr. fyri børn í 3. flokki og 400 kr. fyri børn úr 4. flokki til og við 6. flokk.

Heldur enn at rinda eitt mánaðarligt gjald, rinda foreldrini eitt árligt limagjald. Vit hava brúkaragjøld til millummála, sum børnini eta og teldutíð, sum børnini nýta.

Børnini kunnu spæla teldu í mesta lagi ein tíma um dagin. Tíðin í teldurúminum er býtt soleiðis, at tey skriva seg á ein hálvan tíma í senn. Hesin hálvi tímin kostar 5 kr. Hetta kann gjaldast annaðhvørt við reiðum peningi ella við einum teldukorti, ið virkar á sama hátt sum matkortið. Tað vil siga, at foreldrini kunnu rinda eitt gjald inn á eitt teldukort til barnið, sum starvsfólkini síðani umsita. Vit boða frá, tá kortið er um at verða tømt.

Vit geva foreldrum nærri kunning um ársgjald og brúkaragjøld, tá árið byrjar.

Frípláss

Sum foreldur kunnu tit søkja um fíggjarligt frípláss til barnið.

Hvørt frípláss verður játtað, og hvussu nógv verður játtað, veldst um tykkara inntøku. Tú kanst kunna teg nærri á síðu okkara um frípláss.

Søk um frípláss

Uppsøgn

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp frítíðarskúla