Leita

Lat aftur

Tema

Á flot við Westward Ho 2021

Aftur í ár fara 6. flokkarnir í Tórshavnar kommunu á flot við Westward Ho.

Á fiskitúrinum læra næmingarnir um sjógv og fiskiskap. Teir fara at kappast um, hvør flokkur fær flest fiskar, og hvør næmingur fær størsta fiskin.

Lurta

Til lesiveik

Á flot við Westward Ho 2021

Tað er vorðið fastur táttur, at 6. flokkarnir í kommununi sleppa ein fiskitúr við sluppini Westward Ho. Eins og undanfarin ár er tilboðið í ár skipað sum ein fiskikapping, sum samstundis gevur lærarum tilfar til lærugreinirnar Heimkunnleiki og Náttúra & tøkni.

Túrarnir í 2021 verða frá 25. august til 7. september. Foreldur, ommur og abbar eru vælkomin við. Niðanfyri kanst tú lesa um fiskitúrin og síggja myndir frá undanfarnum kappingum. Ert tú lærari, kanst tú eisini kunna teg um tøku fiskidagarnar og melda flokkin til. Á síðuni kunnu tit eisini kunna tykkum um, hvussu tit kunnu fyrireika tykkum best til túrin.

Soleiðis teknar tú teg

Finn eina tøka tíð

Niðanfyri sært tú, hvørjar dagar og klokkutíðir eru tøkar. So hvørt sum bíleggingarnar koma inn, síggjast tær í hesum yvirlitinum.

Dato	Fyrrapart kl. 7.45-12	Seinnapart kl. 12.45-17
25/8	Bílagt	Bílagt

26/8	Bílagt	Bílagt

27/8	Bílagt	Bílagt

30/8	Bílagt	Bílagt

31/8	Bílagt	Bílagt

1/9	Bílagt	Bílagt

2/9	Bílagt	Bílagt

3/9	Bílagt	Bílagt

6/9	Bílagt	Bílagt

Soleiðis meldar lærarin (akkerslærarin) flokkin til

Tá tú hevur funnið eina hóskandi tíð í talvuni omanfyri, kanst tú tekna tín flokk til kappingina við at trýsta á grøna knøttin niðanfyri og fylla teigarnar út.

BÍLEGG TÚR VIÐ WESTWARD HO

Gjald

Fiskitúrurin kostar kr. 1000 fyri hvønn 6. flokk í Tórshavnar Kommunu. Skúlin fær sendandi rokning frá Westward Ho og rindar gjaldið við at flyta upphæddina á kontu 6460 – 172.136.6 í BankNordik.

Um veðrið ikki er til vildar

Er veðrið ikki til vildar, fær lærarin boð í seinasta lagi kvøldið fyri. Næmingarnir og foreldur fáa síðan boð frá læraranum, og so avtala vit eina nýggja tíð.

Hevur tú spurningar?

Hevur tú spurningar, ert tú vælkomin at venda tær til Claus Reistrup á tel. 55 50 37 ella á teldupost claus.reistrup@icloud.com.

Yvirlit yvir bílagdar fiskitúrar 2021

Í yvirlitinum niðanfyri sært tú, nær túrarnir hjá ymisku skúlunum eru:

Bílagdir fiskitúrar 2021

Westward Ho

Bara tvinnar siglandi sluppir eru eftir av teimum umleið 150 sluppunum, føroyingar keyptu úr Stóra Bretlandi frá 1870–unum og fram. Onnur er Johanna í Vági, við havnakenningartekni TG 326, og hin er Westward Ho í Tórshavn við havnakenningartekni TN 54.

Tórshavnar kommuna hevur átt Westward Ho síðan 2005. Tað er áhugafelagsskapurin Sluppvinir, sum rekur og heldur sluppina viðlíka.

Sluppvinirnir hava skipað fyri fiskikapping fyri 6. flokkunum í Tórshavnar kommunu síðan 2009.

Tú kanst lesa meira um sluppina og áhugafelagsskapin Sluppvinir her:

Westward Ho og Sluppvinir

Lærdómur og íblástur áðrenn og aftaná túrin

Ein fiskitúrur við Westward Ho kann fyrireikast í lærugreinini Náttúra & tøkni. Næmingarnar kunnu til dømis arbeiða við evnunum »fiskur«, »sjógvur« og »veiðihættir« sum fyrireiking til túrin.

Tann meira verkligi parturin gongur fyri seg umborð á Westward Ho. Við at samansjóða tað ástøðiliga og tað verkliga gerst undirvísingin meira ítøkilig og spennandi.

Er veiðan góð, ber til at nýta fiskin í lærugreinini Heimkunnleika. Næmingarnir kunnu til dømis gera knettir og frikadellur burturúr fiskinum. Er fongurin góður, kunnu næmingarnir eisini taka nakrar fiskar heimvið.

Næmingar kunnu sum fyrireiking granska toskatalvuna og talvuna við vanligastu fiskasløgunum undir Føroyum. Talvurnar finna tit niðanfyri:

Vanlig fiskasløg undir Føroyum

Toskatalvan 2021

Leita tær íblástur úr Sankta Frans Skúla

Næmingarnir í Sankta Frans Skúla, sum fara at fiska, gera pilkar og beitir til túrin saman við lærarunum. Navnið á einstaka næminginum verður síðan sett á hvørt settið av pilkum og beitum. Hetta hava næmingarnir við, tá ið teir fara at fiska.

Aftaná fiskitúrin fara næmingarnir í køkin, har teir flekja fiskin og steikja fløk. Síðan eta næmingarnir døgurða saman, og hevur flokkurin fingið nógvan fisk, fáa lærararnir í skúlanum eisini ein bita.

Trýst á myndina

Fyrireiking

Hvussu fyrireika vit okkum best til fiskitúrin?

Á vári 2021 eru umboð fyri manningina á Westward Ho til reiðar at koma framvið í flokkunum, sum fara at fiska við Westward Ho í august og september mánaði. Vit greiða fegin eitt sindur frá skipinum, vísa myndir og svara annars spurningum um skipið og fiskitúrin.

Westward Ho hevur eisini eina avtalu við ein veitara, ið selur ein »fiskapakka« til flokkarnar, sum fara út við Westward Ho at fiska. Í pakkanum eru:

100 m. nylon 0.7 mm/0,80 mm
1-2 pk. svøvlar 3/0, 10 eintøk
1-2 pk. svøvlar v/hekti, 10 eintøk
2 pk. beitihúkar 6/0
10 eintøk av gummirækjum 7/10
10 eintøk av húkum 7/0-8/0
mappa til alla útgerðina

Pakkin á myndini kostar umleið 300 kr., men hann kann tillagast eftir tørvi hjá flokkinum. Næmingarnir kunnu í flokkinum gera teymar, pilkar og annað fyri á tann hátt at fyrireika fiskitúrin.

Um fiskitúrin

Luttakaralisti skal útflýggjast skiparanum

Fullfíggjaður navnalisti við øllum luttakarum hjá flokkinum, t.e. næmingum, lærarum, foreldrum, abbum og ommum, skal latast skiparanum, áðrenn loyst verður. Akkerslærarin ger luttakarayvirlitið og handar skiparanum tvey eintøk av luttakaralistanum.

Yvirlit yvir bílagdar fiskitúrar 2021

Tú sært, nær túrarnir hjá ymisku skúlunum eru í yvirlitinum niðanfyri:

Bílagdir fiskitúrar 2021

Trygd

Allir næmingar skulu vera í flótivesti, meðan teir eru umborð. Westward Ho hevur flótivestar til øll.

Áðrenn vit loysa, og meðan vit sigla út á fiskimið, kunnar manningin næmingar, lærarar og avvarðandi um trygdina umborð. Manningin kunnar millum annað um, hvørjar skipanir og mannagongdir eru, um eitthvørt óvanligt hendir. Kunningin tekur umleið 10 minuttir.

Næmingar, lærarar og avvarðandi eru fevnd av tryggingini hjá sluppini.

Matur og drekka

Næmingarnir kunnu hava matpakka og okkurt drekkandi við. Vit mæla staðiliga til, at næmingarnir hava góðan matpakka við uttan ov nógv søtmeti.

Skaffigreiðir eru umborð.

Flokkurin ruddar eftir sær, og lærarin, ið hevur ábyrgdina av flokkinum, sær til, at hetta fer fram á skilagóðan hátt.

Gott at hava við sær

Tað kann vera hent hjá næmingunum at hava við sær:

knív
myndatól
tráðu

Hvussu verður veðrið?

Vilt tú kanna veðurforsøgnirnar, kanst tú finna tær á heimasíðunum niðanfyri:

Veðrið í Tórshavn sambært norsku veðurstovuni yr.no (yr.no)

Veðrið í Tórshavn sambært donsku veðurstovuni DMI (dmi.dk)

Hvar fiska vit?

Vit royna fiskimið og plinkar á nærleiðunum, mest í Nólsoyarfirði. Tó er ongantíð meira enn umleið ein hálvur tími at sigla á fiskimið, og tað sama heimaftur.

Á flot við Westward Ho í august 2020

KAPPINGIN OG VINNINGAR

Fiskikappingin

Fiskitúrarnir eru skipaðir sum ein fiskikapping millum 6. flokkarnar í Tórshavnar kommunu.

Hvør flokkur fiskar í umleið tveir tímar. Tann flokkurin, sum fær flest fiskar, vinnur kappingina og fær handað eitt vinnarasteyp. Steypið verður handað á viðkomandi skúla, og tað er borgarstjórin í Tórshavnar kommunu, sum handar steypið.

Vit fiska í bakborðs síðu við tráðu og pilki, og í mesta lagi 12 tráður kunnu vera úti í senn. Fiskur minni enn 25 cm telur ikki við og verður sleptur út aftur.

Skiparin skrásetir talið av fiskum og vektina á størsta fiskinum.

Størsti fiskurin og flestu fiskarnir

Tann av øllum næmingunum, sum fær størsta fiskin í 2021, vinnur eina tráðu, sum hann fær handað í september mánaði. Veitari letur og handar næminginum tráðuna.

Tann flokkurin, sum fær flest fiskar, fær í september mánaði handað steyp til ognar. Tað er borgarstjórin í Tórshavnar Kommunu, ið handar flokkinum vinnarasteypið.

Vinnarar síðan 2009

Fiskikappingin hevur verið fastur táttur síðan 2009. Hesir skúlar hava vunnið fiskikappingina:

2009 Argja skúli
2010 Argja skúli
2011 Hoyvíkar skúli, 6.a
2012 Sankta Frans skúli, 6.a
2013 Sankta Frans skúli, 6.b
2014 Hoyvíkar skúli, 6.a
2015 Skúlin á Fløtum, 6.e
2016 Sankta Frans skúli, 6.a
2017 Skúlin á Argjahamri
2018 Sankta Frans skúli, 6.b
2019 Kollafjarðar skúli
2020 Kollafjarðar skúli
2021 Sankta Frans skúli, 6.a

Úrslit 2021

Westward Ho hevur í ár siglt 16 túrar við 6. flokkunum í Tórshavnar kommunu. Úrslitið av fiskikappingini 2021 gjørdist, at tað var Sigbjartur í 6.b í Skúlanum á Fløtum, sum fekk størsta fiskin. Fiskurin vigaði 3,1 kg.

Flest fiskar fekk 6.a í Sankta Frans. Tað eydnaðist flokkinum at fiska 41 fiskar.

ÚRSLIT

Guli skúlin	36 fiskar
Skúlin á Argjahamri, 6.b	30 fiskar
Skúlin á Løgmannabreyt, 6.b	30 fiskar
Lítliskúli	34 fiskar
Sankta Frans, 6.b	11 fiskar
Skúlin á Løgmannabreyt, 6.a	26 fiskar
Sankta Frans, 6.a	41 fiskar
Hoyvíkar skúli, a-bólkurin	5 fiskar
Skúlin á Fløtum, 6.a	15 fiskar
Skúlin á Fløtum, 6.d	33 fiskar
Eysturskúlin, 6.a	15 fiskar
Eysturskúlin, 6.b	11 fiskar
Velbastaðar og Kaldbaks skúli, 6.fl.	23 fiskar
Skúlin á Fløtum, 6.b	31 fiskar
	Sigbjartur: 3,1 kg.
Skúlin á Argjahamri, 6.a	23 fiskar
Kollafjarðar skúli, 6.fl.	29 fiskar