Lat aftur
Tema
Skúlainnskrivingin 2022
Skúlainnskrivingin er tøk frá 15. desember til 16. januar
Skúlainnskrivingin er tøk frá 15. desember til 16. januar

Her kanst tú lesa um, hvat tú skalt hava klárt fyri at rita inn í skipanina, og hvussu tú ber teg at við at skriva títt barn inn í skúla.

Lurta

Skúlainnskrivingin 2022

Skúlainnskrivingin letur upp 15. desember 2021. Talgilda innskrivingin ber millum annað í sær, at tú sum foreldur mást bíleggja tær Samleikan frammanundan.

Gev gætur, at innskrivingardagurin ikki hevur nakað at siga fyri, um títt barn verður upptikið í skúla. Tað hevur sostatt einki at siga, hvør skrivar sítt barn inn fyrst. Tú skalt bara syrgja fyri at skriva barnið inn, áðrenn freistin er farin. Innskrivingarfreistin er 16. januar 2022.

Skriva inn í skúla

Á hesari síðuni greiða vit tær frá, hvussu tú ber teg at við at skriva barnið inn í skúla. Tú kanst tó byrja alt fyri eitt við at bíleggja tær Samleikan, sum krevst fyri at rita inn í skipanina og skriva barnið inn í skúla. 

Fá Samleikan (samleikin.fo)

 

Seks nýggj grundupptøkuøki fyri skúlarnar

Tórshavnar kommuna hevur í mong ár havt frítt skúlaval. Fría skúlavalið hevur tó verið treytað av, at tilgongdin til einstøku skúlarnar ikki er ov stór. Tá ið tilgongdin til ein skúla er vorðin ov stór, hava leiðreglurnar fyri upptøku av næmingum tikið við. Hendan treytin er framvegis galdandi.

Í ár eru tó seks nýggj grundupptøkuøki løgd afturat upptøkureglunum. Broytingin kom í gildi 15. november 2021 og ber í sær, at tá tilgongdin er ov stór til ein ávísan skúla, so hyggja vit fyrst at, um barnið er skrivað inn áðrenn freistina, og um barnið býr í upptøkuøkinum hjá skúlanum. Í øðrum lagi hyggja vit at, um barnið hevur systkin í skúlanum, gongur í forskúla ella um serlig atlit eru at taka. 

Á kortinum niðanfyri sært tú, hvar grundupptøkuøkini hjá skúlunum eru. Tøppa tín bústað inn í leititeigin á kortinum, so sært tú, hvønn skúla tit hoyra til.

Kortið við upptøkuøkjunum sært tú í fullari stødd her: 

Upptøkuøki fyri skúlarnar í Tórshavnar kommunu (arcgis.com)

Tú kanst lesa meira um nýggju grundupptøkuøkini her: 

Seks nýggj upptøkuøki til skúlarnar

Soleiðis fyrireikar tú teg
Bílegg tær Samleikan

Byrja við at bíleggja tær Samleikan, sum krevst fyri at rita inn í bókingarskipanina. Tú bíleggur Samleikan her:

Fá Samleikan (samleikin.fo)

Hevur títt barn ikki eitt p-tal?

Títt barn má hava eitt føroyskt p-tal, tá tú skrivar barnið inn í skúla. Hevur títt barn ikki fingið eitt p-tal, kanst tú útvega barninum eitt sonevnt TK-tal, sum tú kanst brúka til innskrivingina.

Hevur tú Samleikan, kanst tú søkja um TK-tal á Vanganum. 

Søk um TK-tal á Vanganum

Hevur tú ikki skrásett tær Samleikan, ið krevst fyri at søkja á Vanganum, kanst tú gera tað á heimasíðuni hjá Samleikanum.

Fært tú av onkrari orsøk ikki nýtt Vangan, kanst tú fylla út umsóknarskjalið niðanfyri og senda tað til torshavn@torshavn.fo ella lata tað inn á Snarskivuni á Vaglinum 11 í Tórshavn. Sendir tú umsóknina inn sum teldubræv, skalt tú minnast til at viðmerkja »Umsókn um TK-tal« í evnisteigin.

Tað er ein fyrimunur at søkja á Vanganum, tí samskiftið á Vanganum er bæði skjótari og tryggari. Á tínari vangasíðu hevur tú harafturat møguleika fyri at fylgja við í viðgerðargongdini.

Fá Samleikan (samleikin.fo)

Søk um TK-tal

Tosa við barnagarðin, um tú ivast

Ivast tú í, um títt barn er búgvið at fara í skúla, ella um tað eigur at fara í forskúla fyrst, kanst tú altíð spyrja leiðaran og námsfrøðingarnar í barnagarðinum um skiftið til skúla. Summir barnagarðar hava mannagongdir fyri, hvussu børnini best kunnu fyrireikast til at fara í skúla.

Gev gætur, at innskriving í skúla er uppsøgn av barnagarðinum

Áðrenn tú skrivar títt barn inn í forskúla ella skúla, mást tú gera tær greitt, at innskriving í skúla merkir, at títt barn samstundis verður sagt úr sínum dagstovni. Eitt barn fær ikki staðið innskrivað í barnagarði og skúla í senn.

Tað ber ikki til at ógilda uppsøgnina av dagstovnaplássinum. Angrar tú uppsøgnina, mást tú søkja dagstovnapláss av nýggjum í bókingarskipanini. 

Vel skúla, áðrenn tú ritar inn

Tað er skilabest, at tú tekur avgerðina um skúla, áðrenn tú ritar inn í skipanina. Tí skipanin er ein bókingarskipan, sum fyrst og fremst er gjørd til at avgreiða innskrivingar, heldur enn at kunna um stovnar.

Har eru fleiri ymisk viðurskifti, sum kunnu gera av, hvønn skúla foreldur velja. Summi foreldur velja til dømis eftir staðseting, onnur í mun til um systkin frammanundan ganga í skúlanum meðan onnur leggja dent á, at skúlin bjóðar forskúla, skúla og frítíðarskúla. Summi foreldur velja eisini út frá tí, tey hoyra um frálæruna og námsfrøðina á stovninum. Gev tó gætur, at seks nýggj grundupptøkuøki eru løgd afturat leiðreglunum fyri upptøku av næmingum til skúlarnar, og at hesar upptøkureglurnar taka við, tá tilgongdin til einstøku skúlarnar er ov stór. Tú kanst lesa ella taka leiðreglurnar niður niðanfyri.  

Á síðu okkara »Finn skúla« sært tú eitt yvirlit yvir skúlarnar í Tórshavnar kommunu. Í yvirlitinum finnur tú eisini leinki til heimasíðurnar hjá skúlunum, so tú kanst kunna teg um virksemið og tilboðini á skúlunum.

Leiðreglurnar fyri upptøku av næmingum verða endurskoðaðar í løtuni. Tær verða tøkar aftur, tá viðgerðin er liðug.  

Finn skúla

Hvør kann skriva eitt barn inn í skúla?

Fyri at skriva títt barn inn í ein skúla, mást tú:

  • Vera búsitandi í Tórshavnar kommunu
  • Hava foreldramyndugleikan yvir barninum
  • Hava sama bústað sum barnið 
Soleiðis gert tú
Rita inn við Samleikanum

Tú ritar inn í bókingarskipanina við Samleikanum, sum er ein trygg innritingarskipan.

Skriva inn í skúla

Hevur tú ikki longu stovnað tær Samleikan, kanst tú gera tað á heimasíðuni hjá Samleikaum. 

Bókingarskipan okkara er somuleiðis tengd at postskipanini MínBoks. Bókingarskipanin sendir tær kvittanir fyri tað, tú hevur gjørt í skipanini. Tá tú hevur stovnað tær Samleikan, fært tú samstundis atgongd til tína MínBoks á Vanganum. 

Fá Samleikan (samleikin.fo)

Vel spjaldrið við navninum á barninum

Í erva á byrjunarsíðuni sært tú eitt spjaldur við navninum á tínum barni. Trýst á navnið og síðan á yvirskriftina »BARN«, so sleppur tú framat innskrivingarmøguleikunum.

 

Vel røttu dagfestingina í álmanakkanum

Tá tú hevur trýst á spjaldrið við navninum á tínum barni og yvirskriftina »BARN«, fert tú undir »Sjálvavgreiðsluna« og trýstir á grøna knøttin »Finn pláss til«.

Nú skalt tú í álmanakkanum áseta dagfestingina til 16. august 2022. Tað er umráðandi, at tú ásetir rætta byrjanardagin, tí annars fært tú ikki røttu valmøguleikarnar fram á skíggjan.

Finn rætta tilboðið í listanum

Beint undir álmanakkanum kanst tú velja, um tú vilt skriva barnið inn í ein ávísan skúla, ella um tú vilt leita millum allar stovnar og skúlar í kommununi. Loyp hendan partin um og far beint niður til knøttin »Vel stovn« og trýst á hann.

Tá tú hevur trýst á »Vel stovn«, sært tú allar valmøguleikarnar á einum lista. 

Listin kann tykjast trupul at fáa skil á í fyrstu atløgu. Tí listin fevnir bæði um býlingshús, dagstovnar, forskúlar, skúlar og frítíðarskúlar til 1. 2. og 3. flokk. Tá tú skalt skriva barnið inn í skúla, skalt tú tó bara skrulla niður til teigarnar, ið byrja við »Innskriving«. Her finnur tú tann forskúlan, skúlan og frítíðarskúlan, tú leitar eftir. Skúlarnir eru skipaðir eftir stavraðnum. Síðan velur tú júst tað tilboðið, tú ætlar tær.

Tú kanst velja at skriva barnið inn til fylgjandi tilboð:

  • Forskúla
  • Forskúla og frítíðarskúla
  • Frítíðarskúla hjá forskúla
  • Skúla
  • Skúla og frítíðarskúla 1. og 2. flokkur
  • Frítíðarskúla hjá 3. flokki

Tá tú hevur valt rætta tilboðið, leitar skipanin eina løtu, til plássið er funnið.

Fyll sambandsupplýsingarnar út og vátta innskriving

Tá tú hevur valt rætta tilboðið, letur nýggjur gluggi seg upp, og tú verður spurd um at fylla út nakrar teigar við sambandsupplýsingum hjá hinum foreldrinum.

Tá tú hevur fylt sambandsupplýsingarnar út og trýstir á »goym«, tekur skipanin samanum tað, tú hevur valt í skipanini. 

Gev gætur, áðrenn tú trýstir á goym: skrivar tú eitt barn inn í forskúla ella skúla, sum gongur í barnagarði, skalt tú vita, at plássið í barnagarðinum verður sagt upp, tá tú trýstir á »goym«. Orsøkin er, at tað letur seg ikki gera at hava pláss í barnagarði og forskúla ella skúla í senn.

Tá tú skrivar barnið inn í skúla frá 16. august 2022, verður plássið í barnagarðinum sagt upp við virknað frá 15. august 2022. Hetta verður eftirfylgjandi rættað av umsitingini til 31. juli 2022. Angrar tú, at tú hevur sagt barnagarðsplássið upp, og ynskir tú at fáa pláss í barnagarði aftur, mást tú bóka dagstovnapláss av nýggjum í bókingarskipanini.

Skúlar í Tórshavnar kommunu

Á síðu okkara »Finn skúla« finnur tú eitt yvirlit yvir allar fólkaskúlarnar í Tórshavnar kommunu. Her finnur tú eisini leinki til heimasíðurnar hjá skúlunum, so tú kanst kunna teg um einstøku skúlarnar.

Á síðu okkara »Skriva inn í forskúla« sært tú eitt yvirlit yvir forskúlarnar í kommununi. Her sært tú eisini, hvat tú rindar fyri forskúla.

Tað er skilagott, at tú veitst, hvønn skúla tú skalt velja, áðrenn tú ritar inn í bókingarskipanina, tí skipanin er meira ein bókingarskipan enn ein kunningarskipan.

Tá tilgongdin til ein skúla er ov stór, taka leiðreglurnar fyri upptøku av næmingum til fólkaskúlarnar við. Tað merkir, at vit luta avmarkaðu plássini út sambært raðfestum leiðreglum, sum tú finnur leinki til niðanfyri.

Finn skúla

Skriva inn í forskúla 

Leiðreglurnar fyri upptøku av næmingum verða endurskoðaðar í løtuni. Tær verða tøkar aftur, tá viðgerðin er liðug.  

Frítíðarskúlar í Tórshavnar kommunu

Á kortinum niðanfyri sært tú allar frítíðarskúlarnar í Tórshavnar kommunu. Tøppa tín bústað inn í leititeigin á kortinum, so sært tú, hvør frítíðarskúli er tættastur tínum bústaði.

Á listanum niðanfyri sært tú, hvørjar skúlar einstøku frítíðarskúlarnir eru knýttir at. Í listanum finnur tú eisini leinki til heimasíðurnar hjá frítíðarskúlunum, so tú kanst lesa um virksemið og námsfrøðiliga leistin í frítíðarskúlanum.

Soleiðis eru frítíðarskúlarnir knýttir at forskúlum og skúlum
Eysturskúlin

Børn, sum ganga í skúla í Eysturskúlanum, kunnu ganga í frítíðarskúla í Frítíðarskúlanum Smílibýlið.

Børn, sum ganga í 3. flokki í Eysturskúlanum, kunnu ganga í frítíðarskúla í Margarinfabrikkini.

Heimasíðan hjá Frítíðarskúlanum Smílibýlið

Heimasíðan hjá Margarinfabrikkini

Frískúlin í Havn

Børn, sum ganga í Frískúlanum í Havn, sum er á Velbastað, kunnu ganga í frítíðarskúla í Frískúlanum í Havn.

Heimasíðan hjá Frískúlanum í Havn

Hoyvíkar skúli

Børn, sum  ganga í Hoyvíkar skúla, kunnu ganga í Frítíðarskúlanum í Hoyvík.

Heimasíðan hjá Frítíðarskúlanum í Hoyvík

Kaldbaks skúli

Børn, sum ganga í Kalbaks skúla, kunnu ganga í frítíðarskúla í Dagstovninum Flatnagarður.

Heimasíðan hjá Dagstovninum Flatnagarður

Kollafjarðar skúli

Børn, sum ganga í Kollafjarðar skúla, kunnu ganga í frítíðarskúla í Frítíðarskúlanum við Botnánna.

Heimasíðan hjá Frítíðarskúlanum við Botnánna

Lítliskúli

Børn, sum ganga í skúla í Lítlaskúla, kunnu ganga í frítíðarskúla i Frítíðarskúlanum í Lítlaskúla.

Børn, sum ganga í 3. flokki í Lítlaskúla, kunnu ganga í frítíðarskúla í Margarinfabrikkini.

Heimasíðan hjá Frítíðarskúlanum í Lítlaskúla

Heimasíðan hjá Margarinfabrikkini

Nólsoyar skúli

Børn, sum ganga í Nólsoyar skúla, kunnnu ganga í Barna- og ungdómshúsinum Látrið.

Heimasíðan hjá Barna- og ungdómshúsinum Látrið

Sankta Frans skúli

Børn, sum ganga í forskúla í Sankta Frans skúla, kunnu ganga í Frítíðarskúlanum Sankta Frans.

Børn, sum ganga í 1. og 2. flokki í Sankta Frans skúla, kunnu ganga í frítíðarskúla í Frítíðarskúlanum í Badmintonhøllini.

Børn, sum ganga í 3. flokki í Sankta Frans skúla, kunnu ganga í frítíðarskúla í B36-húsinum. 

Heimasíðan hjá Frítíðarskúlanum Sankta Frans

Heimasíðan hjá Frítíðarskúlanum í Badmintonhøllini

Skúlin á Argjahamri

Børn, sum ganga í forskúla og skúla á Argjahamri, kunnu ganga í Frítíðarskúlanum á Argjahamri.

Heimasíðan hjá Frítíðarskúlanum á Argjahamri

Skúlin á Fløtum

Børn, sum ganga í forskúla og skúla á Skúlanum á Fløtum, kunnu ganga í Frítíðarskúlanum á Fløtum.

Børn, sum ganga í 3. flokki í Skúlanum á Fløtum, kunnu ganga í frítíðarskúla í Margarinfabrikkini.

Heimasíðan hjá Frítíðarskúlanum á Fløtum

Heimasíðan hjá Margarinfabrikkini

Skúlin við Løgmannabreyt

Børn, sum ganga í Skúlanum við Løgmannabreyt, kunnu ganga í Frítíðarskúlanum við Løgmannabreyt.

Heimasíðan hjá Frítíðarskúlanum við Løgmannabreyt

Velbastaðar skúli

Børn, sum ganga í Velbastaðar skúla, kunnu ganga í frítíðarskúlanum í Dagstovninum á Velbastað.

Heimasíðan hjá Frítíðarskúlanum í dagstovninum á Velbastað

Ofta settir spurningar
Kann eg velja ein og hvønn forskúla, skúla og frítíðarskúla?

Hóast Tórshavnar kommuna hevur frítt skúlaval, so er fría skúlavalið treytað av, at tilgongdin til skúlarnar ikki er ov stór.

Tá tilgongdin til ein skúla er ov stór, taka leiðreglurnar fyri upptøku av næmingum til fólkaskúlarnar við. Tað merkir, at vit luta avmarkaðu plássini út sambært raðfestum leiðreglum, sum tú finnur niðanfyri.

Tú hevur ikki frítt val, tá talan er um val av frítíðarskúla. Tí børn skulu ganga í tí frítíðarskúla, sum er knýttur at forskúlanum og skúlanum, sum tey longu ganga í. 

Leiðreglurnar fyri upptøku av næmingum verða endurskoðaðar í løtuni. Tær verða tøkar aftur, tá viðgerðin er liðug.  
Mítt barn gongur í forskúla, men býr uttanfyri grundupptøkuøkið hjá skúlanum

Gongur títt barn í forskúla, men búgva tit uttanfyri grundupptøkuøkið hjá skúlanum, kanst tú skriva barnið inn í 1. flokk á skúlanum. Er tilgongdin til skúlan ov stór, er tó sannlíkt, at tit fáa pláss í tí skúlanum, tit hoyra til ella í øðrum skúla, sum hevur pláss. 

Í 2021 vóru til dømis munandi fleiri umsóknir enn tøk pláss á Skúlanum á Fløtum. Leiðreglurnar fyri upptøku av næmingum eru raðfestar, og tað merkir, at rættstundis innskriving er tað fyrsta vit hyggja at, síðan hvat fyri grundupptøkuøki tit búgva í og í øðrum lagi um barnið gongur í forskúla, hevur systkin í skúlanum og so framvegis.

Raðfylgjuna sært tú í leiðreglunum, sum tú finnur her: 

Leiðreglurnar fyri upptøku av næmingum verða endurskoðaðar í løtuni. Tær verða tøkar aftur, tá viðgerðin er liðug.  
Hvat kosta frítíðarskúlarnir?

Tú finnur gjøldini fyri frítíðarskúla her: 

Gjøld fyri frítíðarskúla

Kostar tað nakað at ganga í forskúla?

Ja. Tú rindar eitt mánaðarligt gjald fyri forskúla. Í 2022 er mánaðarliga gjaldið fyri forskúla 929 kr.

Eg ynski at skriva mítt barn inn í forskúlan í Eysturskúlanum

Hóskvøldið 27. januar samtykti Tórshavnar býráð ætlanina at seta á stovn forskúla í Eysturskúlanum. Uttanríkis- og mentamálaráðið hevur góðkent ætlanina. 

Nú kunnu foreldur sostatt skriva børn síni inn, og tað gongur fyri seg við at trýsta á grøna knøttin niðanfyri og fylla innskrivingarskjalið út.

Innskrivingarfreistin er týsdagin 1. mars 2022.

Skriva inn í forskúla í Eysturskúlanum

Tú kanst lesa meira um forskúlan í Eysturskúlanum her: 

Nú ber til at skriva børn inn í forskúla í Eysturskúlanum

Hvør kann skriva eitt barn inn í skúla?

Fyri at skriva títt barn inn í ein skúla ella frítíðarskúla, skalt tú:

  • Vera búsitandi í Tórshavnar kommunu
  • Hava foreldramyndugleikan yvir barninum
  • Tú og barnið skulu hava sama bústað
Er frítíðarskúli í 3. flokki øðrvísi enn í 1. og 2. flokki?

Ja. Frítíðarskúli til 3. flokk er bara skipað á stóru skúlunum, og talan er í størri mun um eitt frítíðartilboð enn ein frítíðarskúla.

Harafturat gevur gjaldið fyri pláss til frítíðarskúla í 3. flokki ikki rætt til systkinaavsláttur.

Hvussu sigi eg plássið í forskúla og frítíðarskúla upp?

Skalt tú siga plássið upp, mást tú rita inn í BARN og trýsta á spjaldrið við navninum á barninum. Síðan trýstir tú á knøttin »Melda út«. Gev gætur, at uppsagnarfreistin er tveir mánaðir.

Eru bíðilistar til skúlarnar?

Ja. Er einki pláss tøkt í einum skúla, kanst tú skriva barnið upp á bíðilista.

Soleiðis verður títt barn skrivað upp á bíðilista:

  • Tá tú hevur skrivað títt barn inn í skúla og fingið boð frá Mentamáladeildini um, at einki pláss er tøkt, bjóða vit tær pláss á bíðilistanum til skúlan, sum tú hevur ynskt sum fyrsta val
  • Verður plássið tøkt, fært tú boð frá skúlanum um, nær títt barn kann byrja í skúla, og hvussu tú skalt fyrihalda teg

Treytirnar á bíðilistanum eru hesar:

  • Bíðilistarnir í sambandi við útlutan av plássum til forskúla og fyrsta flokk fylgja somu leiðreglum, sum tá ið børn fáa pláss í skúla. Leiðreglurnar finnur tú við at trýsta á leinkið niðanfyri
  • Bíðilistar til hinar flokkarnar eru eftir somu leiðreglum
  • Í ávísum førum taka skúlar ikki fleiri næmingar inn í ein flokk, hóast pláss eru. Grundin kann vera, at nógv flyting hevur verið í flokkinum. Ein onnur orsøk kann vera, at avbjóðingar eru í flokkinum, sum bera í sær, at flokkurin skal hava frið í eina tíð, og at ongar broytingar skulu gerast í næmingatalinum

Hevur tú aðrar spurningar um bíðilistarnar, kanst tú venda tær til viðkomandi skúlarnar, sum umsita bíðilistarnar.

Leiðreglurnar fyri upptøku av næmingum verða endurskoðaðar í løtuni. Tær verða tøkar aftur, tá viðgerðin er liðug.  

Finn skúla

Hvussu geri eg, um eg havi trupult við at nýta talgildar skipanir sum BARN?

Hevur tú ikki møguleika fyri at nýta talgildu bókingarskipanina ella Samleikan og MínBoks, skalt tú brúka umsóknarblaðið á heimasíðuni, sum tú finnur niðast á síðuni um innskriving í skúla.

Skriva inn í skúla

Her sært tú tølini frá skúlainnskrivingini í ár

Skúlainnskrivingin er nú av, og Mentamáladeildin og Snarskivan í Tórshavnar kommunu hava eftirkannað og viðgjørt innskrivingarnar.

Í yvirlitinum niðanfyri sært tú talið av børnum, sum hava skrivað seg inn í ymisku kommunalu skúlarnar í ár. Yvirlitið vísir, at ov nógv børn eru skrivað inn í Skúlan á Fløtum og í Sankta Frans skúla. Tað hevur við sær, at nakrar flytingar mugu gerast, tí skúlarnir fáa ikki tikið ímóti øllum teimum innskrivaðu børnunum.

Foreldur at børnum, sum ikki fáa pláss í tí skúlanum, tey hava ynskt, fáa nærri boð frá kommununi fyrst í februar.

Innskrivingar 2022

Skúli Innskrivingar Pláss
Eysturskúlin 30 48
Hoyvíkar skúli 33 48
Kaldbaks skúli 3  
Kollafjarðar skúli 16 24
Nólsoyar skúli 0  
Sankta Frans skúli 51 48
Skúlin á Argjahamri 46 48
Skúlin á Fløtum 85 72
Skúlin við Løgmannabreyt 23 48
Velbastaðar skúli 1  
  Samantalt: 288  

 

Forskúli Innskrivingar Pláss
Sankta Frans skúli 46 48
Skúlin á Argjahamri 16 48
Skúlin á Fløtum 52 72
Nólsoyar forskúli 3  
Kaldbaks forskúli 6  
  Samantalt: 123  

 

REGLUVERK

Fólkaskúlalógin

Lógin um fólkaskúlar (logir.fo)


Upptøkureglur

Leiðreglurnar fyri upptøku av næmingum verða endurskoðaðar í løtuni. Tær verða tøkar aftur, tá viðgerðin er liðug.  

Broyting av upptøkureglum - hoyring og samtykt

Uppskotið til broyting av leiðreglunum fyri upptøku av næmingum varð sent hesum myndugleikum til hoyringar, áðrenn leiðreglurnar vórðu endaliga samtyktar í Trivnaðarnevndini 15. november 2021:

  • Skúlastýrunum í fólkaskúlunum í Tórshavnar kommunu
  • Skúlaleiðslunum í fólkaskúlunum í Tórshavnar kommunu
  • Undirvísingarstýrinum
  • Uttanríkis- og mentamálaráðnum
  • Føroya Lærarafelag
  • Føroya Pedagogfelag
Mentamáladeildin
Mentamáladeildin

Vaglið 1, 100 Tórshavn

Les um Mentamáladeildina

torshavn@torshavn.fo

Tel. 30 20 10

Upplatingartíðir
Mánadag - hósdag 9 - 16
Fríggjadag 9 - 15