Umlættingar- og rehabiliteringsdepilin Urd

Umlættingar- og rehabiliteringsdepilin Urd 
Rólantsgøta 20
188 Hoyvík
Tel. 270118 (Lon 1)
Tel. 270114 (Lon 2)

Eindarleiðari
Birita Clementsen
biritac@torshavn.fo 

Deildarleiðari
Hanne-mi á Brúgv
hannemi@torshavn.fo 

Lon 1
Tel. 27 01 18
Tel. 27 01 46
Tel. 27 01 75
Tel. 27 02 26
urd@torshavn.fo 

Lon 2
Tel. 27 01 14
Tel. 27 01 91
Tel. 27 01 47
Tel. 27 01 68
urd@torshavn.fo 

Tilboðið vendir sær til allar fólkapensjónistar, sum búgva í Tórshavnar Kommunu, og sum hava tørv á røkt og umsorgan alt samdøgrið í eitt styttri tíðarskeið.

Borgarar, ið verða visiteraðir til Urd, eru fólkapensjónistar, sum í eitt styttri tíðarskeið hava tørv á røkt og umsorgan, tí røktin og umsorganin ikki letur seg veita í egnum heimi. Tað kann vera aftaná innleggjan á sjúkrahúsi, um tíni avvarðandi hava tørv á einari fríløtu ella tí tú hevur tørv á rehabiliterandi og sjúkrarøktarfakligum átøkum alt samdøgrið í eitt styttri tíðarskeið.

Endamálið við uppihaldinum kann vera ymiskt og kann fevna um alt frá endurvenjing, tørvsmetan og umlætting til røkt og linnan.

Tú kanst søkja um stutttíðarpláss á Vanganum. Í umsóknini verður tú millum annað biðin um at greiða frá tínari støðu, orsøkina til at tú søkir um stutttíðarpláss og hvat tíðarskeið tær tørvur eitt pláss.

Tú ritar inn á Vangan við tínum Samleika.

SØK UM STUTTTÍÐARPLÁSS Á VANGANUM

Fyll umsóknina út og send hana til heilsuhusid@torshavn.fo ella lat hana inn á Snarskivuni á Vaglinum 11 í Tórshavn. Sendir tú umsóknina inn sum teldubræv, mást tú minnast til at viðmerkja »Umsókn um stutttíðarpláss« í evnisteigin.

Vit viðgera allar umsóknir um stutttíðarpláss eina ferð um mánaðin. Eru fleiri umsóknir enn tøk pláss, játta vit plássini eftir tørvi, og tá kann vera ein ávís bíðitíð, áðrenn vit fáa játtað tær eitt pláss.

At vit játta stutttíðarpláss eftir tørvi vil siga, at vit gera eina fakliga meting í hvørjum einstaka føri og játta pláss til teir borgarar, vit meta hava størsta tørvin. Fakliga metingin tekur støði í tínari umsókn. Ivast vit í hesum sambandi, setir ein visitator seg í samband við teg ella tíni avvarðandi fyri at avtala eina heimavitjan.

Játta vit tær stutttíðarpláss, fært tú svar á Vanganum og í MínBoks. Hevur tú ikki Vangan ella MínBoks, senda vit svarið til tín bústað.

Gjaldið fyri stutttíðarpláss er í løtuni 134 kr. fyri hvørt samdøgur. Tú fært eina rokning, tá títt uppihald er av. Gjaldið fevnir um mat, drekka, røkt, venjing og um leigu og vask av handklæðum og seingjarklæðum.

Ein tørvsmetan er ein skipað kanning av tínari støðu. Fyrstu fýra dagarnar gera vit kanningar og samrøður fyri at fáa greiðu á, hvussu tín støða er, hvørji tíni ynski eru og hvønn tørv tú hevur.

Tá vit hava gjørt kanningar og samrøður, gera vit eina ætlan fyri títt uppihald saman við tær, og ein toghaldari verður settur at syrgja fyri, at øll arbeiða fram ímóti sama máli. Málið, sum vit seta okkum, verður javnan endurmett og tillagað.

Tørvsmetanin kann innihalda:

• greinan av tínum tørvi á venjing, røkt og umsorgan, búplássi, hjálpartólum og tílíkum
• røkt og umsorgan i mun til tín tørv og títt førleikastøði

Eitt venjingaruppihald kann innihalda:

• endur- ella viðlíkahaldsvenjing, sum bæði kann fevna um kropsliga, sálarliga og sosiala venjing
• royna hjálpartól
• eygleiðing og metan
• røkt og umsorgan i mun til tørv og førleikastøði

Starvsfólk okkara gera framhaldandi eina tvørfakliga og ítøkiliga endurmetan av tínari venjingargongd.

Umlætting varir sum meginregla í 1-3 vikur. Frávik kunnu tó vera. Umlættingin kann innihalda:

• avlastan av avvarðandi
• røkt og umsorgan í mun til tín tørv og títt førleikastøði 
• skapa struktur og samanhang í mun til tín tørv
• metan um og íverksetan av framhaldandi átøkum
• royna hjálpartól
• aktivitetir og venjing

Uppihaldið kan innihalda:

• linnandi røkt og umsorgan til álvarsliga sjúkar ella doyggjandi borgarar
• serkøn sjúkrarøktarfaklig átøk
• royna hjálpartól

Tá tú verður útskrivað av Urd, kunna vit heimatænastuna um, hvussu títt uppihald hevur verið, og hvørji átøk vit hava sett í verk. Heimatænastan ger so av, hvussu tit kunnu fylgja upp og hjálpast um at viðlíkahalda átøkini.

Meta vit, at tú hevur tørv á meira hjálp, enn tá tú komst inn á Urd, skipa vit fyri einari nýggjari tørvskanning í sambandi við tína heimferð. 

Harumframt hava vit eitt tætt samstarv við deildarleiðarar og starvsfólk í Heilsuhúsinum. Flytir tú til dømis á bústovn, so tryggja vit okkum, at vitanin fylgir tær, har tú fert. 

Borgarar, ið verða visiteraðir til Urd, eru fólkapensjónistar,  sum í eitt styttri tíðarskeið hava tørv á rehabiliterandi og sjúkrarøktarfakligum átøkum alt samdøgrið.

Ætlanin er, at borgarar, sum eru á einum stutttíðarplássi, skulu vera virknir og útføra – og stuðlast í at útføra – flestu gerandisuppgávur sjálvi. Tað vil siga, at tú í mest møguligan mun er virkin í mun til persónliga røkt, at borðreiða, vaska klæðir, reiða songina, gera reint á kamarinum og at luttaka í felags aktivitetum. Talan er sostatt um eitt uppihald, har vit taka støði í tínum tilfeingi og í tí, sum gevur meining fyri teg.

Talan er um eitt tvørfakligt og samanhangandi tilboð, sum skal stuðla undir, at tú fært livað eitt virkið og innihaldsríkt lív. Saman við tær og tínum avvarðandi arbeiða vit fram ímóti, at tú varðveitir og styrkir tínar førleikar, heilsu og vælveru.

Rehabilitering tekur støði í gerandisvirksemi, skilt á tann hátt, at øll gerandismál eru liður í venjingini, so sum at koma upp úr songini, persónligt reinføri, at lata seg í og úr og at fáa sær at eta. Allir fakbólkar á deplinum taka lut í rehabiliteringini og seta tvørfaklig mál saman við tær.

Endamálið er, at tú hevur ment teg og fingið betri lívsgóðsku, tá tú fert heim aftur. Fyri at náa ásettu málini er tað umráðandi, at tú tekur virknan lut í ætlanini fyri uppihaldinum.

Niðanfyri kanst tú lesa um, hvat tú skalt minnast til, áðrenn tú byrjar títt uppihald á Urd.

Hvat skal eg hava við mær?

Tá vit hava játtað tær eitt uppihald, senda vit tær ein lista, ið greiðir frá, hvat tú skalt minnast til at hava við tær til uppihaldið.

Hetta skalt tú minnast til at hava við tær:

• klæðir, ið eru navnamerkt
• góð útiklæðir
• úti- og inniskógvar
• sápu, hársápu og annað, sum tú vanliga nýtur til persónliga røkt
• hjálpitól, so sum gangistól (rollator), hoyritól, blæur, stomiposar og annað, tær tørvar
• ein nýggjan og fullfíggjaðan heilivágslista (hann kanst tú fáa frá tínum lækna)
• heilivág og annað tílíkt til uppihaldið
• heilivágseskjur, um tú fært annan heilivág, sum ikki er skamtaður á apotekinum
• protein- og sondukost, um tú vanliga brúkar hetta

Hvør skal hava boð um uppihaldið?

Fært tú aðrar tænastur frá Heilsu- og umsorganartænastuni, er umráðandi at boða Heilsu- og umsorganartænastuni frá, at tú fert á eitt stutttíðarpláss, og at tænasturnar tí skulu halda uppat fyribils. Tænastur, sum fyribils skulu halda uppat, kunnu til dømis fevna um matartænastu, reingerðartænastu, dagtilboð, heimahjálp ella aðrar fastar avtalur.

Somuleiðis er umráðandi at boða frá, tá tú ynskir, at hesar tænastur skulu halda fram aftur.

Á Urd eru tilsamans 27 kømur skipað í tveimum lonum, ið venda norður og eystureftir.

Hvørt kamar er 30 fermetrar til støddar. Inngongdin til kamari er frá felagsgongdini í hvørjari lon. Sjálv hurðin og inngongdspartíið er eyka breitt, soleiðis at gott pláss er fyri rullistólum, seingja- og børuflutningi og flutningi av møblum.

Fyri at skapa góð ljósviðurskifti venda øll búrúm eystureftir og norðeftir út ímóti havinum, og við stórum vindeygapørtum kemur nógv ljós inn, soleiðis at búrúmini verða ljós. Lætt er hjá búfólkunum at fylgja dagsrútmuni. Ert tú seingjarløgst, so hevur tú kortini gott útsýni frá búrúmunum, tí vindeygaparturin byrjar í 45 cm hædd.

Í kamarinum er baðirúm, song, seingjarborð, skáp, spísiborð við tveimum stólum, lenistólur og sjónvarp. Frá kamarinum er eisini útgongd til terassu.

Baðirúmið er rúmligt og liggur beinleiðis inn frá búrúminum gjøgnum eina breiða skjótihurð.

Ein seturstova er til hvørja lon, sum eisini hevur skrivstovu, starvsfólkarúm, skolirúm, vaskirúm og língoymslu. Felagsøkið hevur inngongd, forhøll, ergo- og fysioterapi, matarhøll og køk.

Uttanfyri húsini eru gøtur og sansiøki. Dentur er lagdur á, at útiøkið og bygningurin eru samfeld við terassu við tekju. 

Køkurin tryggjar, at tú fært fjølbroyttan og nøktandi kost. Vit bjóða morgundrekka, døgurða og nátturða. Seinnapartar og kvøld er drekkamuður, og te, kaffi og tílíkt er altíð tøkt í felagsstovuni í lonini.

Avvarðandi kunnu keypa mat á heiminum og eta máltíðina á kamarinum saman við tær. Av praktiskum ávum kunnu bert fýra avvarðandi eta í senn hjá tær. Minst til at bíleggja matin til tíni avvarðandi frammanundan.

Húsið er altíð opið fyri vitjandi. Tó skal atlit takast fyri hvíld og at hvør einstakur hevur ásettar venjingartíðir. Høvuðsdyrnar lata upp kl. 6 og steingja kl. 00.15.

Ergoterapeutur veitir uppvenjing og stuðul í samband við ávís brek. Ergoterapeuturin vegleiðir eisini um, hvussu tú kanst nýta hjálpartól fyri at lætta um gerandisdagin. Endamálið er at betra um ella viðlíkahalda førleikastøðið hjá tær.

Tá tú flytir inn, fært tú vitjan av einum fysioterapeuti, sum ger eina meting av, hvussu tú kanst menna títt førleikastøði ella halda tað viðlíka á frægasta hátt.

Tú kanst eisini sleppa upp í liðvenjingar saman við øðrum, um tú hevur hug. Liðvenjingarnar eru tvær ferðir um vikuna í venjingarhølunum. Her venja tit við venjingartólum.

Fysioterapeuturin ger eina venjingarætlan til tín og gevur tær eisini einstaklingavenjing í eitt avmarkað tíðarskeið.

Fysioterapeuturin kann eisini ráðgeva um hjálpartól og flytingar.

Hannemi á Brúgv er deildarleiðari á Urd. Hannemi hevur drúgvar royndir sum deildarleiðari á Umlættingarheiminum og Boðanesheiminum.

Fyriskipanarliga er Urd partur av Heilsuhúsinum í Brekkutúni 1 í Hoyvík, har sjúkrarøktarfrøðingar, heimatænastan, ergoterapi, fysioterapi, visitatión og Heilræði húsast. Eisini móttøkan hjá Heilsu- og umsorganartænastuni er í Heilsuhúsinum.

Á Urd starvast røktarstarvsfólk, tað vil siga sjúkrarøktarfrøðingar, heilsurøktarar, heilsuhjálparar og hjálparfólk.

Harumframt starvast ergoterapeutar, fysioterapeutar, køksatstøðingar, reingerðarfólk og húsavørður á Urd.

Vit kunngera leys størv á Urd á síðuni »Leys størv«.

Leys størv