Flaggdagshald í Havn mánadagin 25. apríl
Mánadagin 25. apríl verður flaggdagshald í Havn við skrúðgongu, flaggdagsrøðu, kapprenning og framsýning av ellisakførum.
Kl. 15: Skrúðgonga og flaggdagsrøða
Flaggdagshaldið byrjar sum vant við skrúðgongu og flaggdagsrøðu. Skrúðgongan byrjar klokkan 15 í Finsen. Gingið verður úr Tróndargøtu, umvegis Sjúrðargøtu og eftir Niels Finsens gøtu oman á Vaglið.
Flaggdagsrøðan verður hildin á Vaglinum aftaná skrúðgonguna. Tað er Kalpana Vijayavarathan, sum heldur flaggdagsrøðuna í ár.
Kl. 16: Flaggdagsrenningin 2022
Bragdið skipar aftur í ár fyri flaggdagsrenning. Flaggdagsrenningin 2022 er tann 36. flaggdagsrenningin. Øll eru vælkomin við - bæði tey, ið vilja kappast við onnur og seg sjálvan, og tey, sum vilja ganga og renna.
Renningin byrjar kl. 16 beint aftaná flaggdagshaldið á Vaglinum.
Hevur tú hug til at vera við, kanst tú tekna teg á heimasíðuni hjá Bragdinum í seinasta lagi leygarkvøldið 23. apríl kl. 23. Neyðugt er ikki við tilmelding til heilsurenningina. Tú kanst lesa meira um flaggdagsrenningina á heimasíðuni hjá Bragdinum.
Tilmelding til flaggdagsrenningina 2022 (bragdid.fo)
Kunning um Flaggdagsrenningina 2022 (bragdid.fo)
Føroya Ellisakfør sýnir fram í Tórsgøtu
Fastur táttur á flaggdegnum er at uppliva vøkru ellisakførini, sum felagið Føroya Ellisakfør sýnir fram. Ellisakførini eru at síggja í Tórsgøtu og á torginum í Vágsbotni frá kl. 14.