Lurta
Til lesiveik
Tíðindi - 10. juni 2021

Kunning um ólavsøkuna 2021

Ólavsøka-viðgjørd_web

Enn er ógreitt, hvussu koronutilmælini fara at ljóða um ólavsøkumundið. Tó er vist, at ólavsøkan verður, og at hon má fyrireikast. Tí hava Tórshavnar Ítróttaráð og Tórshavnar kommuna gjørt avtalu um ein leist fyri ólavsøkuna í ár.

Avgjørt er, at tivoli verður ikki á Skálatrøð. Í staðin fáa Tórshavnar Ítróttarráð, skótalið og aðrir felagsskapir pláss kring miðbýin til básar, tjøld og undirhald. Somuleiðis er ætlanin, at verandi matstovur og skeinkistøð skulu sleppa at víðka um teirra virksemi út á torg og vegir, har tað er ráðiligt. Soleiðis varð eisini gjørt í fjør. Tískil verður ikki pláss hjá øðrum at seta upp tjøld og básar til sølu og spæl á kommunalum øki á ólavsøkuni í ár.

Tórsfest, konsertin, sum Tórshavnar Ítróttarráð hevur skipað fyri á Vaglinum leygardagin áðrenn ólavsøku, er avlýst í ár.

Somuleiðis er gjørt av at strika stóra tónleikapallin Tórspallur, ið plagar at standa framman fyri Ráðhúsið ólavsøkuaftan- og ólavsøkudag. Í staðin er ætlanin at skipa fyri smærri framførslum og undirhaldi fyri børnum runt um í miðbýnum.

Vit eygleiða gongdina og skipa ólavsøkuna í samráð við Koronuráðgevingina. Er smittuvandin lítil, fáa vit væntandi eina rættiliga vanliga ólavsøku. Er smittustøðan hinvegin ring, kann tað gerast neyðugt at tillaga og møguliga avlýsa partar av ólavsøkuni.

Meira kunning um ólavsøkuna verður at frætta á www.torshavn.fo