Lurta
Til lesiveik
Tíðindi - 18. desember 2020

Rithøvundafelagið inn í Hans Andriasar Hús

Leigusáttmáli varð í dag undirskrivaður millum Rithøvundafelag Føroya og Tórshavnar kommunu. Felagið fær nú innivist í tveimum hølum á loftinum undir Pisuvarða 2. Hetta er í húsunum, sum hjúnini Hans Andrias og Petra Djurhuus búðu í.

Leigusáttmálin merkir, at meira lív og virksemi kemur í húsini, samstundis sum tað søguliga í húsunum verður varðveitt - eitt nú ‟Góðastova”. Í Góðustovu eru fleiri forvitnisligir lutir hjá Hans Andriasi Djurhuius at síggja - eitt nú pípur, hattur og frakki.

Leigusáttmálin er galdandi fram til árslok 2025.

- Rithøvundafelag Føroya hevur ikki havt fastan bústað í fleir ár, og tí er hetta sera gott fyri felagið, limirnar og føroyskan skaldskap, sigur Vónbjørt Vang, forkvinna í Rithøvundafelagi Føroya.

Umframt at skrivstova felagsins verður í húsunum, kunnu rithøvundar savna seg um skaldskap í eini stovu á loftinum í suðurendanum.

120 limir eru í rithøvundafelagnum.

Mynd: Vónbjørt Vang, forkvinna í Rithøvundafelag Føroya, Annika Olsen, borgarstjóri, og Gunvør Balle, varaborgarstjóri.