Lurta
Til lesiveik

Blóðroyndartænasta

Ert tú sjúk ella óhjálpin og hevur trupult við at møta upp til blóðroyndir, kanst tú fáa hjálp frá blóðroyndartænastuni í Tórshavnar kommunu. Tín lækni bíleggur blóðroyndina.

Blóðroyndartænastan er eitt samstarv millum Tórshavnar kommunu og Rannsóknarstovuna á Landssjúkrahúsinum. Tænastan gongur soleiðis fyri seg, at ein bioanalytikari frá Rannsóknarstovuni koyrir út til tín fyri at taka blóðroyndina heima hjá tær.

Gev gætur, at um tú ikki sjálv kanst svara fyri teg, skalt tú vera eyðmerkt við ID-armbandi ella líknandi, um avvarðandi ikki eru til staðar, meðan blóðroyndin verður tikin.



Um blóðroyndartænastuna
Hvør kann brúka blóðroyndartænastuna?

Tænastan er ætlað til tín, sum læknin metir vera so mikið sjúka ella óhjálpna, at tú bara kanst møta á ambulatoriinum við hjálp frá portørum, røktarstarvsfólki ella avvarðandi.

Tænastan fevnir bæði um heimabúgvandi borgarar og um fólk, sum búgva á eldrabústovni ella á sambýli í Tórshavnar kommunu.

Hvørji sløg av blóðroyndum fevnir tænastan um?

Blóðroyndartænastan fevnir bara um vanligar blóðroyndir.

Gev gætur, at tænastan undir ongum umstøðum fevnir um akutt-sjúklingar. Blóðroyndir, sum skulu takast akutt, verða vístar til ambulatoriið hjá Rannsóknarstovuni á Landssjúkrahúsinum.

Hvør kann bíleggja blóðroyndir umvegis blóðroyndartænastuna?

Sjúkrahúslæknar og kommunulæknar kunnu bíleggja blóðroyndir frá blóðroyndartænastuni.

Skalt tú biðja um blóðroyndir, kanst tú senda ein teldupost til laboratorie@ls.fo (áðrenn kl. 10 mikudag) ella ringja til Rannsóknarstovuna á tel. 30 45 20 (gerandisdagar kl. 10-12). Skal royndin takast fylgjandi hósdag, skalt tú ringja til Rannsóknarstovuna í seinasta lagi mikudag kl. 12.

Tá læknin bíleggur blóðroynd gjøgnum Blóðroyndartænastuna, skal hon upplýsa:

  • Navn
  • P-tal
  • Bústað
  • Telefonnummar hjá sjúklingi ella avvarðandi
  • Navn á læknanum, sum bíleggur blóðroyndina

Blóðroyndir verða síðan bílagdar í Cosmic.

Hvørjar dagar verða blóðroyndir tiknar?

Blóðroyndartænastan tekur blóðroyndir ein dag um vikuna. Eru ov fáar ella ov nógvar blóðroyndir bílagdar, kunnu blóðroyndirnar verða útsettar til vikuna eftir.

Onnur kunning

Les meira í faldara okkara um blóðroyndartænastuna.

Blóðroyndartænastan

Heilsuhúsið
Heilsuhúsið

Brekkutún 1, 188 Hoyvík

Les um Heilsu- og Umsorganartænastuna

heilsuhusid@torshavn.fo

Tel. 30 20 00

Upplatingartíðir
Mánadag - hósdag 9 - 16
Fríggjadag 9 - 15