Lurta

Tilboð til fólk við demenssjúku

Ert tú demenssjúk ella avvarðandi at demenssjúkum borgara, kanst tú fáa ráðgeving og vegleiðing frá demenssamskiparum í Heilsu- og umsorganartænastuni. Okkara demenssamskiparar hava drúgvar royndir og servitan innan demens og kunnu tosa við teg um tína støðu, lurta, ráðgeva og vísa á tey tilboð, vit hava í kommununi.

Niðanfyri kanst tú kunna teg nærri um tey tilboð og tær tænastur, Heilsu- og umsorganartænastan veitir demenssjúkum fólki og teirra avvarðandi.



Tilboð til fólk við demenssjúku og teirra avvarðandi
Ráðgeving og vegleiðing

Ert tú farin at gloyma, varðar tú av einum, ið er farin at gloyma ella hevur tú nýliga fingið staðfest demenssjúku, kanst tú fáa ráðgeving og vegleiðing frá demenssamskiparum í Heilsu- og umsorganartænastuni.

Ynskir tú eina heimavitjan, hevur tú møguleika fyri at fáa vitjan heima við hús av einum starvsfólki úr Heilræði ella Visitatiónini. Í Heilræði og í Visitatiónini starvast demenssamskiparar, sum skipa fyri heimavitjanum og bjóða heilsusamrøður. Tú kanst eisini biðja um eitt prát um tín gerandisdag og støðuna heima.

Hvørt Heilræði ella Visitatiónin kemur á heimavitjan, veldst um tín tørv á ráðgeving og hjálp.

HEILRÆÐI

Heilræði kann:

    • koma á heimavitjan
    • tosa við teg um støðuna, lurta, stuðla og ráðgeva
    • vísa á tilboð í kommununi


VISITATIÓNIN

Visitatiónin kann:

    • koma á heimavitjan
    • tosa við teg um støðuna, lurta, stuðla og ráðgeva
    • vísa á tilboð í kommununi
    • gera eina fakliga tørvsmeting og visitera teg til tey ymisku kommunalu tilboðini

Tú ert vælkomin at hava onkran av tínum nærmastu við til samrøðuna. 

Heimarøkt og heimasjúkrarøkt

Ert tú heimabúgvandi og hevur tú tørv á hjálp til persónliga røkt ella sjúkrarøkt, kanst tú fáa heimarøkt ella heimasjúkrarøkt frá Heilsu- og umsorganartænastuni. 

Hevur tú eina demenssjúku, kanst tú fáa vitjan av einum sjúkrarøktarafrøðingi við servitan innan demens, ið kann ráðgeva og vegleiða tær og tíni avvarðandi um tína sjúku. Sjúkrarøktarafrøðingurin kann tá seta í verk betranarátøk, ið taka støði í tínum gerandisdegi.

Kunna teg nærri á síðum okkara um heimarøkt og heimasjúkrarøkt.

Hevur tú tørv á heimarøkt?

Hevur tú tørv á heimasjúkrarøkt?

Dag- og kvøldtilboð

Ert tú fólkapensjónistur við demenssjúku, og hevur tú tørv á umsorgan, røkt og sosialari samveru, kanst tú søkja um dag- ella kvøldtilboð.

Í Tórshavnar kommunu eru trý dag- og kvøldtilboð fyri fólkapensjónistar við demenssjúku:

  • eitt dagtilboð í Stjørnulon
  • eitt kvøldtilboð í Stjørnulon
  • eitt dagtilboð í Tjarnarlon, sum er ein partur av Demensdeplinum á Tjarnargarði

Í dag- og kvøldtilboðunum fært tú møguleika fyri at koma saman við øðrum undir hugnaligum og skipaðum umstøðum. Saman við okkara starvsfólkum ert tú við til at seta dám á virksemið og samveruna. Vit skipa fyri virksemi, ið stuðlar undir, at tú kanst halda tínar førleikar við líka og verða búgvandi heima.

Dag- og kvøldtilboðini fyri fólkapensjónistar við demenssjúku snúgva seg í serligan mun um trivnað og lívsgleði, hóast minnið er viknað. Innihaldsríka samveran hevur tískil stóran týdning í dag- og kvøldtilboðunum.

Rørsla, kostur og virksemi hevur nógv at siga fyri heilsu og trivnað hjá okkum øllum, og tí leggja vit eisini dent á heilsustimbran og fyribyrging. Vit gera fimleik, spæla kort, skipa fyri útferðum, binda og mangt annað.

Tú kanst lesa meira um dag- og kvøldtilboðini á síðu okkara um dag- og kvøldtilboð ella kunna teg nærri í faldara okkara, sum tú finnur her: 

Dag- og kvøldtilboð

Faldarin um dag- og kvøldtilboð til eldri borgarar

 

Soleiðis søkir tú dag-ella kvøldtilboð

Hevur tú Samleikan, søkir tú um dag- og kvøldtilboð á Vanganum.

Søk um dag- ella kvøldtilboð á vanganum

Hevur tú ikki skrásett tær Samleikan, ið krevst fyri at søkja á Vanganum, kanst tú gera tað á heimasíðuni hjá Samleikanum. Tað er ein fyrimunur at søkja á Vanganum, tí samskiftið á Vanganum er bæði skjótari og tryggari. Á tínari vangasíðu hevur tú harafturat møguleika fyri at fylgja við í viðgerðargongdini.

Fært tú av onkrari orsøk ikki nýtt Vangan, kanst tú fylla út umsókn á heimasíðuni og senda hana til heilsuhusid@torshavn.fo ella lata hana inn á Snarskivuni á Vaglinum 11 í Tórshavn. Sendir tú umsóknina inn sum teldubræv, skalt tú minnast til at viðmerkja »Umsókn um dag- og kvøldtilboð« í evnisteigin.

Fá Samleikan (samleikin.fo)

Søk um dag- og kvøldtilboð

Stutttíðarpláss

Ert tú fólkapensjónistur, kanst tú søkja um at fáa tillutað eitt stutttíðarpláss frá Heilsu- og umsorganartænastuni. Stutttíðarplássini finnur tú á Umlættingar- og rehabiliteringsdeplinum Urd og á Demensdeplinum á Tjarnargarði.

Eitt stutttíðarpláss er, soleiðis sum orðið leggur upp til, eitt tíðaravmarkað uppihald, har tú kanst fáa hjálp alt samdøgrið í eitt styttri tíðarskeið samsvarandi tínum tørvi.

Tú kanst til dømis søkja um stutttíðarpláss, tí:

  • tú hevur tørv á linnandi røkt og umsorgan
  • tíni avvarðandi og tú sjálv hava tørv á einari fríløtu, har tú ert til umlætting á stutttíðarplássinum
  • tær tørva eina tørvsmetan í mun til tína heilsu og tínar førleikar. Tað vil siga, at starvsfólk saman við tær leggja eina ætlan fyri, hvørji betranarátøk kunnu setast í verk

Tilboðið kann fevna um fleiri ymisk átøk í mun til tín tørv og tína heilsustøðu. Tú kanst lesa meira á síðu okkara um stutttíðarpláss, sum tú finnur her: 

Stutttíðarpláss

 

Soleiðis søkir tú um stutttíðarpláss

Hevur tú Samleikan, søkir tú um stutttíðarpláss á Vanganum.

Søk um stutttíðarpláss

Hevur tú ikki skrásett tær Samleikan, ið krevst fyri at søkja á Vanganum, kanst tú gera tað á heimasíðuni hjá Samleikanum.

Tað er ein fyrimunur at søkja á Vanganum, tí samskiftið á Vanganum er bæði skjótari og tryggari. Á tínari vangasíðu hevur tú harafturat møguleika fyri at fylgja við í viðgerðargongdini.

Fært tú av onkrari orsøk ikki nýtt Vangan, kanst tú fylla út umsókn á heimasíðuni og senda hana til heilsuhusid@torshavn.fo ella lata hana inn á Snarskivuni, á Vaglinum 11, í Tórshavn. Sendir tú umsóknina inn sum teldubræv, skalt tú minnast til at viðmerkja »Umsókn um stutttíðarpláss« í evnisteigin.

Fá Samleikan (samleikin.fo)

Søk um stutttíðarpláss

Búpláss

Kommunan hevur fimm búeindir til fólk við demenssjúku. Hesar eru á Vallalíð, á Boðanesheiminum, á Lágargarði, á Demensdeplinum á Tjarnargarði og á Eldrasambýlinum oman Mattalág.

Á búeindunum veita vit røkt og umsorgan við eginumsorgan fyri eyga. Tað vil siga, at okkara røkt tekur atlit til tína likamligu og sálarligu orku: tú fært stuðul til at varðveita teir førleikar, tú hevur, og fært samstundis hjálp til tað, tú ikki megnar.

Vit byggja umsorganina og røktina á tína lívssøgu og arbeiða út frá persónsmiðsavnandi umsorgan, ið merkir, at røktin tekur støði í tínum fortreytum, tørvi og virðum. 

Vit kunnu tilluta tær eitt demensbúpláss, um tú ert útgreinað fyri demens ella mett at hava tørv á demensbúplássi og hevur tørv á hjálp ella røkt alt samdøgrið.

Demensbúplássini eru ætlað bæði fólkapensjónistum og fólki við demens undir pensjónsaldur.

Tú kanst søkja um búpláss á síðu okkara um búpláss við umsorgan og røkt. Tú kanst eisini lesa um einstøku búplássini, ið hava hvør sína síðu. Tú finnur búplássini í listanum niðast á hesari síðuni. 

Soleiðis søkir tú um eldrabúpláss

Búpláss við umsorgan og røkt

Samsýning at ansa eldri heima

Tú kanst søkja um samsýning at ansa einum demenssjúkum fólkapensjonisti heima. Samsýningin hevur sum endamál at tryggja, at borgarin við demenssjúku fær støðuga røkt og hjáveru í heiminum og tískil ikki noyðist at fara á røktarheim.

Kunna teg nærri á síðu okkara um ansing av eldri og óhjálpnum heima.

Ansa eldri og óhjálpnum heima

Telefonráðgeving og leiðbeining

Hevur tú spurningar ella ivamál um demenssjúku, kanst tú ringja til Heilsuhúsið á
tel. 30 20 00 og fáa ráðgeving umvegis telefon. Tá tú ringir til Heilsuhúsið, tekur eitt starvsfólk í móttøkuni ímóti boðunum og beinir teg víðari til rætta viðkomandi, sum síðan setir seg í samband við teg.

Onnur kunning

Tú kanst lesa meira um tilboðini og tænasturnar í faldara okkara um demens, sum tú finnur her: 

Demens

Demensbúpláss í Tórshavnar kommunu

Eldrasambýlið oman Mattalág

Oman Mattalág 5
100 Tórshavn

Vís búpláss
Vís á korti

Boðalon á Boðanesheiminum

Yviri við Strond 95
100 Tórshavn

Vís búpláss
Vís á korti

Handarastova á Lágargarði

Stoffalág 84
100 Tórshavn

Vís búpláss
Vís á korti

Demensdepilin á Tjarnargarði

Hoyvíksvegur 58
100 Tórshavn

Vís búpláss
Vís á korti

Heimið við Vallalíð

Vallalíð 12
100 Tórshavn

Vís búpláss
Vís á korti