Søk um matstovuloyvi

Vilt tú hava loyvi til at reka matstovu, skalt tú søkja Loyvisnevndina um loyvi. Fyri at søkja Loyvisnevndina um matstovuloyvi, skalt tú altíð útvega tær eina bruna- og umhvørvisváttan frá kommununi.

Søk um bruna- og umhvørvisváttan frá Tórshavnar kommunu

Partur av brunagóðkenningini hjá kommununi er at áseta mest loyvda tal av gestum á staðnum. Kommunan skal eisini umhvørvisgóðkenna virksemið. Tað vil siga, at vit skulu tryggja okkum, at virksemið samsvarar við galdandi umhvørvisreglurnar.

Hvat krevst av tínari umsókn annars veldst um, hvat slag av virksemi, tú søkir um loyvi til. Í ávísum førum noyðist tú til dømis eisini at útvega tær eina løggildingarváttan ella eitt skrásetingarskjal frá Heilsufrøðiligu Starvsstovuni ella eitt alment loyvi frá løgregluni.

Niðanfyri sært tú, hvørjir myndugleikar eru viðkomandi fyri ymisku sløgini av virksemi, og hvørjar váttanir, skrásetingar ella løggildingar eru kravdar. Tú skalt tó minnast til, at tað til eina og hvørja tíð eru krøvini og leiðbeiningarnar frá Loyvisnevndini, sum eru galdandi. Niðast á hesi síðuni finnur tú eisini eitt yvirlit yvir mannagongdina fyri viðgerð av tínari umsókn um matstovuloyvi.