Eg vil grava – krevur tað loyvi?
Ætlar tú tær at grava, eru nøkur viðurskifti, tú skalt hava í huga. Annaðhvørt tú grevur á privatum øki ella kemur inn á alment øki, eru ymisk atlit at taka.
Ætlar tú tær til dømis at grava á óbygdari ogn, mást tú søkja um eitt byggiloyvi fyri at grava út og planera.
Søk um graviloyvi
Tørvar tær at grava í ogn hjá kommununi, eitt nú í gongubreyt ella koyriveg, skalt tú minnast til at søkja um loyvi frá kommununi frammanundan. Tað gert tú við at senda okkum serstaka umsókn um graviloyvi at grava í kommunalum øki.
Í umsóknini skalt tú tilskila, hvar tú ætlar tær at grava og hví. Ætlar tú tær at tyrva tangar, leiðingar ella annað, skalt tú eisini tilskila, hvat tú ætlar tær at tyrva.
Minst til, at markini móti grannaøkjum altíð skulu virðast. Tað er hvørki loyvt at fylla inn á grannastykkið ella at grava so nær, at tað kann leypa úr grannastykkinum. Sostatt er bara loyvt at arbeiða út til mark. Fert tú av onkrari orsøk inn á grannastykkið, skalt tú boða eigaranum frá sum skjótast.
Gerst neyðugt hjá tær at koma grannaognini so nær, at hon verður ávirkað, er skilabest, at tú tosar við grannan frammanundan.
Áðrenn tú byrjar at grava, skulu møguligar leiðingar, kaðlar og rørleiðingar í jørðini avmerkjast á staðnum. Hetta gera SEV, NET, Fjarhitafelagið, Tórshavnar kommuna og onnur, sum millum annað varða av sjónvarps- og fjarskiftiskaðlunum.
