Børn við serligum avbjóðingum
Øll børn eru fevnd av dagstovnatilboðunum hjá Tórshavnar kommunu. Eisini børn við serligum tørvi og avbjóðingum. Hevur títt barn serligar avbjóðingar, skalt tú tískil skriva barnið upp til eitt dagstovnapláss eftir vanligum leisti. Kortini er umráðandi, at tú gert dagstovnin varugan við tær avbjóðingar, barnið hevur.
Hevur títt barn tørv á eyka stimbran, ella hevur barnið aðrar avbjóðingar í styttri ella longri tíð, ber til at fyriskipa serstøk námsfrøðilig tiltøk á stovninum, ið taka hædd fyri avbjóðingunum hjá barninum.
Barna- og ungdómsdeildin hjá Tórshavnar kommunu veitir ráð og vegleiðing og játtar í serstøkum førum eyka starvsfólkatímar til stovuna hjá barninum í eina tíð. Hevur títt barn tørv á einari serstakari fyriskipan, skalt tú venda tær til stovnsleiðaran, sum síðan vendir sær til námsfrøðiligu ráðgevingina hjá Barna- og ungdómsdeildini.
Er vanliga kommunala dagstovnatilboðið ikki nøktandi fyri títt barn, kanst tú søkja um pláss í kommunalari serstovu. Á serstovunum eru færri børn, og karmarnir eru skipaðir við atliti at serliga tørvinum hjá tínum barni. Starvsfólkini á serstovunum arbeiða miðvíst við millum annað samskifti, sosialisering og mál- og rørslumenning.
Seks serstovur eru í Tórshavnar kommunu:
BÓLIÐ
Bólið er partur av Dagstovninum í Øksnagerði og hevur pláss fyri seks børnum við kontakt- og samskiftistrupulleikum.
Heimasíðan hjá Dagstovninum í Øksnagerði
HORNABØ
Hornabø er ein frítíðarskúli fyri børn, sum ganga í 1. og 2. flokki í Skúlanum á Trøðni. Hornabø er ein partur av Dagstovninum í Øksnagerði.
Heimasíðan hjá Dagstovninum í Øksnagerði
SÓLJAN
Sóljan er partur av Dagstovninum Hans Andrias Djurhuus og hevur pláss fyri seks børnum við immunverjusjúkum og tílíkum.
Heimasíðan hjá Dagstovninum Hans Andrias Djurhuus
Serstovan í Frítíðarskúlanum í Hoyvík
Frítíðarskúlin í Hoyvík hevur eina sereind til børn, sum ganga í serflokki í 1. og 2. flokki í Hoyvíkar skúla.
Heimasíðan hjá Frítíðarskúlanum í Hoyvík
serstovan í smílibýlinum
Frítíðarskúlin Smílibýlið hevur eina sereind til børn, sum ganga í serflokki í 1. og 2. flokki í Eysturskúlanum.
Heimasíðan hjá Frítíðarskúlanum Smílibýlið
serstovan í badmintonhøllini
Frítíðarskúlin í Badmintonhøllini hevur eina sereind til børn undir skúlaaldri, sum hava sosio-emotionellar avbjóðingar. Pláss er fyri 4-6 børnum.
Heimasíðan hjá Frítíðarskúlanum í Badmintonhøllini
Meta stovnsleiðarin og tú, at vanliga kommunala dagstovnatilboðið ikki er nøktandi fyri títt barn, kanst tú seta teg í samband við Barna- og ungdómsdeildina hjá Tórshavnar kommunu. Tú finnur sambandsupplýsingarnar hjá Barna- og ungdómsdeildini niðast á hesi síðuni.
Ivast tú í, hvør tørvurin hjá tínum barni er, kanst tú ráðføra teg við starvsfólkini á stovninum. Tú kanst eisini ráðføra teg við kommunulæknan og Sernám.
Sernám veitir sernámsfrøðiliga ráðgeving til foreldur og dagstovnar. Sernámsfrøðilig ráðgeving kann vera neyðug, um barnið til dømis hevur trupult við at læra ella skilja mál, ella um barnið hevur trupult við at nýta kroppin.
SERNÁM
Frælsið 32
110 Tórshavn
sernam@sernam.fo
Heimasíðan hjá Sernámi (sernam.fo)
Yvirlit yvir kommunulæknarnar finnur tú her:
Nøkta kommunalu tilboðini ikki tørvin hjá tínum barni, kanst tú søkja Almannaverkið um eitt ansingartilboð. Almannaverkið veitir eisini hjálp, tá børn vegna aldur ikki eru fevnd av kommunalu tilboðunum longur.
ALMANNAVERKIÐ
Staravegur 18
110 Tórshavn
