Býlingshúsið í Maritugøtu

Mánadag til fríggjadag frá kl. 7.30 til kl. 17.

Dagstovnaleiðari

Vivi Edmundsdóttir Poulsen
Tel. 96 27 89
vivip@torshavn.fo

Reiðrið (vøggustova)

Tel. 28 96 82

Urðin (vøggustova)

Tel. 25 06 80

Dalurin (barnagarður)

Tel. 25 06 81

Víkin (barnagarður)

Tel. 25 06 82

Afturlatingardagar og samanlagt virksemi í 2024

• Allar vanligar halgidagar – Stongt
• Páskafrítíð 28. mars - 1. apríl – Stongt
• Flaggdagur 25. apríl – Stongt
• Dýri biðidagur 26. apríl – Stongt
• 2. hvítusunnudagur 20. mai – Stongt
• Grundlógardagur 5. juni – Stongt frá kl. 12
• Kristi himmalsferðardagur 9. juni – Stongt
• Summarfrítíð vika 29, 30 og 31 – møguleiki fyri at melda til samanlagt virksemi
• Ólavsøka 28.-29. juli – Stongt
• Jólafrí 24. desember til 1. januar 2024 – Stongt
• Stovnurin hevur tveir ráðleggingardagar um árið. Hesar báðar dagar er stovnurin stongdur. Tað er ymiskt, nær ráðleggingardagarnir eru, men foreldur fáa boð í seinasta lagi seks vikur frammanundan

Samanlagt virksemi merkir, at dagstovnarnir leggja virksemið saman, soleiðis at ein dagstovnur er opin í frítíðini. 

Freistir at biðja um pláss í samanlagda virkseminum

Summarfrítíð 2024: 16. mai 2024

Gev gætur, at heldur tú ikki freistina, kunnu vit ikki tryggja tínum barni pláss í samanlagda virkseminum.

Hevur tú tørv á plássi í samanlagda virkseminum, kanst tú kunna teg nærri og søkja á síðu okkara um samanlagt virksemi.

Samanlagt virksemi á dagstovni

Tit eru altíð vælkomin at vitja okkum, síggja húsið og garðin, hitta starvsfólkini og síggja virksemi okkara. Ring til Vivi Edmundsdóttir Poulsen á telefon 96 27 89 ella send ein teldupost til vivip@torshavn.fo fyri at avtala eina vitjan.

Børnini skulu hava sunnan og góðan matpakka við hvønn dag. Stovnurin bjóðar millummála og mjólk.

Tá talan er um kost frá okkum, leggja vit dent á, at kosturin er so sunnur, sum gjørligt. Millummálin kann til dømis vera súpan, jogurt, havragrýn, frukt, pylsubreyð ella gularrótabollar. Stundum koma børnini við hugskotum um millummála, og vit ganga teirra ynskjum á møti so frægt sum til ber.

Tá okkurt serligt er, bjóðar stovnurin mat. Her kann talan til dømis vera um jóladøgurða til børnini, tá jólagudstænasta er, ella okkurt gott afturvið drekka, tá stovnurin hevur føðingardag ella til ymisk tiltøk annars, sum vit skipa fyri.

Viðhvørt gera vit døgurða ella skipa fyri breyðborði, og tá fáa foreldur kunning frammanundan á boðtalvuni.

Stovnurin skipar regluliga fyri trygdarskeiðum fyri starvsfólk og leiðslu.

Foreldraráðið arbeiðir fyri at styrkja trivnaðin og sambandið millum starvsfólk, heim, foreldur og børn á stovninum. Sum limur í foreldraráðnum kanst tú vera við til at tryggja, at stovnurin er eitt gott stað at vera. Tú fært bæði innlit í og ávirkan á gerandisdagin og námsfrøðiliga leist okkara á stovninum. Limirnir í foreldraráðnum eru eisini hugskotsgevar og eru við til at kjakast um menningina og átøk á stovninum. Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Býlingshúsið liggur í tættbygdum øki í barnavinarligum umhvørvi burtur frá ferðslu í Hoyvík.

Vís kort í fullari stødd

Stovnurin hevur tvær vøggustovur og tvær barnagarðsstovur. Børnini sleppa í stóran mun at ganga ímillum stovurnar at vitja hvønn annan. Húsið er í trimum lonum, og stovurnar eru góðar og ljósar.

Vøggustovurnar Reiðrið og Urðin hava børn í aldrinum 10 mðr. til 3 ár, og barnagarðsstovurnar Dalurin og Víkin hava børn í aldrinum 3-7 ár. Vøggustovurnar eru í einari lon fyri seg við teimum hentleikum, sum vøggustovubørnum tørva. Síðani er ein barnagarður í egnari lon við hentleikum, sum barnagarðsbørnum tørva. Allar stovurnar eru felags um miðrúmið Klingruna, har vit hava ein klintrivegg, skipa fyri amboðsfimleiki, spæla ymisk borðspøl, hava sangløtur og ymiskt annað, sum styrkir og mennir børnini.

Uttanfyri hava vit ein frálíkan garð, sum bjóðar nógv ymiskt virksemi til børnini, so sum ein skúr við alskyns leikum at brúka úti, spælihús, bát, klintriborg, reiggjur og sandkassar. Í garðinum er slætt lendi, har børnini kunnu súkkla, koyra mánabilar og annað. Í garðinum er eisini óslætt lendi, sum hóskar til aðrar rørslur. Beint uttanfyri garðin er ein FIFA-vøllur, eitt spælipláss og hugnaligt náttúruøki, sum vit eisini brúka nógv.

MÓTTØKA

Vit leggja stóran dent á at taka væl ímóti barninum hvønn dag, soleiðis at foreldrini og børnini merkja, at her er trygt og gott at vera. Tí er týdningarmikið, at barnið verður latið einum av starvsfólkunum, og at foreldrini siga barninum farvæl.

NÁMSFRØÐILIGA ARBEIÐIÐ

Vit vilja, at foreldrini skulu halda Maritugøtu vera eitt trygt, læruríkt og mennandi stað; eitt stað, har børnini verða móttikin av starvsfólki og leiðara í einum umhvørvi merkt av virðing, opinleika, áliti og góðum samskifti.

Námsfrøðiliga málið er at menna sjálvstøðug, ábyrgdarfull, skapandi og lívsglað børn. Børn, sum kunnu luttaka í sosialum felagsskapi og liva lívið í einari fjølbroyttari og skiftandi verð.

Vit vilja virka fyri, at møguleikarnir hjá barninum at mennast sálarliga og kropsliga eru so góðir, sum møguligt. Vit hava ta fatan, at børn sínámillum ávirka og menna hvørt annað kropsliga, sosialt og kensluliga. Námsfrøðin er tillagað hesum. Vit taka støði í eini heildarfatan av barninum og umhvørvinum, barnið livir í.

Vit leggja dent á at vera viðurkennandi í samskifti okkara, bæði við børnum og vaksnum, tí vit halda, at virðiligt samskifti er týdningarmikið. Vit halda tað vera umráðandi, at børnini kenna seg hoyrd og sædd, at vit viðurkenna teirra kenslur, til dømis gleði, sorg, vreiði. Vit viðurkenna børnini fyri tað, tey eru og ikki bert fyri tað, tey gera.

Vit arbeiða út frá hugtakinum lurtandi námsfrøði, sum í stuttum merkir at lurta eftir børnunum og síggja teirra lyndi. Tað ger, at virksemið er skiftandi, tí vit vita ikki svarið frammanundan. Um vit veruliga lurta eftir børnunum, mugu vit fylgja teirra forvitni og hava eitt opið sinnalag uttan at hava eina greiða meining ella ætlan um, hvussu vit "koma á mál". Meira um hetta stendur í faldarum á heimasíðu okkara, har vit lýsa arbeiðið og námsætlanina hjá stovninum.

ÍTRIV

Vit hava Klingruna til ymisk ítriv hjá børnunum. Stovurnar skiftast um at brúka hølið til virksemi, ið mennir barnið kropsliga og mentalt. Vit hava ikki verkstað, men vit mála og annað úti á stovunum ella í Klingruni.

TILTØK

Hvørt ár hevur stovnurin felags arbeiðs- og hugnadag, har foreldur og børn fríðka og hampa um garðin og hugna sær saman.

Vit hátíðarhalda føðingardagin hjá stovninum 22. oktober. Tá bjóða vit foreldrakaffi.

Harafturat hava vit foreldrakaffi nakrar ferðir um árið og ommu- og abbakaffi eina ferð um árið. Vit hava eisini jólahald, innsavning til tiltakið Í menniskjum góður tokki, lummalyktatúr og summarveitslu.

Eina ferð um árið hava vit foreldrasamrøður. Umleið tríggjar mánaðir eftir, at barnið er byrjað í vøggustovu, hava vit eina byrjanarsamrøðu.

Eina ella tvær ferðir um árið hava vit eisini felags foreldrafund.

FORELDRASAMSTARV

Samskifti hevur stóran týdning. Mest umráðandi fyri okkum er dagliga samskiftið við foreldrini um barnið. Foreldur fáa javnan kunning við telduposti og kunnandi skriv um tað, sum hendir á stovninum.

Harafturat hava vit eina heimasíðu við kunning um okkum.

Á stovninum starvast 18 dugnalig starvsfólk. Vit eru níggju námsfrøðingar og níggju hjálparfólk. Starvsfólkahópurin er støðugur. Tey flestu hava starvast her í fleiri ár, og summi hava starvast her, síðan stovnurin lat upp.

Vit dagføra okkum støðugt um námsfrøðiliga arbeiðið og vilja gera okkara besta fyri, at børnini hava góðar og tryggar karmar, og at tey trívast væl hjá okkum.

ForeldraGluggin er ein felags samskiftispallur hjá dagstovnum og frítíðarskúlum í kommununi. Talan er um eina ókeypis app til snildfon, sum foreldur og dagstovnar brúka, tá tey samskifta sínámillum.

So hvørt sum Føroyar vórðu raktar av Covid-19 farsóttini í 2020, gjørdist tað kommununi greitt, at okkum tørvaði ein skjótan, tryggan og felags samskiftisfarveg fyri alt dagstovnaøkið. Boðini og tilmælini til foreldur vóru mong, og tey broyttust ofta. Talan var eisini mangan um bráðfeingisboð, ið vóru umráðandi at fáa skjótt út til øll foreldur.

Harafturat kom nýggja dátuverndarlógin í gildi í januar 2021, og sambært henni eiga vit øll at tryggja okkum, at persónsupplýsingar og myndir verða handfarnar á so tryggan hátt sum gjørligt.

Tín persónligi gluggi

ForeldraGluggin er tó ikki bara tikin í nýtslu fyri at geva stovnum ein felags farveg til bráðfeingisboð og tilmæli. ForeldraGluggin er eisini partur av talgildingarætlanini hjá kommununi, ið millum annað hevur til endamáls at hækka kommunala tænastustøðið. Ítøkiliga er appin ein lættur snarvegur hjá tær, sum ynskir at fáa skjótt og ómakaleyst innlit í gerandisdagin hjá tínum barni.

Tað er ein kend avbjóðing millum foreldur, at tað kann vera trupult at fáa rættiligt innlit í tann stóra partin av gerandisdegnum, børnini eru á stovni. Børnini eru ikki altíð før fyri sjálvi at velja úr rúgvuni av upplivingum, og foreldur hava viðhvørt knappa tíð at tosa og hyggja at myndum, tá tey koma eftir børnunum á stovninum.

Higartil hava dagstovnar brúkt boðtalvur, facebookbólkar og teldur við myndum til at kunna foreldur um dagliga virksemið. Stovnarnir hava sjálvandi eisini tosað beinleiðis við foreldrini. ForeldraGluggin kemur ikki í staðin fyri munnliga samskiftið, men letur upp fyri fleiri miðvísum samskiftismøguleikum, soleiðis at tú sum foreldur hevur lætta atgongd til mangt av tí í gerandisdegnum, sum tú og barnið kunnu hava gagn av at tosa um.

ForeldraGluggin er tryggari loysn í fleiri mátar:

• bara foreldur, sum hava foreldramyndugleikan, og í summum førum fosturforeldur, kunnu í løtuni fáa atgongd til dáturnar í skipanini. Næsta verkætlanarstig fer at umfata foreldur, sum ikki hava felags foreldramyndugleika, og sonevnd bonusforeldur
  
  
• tvey-faktor-góðkenning krevst fyri at rita inn í skipanina fyrstu ferð. Tað vil siga, at tú brúkar títt egna loyniorð og brúkaranavn og fært eina einnýtiskotu sendandi við SMS, ið verður brúkt fyri at tryggja, at tínar upplýsingar samsvara
  
  
• myndir av tínum børnum verða goymdar í appini, ið verður rikin á vardum servara hjá Tórshavnar kommunu. Tað merkir millum annað, at tá starvsfólk taka myndir av tínum barni, so verður myndin ikki goymd á snildfonini sjálvari, men á varda kommunala servaranum
  
  
• stovnar og foreldur sleppa undan at hava myndir liggjandi á Facebook og heimasíðum, sum kommunan ikki fær vart, og sum fólk av óvart kunnu fáa atgongd til
  
  
• fyllir tú kartotekskortið hjá tínum barni rætt út, syrgir skipanin fyri, at myndir verða deildar í tann mun, tú hevur givið loyvi til tað

ForeldraGluggin er ein app, sum verður brúkt til samskifti. Tað kann til dømis vera at senda innkallingar til foreldraviðtalur, kunna um ráðleggingardagar, deila myndir av børnunum og vísa brellbitar frá degnum á stovninum:

• foreldur kunnu fylgja við í gerandisdegnum hjá barninum
• foreldur kunnu skráseta frí og frítíð hjá barninum
• foreldur og stovnur kunnu samskifta talgilt
• stovnurin kann skjótt og lætt kalla inn til foreldraviðtalur og tiltøk
• foreldur fáa atgongd til myndir og filmsbrot av barninum
• foreldur kunnu gera spæliavtalur vegna børnini

Soleiðis gert tú, um tú longu hevur skrásett fartelefon og teldupost í plássskipanini

Hevur tú skrásett títt fartelefonnummar og tín teldupostbústað í plássskipanini frammanundan, kann stovnsleiðarin senda tær ein teldupost við einum leinki, tá ið barnið byrjar á stovninum.

Í teldupostinum stendur:

»Góði brúkari av ForeldraGlugganum. Fyri at rita inn á ForeldraGluggan, skalt tú stovna brúkaranavn og loyniorð. Trýst á leinkið og vel brúkaranavn og loyniorð«

Tá ið tú trýstir á leinkið í teldupostinum og ritar inn, sært tú eina QR-kotu, sum tú skannar við snildfonini. So verður appin tikin niður á tína telefon.

Tá tú hevur gjørt hetta, kanst tú fara til stig 4 í vegleiðingini niðanfyri.

Fært tú ikki ein teldupost sendandi, mást tú sjálv stovna teg sum brúkara. Tað gert tú við at fylgja stig 1-3 í vegleiðingini niðanfyri.

Soleiðis gert tú, um tú ikki hevur skrásett fartelefon og teldupost í plássskipanini, ella um tú ikki fært teldupost frá stovninum

1. Stovna teg sum brúkara

Fært tú ikki ein teldupost sendandi við einari QR-kotu, mást tú sjálv stovna teg sum brúkara fyri at brúka ForeldraGluggan. Tað gert tú í plássskipanini. Tað tekur áleið ein minutt at stovna seg sum brúkara í plássskipanini.

Tú ritar inn í plássskipanina við tínum Samleika. Hevur tú ikki fingið tær Samleikan, kanst tú bíleggja tær hann á heimasíðuni hjá Samleikanum.

RITA INN Í plássskipanina

Tá tú hevur ritað inn í plássskipanina, skalt tú trýsta á spjaldrið við tínum navni. Hevur tú foreldramyndugleikan, eigur tú tá at síggja teigin »Stovna ForeldraGluggan«:

Her skalt tú:

• velja tær eitt brúkaranavn
• velja tær eitt loyniorð
• upplýsa títt fartelefonnummar, ið verður brúkt, tá tú tekur appina í nýtslu fyrstu ferð

Fá tær Samleikan (samleikin.fo)

2. Tak appina niður á snildfonina

Far inn á App Store (um tú hevur iPhone) ella GooglePlay (um tú hevur Android) og leita eftir »ForeldraGluggin«. Tak síðan appina niður.

3. Skriva brúkaranavn og loyniorð

Tá ið tú hevur tikið appina niður, trýstir tú á appina fyri at lata hana upp. Nú verður tú biðin um at skriva brúkaranavnið og loyniorðið, tú valdi tær í plássskipanini.

Tá ið tú hevur tøppað brúkaranavnið og loyniorðið inn, fært tú eini SMS-boð sendandi við einum trygdartali, sum tú skalt tøppa inn. SMS-boðini við trygdartali verða bara send fyrstu ferð, tú ritar inn - aftaná hetta tørvar tær bara at nýta brúkaranavnið og loyniorðið, tú valdi tær í plássskipanini.

4. Vel títt barn í appini og fyll kartotekskortið út

Hevur tú fleiri børn á stovni, sært tú byrjanarstavirnar hjá hvørjum barni í appini. Tú kemur inn á einstaka barnið við at trýsta á runda ikonið við byrjanarstavunum í.

Nú trýstir tú niðast høgrumegin á ikonið »Meira«.

Síðan trýstir tú á »kartotekskort« næstniðast í valmyndini.

Her svarar tú spurningum um títt barn og velur, hvørji loyvi tú vilt lata. Gev gætur, at hesar upplýsingarnar eru neyðugar fyri at skipanin riggar og handfer upplýsingarnar rætt.

Á kartotekskortinum kanst tú velja, um tú vilt lata stovninum ymiskar fulltrúir ella ikki. Tað eru fulltrúir til:

• at barnið sleppur at fara við á útferð
• at barnið sleppur at svimja undir námsfrøðiligum eftirliti
• at barnið kann koyrast í privatbili, lógliga íbundið trygdarbelti
• at barnið kann avheintast av øðrum sambært munnligari avtalu

Somuleiðis kanst tú geva fulltrúir til myndir og filmar alt eftir, hvat tú ynskir. Tú kanst velja, um:

• øll foreldur at børnum á stovuni hjá barninum skulu kunna síggja myndir og filmar av tínum barni
• øll foreldur at børnum á stovninum hjá barninum skulu kunnu síggja myndir og filmar av tínum barni
• myndir og filmar av barninum skulu kunna vísast á almennu heimasíðuni hjá stovninum

Aðrar upplýsingar skulu eisini gevast, um serlig viðurskifti og atlit skulu takast til sjúkur, kost, lívsneyðugan heilivág og ovurviðkvæmi.

Somuleiðis verður tú spurd eftir:

• kunning um tryggingar
• kunning um barnið
• kunning um familjuna

Tú kanst velja at brúka appina á føroyskum. Ynskir tú tað, skalt tú fara til »generelt« í stillingunum á sjálvari telefonini, velja »Sprog og område« og velja »føroyskt« sum mál:

Tú mást ansa eftir, at føroyskt eisini stendur ovast undir »foretrukken sprogrækkefølge« í yvirskipaðu stillingunum.

Fyri at kunna leggja arbeiðið til rættis á stovnunum, ynskja vit, at tú boðar frá, nær barnið heldur frí. Hesum boðar tú frá í ForeldraGlugganum.

Soleiðis boðar tú frá:

1. Lat ForeldraGluggan upp og rita inn

2. Trýst á »meira« niðast í høgra horni

3. Trýst á »Frí og frítíð«

4. Syrg fyri at swipe-knøtturin ovast er grønur

5. Vel fyrsta og seinasta frídag í álmanakkanum og trýst á flugubeinið ovast í høgra horni:

Nú hevur tú skrásett frítíðina. Hevur tú eina viðmerking til tína fráboðan, kanst tú skriva hana í niðasta teigin. Minst til at trýsta á bláa flugubeinið, tá tú ert liðug.

UPPSLØG

Í uppsløgunum finnur tú kunning um gerandisdagin á stovninum. Tað kunnu vera lýsingar av námsfrøðiliga gerandisdegnum, tiltøk ella ítriv, sum fara fram í nærmastu framtíð ella áheitanir um at hava regnklæðir við og tílíkt. Tað ber ikki til at gera viðmerkingar til uppsløg.

BOÐ

Undir »Boð« sært tú samskiftið við ein ella fleiri úrvaldar móttakarar. Her hevur tú møguleika fyri at svara boðunum. Tað kann til dømis vera eini boð, har starvsfólkini ynskja at avtala eina foreldraviðtalu, ella tað kann vera eini boð við einum stuttum spurningi.

Tá tú sendir eini boð til starvsfólkini á dagstovninum, verða boðini send til felags postkassan hjá stovninum. Øll viðkomandi starvsfólk eru knýtt at hesum postkassanum, og tey kunnu sostatt svara tínum boðum.

Tað ber ikki til at senda boð til onnur foreldur á stovninum.

ÁLMANAKKI

Í álmanakkanum sært tú tiltøkini á stovninum, til dømis foreldrafundir, jólahald, páskahald og tílíkt. Her sært tú eisini, um tú ert boðin til foreldraviðtalu.

MYNDASAVN

Í myndaskjáttuni sært tú allar tær mappur og myndir, sum eru deild við teg. Í mappuni »Myndir av tær og tínum børnum« verða allar myndir og øll filmsbrot savnað, sum hava títt barn frámerkt á teimum.

Títt barn verður stovnað sjálvvirkandi í ForeldraGlugganum við upplýsingum úr fólkayvirlitinum. Sostatt eru tað bara foreldur við foreldramyndugleika, sum síggja upplýsingar um barnið. Næsta verkætlanarstig fer at gera tað møguligt at geva foreldrum uttan foreldramyndugleika atgongd til skipanina.

Sært tú ikki barnið í ForeldraGlugganum, kanst tú:

• spyrja stovnin, um barnið er skrásett í einari stovu á stovninum. Tá ið dagstovnurin hevur skrásett barnið í einari stovu, verður barnið sjónligt í appini, og tú kanst fylla kartotekskortið og tínar sambandsupplýsingar út

Sært tú ikki barnið, hóast barnið er skrásett á einari stovu, kanst tú:

• kanna um foreldramyndugleikin er rætt skrásettur í fólkayvirlitinum. Hetta gert tú við at ringja til fólkayvirlitið á tel. 30 20 10.

Hevur tú fleiri spurningar um, hvussu tú skrásetir ella brúkar ForeldraGluggan, so finnur tú ofta settar spurningar og svar á síðu okkara um ForeldraGluggan. Har kanst tú eisini kunna teg um brúkaratreytirnar.

ForeldraGluggin (tema)

Samskifti hevur stóran týdning. Týdningarmest fyri okkum er dagliga samskiftið við foreldrini um barnið. Í gongini uttan fyri hvørja stovu er boðtalva, sum vit heita á foreldur um at kanna hvønn dag.

Á boðtalvuna skriva vit týðandi boð um til dømis útferðir, kalt borð og føðingardagar. Vit greiða eisini frá, hvat børnini hava gjørt gjøgnum dagin. Vit viðmæla, at foreldrini lesa og tosa við barnið um tað, tá tit fara heim, tí tað kann hava stóran týdning fyri barnið. Tað stimbrar málmenningina og stuðlar upp undir sambandið millum heim og stovn.

Ein dygdarmennari frá Barna- og ungdómsdeildini hjá Tórshavnar kommunu kemur við jøvnum millumbilum út á dagstovnarnar í kommununi at eygleiða námsfrøðiliga innihaldið og umstøðurnar, sum námsfrøðiliga arbeiði fer fram í.

Dygdarmennarin samskiftir síðan við dagstovnaleiðaran og starvsfólkini um sínar eygleiðingar, og funnið verður fram til ítøkiligar menningarmøguleikar.

Talan er um skipaðar eygleiðingar (KIDS), sum skulu vera við til at tryggja, at vit framhaldandi arbeiða við námsfrøðiligu dygdini á hvørjum einstøkum dagstovni. KIDS er eitt viðurkent og granskingargrundað amboð til eftirmeting og menning av námsfrøðiligu dygdini á dagstovnum.

Eygleiðingarnar eru innanhýsis arbeiðsamboð til einstaka stovnin at brúka í sínum menningararbeiði.

Triðja hvørt ár skipar kommunan fyri eftirliti av trygdarviðurskiftunum á øllum dagstovnaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Kommunalu húsavørðarnir hava dagliga eftirlitið við spæliplássunum.

Býlingshúsið hevur pláss fyri 23 vøggustovubørnum og 37 barnagarðsbørnum.

Vilt tú skriva títt barn upp til ein dagstovn, kanst tú avgreiða uppskrivingina frá hesari síðuni:

Skriva upp til dagstovnapláss

Her kanst tú kunna teg um galdandi reglurnar fyri upptøku av børnum til dagstovnarnar í Tórshavnar kommunu:

Upptøkureglur

Brúkaragjøldini fyri dagstovnapláss sært tú her:

Dagstovnagjøld

Foreldur við inntøkum undir ávísum marki kunnu søkja kommununa um eitt ískoyti til at fíggja dagstovnaplássið. Ískoytið verður rópt fyri fíggjarligt frípláss. Les meira um møguleikarnar og treytirnar á síðu okkara um frípláss.

Søk um frípláss

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp stovnspláss