Dagstovnurin Birkilund

Hoyvíksvegur 41
100 Tórshavn

Dagstovnaleiðari: Sanna á Løgmansbø
Tel. 26 53 26
sannal@torshavn.fo

Lurta

Dagstovnurin Birkilund

Birkilund er ein av størstu dagstovnunum í Tórshavnar kommunu. Her ganga um 120 børn dagliga. Stovnurin liggur væl fyri í náttúruvøkrum umhvørvi í Eysturbýnum beint við Hoyvíkstjørn. Stovnurin liggur tætt við miðbýin, og tí er skjótt at fara bæði í bý og náttúru.

Vit eru dagliga úti á túrum við børnunum í eitt nú Viðarlundini, Boðanesi, Grasagarði og Hoydølum, har børnini hava góðar umstøður at royna seg í avbjóðandi lendi, eins og tey kunnu uppliva frísku náttúruna og djóralívið rundanum okkum.

Í Birkilund eru 3 vøggustovur, 4 barnagarðsstovur og ein stova til tey 6 ára gomlu børnini, sum ganga seinasta árið í barnagarði. Her starvast um 28 starvsfólk: 10 námsfrøðingar, 17 hjálparfólk og ein køksdama.



Um Dagstovnin Birkilund
Upplatingartíðir

Mánadag til fríggjadag frá kl. 7.30 til kl. 17.00

Samband

Dagstovnaleiðari

Sanna á Løgmansbø
Tel. 26 53 26
sannal@torshavn.fo


Bláa vøggustova

Tel. 23 30 33


Blái Barnagarður

Tel. 23 30 36


Grøni barnagarður

Tel. 23 30 35

                                                                                                                                       Reyða vøggustova

Tel. 23 30 31


Reyði barnagarður

Tel. 23 30 37


Gula vøggustova

Tel. 23 30 32


Skúlabólkurin

Tel. 23 30 39

Afturlatingardagar í 2022
  • Allar vanligar halgidagar og serstakar merkisdagar – stovnurin stongdur
  • Skírhósdag til 2. páskadag 14. – 18. apríl – stovnurin stongdur
  • Flaggdagin 25. apríl – stovnurin stongdur
  • Dýra biðidag 13. mai – stovnurin stongdur
  • Kristi himmalsferðardag 26. mai – stovnurin stongdur
  • Grundlógardag 5. juni ­– stovnurin stongdur frá kl. 12
  • Summarfrítíð vika 29, 30 og 31 – møguleiki fyri at melda til samanlagt virksemi
  • Ólavsøkuaftan 28. juli – stovnurin opin til kl. 12
  • Ólavsøkudag 29. juli – stovnurin stongdur
  • Jólafrítíð 24. desember 2022 – 1. januar 2023 – stovnurin stongdur
  • Stovnurin hevur tveir ráðleggingardagar um árið. Hesar báðar dagar er stovnurin stongdur. Tað er ymiskt, nær ráðleggingardagarnir eru, men foreldur fáa boð í seinasta lagi seks vikur frammanundan

SAMANLAGT VIRKSEMI

Samanlagt virksemi vil siga, at dagstovnarnir í Tórshavnar kommunu leggja sítt virksemi saman, soleiðis at ein dagstovnur er opin í frítíðartíðini.

Hevur tú tørv á tí, kann títt barn sostatt fáa pláss í samanlagda virkseminum í summarfrítíðini, tá stovnarnir annars eru stongdir.

FREISTIR AT BIÐJA UM PLÁSS Í SAMANLØGDUM VIRKSEMI:

Summarfrítíð 2022: 1. juni 2022

Gev gætur, at heldur tú ikki freistina, kunnu vit ikki tryggja tínum barni pláss í samanlagda virkseminum.

Hevur tú tørv á plássi í samanløgdum virksemi, kanst tú kunna teg nærri og søkja her:

Samanlagt virksemi í frítíðarskeiðum

Vitja okkum

Tú ert vælkomin at vitja okkum í barnagarðinum. Ring til Sonnu á Løgmansbø á tel. 26 53 26 ella skriva til sannal@torshavn.fo fyri at avtala eina vitjan.

Matur og drekka

Børnini hava matpakka við hvønn dag undantikið annanhvønn mikudag, tá vit gera døgurða. Døgurðin kostar 20 krónur, sum verða goldnar á stovuni, har barnið gongur. Millummála, frukt og mjólk bjóða vit á stovninum.

Døgurðin er aloftast okkurt slag av fiski, og til millummála fáa børnini bollar, breyðflís við viðskera, ovnbakað epli, suppu ella okkurt lætt so sum skorpur og frukt.

Tá ið barnið hevur føðingardag kann tað bjóða døgurða ella køku til stovuna. Tó ynskja vit, at tit hugsa um sukurinnihaldið í matinum, tit hava við.

Á stovninum drekka vit mjólk og vatn og vilja eggja foreldrum til ikki at geva børnum sukurdrykkir við.

Trygdarskeið

Vit skipa javnan fyri fyrstuhjálparskeiðum til starvsfólk okkara. Seinasta skeiðið var í januar 2019

Vit skipa eisini fyri brandskeiði. Seinasta skeiðið var í í januar 2019

Næstu skeiðini verða í vár ella summar 2021.

Foreldraráðið

Vit hava eitt foreldraráð, sum er til fyri at styrkja trivnaðin og sambandið millum starvsfólk, foreldur og børn á stovninum.

Sum limur í foreldraráðnum kanst tú gera títt fyri, at stovnurin er eitt gott stað at vera. Tú fært ávirkan og innlit í gerandisdagin á stovninum og í námsfrøðiliga leistin. Sum limur í foreldraráðnum ert tú eisini hugskotsgevi og ert við til at kjakast um menningina og átøk á stovninum.

Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Sí á korti

Námsfrøðiligur leistur
Soleiðis arbeiða vit

Øll børn hava rætt til at blíva sædd og hoyrd og at teirra upplivingar verða tiknar í álvara. Børn hava rættindi sum vit vaksnu, og tey skulu hava møguleika at hava ávirkan á egið lív. Harafturat eiga øll børn at hava eitt meiningsfult og gott barnalív, har tey kunnu mennast og spæla og fáa góðar upplivingar saman við øðrum børnum og vaksnum. Hetta er grundleggjandi hugburðurin vit arbeiða við í Birkilund.

Í Birkilund arbeiða vit við námsfrøðiliga leistinum Betri Vinir. Hetta gera vit í samráð við Barnabata, sum hevur hildið skeið fyri øllum starvsfólkum á stovninum. Betri Vinir tekur støði í námsfrøðiligum amboðum, ið uppbyggja ein góðan barnafelagsskap, ið hjálpir øllum børnum at trívast. Í góða barnafelagsskapinum er tolsemi og virðing fyri hvør øðrum grundleggjandi, og tað er hetta, sum skapar rúm fyri ymiskleika í barnabólkinum. Vit meta, at foreldur hava ein týðandi leiklut í arbeiðinum at fáa Betri Vinir at rigga til fulnar.

Starvsfólkini í Birkilund arbeiða eftir leistinum ICDP, sum leggur dent á sambandið millum menniskju, har førleikin hjá tí vaksna er í fokus. Á henda hátt tryggja vit okkum, at ábyrgdin fyri sambandinum millum barnið og tann vaksna altíð liggur hjá tí vaksna.

Vit hava fleiri hjálparfólk á stovninum, og tað hevur stóran týdning, at okkara hjálparfólk eru væl rustað til at vera um børnini í gerandisdegnum. Tí raðfesta vit hjálparfólkafundir, har fokus millum annað er á menningina og trivnaðinum hjá barninum, týdningin av góðum foreldrasamstarvi og ta góðu komuna og móttøkuna um morgunin.

Spælið fyllir nógv í gerandisdegnum á Birkilund, tí børn mennast gjøgnum spæl. Ein part av degnum er frítt spæl í hásæti, har børnini hava møguleika at spíla seg út í ymiskum áhugamálum, tey eru hugtikin av. Harumframt leggja starvsfólkini virksemi til rættis, ið tekur støði í menningini og áhugamálum hjá barnabólkinum á stovuni.

MÓTTØKA

Vit taka ímóti børnum millum kl. 7.30 - 9.30. Eftir hetta byrjar ávikavist ætlaða og minni ætlaða virksemið.

Tit eru vælkomin at koma við børnunum eftir kl. 9.30, men tá er umráðandi, at tit boða stovuni frá frammanundan.

Vit ynskja at taka væl ímóti barninum um morgunin, og vit leggja okkum eftir, at bæði barn og foreldur fáa eina góða byrjan  uppá dagin. Tað er umráðandi, at tit kenna tykkum trygg, og vit tosa fegin við tykkum um komuna, soleiðis at tit fáa sagt, hvussu tit ynskja at móttøkan skal verða. Eisini er umráðandi fyri bæði barnið og tykkum, at tit fáa stundir at siga barninum farvæl.

ÍTRIV

Børnini í Birkilund fara í Fimi hvønn týsdag kl. 8.30. Í Fimi eru sera góðar umstøður hjá børnunum at vera kropsliga virkin og brúka eina rúgvu av orku. Børnini skiftast um at fara í Fimi. Áleið 4 børn fara við frá hvørjari stovu hvørja ferð.

TILTØK

Í Birkilund hava vit nøkur árlig tiltøk so sum føstulávint, sól- og summardag, fletta seyð um heystið og jólahald. Vit syrgja altíð fyri at kunna foreldur, áðrenn eitthvørt spennandi tiltak fer fram.

Vit hava millum annað hesi afturvendandi tiltøkini: 

Føstulávintshald. Børnini kunnu koma grýluklødd, um tey hava hug til tað. Vit sláa tunnu og hugna okkum saman.

Sól- og summardagur. Børn, foreldur og starvsfólk eru saman í garðinum til ymiskt virksemi, sum er lagt til rættis frammanundan. Til sól- og summardag hava vit eitt tema fyri dagin, og tað er bara hugflogið, ið setur markið fyri, hvat temaið kann verða.

Fletting. Ein uttanífrá kemur á stovnin at vísa børnunum, hvussu vit fletta ein seyð. Børnini fáa eina rúgvu at vita um, hvussu alt á og innan í seyðinum eitur. Eisini fáa børnini høvi at kanna seyðin nærri og halda í seyðabeininum, um tey hava hug til tað. Vit hagreiða kjøt og annars alt tað vit kunnu, eitt nú gera vit blóðpannukøkur og fletta bein.

Jólahald. Foreldur verða boðin til eina hugnaløtu á stovninum saman við børnum og starvsfólkum. Børnini ganga Lusia og syngja jólasangir. Eisini bjóða vit kaffi, thé og okkurt søtt hendan dagin.


FORELDRASAMSTARV

Gott foreldrasamstarv hevur stóran týdning fyri trivnaðin hjá einstaka barninum. Í Birkilund leggja vit dent á at hava eitt erligt, virðiligt og opið samskifti við foreldur. Tað er umráðandi, at tit sum foreldur kenna tykkum væl at tosa við okkum, tá tit hava tørv á tí.

Fyri at tryggja eitt gott grundarlag fyri einum góðum foreldrasamstarvi, leggja vit dent á at samskifta dagliga við tykkum um dagin hjá tykkara barni. Barnið og foreldrini hava betri møguleika fyri at tosa um gerandisstøður heima við hús, tá foreldur hava eina vitan um, hvat barnið upplivir gjøgnum dagin.

Vit hava foreldrasamrøður tvær ferðir árliga, tó hava tit altíð møguleika at fáa eina samrøðu við okkum, um tørvur á tí.

Hvørji eru vit

Á stovninum starvast í løtuni 28 starvsfólk. Námsfrøðingur er á hvørjari stovu, og vit miðja eftir at hava í minsta lagið tveir námsfrøðingar á hvørjari stovu, soleiðis at vit kunnu tryggja eitt gott og mennandi tilboð til børn okkara.

ForeldraGluggin
Hvat er ForeldraGluggin?

ForeldraGluggin er ein ókeypis app til snildfon, sum tú kanst brúka, um tú ert foreldur at dagstovnabarni í Tórshavnar kommunu.

Tænastan fevnir um dagstovnarnar og frítíðarskúlarnar í kommununi og verður brúkt til samskifti millum foreldur og dagstovn. Í ForeldraGlugganum kallar stovnurin til dømis inn til foreldraviðtalur og kunnar um gerandisdagin, og tað er somuleiðis her, tú boðar frá feriu:

  • foreldur kunnu fylgja við í gerandisdegnum hjá børnunum
  • foreldur kunnu skráseta frí og frítíð hjá barninum
  • foreldur og stovnur kunnu senda boð sínámillum
  • stovnurin kann skjótt og lætt kalla inn til foreldraviðtalur og tiltøk
  • foreldur fáa trygga atgongd til myndir og filmsbrot av barninum

Appin er royndarkoyrd á úrvaldum stovnum, og nú verður fyrsta verkætlanarstig so líðandi sett í verk á øllum dagstovnum í kommununi.

Hví brúka vit ForeldraGluggan?

So hvørt sum Føroyar vórðu raktar av Covid-19 aldunum í fjør, gjørdist tað kommununi greitt, at okkum tørvar ein skjótan og tryggan samskiftisfarveg, sum er felags fyri alt dagstovnaøkið: boðini og tilmælini til foreldur vóru mong, og tey broyttust ofta. Talan var eisini mangan um bráðfeingisboð, ið vóru umráðandi at fáa skjótt út til øll foreldur.

Harafturat kom nýggja dátuverndarlógin í gildi í januar 2021, og sambært henni eiga vit øll at tryggja okkum, at persónsupplýsingar og myndir verða handfarnar á so tryggan hátt sum gjørligt.


Tín persónligi gluggi

ForeldraGluggin verður tó ikki bara settur í verk fyri at geva stovnum ein farveg til bráðfeingisboð og tilmæli til foreldur. ForeldraGluggin er eisini partur av talgildingarætlanini hjá kommununi, sum millum annað hevur til endamáls at hækka kommunala tænastustøðið. Ítøkiliga er ForeldraGluggin, soleiðis sum orðið leggur upp til, ein lættur snarvegur hjá tær, sum ynskir at fáa skjótt og ómakaleyst innlit í gerandisdagin hjá tínum barni.

Tað er ein kend avbjóðing millum foreldur, at tað kann vera trupult at fáa rættiligt innlit í tann ofta stóra partin av gerandisdegnum, børnini eru á stovni. Børnini eru ikki altíð før fyri sjálvi at velja úr rúgvuni av upplivingum og greiða frá hendingunum í einum degi á stovni. Og foreldur hava viðhvørt knappa tíð at tosa og hyggja at myndum, tá tey koma eftir børnum sínum.

Higartil hava dagstovnar havt boðtalvur, facebookbólkar og teldur við myndum í gongini fyri at kunna foreldur um virksemið á stovninum. Dagstovnarnir hava eisini brúkt gott gamalt munnligt samskifti. ForeldraGluggin kemur ikki í staðin fyri munnliga samskiftið, men letur upp fyri fleiri miðvísum samskiftismøguleikum, soleiðis at tú sum foreldur hevur lætta atgongd til mangt av tí í gerandisdegnum, sum tú og barnið kunnu hava gagn av at tosa um.

Taka vit hesa skipanina til okkum og læra okkum at brúka hana miðvíst, so bæði skipar og tryggjar hon samskiftið fyri okkum og kann samstundis vera við til at tryggja trivnaðin og sambandið millum foreldur og barn.

Hvussu stovni eg ForeldraGluggan?

Soleiðis gert tú, um tú frammanundan hevur skrásett fartelefon og teldupost í BARN-skipanini

Hevur tú frammanundan skrásett títt fartelefonnummar og tín teldupostbústað í BARN-skipanini, kann stovnsleiðarin senda tær ein teldupost við einum leinki, tá ið barnið byrjar á stovninum.

Í teldupostinum stendur:

»Góði brúkari av ForeldraGlugganum

Fyri at kunna rita inn á ForeldraGluggan, skalt tú stovna brúkaranavn og loyniorð. Trýst á leinkið og vel brúkaranavn og loyniorð«

Tá ið tú trýstir á leinkið í teldupostinum og ritar inn, fært tú eina QR-kotu, sum tú skannar við snildfonini. So verður ForeldraGluggin tikin niður á tína telefon.

Tá tú hevur gjørt hetta, kanst tú fara til stig 4 í vegleiðingini niðanfyri.

Fært tú ikki ein teldupost sendandi, mást tú sjálv stovna teg sum brúkara. Tað gert tú við at fylgja stig 1-3 í vegleiðingini niðanfyri.

Soleiðis gert tú, um tú ikki hevur skrásett fartelefon og teldupost í BARN-skipanini, ella um tú ikki fært teldupost frá stovninum

1. Stovna teg sum brúkara

Fært tú ikki ein teldupost sendandi við einari QR-kotu, mást tú sjálv stovna teg sum brúkara fyri at brúka ForeldraGluggan. Tað gert tú í bókingarskipanini BARN. Tað tekur áleið ein minutt at stovna seg sum brúkara.

Tú ritar inn í bókingarskipanina BARN við tínum Samleika. Hevur tú ikki fingið tær Samleikan, kanst tú bíleggja tær hann á heimasíðuni hjá Samleikanum. Tú ritar inn í bókingarskipanina BARN her:

RITA INN Í BARN-SKIPANINA

Fá tær Samleikan (samleikin.fo)

Tá tú hevur ritað inn í BARN-skipanina, skalt tú trýsta á spjaldrið við tínum egna navni. Hevur tú foreldramyndugleikan yvir barninum, eigur tú at síggja teigin »Stovna ForeldraGluggan« í høgra bredda niðanfyri á síðuni:

Her skalt tú:

  • velja eitt brúkaranavn
  • velja eitt loyniorð
  • upplýsa títt fartelefonnummar, sum verður brúkt, tá tú tekur appina í nýtslu fyrstu ferð

2. Tak appina niður á snildfonina

Far inn á App Store (um tú hevur iPhone) ella GooglePlay (um tú hevur Android) og leita eftir »ForeldraGluggin«. Tak síðan appina niður.

3. Skriva brúkaranavn og loyniorð

Tá ið tú hevur tikið appina niður, trýstir tú á appina fyri at lata hana upp. Nú verður tú biðin um at skriva brúkaranavnið og loyniorðið, tú valdi tær í BARN-skipanini.

Tá tú hevur tøppað brúkaranavnið og loyniorðið inn, fært tú eini SMS-boð sendandi við einum trygdartali, sum tú skalt tøppa inn.

SMS-boðini við trygdartali verða bara send fyrstu ferðina, tú ritar inn - aftaná hetta tørvar tær bara at nýta brúkaranavnið og loyniorðið, tú valdi tær í BARN-skipanini.

4. Vel títt barn í appini og fyll kartotekskortið út

Hevur tú fleiri børn á stovni, sært tú byrjanarstavirnar hjá hvørjum barni í appini. Tú kemur inn á einstaka barnið við at trýsta á runda ikonið við byrjanarstavunum í.

Nú trýstir tú niðast høgrumegin á ikonið »Meira«.


Síðan trýstir tú á »kartotekskort« næstniðast í valmyndini.


Her svarar tú spurningum um títt barn og velur, hvørji loyvi tú vilt lata. Gev gætur, at hesar upplýsingarnar eru neyðugar fyri at skipanin riggar og handfer upplýsingarnar rætt.

Á kartotekskortinum kanst tú velja, um tú vilt lata stovninum ymiskar fulltrúir ella ikki. Tað eru fulltrúir til:

  • at fara útferðir
  • svimja undir námsfrøðiligum eftirliti
  • at barnið kann koyrast í privatbili, lógliga íbundið trygdarbelti
  • at barnið, sambært munnligari avtalu, kann avheintast av øðrum

Somuleiðis kanst tú geva fulltrúir til myndir og video alt eftir, hvat tú ynskir. Tú kanst velja, um:

  • øll foreldur at børnum á stovuni hjá barninum skulu kunna síggja myndir og filmar av tínum barni
  • øll foreldur at børnum á stovninum hjá barninum skulu kunnu síggja myndir og filmar av tínum barni
  • myndir og filmar av barninum skulu kunna vísast á almennu heimasíðuni hjá stovninum

Aðrar upplýsingar skulu eisini gevast, um serlig viðurskifti og atlit skulu takast til sjúkur, kost, lívsneyðugan heilivág og ovurviðkvæmi.

Somuleiðis verður tú biðin um at upplýsa:

  • tryggingar
  • kunning um barnið
  • kunning um familjuna
Soleiðis fært tú appina á føroyskum

Tú kanst velja at brúka appina á føroyskum. Ynskir tú tað, skalt tú fara til »generelt« í stillingunum á sjálvari telefonini, velja »Sprog og område« og velja »føroyskt« sum mál.

Tú mást somuleiðis ansa eftir, at føroyskt eisini stendur ovast undir »foretrukken sprogrækkefølge« í yvirskipaðu stillingunum.

Soleiðis boðar tú frá frí og frítíð

Fyri at kunna leggja arbeiðið til rættis á stovnunum, ynskja vit, at tú boðar frá, nær barnið heldur frí. Hesum boðar tú frá í ForeldraGlugganum.

Soleiðis boðar tú frá:

1. Lat ForeldraGluggan upp og rita inn

2. Trýst á »meira« niðast í høgra horni


3. trýst á »Frí og frítíð«


4. syrg fyri at swipe-knøtturin ovast er grønur


5. Vel fyrsta og seinasta dag í álmanakkanum og trýst á flugubeinið ovast í høgra horni

So er frítíðin skrásett. Hevur tú eina viðmerking til tína fráboðan, kanst tú skriva hana í teigin niðast. Minst til at trýsta á flugubeinið, tá tú ert liðug.

Hvar samskifta vit um hvat?

UPPSLØG

Í uppsløgunum finnur tú kunning um gerandisdagin á stovninum. Tað kunnu vera lýsingar av námsfrøðiliga gerandisdegnum, tiltøk ella ítriv, sum fara fram í nærmastu framtíð, áheitanir um at hava regnklæðir við og tílíkt. Tað ber ikki til at gera viðmerkingar til uppsløg.


BOÐ

Undir Boð sært tú samskiftið við ein ella fleiri úrvaldar móttakarar. Her hevur tú møguleika fyri at svara boðunum. Tað kann til dømis vera eini boð, har starvsfólkini ynskja at gera avtalu um eina foreldraviðtalu, ella tað kann vera eini boð við einum stuttum spurningi.

Tá tú sendir eini boð til starvsfólkini á dagstovninum, verða boðini send til felags postkassan hjá stovninum. Øll viðkomandi starvsfólk eru knýtt at hesum postkassanum, og tey kunnu sostatt svara tínum boðum.

Tað ber ikki til at senda boð til onnur foreldur á stovninum.


ÁLMANAKKI

Í álmanakkanum sært tú millum annað tiltøkini á stovninum, til dømis foreldrafundir, jólahald, páskahald og tílíkt. Her sært tú eisini, um tú ert boðin til foreldraviðtalu.


MYNDASAVN

Í myndaskjáttuni sært tú allar tær mappur og myndir, sum eru deild við teg. Í mappuni »Myndir av tær og tínum børnum« verða allar myndir og øll filmsbrot savnað, sum hava títt barn frámerkt á teimum.

Eg síggi ikki mítt barn í ForeldraGlugganum

Títt barn verður stovnað sjálvvirkið í ForeldraGlugganum við upplýsingum úr fólkayvirlitinum. Sostatt eru tað bara foreldur við foreldramyndugleika, sum síggja upplýsingar um barnið.

Sært tú ikki barnið í ForeldraGlugganum kanst tú:

  • spyrja stovnin, um barnið er skrásett í einari stovu á stovninum. Tá ið dagstovnurin hevur skrásett barnið í einari stovu, verður barnið sjónligt í appini, og tú kanst fylla kartotekskortið og tínar sambandsupplýsingar út

Sært tú ikki barnið, hóast barnið er skrásett á einari stovu, kanst tú:

  • kanna um foreldramyndugleikin er rætt skrásettur í fólkayvirlitinum. Hetta gert tú við at ringja til fólkayvirlitið á tel. 30 20 10.
Hevur tú aðrar spurningar um ForeldraGluggan?

Hevur tú fleiri spurningar um, hvussu tú skrásetur ella brúkar ForeldraGluggan, so finnur tú ofta settar spurningar og svar á síðu okkara um ForeldraGluggan. Har kanst tú eisini lesa brúkaratreytirnar.

TEMA - ForeldraGluggin

Dagligt samskifti
Facebook og teldupostsamskifti

Hvør stova hevur ein facebookbólk, har vit leggja kunning og myndir út til foreldur at lesa og síggja. Kunning frá leiðsluni senda vit umvegis teldupost.

Boðtalva

Ein boðtalva hongur í hvørjari gongd, har foreldur fáa dagliga kunning frá stovuni. Hendan kunning snýr seg í stórum um tað, sum gongur fyri seg í gerandisdegnum: hvat børnini hava gjørt ávísa dagin, um túrar og hvat annars fer at henda komandi dagarnar.

Vit leggja dent á, at tit sum foreldur javnan hyggja at talvuni, soleiðis at tit fáa røttu kunning. Tað er tó somuleiðis umráðandi, at foreldur og starvsfólk tosa væl saman, og hava tit spurningar ella eru ivamál, so eru tit altíð vælkomin inn at tosa við starvsfólk ella leiðara. Okkara ynski er at hava eitt opið og álitisfult samskifti við øll foreldur.

Eftirlit og dygd
Námsfrøðilig dygd

Ein dygdarmennari úr Barna- og ungdómsdeildini hjá Tórshavnar kommunu kemur við jøvnum millumbilum út á dagstovnarnar í kommununi at eygleiða námsfrøðiliga innihaldið og umstøðurnar, sum námsfrøðiliga arbeiði fer fram í.

Dygdarmennarin samskiftir síðan við dagstovnaleiðaran og starvsfólkini um sínar eygleiðingar, og funnið verður fram til ítøkiligar menningarmøguleikar.

Talan er um skipaðar eygleiðingar (KIDS), sum skulu vera við til at tryggja, at vit framhaldandi arbeiða við, og savna okkum um, námsfrøðiligu dygdina á hvørjum einstøkum dagstovni. KIDS er eitt viðurkent og granskingargrundað amboð til eftirmeting og menning av námsfrøðiligu dygdini á dagstovnum.

Eygleiðingarnar eru innanhýsis arbeiðsamboð til einstaka stovnin at brúka í sínum menningararbeiði.

Eftirlit við spæliplássi

Triðja hvørt ár skipar kommunan fyri einari kanning av trygdarviðurskiftunum á øllum dagstovnaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Seinasta trygdareftirlit fór fram í 2018. Næsta eftirlitið verður í 2021.

Kommunalu húsavørðarnir hava dagliga eftirlitið við spæliplássunum.

Lyklatøl
Pláss á stovninum

Á Dagstovninum Birkilund hava vit pláss fyri áleið 120 børnum. Vit hava tríggjar vøggustovur, sum rúma um 36 børnum, og fýra barnagarðsstovur, sum rúma um 75 børnum. Harafturat er ein stova til tey 6 ára gomlu, skúlabólkurin, har barnatalið skiftir alt eftir hvussu stórur árgangurin er.

Gjald og uppskriving til stovnspláss
Bóka pláss

Tú nýtir talgildu bókingarskipanina BARN, tá tú skalt bóka dagstovnapláss.

Fyri at nýta bókingarskipanina, skalt tú rita inn við Samleikanum, sum er ein trygg innritingarskipan. Hevur tú ikki Samleikan, kanst tú bíleggja tær hann her:

Fá tær Samleikan (samleikin.fo)

Bókingarskipanin er somuleiðis knýtt at postskipanini MínBoks. Tú fært atgongd til tína MínBoks, tá tú hevur fingið Samleikan.

Hevur tú ikki møguleika fyri at nýta bókingarskipanina BARN, kanst tú fylla umsóknarblaðið niðanfyri út og lata tað inn á Snarskivuni á Vaglinum í Tórshavn. Tú noyðist tá at vera til staðar í Snarskivuni, meðan skipanin leitar eftir stovnsplássi fyri teg. Finnur skipanin hóskandi pláss, mást tú taka av stovnsplássinum og vátta beinanvegin. Orsøkin er, at eitt pláss, sum er tøkt, kann verða bókað hvørja løtu av foreldrum, sum sjálvi bóka pláss í skipanini.

Bóka pláss

Umsókn um pláss á dagstovni

Upptøkureglur

Her kanst tú kunna teg um galdandi reglurnar fyri upptøku av børnum til dagstovnar í Tórshavnar kommunu.

Upptøkureglur fyri dagstovnarnar í Tórshavnar kommunu

Dagstovnagjøld

Gjøldini fyri dagstovnapláss sært tú her:

Dagstovnagjøld

Frípláss

Sum foreldur kunnu tit søkja um frípláss til barnið. Um frípláss verður játtað, og hvussu nógv verður játttað, veldst um tykkara inntøku.

Søk um frípláss

Uppsøgn

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp stovnspláss