Barna- og ungdómshúsið Látrið

Válagøta 7
270 Nólsoy

Leiðari Maud Wang Hansen
Tel. 28 86 06
maudwh@torshavn.fo 

Vís á korti

Lurta

Barna- og ungdómshúsið Látrið

Látrið er ein nýmótans dagstovnur mitt í náttúruperluni Nólsoy. Vit brúka bygdina og oynna sum spæli- og upplivingarpláss. Á Látrinum leggja vit dent á fría spælið hjá børnunum, tí soleiðis mennir barnið millum annað hugflogið og sosialu spælireglurnar. Látrið og Nólsoyar skúli hava eitt tætt samstarv.



Um frítíðarskúlan
Upplatingartíðir

Mánadag til hósdag frá kl. 11.30-17.

Fríggjadag frá kl. 10.45-17.

Samband

Dagstovnaleiðari

Maud Wang Hansen
Tel. 28 86 06
maudwh@torshavn.fo 


Bólið

Tel. 27 49 10

Afturlatingardagar og samanlagt virksemi

Afturlatingardagar og samanlagt virksemi í 2024

  • Allar vanligar halgidagar – stongt
  • Páskafrítíð 25. - 27. mars – møguleiki fyri at melda til samanlagt virksemi
  • Páskafrítíð 28. mars - 1. apríl – stongt
  • Flaggdagur 25. apríl – stongt
  • Dýri biðidagur 26. apríl – stongt
  • 2. hvítusunnudagur 20. mai – stongt
  • Grundlógardagur 5. juni – stongt
  • Kristi himmalsferðardagur 9. juni – stongt
  • Summarfrítíð 19. juni - 9. juli – møguleiki fyri at melda til samanlagt virksemi
  • Summarfrítíð 10. juli - 14. august – stongt
  • Heystfrítíð 14. - 18. oktober – møguleiki fyri at melda til samanlagt virksemi
  • Jólafrítíð 2024 – stongt samsvarandi frítíð skúlans
  • Stovnurin hevur tveir ráðleggingardagar um árið. Hesar báðar dagar er stovnurin stongdur. Tað er ymiskt, nær ráðleggingardagarnir eru, men foreldur fáa boð í seinasta lagi seks vikur frammanundan


Samanlagt virksemi

Í páskafrítíðini, í summarfrítíðini og í heystfrítíðini leggja kommunalu frítíðarskúlarnir sítt virksemi saman, soleiðis at ein frítíðarskúli er opin í feriuni. Hetta rópa vit fyri samanlagt virksemi. Hevur tú tørv á tí, kann títt barn sostatt fáa pláss í samanlagda virkseminum, tá frítíðarskúlarnir annars eru stongdir.

Frítíðarskúlarnir hava samanlagt virksemi hesi tíðarskeið í 2024:

  • Páskafrítíð 25. - 27. mars 2024
  • Summarfrítíð 19. juni - 9. juli 2024
  • Heystfrítíð 14. - 18. oktober 2024

Freistir at tekna seg til samanlagt virksemi

  • Páskafrítíð 2024: 12. februar 2024
  • Summarfrítíð 2024: 16. mai 2024
  • Heystfrítíð 2024: 2. september 2024

Gev gætur, at heldur tú ikki umsóknarfreistina, kunnu vit ikki tryggja tínum barni pláss í samanlagda virkseminum. Tørvar tær pláss í samanløgdum virksemi, kanst tú søkja á síðu okkara um samanlagt virksemi fyri frítíðarskúlar.

Samanlagt virksemi fyri frítíðarskúlar

Vitja okkum

Tit eru altíð vælkomin at vitja okkum. Ring til Maud Wang Hansen á tel. 28 86 06 ella skriva til maudwh@torshavn.fo fyri at avtala eina vitjan.

Matur og drekka

Børnini skulu hava matpakka við hvønn dag, uttan tá vit hava felags døgurða. Teir dagarnar fáa foreldrini boð í góðari tíð. Afturvið matpakkanum fáa børnini mjólk.

Børnini fáa millummála hvønn dag. Vit royna at hava ein fjølbroyttan millummála, sum millum annað broytist eftir árstíðunum og eftir ynskjum frá børnunum. Millummálalistin hongur á svørtu talvu í køkshorninum í Bólinum.

Trygdarskeið

Stovnurin skipar regluliga fyri trygdarskeiðum fyri starvsfólk og leiðslu.

Foreldraráðið

Foreldraráðið arbeiðir fyri at styrkja trivnaðin og sambandið millum starvsfólk, heim, foreldur og børn á stovninum. Sum limur í foreldraráðnum kanst tú vera við til at tryggja, at stovnurin er eitt gott stað at vera. Tú fært bæði innlit í og ávirkan á gerandisdagin og námsfrøðiliga leist okkara á stovninum.

Limirnir í foreldraráðnum eru eisini hugskotsgevar og eru við til at kjakast um menningina og átøk á stovninum. Tú verður við til at skifta orð um og viðgerða virðini handan námsfrøðiliga leistin, sum í ávísan mun eru stýrandi fyri tey ítriv, børnini og tey vaksnu eru saman um á stovninum.

Her finnur tú okkum

Námsfrøðiligur leistur
Soleiðis arbeiða vit

Á Látrinum skal vera pláss fyri smáum og stórum, tað vil siga børnum, ungum, foreldrum og starvsfólkum. Vit arbeiða við nærleika og tryggleika í nærumhvørvinum við at skapa ein gerandisdag, har børn, ung og starvsfólk trívast, mennast og finna avbjóðingar. Vit arbeiða tvørturum aldurin á børnunum og taka støði í hvørjum einstøkum barni og ungum við tí í huga, at vit øll eru serstøk og hava ymiskan tørv á at mennast sálarliga og likamliga.

Vit arbeiða miðvíst fyri, at stovnurin skal gerast so grønur sum møguligt, millum annað við at gera børnini og tey ungu tilvitað um plastnýtslu og tílíkt. Vit nýta nærum einki plast. Heldur endurnýta vit og brúka tilfeingi úr náttúruni.

Vit leggja dent á tað fría spæli hjá børnunum, tí soleiðis mennir barnið millum annað hugflogið og sosialu spælireglurnar.

Í námsætlan okkara arbeiða vit við barnarættindum, fólkaræði og javnstøðu í huga.

Vit leggja millum annað dent á:

  • At børnini eru við til at mynda gerandisdagin
  • At vit virða ymisleikan og áhugan hjá tí einstaka barninum og hjá hvørjum øðrum
  • At vit øll hava rætt til at luttaka í felagsskapinum

Vit leggja dent á ríku tónleikamentanina í Nólsoy. Vit hava eitt væl útgjørt tónleikarúm við ymiskum ljóðførum, har børn og ung kunnu venja ymisk ljóðføri hvør sær ella saman. Tey framføra bæði sum einstaklingar og í tónleikabólkinum hjá Látrinum, "Bólaband".

Vit arbeiða við søgu og mentan bæði afturlítandi og við staðbundnu søguni í nútíðarsamfelagnum.

 

Samstarv

Tað er sera týdningarmikið, at vit hava eitt gott og virðiligt foreldrasamstarv, soleiðis at barnið trívist á stovninum. 

Tá foreldur koma á stovnin, leggja vit dent á at steðga á og heilsast. Av tí, at foreldur sjáldan koma á stovnin, svara vit á tel. 27 49 10 frá kl. 11.

Vit hava ein árligan felags foreldrafund. Eisini hava vit eina foreldraviðtalu um árið. Um tørvur er á tí, eru vit kortini altíð til reiðar at tosa við tykkum, um tit ella vit hava okkurt upp á hjarta.

Tað kemur fyri, at barninum tørvar eyka stimbran ella viðgerð, og tá er umráðandi, at vit tosa opið saman um hetta, soleiðis at tørvurin hjá barninum verður nøktaður. Soleiðis fær barnið bestu fortreytir at mennast.

Stovnurin hevur í samráð við foreldrini møguleikar at leita sær serkøna hjálp og ráðgeving frá Barna- og ungdómsdeildini hjá Tórshavnar kommunu, umframt frá Sernámi.

 

Ítriv

Í Berginum er okkara verkstaðsøki, har til ber at fáast bæði við fínt og grovari arbeiði. Vit leggja dent á endurnýtslu og ymiskt tilfar úr náttúruni, og vit brúka sum minst av formum. Vit leggja dent á, at børnini læra at brúka ymisk amboð og gott handverk. Hetta fyri at børnini læra at hugsavna seg um tað, tey gera. Tað ein góður førningur at hava við sær í lívinum.

Vit arbeiða tvørtur um aldursbólkar í verkstaðnum í Berginum. Vilja stovurnar arbeiða hvør sær við ymiskum ítrivi, taka tær tilfarið inn á stovurnar.

 

Tiltøk

Siðvand tiltøk eru jólahald, føstulávint og summarveitsla. Tað hevur stóran týdning, at vit hava afturvendandi tiltøk, ið vit kenna aftur, og sum vit kunnu gleða okkum til.

Eisini skipa vit saman við Nólsoyar skúla fyri SSP, ið stendur fyri Skúli, Sosialir myndugleikar og Politi. Hetta eru tiltøk fyri børn, ung og foreldur. Vit hava til dømis havt drekadag og lummalyktatúrar.

Um heystið fletta vit. Tá hagreiða vit alt av seyðinum. Vit gera rullu-og blóðpylsu, heingja kjøt til ræsingar og rota skinnið fyri at tøva ullina. Tálgina nýta vit til knettir, sápu og ljós. Hornini framleiða vit til ymiskar prýðislutir.

Um várið velta vit ymiskt grønmeti, sum vit eta til millummála um heystið.

 

Sjúka

Tá eitt barn er sjúkt, hevur fepur ella er illa fyri, kann tað ikki koma á stovnin. Barnið skal kunna taka lut í vanliga gerandisdegnum á stovninum, til dømis at vera úti.

Vinarliga sig okkum frá, um barnið ikki kemur á stovnin vegna sjúku, og hvat bagir barninum. Hetta er vegna smittuvanda.

Meta vit, at eitt barn er illa fyri, hevur fepur ella til dømis eygnabruna, ringja vit eftir tykkum.

 

Klæðir

Gerandisdagurin er merktur av, at børnini fáa avbjóðingar innan- og uttandura. Tí er umráðandi, at børnini hava klæðir, ið hóska til veðrið, og at eyka klæðir liggja á stovninum. Øll klæðir skulu merkjast við navni. Foreldrini hava ábyrgdina av at rudda skiftirúmið hjá barninum og kanna eftir, um alt er í rúminum, sum eigur at vera har.

Hvørji eru vit?

Á stovninum starvast ein námsfrøðingur og tvey hjálparfólk, sum eisini eru tónleikarar. Harafturat hava vit reingerðarfólk og ein húsavørð.

ForeldraGluggin
Hvat er ForeldraGluggin?

ForeldraGluggin er ein felags samskiftispallur hjá dagstovnum og frítíðarskúlum í kommununi. Talan er um eina ókeypis app til snildfon, sum foreldur og dagstovnar brúka, tá tey samskifta sínámillum.

Hví brúka vit ForeldraGluggan?

So hvørt sum Føroyar vórðu raktar av Covid-19 farsóttini í 2020, gjørdist tað kommununi greitt, at okkum tørvaði ein skjótan, tryggan og felags samskiftisfarveg fyri alt dagstovnaøkið. Boðini og tilmælini til foreldur vóru mong, og tey broyttust ofta. Talan var eisini mangan um bráðfeingisboð, ið vóru umráðandi at fáa skjótt út til øll foreldur.

Harafturat kom nýggja dátuverndarlógin í gildi í januar 2021, og sambært henni eiga vit øll at tryggja okkum, at persónsupplýsingar og myndir verða handfarnar á so tryggan hátt sum gjørligt.


Tín persónligi gluggi

ForeldraGluggin er tó ikki bara tikin í nýtslu fyri at geva stovnum ein felags farveg til bráðfeingisboð og tilmæli. ForeldraGluggin er eisini partur av talgildingarætlanini hjá kommununi, ið millum annað hevur til endamáls at hækka kommunala tænastustøðið. Ítøkiliga er appin ein lættur snarvegur hjá tær, sum ynskir at fáa skjótt og ómakaleyst innlit í gerandisdagin hjá tínum barni.

Tað er ein kend avbjóðing millum foreldur, at tað kann vera trupult at fáa rættiligt innlit í tann stóra partin av gerandisdegnum, børnini eru á stovni. Børnini eru ikki altíð før fyri sjálvi at velja úr rúgvuni av upplivingum, og foreldur hava viðhvørt knappa tíð at tosa og hyggja at myndum, tá tey koma eftir børnunum á stovninum.

Higartil hava dagstovnar brúkt boðtalvur, facebookbólkar og teldur við myndum til at kunna foreldur um dagliga virksemið. Stovnarnir hava sjálvandi eisini tosað beinleiðis við foreldrini. ForeldraGluggin kemur ikki í staðin fyri munnliga samskiftið, men letur upp fyri fleiri miðvísum samskiftismøguleikum, soleiðis at tú sum foreldur hevur lætta atgongd til mangt av tí í gerandisdegnum, sum tú og barnið kunnu hava gagn av at tosa um.

Er ForeldraGluggin tryggur?

ForeldraGluggin er tryggari loysn í fleiri mátar:

  • bara foreldur, sum hava foreldramyndugleikan, og í summum førum fosturforeldur, kunnu í løtuni fáa atgongd til dáturnar í skipanini. Næsta verkætlanarstig fer at umfata foreldur, sum ikki hava felags foreldramyndugleika, og sonevnd bonusforeldur

  • tvey-faktor-góðkenning krevst fyri at rita inn í skipanina fyrstu ferð. Tað vil siga, at tú brúkar títt egna loyniorð og brúkaranavn og fært eina einnýtiskotu sendandi við SMS, ið verður brúkt fyri at tryggja, at tínar upplýsingar samsvara

  • myndir av tínum børnum verða goymdar í appini, ið verður rikin á vardum servara hjá Tórshavnar kommunu. Tað merkir millum annað, at tá starvsfólk taka myndir av tínum barni, so verður myndin ikki goymd á snildfonini sjálvari, men á varda kommunala servaranum

  • stovnar og foreldur sleppa undan at hava myndir liggjandi á Facebook og heimasíðum, sum kommunan ikki fær vart, og sum fólk av óvart kunnu fáa atgongd til

  • fyllir tú kartotekskortið hjá tínum barni rætt út, syrgir skipanin fyri, at myndir verða deildar í tann mun, tú hevur givið loyvi til tað
Hvat kann ForeldraGluggin brúkast til?

ForeldraGluggin er ein app, sum verður brúkt til samskifti. Tað kann til dømis vera at senda innkallingar til foreldraviðtalur, kunna um ráðleggingardagar, deila myndir av børnunum og vísa brellbitar frá degnum á stovninum:

  • foreldur kunnu fylgja við í gerandisdegnum hjá barninum
  • foreldur kunnu skráseta frí og frítíð hjá barninum
  • foreldur og stovnur kunnu samskifta talgilt
  • stovnurin kann skjótt og lætt kalla inn til foreldraviðtalur og tiltøk
  • foreldur fáa atgongd til myndir og filmsbrot av barninum
  • foreldur kunnu gera spæliavtalur vegna børnini
Hvussu stovni eg meg sum brúkara?

Soleiðis gert tú, um tú longu hevur skrásett fartelefon og teldupost í plássskipanini

Hevur tú skrásett títt fartelefonnummar og tín teldupostbústað í plássskipanini frammanundan, kann stovnsleiðarin senda tær ein teldupost við einum leinki, tá ið barnið byrjar á stovninum.

Í teldupostinum stendur:

»Góði brúkari av ForeldraGlugganum. Fyri at rita inn á ForeldraGluggan, skalt tú stovna brúkaranavn og loyniorð. Trýst á leinkið og vel brúkaranavn og loyniorð«

Tá ið tú trýstir á leinkið í teldupostinum og ritar inn, sært tú eina QR-kotu, sum tú skannar við snildfonini. So verður appin tikin niður á tína telefon.

Tá tú hevur gjørt hetta, kanst tú fara til stig 4 í vegleiðingini niðanfyri.

Fært tú ikki ein teldupost sendandi, mást tú sjálv stovna teg sum brúkara. Tað gert tú við at fylgja stig 1-3 í vegleiðingini niðanfyri.

Soleiðis gert tú, um tú ikki hevur skrásett fartelefon og teldupost í plássskipanini, ella um tú ikki fært teldupost frá stovninum

1. Stovna teg sum brúkara

Fært tú ikki ein teldupost sendandi við einari QR-kotu, mást tú sjálv stovna teg sum brúkara fyri at brúka ForeldraGluggan. Tað gert tú í plássskipanini. Tað tekur áleið ein minutt at stovna seg sum brúkara í plássskipanini.

Tú ritar inn í plássskipanina við tínum Samleika. Hevur tú ikki fingið tær Samleikan, kanst tú bíleggja tær hann á heimasíðuni hjá Samleikanum.

RITA INN Í plássskipanina

Tá tú hevur ritað inn í plássskipanina, skalt tú trýsta á spjaldrið við tínum navni. Hevur tú foreldramyndugleikan, eigur tú tá at síggja teigin »Stovna ForeldraGluggan«:

Her skalt tú:

  • velja tær eitt brúkaranavn
  • velja tær eitt loyniorð
  • upplýsa títt fartelefonnummar, ið verður brúkt, tá tú tekur appina í nýtslu fyrstu ferð


Fá tær Samleikan (samleikin.fo)

2. Tak appina niður á snildfonina

Far inn á App Store (um tú hevur iPhone) ella GooglePlay (um tú hevur Android) og leita eftir »ForeldraGluggin«. Tak síðan appina niður.

3. Skriva brúkaranavn og loyniorð

Tá ið tú hevur tikið appina niður, trýstir tú á appina fyri at lata hana upp. Nú verður tú biðin um at skriva brúkaranavnið og loyniorðið, tú valdi tær í plássskipanini.

Tá ið tú hevur tøppað brúkaranavnið og loyniorðið inn, fært tú eini SMS-boð sendandi við einum trygdartali, sum tú skalt tøppa inn. SMS-boðini við trygdartali verða bara send fyrstu ferð, tú ritar inn - aftaná hetta tørvar tær bara at nýta brúkaranavnið og loyniorðið, tú valdi tær í plássskipanini.

4. Vel títt barn í appini og fyll kartotekskortið út

Hevur tú fleiri børn á stovni, sært tú byrjanarstavirnar hjá hvørjum barni í appini. Tú kemur inn á einstaka barnið við at trýsta á runda ikonið við byrjanarstavunum í.

Nú trýstir tú niðast høgrumegin á ikonið »Meira«.


Síðan trýstir tú á »kartotekskort« næstniðast í valmyndini.


Her svarar tú spurningum um títt barn og velur, hvørji loyvi tú vilt lata. Gev gætur, at hesar upplýsingarnar eru neyðugar fyri at skipanin riggar og handfer upplýsingarnar rætt.

Á kartotekskortinum kanst tú velja, um tú vilt lata stovninum ymiskar fulltrúir ella ikki. Tað eru fulltrúir til:

  • at barnið sleppur at fara við á útferð
  • at barnið sleppur at svimja undir námsfrøðiligum eftirliti
  • at barnið kann koyrast í privatbili, lógliga íbundið trygdarbelti
  • at barnið kann avheintast av øðrum sambært munnligari avtalu

Somuleiðis kanst tú geva fulltrúir til myndir og filmar alt eftir, hvat tú ynskir. Tú kanst velja, um:

  • øll foreldur at børnum á stovuni hjá barninum skulu kunna síggja myndir og filmar av tínum barni
  • øll foreldur at børnum á stovninum hjá barninum skulu kunnu síggja myndir og filmar av tínum barni
  • myndir og filmar av barninum skulu kunna vísast á almennu heimasíðuni hjá stovninum

Aðrar upplýsingar skulu eisini gevast, um serlig viðurskifti og atlit skulu takast til sjúkur, kost, lívsneyðugan heilivág og ovurviðkvæmi.

Somuleiðis verður tú spurd eftir:

  • kunning um tryggingar
  • kunning um barnið
  • kunning um familjuna
Soleiðis fært tú appina á føroyskum

Tú kanst velja at brúka appina á føroyskum. Ynskir tú tað, skalt tú fara til »generelt« í stillingunum á sjálvari telefonini, velja »Sprog og område« og velja »føroyskt« sum mál:

Tú mást ansa eftir, at føroyskt eisini stendur ovast undir »foretrukken sprogrækkefølge« í yvirskipaðu stillingunum.

Soleiðis boðar tú frá frí og frítíð

Fyri at kunna leggja arbeiðið til rættis á stovnunum, ynskja vit, at tú boðar frá, nær barnið heldur frí. Hesum boðar tú frá í ForeldraGlugganum.

Soleiðis boðar tú frá:

1. Lat ForeldraGluggan upp og rita inn

2. Trýst á »meira« niðast í høgra horni


3. Trýst á »Frí og frítíð«


4. Syrg fyri at swipe-knøtturin ovast er grønur


5. Vel fyrsta og seinasta frídag í álmanakkanum og trýst á flugubeinið ovast í høgra horni:

Nú hevur tú skrásett frítíðina. Hevur tú eina viðmerking til tína fráboðan, kanst tú skriva hana í niðasta teigin. Minst til at trýsta á bláa flugubeinið, tá tú ert liðug.

Hvar samskifta vit um hvat?

UPPSLØG

Í uppsløgunum finnur tú kunning um gerandisdagin á stovninum. Tað kunnu vera lýsingar av námsfrøðiliga gerandisdegnum, tiltøk ella ítriv, sum fara fram í nærmastu framtíð ella áheitanir um at hava regnklæðir við og tílíkt. Tað ber ikki til at gera viðmerkingar til uppsløg.


BOÐ

Undir »Boð« sært tú samskiftið við ein ella fleiri úrvaldar móttakarar. Her hevur tú møguleika fyri at svara boðunum. Tað kann til dømis vera eini boð, har starvsfólkini ynskja at avtala eina foreldraviðtalu, ella tað kann vera eini boð við einum stuttum spurningi.

Tá tú sendir eini boð til starvsfólkini á dagstovninum, verða boðini send til felags postkassan hjá stovninum. Øll viðkomandi starvsfólk eru knýtt at hesum postkassanum, og tey kunnu sostatt svara tínum boðum.

Tað ber ikki til at senda boð til onnur foreldur á stovninum.


ÁLMANAKKI

Í álmanakkanum sært tú tiltøkini á stovninum, til dømis foreldrafundir, jólahald, páskahald og tílíkt. Her sært tú eisini, um tú ert boðin til foreldraviðtalu.


MYNDASAVN

Í myndaskjáttuni sært tú allar tær mappur og myndir, sum eru deild við teg. Í mappuni »Myndir av tær og tínum børnum« verða allar myndir og øll filmsbrot savnað, sum hava títt barn frámerkt á teimum.

Eg síggi ikki mítt barn í appini

Títt barn verður stovnað sjálvvirkandi í ForeldraGlugganum við upplýsingum úr fólkayvirlitinum. Sostatt eru tað bara foreldur við foreldramyndugleika, sum síggja upplýsingar um barnið. Næsta verkætlanarstig fer at gera tað møguligt at geva foreldrum uttan foreldramyndugleika atgongd til skipanina.

Sært tú ikki barnið í ForeldraGlugganum, kanst tú:

  • spyrja stovnin, um barnið er skrásett í einari stovu á stovninum. Tá ið dagstovnurin hevur skrásett barnið í einari stovu, verður barnið sjónligt í appini, og tú kanst fylla kartotekskortið og tínar sambandsupplýsingar út

Sært tú ikki barnið, hóast barnið er skrásett á einari stovu, kanst tú:

  • kanna um foreldramyndugleikin er rætt skrásettur í fólkayvirlitinum. Hetta gert tú við at ringja til fólkayvirlitið á tel. 30 20 10.
Hevur tú aðrar spurningar um ForeldraGluggan?

Hevur tú fleiri spurningar um, hvussu tú skrásetir ella brúkar ForeldraGluggan, so finnur tú ofta settar spurningar og svar á síðu okkara um ForeldraGluggan. Har kanst tú eisini kunna teg um brúkaratreytirnar.

ForeldraGluggin (tema)

Eftirlit og dygd
Námsfrøðilig dygd

Ein dygdarmennari úr Barna- og ungdómsdeildini hjá Tórshavnar kommunu kemur við jøvnum millumbilum út á kommunalu frítíðarskúlarnar at eygleiða námsfrøðiliga innihaldið og umstøðurnar, sum námsfrøðiliga arbeiði fer fram í.

Dygdarmennarin samskiftir síðan við frítíðarskúlaleiðaran og starvsfólkini um sínar eygleiðingar, og funnið verður fram til ítøkiligar menningarmøguleikar.

Talan er um skipaðar eygleiðingar (KIDS), sum skulu vera við til at tryggja, at vit framhaldandi arbeiða við, og savna okkum um, námsfrøðiligu dygdina í hvørjum einstøkum frítíðarskúla. KIDS er eitt viðurkent og granskingargrundað amboð til eftirmeting og menning av námsfrøðiligu dygdini á dagstovnum og frítíðarskúlum.

Eygleiðingarnar eru innanhýsis arbeiðsamboð til einstaka stovnin at brúka í sínum menningararbeiði.

Eftirlit við spæliplássi

Triðja hvørt ár skipar kommunan fyri kanning av trygdarviðurskiftunum á øllum frítíðarskúlaspæliplássum í Tórshavnar kommunu.

Í løtuni er tað Nordisk Legepladsinstitut, sum hevur kanningararbeiðið um hendi. Tórshavnar kommuna fær eina útgreinaða støðulýsing av hvørjum spæliplássi og ger neyðugu umvælingarnar ella tiltøkini, sum støðulýsingin mælir til.

Kommunalu húsavørðarnir hava dagliga eftirlitið við spæliplássunum.

Lyklatøl
Pláss á frítíðarskúlanum

Frítíðarskúlin Látrið hevur pláss fyri 22 børnum.

Gjald og uppskriving til stovnspláss
Skriva títt barn inn í frítíðarskúla

Vilt tú skriva títt barn inn í frítíðarskúla, kanst tú avgreiða innskrivingina frá hesari síðuni:

Skriva títt barn inn í frítíðarskúla

Upptøkureglur

Her kanst tú kunna teg um galdandi reglurnar fyri upptøku av børnum til frítíðarskúlarnar í Tórshavnar kommunu:

Upptøkureglur

Frítíðarskúlagjøld

Gjøldini fyri frítíðarskúlapláss sært tú her:

Gjøld fyri frítíðarskúla

Frípláss

Foreldur við inntøkum undir ávísum marki kunnu søkja kommununa um eitt ískoyti til at fíggja stovnspláss. Ískoytið verður rópt fyri fíggjarligt frípláss. Les meira um møguleikarnar og treytirnar á síðu okkara um frípláss.

Søk um frípláss

Uppsøgn

Ynskir tú at siga stovnsplássið frá tær ella biðja um farloyvi frá stovninum, er uppsagnartíðin tveir mánaðir. Tú kanst lesa meira her:

Sig upp frítíðarskúla

Nólsoy sæð við barnsins eyga

Barna- og ungdómshúsið Látrið hevur framleitt ein film saman við Nólsoyar skúla og við stuðli frá Mentamáladeildini í Tórshavnar kommunu, Mentamálaráðnum og Visit Faroe Islands.