Lurta

Samanlagt virksemi í frítíðarskúla

Hevur tú tørv á frítíðarskúlaplássi í frítíðini, tá frítíðarskúlarnir annars eru stongdir, kanst tú søkja um pláss í einum frítíðarskúla, sum er opin í frítíðini. Í Tórshavnar kommunu leggja frítíðarskúlarnir virksemið saman í frítíðini, soleiðis at minst ein frítíðarskúli er opin. Hetta rópa vit fyri samanlagt virksemi.

Søk um pláss í samanløgdum virksemi

Øll børn til og við 2. flokki eru vælkomin at nýta tilboðið. Niðanfyri kanst tú kunna teg um, hvussu samanlagda virksemið er skipað, hvørjar umsóknarfreistirnar eru og hvussu tú ber teg at við at søkja barni tínum pláss.



Soleiðis meldar tú til
Hvussu meldi eg til?

Hevur tú tørv á plássi í samanløgdum virksemi, skalt tú søkja um tað við at nýta grøna knøttin niðanfyri og tøppa kravdu upplýsingarnar inn.

Gev gætur, at tilmeldingin letur upp fýra vikur áðrenn umsóknarfreistina. Tað ber ikki til at søkja pláss, fyrr enn tilmeldingin er latin upp. Kunna teg um umsóknarfreistirnar niðanfyri.

Søk um pláss í samanløgdum virksemi

Hevur tú spurningar, ert tú vælkomin at venda tær til Snarskivuna á telefon 30 20 10.

Tilmeldingin er bindandi – sig frá, um tú ikki hevur tørv á plássinum

Tilmeldingin til samanlagt virksemi er bindandi. Hevur tú teknað títt barn til samanlagda virksemið, og hevur tað ikki tørv á plássinum kortini, skalt tú skjótast gjørligt boða leiðaranum frá í frítíðarskúlanum hjá barninum.

Er samanlagda virksemið longu byrjað, skalt tú venda tær til leiðaran í tí frítíðarskúlanum, har samanlagda virksemið fer fram. Navn og telefonnummar til leiðaran av samanlagda virkseminum hevur tú fingið frá leiðaranum á frítíðarskúlanum hjá tínum barni, áðrenn samanlagda virksemið byrjaði.

Bráðfeingis tørvur á plássi

Hevur tú bráðfeingis tørv á plássi, eftir at tilmeldingarfreistin er farin, skalt tú senda torshavn@torshavn.fo eina skrivliga umsókn um pláss í samanlagda virkseminum. Minst til at skriva »Bráðfeingis tørvur/Barna- og ungdómsdeildin« í evnisteigin.

Í umsóknini skalt tú greiða frá bráðfeingisstøðuni og grundgeva fyri tín brádliga íkomna tørv á plássi. Tórshavnar kommuna svarar tær skrivliga aftur.

Soleiðis er samanlagda virksemið skipað
Samanlagda virksemið í 2023

Frítíðarskúlarnir hava samanlagt virksemi hesi tíðarskeið í 2023:

  • Páskafrítíð 3. apríl - 5. apríl 2023
  • Summarfrítíð 21. juni - 5. juli 2023
  • Heystfrítíð 9. oktober - 13. oktober 2023

Tá tað stundar til, at samanlagda virksemið skal byrja, kunnar frítíðarskúlaleiðarin teg um, hvat tú skalt hava í huga, tá títt barn byrjar í samanlagda virkseminum. Tú fært millum annað at vita, hvørji starvsfólk frá frítíðarskúlanum verða til staðar í samanlagda virkseminum.

Umsóknarfreistir

Freistirnar at melda til samanlagt virksemi í 2023 eru:

  • Páskafrítíð 13. mars 2023
  • Summarfrítíð 31. mai 2023
  • Heystfrítíð 25. september 2023

Tú finnur eisini freistirnar á heimasíðuni hjá frítíðarskúlanum, títt barn vanliga gongur í.

Ein mánaða fyri tilmeldingarfreistina festa allir dagstovnar í kommununi eitt uppslag um tilmelding og freist á kunningarveggin í dagstovninum. Hetta er fyri at minna foreldur á tilmeldingina.

Gev gætur, at tað er tín egna ábyrgd sum foreldur at melda barnið til samanlagda virksemið rættstundis.

Finn frítíðarskúla

Dagligu upplatingartíðirnar í samanlagda virkseminum

Samanlagda virksemið er opið frá kl. 7.45-17.

Hvussu síggi eg, hvør stovnur er opin í frítíðartíðini?

Hevur tú meldað títt barn til samanlagt virksemi, kunna vit teg um, hvør frítíðarskúli er opin, tá tilmeldingarfreistin er farin. Hesa kunning fært tú frá leiðaranum á frítíðarskúlanum hjá tínum barni.

Hvussu leingi er tilmeldingin opin?

Tilmeldingin er opin í minsta lagi fýra vikur. Eftir tilmeldingarfreistina letur tilmeldingin aftur, og stovnsleiðarar fáa tá stundir til at fyrireika starvsfólk og virksemi, áðrenn samanlagda virksemið letur upp.

Nær fái eg kunning um samanlagda virksemið, sum mítt barn er meldað til?

Tá tað stundar til samanlagda virksemið, fært tú nærri upplýsingar um, hvat tú skalt hava í huga. Tú fært millum annað at vita, hvørji starvsfólk frá frítíðarskúlanum verða til staðar í samanlagda virkseminum.

Kunningina fært tú frá leiðaranum á frítíðarskúlanum hjá tínum barni.

Barna- og ungdómsdeildin
Barna- og ungdómsdeildin

Niels Finsens gøta 31, 100 Tórshavn

Les um Barna- og ungdómsdeildina

torshavn@torshavn.fo

Tel. 30 20 10

Upplatingartíðir
Mánadag - hósdag9-16
Fríggjadag9-15