Søk um frípláss til frítíðarskúla
Foreldur við inntøkum undir ávísum marki kunnu søkja um eitt ískoyti til at fíggja dagstovnapláss og frítíðarskúlapláss. Hetta verður rópt fyri frípláss.
Freistin at søkja um fíggjarligt frípláss er 1. juli á hvørjum ári. Tú noyðist at bóka tínum barni pláss á einum frítíðarskúla, áðrenn tú kanst søkja um frípláss.
Hevur tú Samleikan, søkir tú á Vanganum. Tá tú hevur søkt fært tú eina kvittan í MínBoks.
Hevur tú ikki skrásett tær Samleikan, ið krevst fyri at søkja á Vanganum, kanst tú gera tað á heimasíðuni hjá Samleikanum. Tá tú søkir umvegis Vangan kanst tú kunna teg um journalnummar og støðuna á málinum á veitarasíðuni.
Tá tú søkir um fíggjarligt frípláss, skalt tú viðfesta tvey yvirlit frá TAKS:
- yvirlit yvir tínar inntøkur í inniverandi ári
- yvirlit yvir tínar inntøkur í fjør
Tað er umráðandi, at yvirlitini vísa einstøku postarnar og samlaðu inntøkuna.
Soleiðis kanst tú fáa fatur á yvirlitunum:
- rita inn á borgaragluggan hjá TAKS á heimasíðuni hjá TAKS
- vel spjaldrið »Løn«
- vel røttu tíðarskeiðini (fyri í fjør og í ár) og trýst á »skriva út« ovast í høgra bredda
- goym útskriftirnar sum PDF og viðfest tær í tínari umsókn um frípláss
Hava tú ella maki tín eyka inntøkur aftrat lønarinntøkunum, skalt tú viðfesta skjalprógv fyri eykainntøkurnar. Eykainntøkur kunnu til dømis vera inntøkur frá útleigan av íbúð, inntøkur frá virðisbrøvum ella inntøkur, ið ikki eru skattskyldugar í Føroyum. Tú hevur skyldu til at kunna okkum um tílíkar inntøkur.
Fyri at søkja á Vanganum skalt tú harafturat hava fingið tær Samleikan, so tú fært ritað inn í skipanina. Hevur tú ikki fingið tær Samleikan, kanst tú bíleggja tær hann her:
Tú kanst søkja um frípláss á Vanganum. Tú ritar inn á Vangan við tínum Samleika.
Hevur tú ikki fingið tær Samleikan, kanst tú bíleggja hann her:
Hvussu stórt ískoyti, tú kanst fáa, veldst um inntøkuna í húskinum. Á stigatalvuni fyri frípláss sært tú, hvussu stóran part, tú sjálv skalt rinda, og hvussu stóran part, landið rindar.
Fyri at rokna fríplássupphæddina skalt tú sostatt bara kenna samlaðu inntøkuna hjá tær og tínum maka og galdandi dagstovnagjøldini.
Vit kunnu í fyrsta lagi játta tær frípláss, tá tú hevur bókað eitt pláss í einum frítíðarskúla. Tú bókar pláss við at trýsta á leinkjuna niðanfyri.
Tú móttekur fríplássískoytið, tá títt barn er byrjað á stovni. Gev gætur, at tað ber ikki til at søkja um frípláss afturvirkandi.
Eru tú ella maki tín sjálvstøðugt vinnurekandi, skalt tú viðfesta forskotsuppgerðina fyri tann av tykkum, sum er sjálvstøðugt vinnurekandi. Legg forskotsuppgerðina við, tá tú letur okkum umsóknina um frípláss.
Er tín umsókn um arbeiðsloysisstuðul ikki liðugt viðgjørd, er frægast, at tú viðmerkir navnið á tínum málsviðgera í ALS og gevur okkum loyvi til at seta okkum í samband við viðkomandi. Tú kanst viðmerkja hetta í viðmerkingarteiginum, tá tú søkir um frípláss á Vanganum.
Á henda hátt er skjótari hjá okkum at fáa eitt yvirlit yvir samlaðu inntøkurnar í tykkara húski og rokna títt fíggjarliga frípláss út.
Fært tú av onkrari orsøk ikki nýtt Vangan, kanst tú fylla út umsóknarskjalið niðanfyri og senda tað til torshavn@torshavn.fo ella lata skjalið inn á Snarskivuni á Vaglinum 11 í Tórshavn. Sendir tú umsóknina inn sum teldubræv, skalt tú minnast til at viðmerkja »Umsókn um frípláss til frítíðarskúla« í evnisteigin.
Játta vit tær frípláss, minkar títt dagstovnagjald samsvarandi fríplássupphæddini. Tað vil siga, at fríplássupphæddin verður mótroknað í tínum dagstovnagjaldi.
Fríplássískoytið er galdandi frá tí degi, títt barn byrjar í frítíðarskúlanum. Hetta er kortini treytað av, at tú hevur latið umsóknina um frípláss inn í seinasta lagi ein mánað eftir byrjanardagin. Letur tú hinvegin umsóknina inn seinni enn ein mánað aftaná byrjanarfreistina, er játtanin galdandi frá fyrsta degi í mánaðinum eftir.
Fáa vit til dømis tína umsókn 25. februar ella 31. mars, og barnið byrjar á stovninum 1. mars, verður ískoytið veitt frá 1. mars. Fáa vit hinvegin umsóknina seinni enn 31. mars, tekur fríplássið við frá 1. apríl.
Títt frípláss kann broytast frá mánaða til mánaða. Hetta kann koma fyri, um inntøkan hjá tær ella tínum maka broytist munandi.
Minst til, at tú hevur skyldu til at boða kommununi frá varandi broytingum í inntøkuviðurskiftunum og øðrum viðurskiftum, sum skerja tín rætt til fíggjarligt frípláss.
Eru varandi broytingar í tínum inntøkuviðurskiftum ella øðrum viðurskiftum, sum økja tín rætt til fíggjarligt frípláss, kanst tú lata nýggja umsókn inn fyri at dagføra fríplássupphæddina.
Nýt sjálvgreiðsluna omanfyri á hesari síðuni.
Tú hevur skyldu til at kunna okkum um broytingar í húskinum, hjúnastøðuni ella í øðrum viðurskiftum, sum hava týdning fyri títt fíggjarliga frípláss. Ein broyting kann til dømis vera, at tú fært ein maka, sum letur fíggjarligt íkast til húskið.
Tú hevur kortini ikki skyldu til at kunna um tínar egnu inntøkubroytingar uttan so, at talan er um broytingar í inntøkum frá sjálvstøðugum vinnuvirksemi ella í inntøkum, sum ikki eru skattskyldugar í Føroyum.
Vit eftirmeta títt fríplássískoyti eina ferð um árið. Vit fáa ársuppgerðir og onnur skjalprógv um tíni fíggjarviðurskifti frá TAKS.
Tá vit eftirjavna, taka vit eisini fyrilit fyri smærri inntøkubroytingum, sum ikki hava ført til eftirjavning árið fyri.
