Open Gym í venjingarmiðstøð

Open Gym er til tín, sum ert fólkapensjonistur, og sum ynskir at gerast betur fyri kropsliga.

Tilmelding er ikki neyðug. Tú kanst bara møta upp í BURN týsdag ella hósdag kl. 9.30

Endamálið við venjingini er, at tú endurvinnur tínar rørsluførleikar, soleiðis at tú kanst hava eitt virkið og vakið eldralív. Venjingarnar eru samstundis ein góður máti at koma saman við øðrum og møta nýggjum fólki.

Í Open Gym leggja vit dent á bæði styrki og at betra um konditiónina. Saman við tær leggja vit eina ætlan, soleiðis at venjingarnar hóska til tín tørv og tína heilsustøðu.

Vit venja týsdagar og hósdagar kl. 9.30 – 11.30

Tað er ymiskt, hvussu leingi hvør venjing varir, tí tað veldst um tína heilsustøðu. Starvsfólk hjá fysioterapitoyminum í Heilsu- og umsorganartænastuni eru hjástødd týsdagar og hósdagar kl. 9.30 til 11.30. Tey vegleiða teg gjøgnum fyrstu venjingarnar, soleiðis at tú kennir teg trygga og fært eina góða byrjan. Eftir hetta venur tú sjálvstøðugt.

Tá tú kemur til venjing, skalt tú hava innanduraskógvar og klæðir við, sum eru góð og løtt at røra seg í. Eisini er snilt at hava eitt handklæði við.

Tú mást tekna eitt limahald hjá BURN. Kostnaðurin er 199 kr. um mánaðin. Eitt stovningargjald á kr. 99 verður lagt afturat fyrsta gjaldinum.

Tú noyðist ikki at geva avboð.

Ynskir tú at siga haldið upp, skalt tú siga BURN frá áðrenn tann 15. í mánaðinum fyri.

Hevur tú spurningar, ert tú vælkomin at seta teg í samband við móttøkuna í Heilsuhúsinum við at ringja á tel. 30 20 00 ella senda ein teldupost til heilsuhusid@torshavn.fo.