Stóratjørn - ein burðardyggur býarpartur

Innrættingin av býarpartinum Stórutjørn skal sambært uppskotinum skipast soleiðis, at bústaðirnir liggja tætt at náttúruni, tó við hóskandi frástøðu fyri at skapa umstøður hjá fuglinum, so hann framhaldandi kann reiðrast í økinum. Grønu geirarnir í økinum eru bindiliðið millum Stórutjørn og býin. Geirarnir skapa eina áhugaverda grøna ferðaleið hjá øllum, sum búgva í býnum, og sum ynskja at leita sær niðan í hagan.

Stóratjørn liggur uppi í hæddunum, og býlingarnir eru tí harðbalnir. Sum verja ímóti útsynningsættini verða gjørdir vallgarðar, sum veita býlinginum lívd.

Stóratjørn er ein "rættur" býur við øllum hentleikum og innrættingum, sum lívsins uppihald krevur. Tað tekur tó nógv ár at gerast ein býur, og meðan býurin veksur, skal hann virka saman við grannalagnum og geva íbúgvunum neyðugu samleikakensluna, sum hoyrir býlinginum ella bygdini til.

Í miðstaðnum er eitt stórt torg, sum skilur seg út frá vanligum býartorgum. Her sæst náttúran aftur við eini tjørn, grasfløtum, trøðum og runnum. Her er eitt pláss, har bussar steðga, skrivstovur, handlar, kaféir og matstovur.

6 býlingar eru, og hvør býlingur er ein sjálvvirkandi eind, sum inniheldur ymiskar bygningseindir, raðhús, sethús, býarhús við íbúðum, eitt felagsøki við felagshúsi og ein stovnsbygning. Býlingurin er skipaður við ymiskum bústaðarstøddum, bústaðarsløgum og ognarleistum, sum ger, at tú fær fjølbroytni í samansetingini av íbúgvum og soleiðis tryggjar, at býlingurin verður sosialt burðardyggur, sum samstundis er útgangsstøði í felagsskapinum.

Heildarætlanin fevnir um eitt stórt øki, sum sambært ætlanini fer at rúma 800-900 bústøðum, umframt stovnum, miðstaðarbygging og øðrum. Tílík stór øki taka tíð at menna, og tørvurin kann broytast, so hvørt sum økini verða ment.

Heildarætlanin skal virka sum vegleiðandi grundarlag undir menningini av Stórutjørn, ið til ber at tillaga, so hvørt sum økini verða ment, og so hvørt sum nýggir tørvir vísa seg.

Skipanaruppskotið fyriheldur seg millum annað til hesi vandamál:

• Hvussu skipa vit økið sum ein burðardyggan býarpart, har náttúra og veðurlag er stýrandi fyri verkætlanina?
• Hvussu innrætta vit økið sum ein sjálvstøðugan býarpart við øllum teimum hentleikum, sum ein føroysk familja tørvar fyri at trívast?
• Hvussu skulu búformarnar síggja út fyri at kunna hýsa einum so fjølbroyttum borgarahópi sum gjørligt?

Allar býarskipanarligar heildarætlanir í Tórshavnar kommunu taka støði í kommunuætlanini, sum er yvirskipaða planleggingaramboðið hjá kommununi. Kommunuætlanin setir framtíðarnýtsluna fyri tey ymsu økini út í kortið, so sum bústaðarøki, vinnuøki, ítróttarøki og miðstaðarøki. Við støði í kommunuætlanini verða meira ítøkiligar ætlanir gjørdar, til dømis heildarætlanir.

Eitt dømi um slíka heildarætlan er Stóratjørn, ið er gjørd við støði í kommunuætlanini fyri Tórshavnar kommunu, har økið við Stóratjørn er lagt av sum ovasta raðfesting til framtíðar býarvøkstur.

Heildarætlanin fyri Stórutjørn er bara ein av fleiri heildarætlanum fyri ymisku økini í høvuðsstaðnum.

Tað er bæði eitt politiskt og umsitingarligt ynski í kommununi at fáa gjørt heildarætlanir fyri øll øki í býnum, soleiðis at framtíðarætlanirnar í kommununi gerast gjøgnumskygdar og atkomiligar hjá borgaranum, og soleiðis at vit hava eitt skilvíst grundarlag fyri at gera bindandi ásetingar fyri bygging og nýtslu av teimum økjum, sum heildarætlanirnar fevna um.

Kommunuætlanin

Miðbýarætlanin

Heildarætlanin fyri Eystara Havnaøki