Stóratjørn - ein burðardyggur býarpartur

Kommunan bjóðaði luttakarum til eitt undangóðkenningarumfar, áðrenn kappingin kundi setast í gongd um at gera besta heildaruppskotið fyri økið við Stórutjørn. Innbjóðingina til undangóðkenning sært tú her:

Innbjóðing til undangóðkenning desember 2019

Sjey umsóknir komu inn til undangóðkenningina, og fýra toymi vórðu vald út at luttaka í kappingini. Úrvaldu toymini vóru (í tilvildarligari raðfylgju) hesi:

• Fuglark, Biosis, Urban Creators og HMP Consult
• Henning Larsen North Atlantic, PB Consult og Rambøll
• MAP, Spenn og PB Consult
• SNA, Holscher Nordberg, LBF og SMJ

Øll fýra toymi lótu inn nøktandi uppskot inn. Dómsnevnd varð sett at meta um tey fýra uppskotini. Í dómsnevndini sótu:

• Marin Katrina Frýdal, forkvinna í byggi- og býarskipanarnevndini
• Heðin Mortensen, býráðslimur
• Bogi Jacobsen, tekniskur stjóri
• Birita Wardum, býararkitektur
• Ellen Marie Braae, landslagsarkitektur, fakdómari
• Ole Jensen, arkitektur, fakdómari

Ein samd dómsnevnd valdi at geva uppskotunum hjá toymunum hjá MAP og SNA eina deilda 1. virðisløn.

Uppskotini og dómsnevndarálitið sært tú her:

Stóratjørn - bygdin í býnum (MAP arkitektar)

Stóratjørn - oyggjar á heiði (SNA arkitektar)

Stóratjørn - dómsnevndarálit mai 2020

Við støði í vinnandi kappingaruppskotunum varð ráðgevarasáttmáli undirskrivaður við tey bæði vinnandi toymini um heildarætlan fyri Stórutjørn.

Ráðgevar lótu nýggju heildarætlanina fyri Stórutjørn inn 30. juni 2023.

Á býráðsfundi 28. september 2023 samtykti Tórshavnar býráð heildarætlanina fyri Stórutjørn sum vegleiðandi fyri víðari menning av økinum.

Tú kanst lesa politisku málsviðgerðina í gerðabókini frá býráðsfundinum, sum tú finnur á síðu okkara um býráðsfundir. Her finnur tú eisini leinki til stroymingina frá fundinum.

Dagsskráir og fundarfrásagnir frá býráðnum

Umsitingin bjóðaði út avgrevstur fyri tveimum býlingum. Articon var einasti arbeiðstakari, ið bjóðaði, og vann tí tilboðið. Articon hevur síðani bjóðað kommununi, umframt avgrevstur, at byggibúgva økið við tilfari frá innkomuvegnum. Rammusáttmáli er gjørdur millum arbeiðstakaran og Tórshavnar kommunu um byggibúning av býlingi 1 og 4 við Stórutjørn, og er talan um eina heildararbeiðstøku. Grótið frá innkomuvegnum og Húsareynstunlinum er stuttflutt tilfeingi, tí grótið verður nýtt til útstykkingina. Av tí sama ber til at avmarka nýggja spreinging í økinum sum tilmælt í umhvørvisárinskanning fyri økið. Arbeiðið verður handað kommununi 1. juli 2026.

Eftir at heildarætlanin varð samtykt, varð sjøtil settur á at fyrireika byggibúningina av teimum økjunum, sum í heildarætlanini eita Býlingur 1 og 4, og sum, sambært ætlanini, skuldu rúma tilsamans 218 bústaðareindum.

Við atliti til hugsjónina um skynsama lendisnýtslu og stóra bústaðartørvin varð tó mett, at økið kundi rúma fleiri bústøðum, og í fyrireikingartilgongdini gjørdi tekniska fyrisitingin hjá Tórshavnar kommunu tískil eina tillaging av býlingi 1 og 4. Nýggja skipanaruppskotið rúmar millum 410-og 420 bústaðareindum.

Umframt at fáa fleiri bústaðareindir, gevur nýggja skipanaruppskotið eisini fjølbroyttari bústaðarmøguleikar og leggur samstundis dent á at varðveita órørdu náttúrueyðkennini í lendinum sum ein part av býarskipanini. Hetta eru millum annað ymsar smærri tjarnir og vátlendisskipanir í økinum.

LBF er prosjekterandi ráðgevin í byggibúningini av býlingi 1 og 4, og P/F Articon er arbeiðstakari á staðnum.

^{Býlingsskipanin við Stórutjørn skal hava bæði randarhús, íbúðir og samanbygd krosshús}

Byggifelagsskapir sum krosshús

Í býlingunum 1 og 4 vera eftir ætlan randarhús, íbúðir í raðhúsum, sethús við 300 m2 grundstykki, lestraríbúðir og smærri íbúðir til støk og eldri. Umframt hetta verður ein partur av nýggju bústøðunum við Stórutjørn eftir ætlan skipaður sum byggifelagsskapir við fýra til átta samanbygdum bústaðareindum. 

Hetta slagið av bygging er ikki sæð fyrr í Føroyum, og skal eftir ætlan gera tað bíligari hjá fólki at byggja sær hús. Hugsanin er, at fýra atskild hús við hvør sínum matrikkli verða bygd upp í móti hvørjum øðrum við felags brunamúrum í miðjuni, sum hava eitt krossskap. Húsaeindirnar venda sostatt “rygg” til hvørja aðra, men stiðja seg upp at hvørji aðrari við at deila tveir brunaveggir við grannarnar.

Pláss verður til 11 av hesum samansettu krosshúsunum, sum hvørt kann hava úr fýra upp í átta bústaðareindir.

Krosshúsini hava stór grøn felagsøkir og eina bilfría gongugøtuskipan millum húsini við felags bilparkering uttanfyri grannalagið. Skipanarliga kemur hetta sostatt at minna um Tórsbyrgi, sum er eitt eyðkendur smábýlingur í eysturbýnum í Havn, og sum ofta verður nýtt sum eitt dømi um góðan grannalagsdám.

Í løtuni verður arbeitt við at planera vegir, fyrireika byggiøkini, og at leggja leiðingar av ymsum slag ígjøgnum økið.

Í størri byggiætlanum sum hesari eru broytingar væntandi, men verandi meting er, at økið verður byggibúgvið í seinnu helvt av 2026.

Skipanaruppskotið fyri býlingarnar 1 og 4, við tvífalt so nógvum búeindum (frá upprunaliga 218 búeindum til umleið 415 búeindir), varð samtykt á býráðsfundi 23. oktober 2025. Gerðabókina sært tú her:

Gerðabók fyri býráðsfundin 23. oktober 2025