Løgtingsvalið 26. mars 2026

Fyri at velja til løgtingsvalið, mást tú vera:

• Fylt 18 ár
• Heimahoyrandi í Føroyum og hava danskan heimarætt
• Skrásett á veljaralistanum

Harafturat mást tú ikki vera undir verjumáli og hava fingið rættarliga myndugleikan frátiknan eftir verjumálslógini.

Veljaralistarnir liggja frammi til alment eftirlits í Snarskivuni frá í seinasta lagi hósdegnum 19. mars 2026.

Tú mást vera skrásett á veljaralistanum fyri at greiða atkvøðu. Veljaralistarnir liggja frammi til alment eftirlits í Snarskivuni frá í seinasta lagi hósdegnum 19. mars 2026.

Flytur tú í aðra kommunu aftaná 11. mars 2026, verður tú framvegis standandi á veljaralistanum í kommununi, tú flytur úr. Flytur tú 11. mars 2026 ella áðrenn, verður tú skrásett á veljaralistanum í kommununi, tú flytur til.

Stendur tú ikki á veljaralistanum, men heldur tú teg lúka treytirnar fyri at velja, skalt tú seta teg í samband við kommunala fólkayvirlitið í Snarskivuni í Havn. Snarskivan kannar síðan, um tú lýkur treytirnar fyri at velja. Vísir tað seg, at tú lýkur treytirnar, verður tú sett á ein eykalista og kanst fara á val. 

Gev gætur, at tú fært einki valkort sendandi, tá ið tú stendur á eykalistanum. Minst tí til at hava galdandi koyrikort ella pass við tær á valstaðið. Á valstaðnum skalt tú venda tær til kommunala fólkayvirlitið, ið er til staðar undir allari atkvøðugreiðsluni á valdegnum.

Ríkisborgarar úr øðrum londum hava ikki valrætt til løgtingsval.

Hevur tú havt útlendskan ríkisrætt og seinni fingið danskan heimarætt, mæla vit til, at tú eftirkannar, at tú stendur á veljaralistanum. Tí tað kemur fyri, at Landsfólkayvirlitið ikki hevur fingið fráboðað broytingina, og tá verður tú ikki skrásett á veljaralistanum. Á valdegnum er í flestu førum ov seint at rætta tílíkt.

Veljaralistarnir liggja frammi til alment eftirlits í Snarskivuni frá í seinasta lagi hósdegnum 19. mars 2026.

Ert tú stødd uttanfyri Føroyar í lestrarørindum, varðveitir tú valrættin. Tað er tó treytað av, at tú hevur búð í Føroyum og verið skrásett í føroyska fólkayvirlitinum í minsta lagi fimm ár tilsamans. Og tú mást ikki hava havt tilhald uttanfyri Føroyar í meira enn átta ár.

Fyri at velja, skalt tú søkja um at sleppa á veljaralistan í tí kommunu, har tú seinast vart skrásett. Tú søkir á Vanganum. Rita inn við tínum Samleika.

Søk um atkvøðurætt til løgtingsval

Tann 5. mars 2026 er seinasti dagur, Tórshavnar kommuna kann taka avgerð um upptøku á veljaralistan til løgtingsvalið 2026. Tað vil siga, at tín umsókn má vera Tórshavnar kommunu í hendi nakað áðrenn afturlatingartíð 5. mars 2026 klokkan 16.

Hvar, nær og hvussu greiði eg mína atkvøðu?

Les meira um hvar og hvussu tú greiðir brævatkvøðu undir punktinum »Greið atkvøðu í útlondum« á síðu okkara um at greiða atkvøðu áðrenn valdagin. 

Gev gætur, at skal tín brævatkvøða telja við á valinum, mást tú syrgja fyri at greiða tína atkvøðu í so mikið góðari tíð, at atkvøðan er frammi hjá valstýrinum í tínari bústaðarkommunu, áðrenn atkvøðugreiðslan byrjar á sjálvum valdegnum. Spyr á staðnum, nær seinasta freist at senda brævatkvøður er. Ert tú búsitandi í Danmark, sært tú eitt yvirlit yvir danskar sendistovur og konsulat og upplatingartíðir teirra á heimasíðuni hjá danska uttanríkismálaráðnum.

Gev eisini gætur, at tú fært ikki nakað valkort sendandi, tá tú hevur søkt um upptøku á veljaralistan. Tú mást tí minnast til at hava samleikaprógv við, tá tú greiðir brævatkvøðu. Samleikaprógv kann annaðhvørt vera pass ella koyrikort.  

Tú kanst kunna teg nærri um reglurnar í løgtingslógini um val til Løgtingið.

Greið atkvøðu áðrenn valdagin

Find os i verden (Udenrigsministeriet)

Lógin um val til Løgtingið (logir.fo) 

Á valkortinum stendur, hvar tú skalt greiða tína atkvøðu, tað vil siga valstaðið, tú hoyrir til. Til løgtingsvalið 26. mars 2026 eru valstøðini opin frá klokkan 10 til klokkan 20 ella so leingi veljarar møta uttan at steðgur kemur í.

Ivast tú í, hvat fyri valstað tú hoyrir til, kanst tú kanna tað her:

Valstøð

Tá ið tú møtir á valstaðnum, skalt tú hava valkortið við tær. Hevur tú einki valkort við, kanst tú fáa nýtt valkort útskrivað á valstaðnum treytað av, at tú stendur á veljaralistanum. Minst til at hava samleikaprógv við, sum annaðhvørt kann vera koyrikort ella pass.

Ovast í vinstra horni á valkortinum er eitt raðtal. Tað er hetta raðtalið, sum avger, hvat fyri valborð tú skalt fara til á tínum valstaði. Niðanfyri er eitt gjørt dømi frá løgtingsvalinum í 2022:

Í Høllini á Hálsi eru til dømis seks valborð. 

Tá tú kemur inn í valhølini, sært tú skelti við hvørt borð, sum vísa, hvørji talstrekki hoyra til hvørt borð.

Tá ið atkvøðuseðilin er útflýggjaður, fert tú inn í atkvøðurúmið, har eingin annar má vera inni. Her skalt tú seta kross annaðhvørt við tann listan, tú ætlar at velja, ella við eitt valevni.

Minst til at seta krossin rætt, tá tú velur. Tú skalt annaðhvørt seta kross fyri tí lista, tú ætlar tær at velja, ella fyri einum valevni. Tú sært dømi um, hvussu tú skalt gera, og hvussu tú ikki mást gera, her:

Soleiðis atkvøður tú

Tá ið tú hevur sett krossin, leggur tú atkvøðuseðilin saman, soleiðis at eingin annar sær, hvussu tú hevur atkvøtt. Síðan koyrir tú beinanvegin atkvøðuseðilin í kassan uttanfyri atkvøðurúmið, meðan ein úr valstýrinum ella eitt hjálparfólk sær.

Hevur tú longu brævatkvøtt, men ætlar tær at greiða atkvøðu á valdegnum, verður brævatkvøðan ikki roknað uppí uppteljingina.

Hjálp til at greiða atkvøðu

Tørvar tær hjálp til velja, skalt tú siga valstýrinum ella hjálparfólkunum á valstaðnum frá. Tú kanst fáa hjálp frá tveimum persónum at greiða atkvøðu í atkvøðuhølunum ella beint uttanfyri atkvøðuhølið, til dømis í einum bili. Tú kanst krevja, at annar persónurin er ein, sum tú sjálv vísir á.

Hóast tú fært hjálp at velja, skalt tú sjálv skilliga siga ella á annan hátt vísa á, hvørjum tú vilt atkvøða fyri.

Tá valevnislistarnir eru góðkendir, verða teir at síggja her. Somuleiðis adressurnar, heimasíðurnar og aðrar sambandsupplýsingar hjá flokkunum.