Ólavsøka 2025

Serflutningur og pláss til rørslutarnað

Á ólavsøku er miðbýurin stongdur fyri ferðslu, og tað ber ikki til at koyra oman í Steinatún. Undantøk verða tó gjørd fyri bussleiðina, bygdaleiðir og fyri akfør, sum flyta fólk, ið nýta koyristól, og sum ynskja at verða sett av í Steinatúni.

Fyri at sleppa innum ferðsluforðingarnar í Bøkjarabrekku og Niels Winthers gøtu er tó neyðugt, at serflutningsakfarið er eyðmerkt við skrásetingarnummari og kontaktpersóni áðrenn ólavsøku. Tí vaktarhaldið á staðnum má vita, hvørji akfør hava loyvi til at koyra oman í Steinatún.

Situr tú í koyristóli, kanst tú brúka serflutningsbussin hjá Tórshavnar kommunu. Serflutningsbussurin nýtist ikki at gera vart við seg, tí hann verður nógv bílagdur til flutning av fólki í koyristóli og er tískil góðkendur frammanundan. 

Varir tú av akførum til flutning av fólki í koyristóli, sum ynskja at nýta møguleikan at koyra oman í Steinatún á ólavsøku, skalt tú siga kommununi frá frammanundan. Tað kanst tú gera við at senda kommununi ein teldupost á torshavn@torshavn.fo við navn og telefonnummari hjá kontaktpersóni. Minst eisini til at upplýsa skrásetingarnummarið á akfarinum.

Legg til merkis, at tað ber eisini til at koyra oman á parkeringsøkið á Skálatrøð á ólavsøku. Aftaná kappróðurin er somuleiðis koyrandi til parkeringsøkið á Bursatanga.

Framman fyri H.N. Jacobsens bókahandli eru pláss sett av til fólk í koyristólum undir setanini ólavsøkuaftan og undir skrúðgonguni og kórsanginum ólavsøkudag.

Til midnáttarsangin er pláss sett av við ráðhúsið.

Ferðslan á ólavsøku

Partar av miðbýnum eru stongdir fyri ferðslu, meðan ólavsøkan er. Ferðsluforðingar verða settar upp av trygdarávum. Í ávísum støðum er vaktarhald, ið kann loyva neyðsynjarakførum, bussleiðini og øðrum frammanundan góðkendum akførum inn. Niðanfyri sært tú, hvar og nær ferðsluavmarkingar eru í býnum.

Bussleiðin á ólavsøku

Bussleiðin koyrir eftir serstakari ferðaætlan ólavsøkuaftan og ólavsøkudag. Trýst á leinkið niðanfyri, so sært tú ferðaætlanina. Vilt tú vita, hvar bussarnir eru beint nú, kanst tú síggja tað á sonakortinum »Hvar er bussurin?«.

Bussleiðin á ólavsøku 2025

Hvar er bussurin beint nú?

Parkering

Eins og í fjør ber til at seta bilin frá sær á Skálatrøð. Innkoyringin til Skálatrøð er tó broytt soleiðis, at tú skalt koyra omaneftir Gríms Kambans gøtu og Bøgøtu og snara inn niðanfyri Smiðjuna í Lítluvík fyri at sleppa inn á parkeringsøkið á Skálatrøð. Ein fyribils innkoyring er gjørd við Smiðjuna í Lítluvík.

Bilar, ið fara av Skálatrøð, sleppa bara niðan eftir Sigmundargøtu.

Trygd

Á ólavsøku skipar Tórshavnar kommuna fyri trygdarátøkum í samstarvi við aðrar myndugleikar. 

Ferðsluforðingar eru settar upp kring miðbýin, og um kvøldið og náttina ólavsøkuaftan og ólavsøkudag ganga samarittar hjá Reyðakrossi runt í býnum, soleiðis at tað ber til at veita skjóta hjálp, um tørvur er á tí. Samarittarnir halda til í Posthúskjallaranum í Tórsgøtu 8.

Í Steinatúni verður skipað fyri vaktarhaldi, so bussleiðin kann virka ótarnað, og í Vágsbotni er vaktarhald framvið sjóvarmálan.

Undir midnáttarsanginum savnast tilbúgvingin á loftinum í Ráðhúsinum fyri at hava eftirlit við mannamúgvuni á Vaglinum.

Hvar finni eg vesini í miðbýnum?

Á ólavsøku er roynt at bøta um vesiumstøðurnar í miðbýnum. Umframt almennu vesini í Finsen, Steinatúni og Undir Bryggjubakka, eru vesivognar settir upp í Tórsgøtu og á Skálatrøð. Haraftrat eru átta kabinur settar upp í Vágsbotni undir Jomfrúbakkanum.

Vesini eru opin til klokkan 04 og verða javnan reingjørd.