Kom við til skrúðgongu, kappróður, framsýningar, spælibásar, middagssang, midnáttarsang, føroyskan dans og mangt annað á ólavsøku.
Les alt um ólavsøkuna her.
Sjálvgreiðsla
Leita
Lat aftur
Vælkomin á ólavsøku
Ólavsøkan á Tímanum
Vel tíni yndistiltøk, goym tey á snildfonini ella deil eitt tiltak við ein vin. Tímin fæst eisini á enskum.
Midnáttarsongur
Tak sangheftið til midnáttarsangin niður til snildfonina her.
Vit býta eisini sanghefti út við ovaru hurðina í býráðssalinum, tá ið midnáttarsangurin er.
Ólavsøkuróðurin
Týsdagin 28. juli er ólavsøkuróður frá klokkan 13 til klokkan 18. Keyp tær atgongumerki til róðurin her:
Brúka Bussleiðina á ólavsøku
Bussleiðin koyrir eftir serstakari ferðaætlan ólavsøkuaftan og ólavsøkudag.
Eykatúrur til Nólsoyingar og Hestfólk 29. juli
Erla Kongsdóttir siglir av Havnini til Nólsoyar klokkan 01.30 aftaná midnáttarsangin 29. juli. Báturin leggur eisini at í Hesti.
Tímin.fo
Ólavsøkuskráin
Tú sært øll ólavsøkutiltøkini í Tímanum. Vel »Ólavsøka« undir filtur, so sært tú skránna í tíðarrað. Tú kanst eisini sálda tiltøkini, soleiðis at tú til dømis bara sært tónleika- ella ítróttartiltøkini.
Skipar tú fyri tiltaki á ólavsøku, kanst tú sjálv leggja títt tiltak út. Tað er ómakaleyst og ókeypis. Minst bara til at leggja tiltakið inn í góðari tíð, so vit kunnu náa at góðkenna tað. Tiltakskalendarin finst bæði á føroyskum og enskum.
Vilt tú hava eina pappírsútgávu av skránni, far so inn á Tíman, trýst á knøttin »Filtur«, vel »Ólavsøka« og trýst síðan á gula knøttin »Prenta ólavsøkuskránna«. Tað er tó frægast at fylgja við á Tímanum, tí har sært tú altíð eina dagførda skrá.
Setan
Ólavsøkan verður sett
Týsdagin 28. juli er skrúðgonga og setan frá klokkan 14. Kom til skrúðgongu við hornblásarum, ítróttarfólki og býráðslimum. Gingið verður úr Tróndargøtu við Finsen oman á Vaglið, har Debes Hammershaimb Christiansen setir ólavsøkuna.
Ólavsøkuróðurin
Atgongumerki til ólavsøkuróðurin
Týsdagin 28. juli er ólavsøkuróður frá klokkan 13 til klokkan 18. Barnaróðurin byrjar klokkan 13, vaksnaróðurin klokkan 15. Keyp tær atgongumerki til róðurin her:
Skrúðgonga og kórsongur
Skrúðgonga og kórsongur
Mikudagin 29. juli er skrúðgonga úr Havnar Kirkju við løgtingslimum, prestum og øðrum embætisfólki niðan á Tinghúsvøllin, har Ólavsøkukórið syngur undir leiðslu av Ásbjørn Berthelsen.
Midnáttarsongur
Midnáttarsongur og sanghefti
Les alt um midnáttarsangin og tak sangheftið niður á Tímanum. Vit býta eisini sanghefti út við ovaru hurðina í býráðssalinum, tá ið midnáttarsangurin er.
Serflutningur og pláss til rørslutarnað
Á ólavsøku er miðbýurin stongdur fyri ferðslu, og tað ber ikki til at koyra oman í Steinatún. Undantøk verða tó gjørd fyri bussleiðina, bygdaleiðir og fyri akfør, sum flyta fólk, ið nýta koyristól, og sum ynskja at verða sett av í Steinatúni.
Fyri at sleppa innum ferðsluforðingarnar í Bøkjarabrekku og Niels Winthers gøtu, skal serflutningsakfarið tó vera eyðmerkt við skrásetingarnummari og kontaktpersóni áðrenn ólavsøku. Tí vaktarhaldið á staðnum má vita, hvørji akfør hava loyvi til at koyra oman í Steinatún.
Varir tú av akførum til flutning av fólki í koyristóli, sum ynskja at nýta møguleikan at koyra oman í Steinatún á ólavsøku, skalt tú siga kommununi frá frammanundan. Tað kanst tú gera við at senda kommununi ein teldupost á torshavn@torshavn.fo við navn og telefonnummari hjá kontaktpersóni. Minst eisini til at upplýsa skrásetingarnummarið á akfarinum.
Legg til merkis, at tað ber eisini til at koyra oman á parkeringsøkið á Skálatrøð á ólavsøku. Aftaná kappróðurin er somuleiðis koyrandi til parkeringsøkið á Bursatanga.
Serflutningsbussurin
Situr tú í koyristóli, kanst tú brúka serflutningsbussin hjá Tórshavnar kommunu. Serflutningsbussurin nýtist ikki at gera vart við seg, tí hann verður nógv bílagdur til flutning av fólki í koyristóli og er tískil góðkendur frammanundan.
Pláss á Vaglinum til rørslutarnað
Pláss eru sett av við ráðhúsið til fólk í koyristólum undir setanini ólavsøkuaftan og undir midnáttarsanginum.
27. juli 2026: Vegir stongdir í sambandi við ólavsøkufyrireiking og tiltøk
Fleiri vegir eru stongdir í miðbýnum og í Gundadali mánadagin 27. juli í sambandi við ólavsøkufyrireiking, ólavsøkurenning og pridegongu.
- 27. juli klokkan 8 til 30. juli klokkan 12
Vágsbotnur er stongdur frá Bøgøtu til Tórsgøtu. Ólavsøkubásar verða settir upp í Vágsbotni. Tó ber til hjá teimum, ið hava atgongd til økið undir Bryggjubakka, at koyra, inntil alt verður stongt av ólavsøkuaftan. Koyrast skal tá eftir Vágsbotni og ikki niðan Mylnugøtu - 27. juli klokkan 8 til 30. juli klokkan 20
Parkeringsøkið í Tórsgøtu er stongt - 27. juli klokkan 8 til 28. juli klokkan 20
Parkeringsøkið á Bursatanga er stongt - 27. juli klokkan 8 til mikudagin 30. juli klokkan 8
Niels Finsens gøta er stongd frá Sverrisgøtu til Vaglið. Gjørt verður klárt til Pride-konsert og ólavsøkubásar - 27. juli klokkan 9 til mikudagin 30. juli klokkan 8
Sverrisgøta er stongd frá Magnusar Heinasonar gøtu oman til Tórsgøtu
Tórsgøta er stongd frá Sverrisgøtu oman til Vágsbotn - 27. juli klokkan 8 til 27. juli klokkan 20
Ferðslan í Mylnugøtu er einvegis niðaneftir, meðan gjørt verður klárt til pallin hjá Pride-konsertini og ólavsøkurenningin er á skrá - 27. juli klokkan 15 til 16
Gundadalsvegur er stongdur frá R. C. Effersøes gøtu yvir til Nainu - 27. juli klokkan 18 til mikudagin 30. juli klokkan 12
Partur av Húsabrúgv er stongdur. KVF setir upp pallar til upptøkutól - 27. juli klokkan 18 til 27. juli klokkan 20
Skálatrøð er stongd frá Bøgøtu til Skiparagøtu. Ólavsøkurenningin hjá Bragdinum er á skránni - 27. juli klokkan 18 til 27. juli klokkan 20
Undir Bryggjubakka er stongd
Bøgøta er stongd frá Skálatrøð til Gríms Kambans gøtu
28. juli til 30. juli 2026: Vegir stongdir í miðbýnum í sambandi við ólavsøku
Fleiri vegir eru stongdir í miðbýnum frá týsdegnum 28. juli til hósdagin 30. juli í sambandi við ólavsøkuna.
Innkoyringin til parkeringsøkið á Skálatrøð verður úr Bøgøtu, og útkoyringin verður niðan eftir Sigmundargøtu. Bøgøta verður sostatt stongd fyri ferðslu av Skálatrøð.
Hetta tíðarskeiðið er ferðsla ikki loyvd eftir Niels Winthers gøtu og Bøkjarabrekku tvørturum Steinatún. Bara býarbussarnir, bygdaleiðirnar og frammanundan góðkend akfør verða loyvd ígjøgnum, har trygdarforðingar og vaktarhald er.
Ólavsøkudag frá klokkan 05 til 10 er tó gjørligt hjá teimum, ið hava tørv á at sleppa inn í miðbýin við vøru at koyra gjøgnum Steinatún og oman Tórsgøtu, og út aftur gjøgnum Vágsbotn til Skálatrøð og niðan Sigmundargøtu. Sama er galdandi frá klokkan 06 tann 30. juli.
- 28. juli klokkan 8-19
Eystara Bryggja er stongd frá Havnargøtu til Jónas Broncks gøtu. Eisini Erling Jals gøta er stongd. Kappróður er á skránni
- 28. juli klokkan 13-14
Tróndargøta er stongd frá Sjúrðargøtu oman til Kongagøtu. Skrúðgongan verður fyrireikað - 28. juli klokkan 14-21
Doktara Jakobsens gøta er stongd frá Bøgøtu til Dalavegin. Tiltak er á gøtuni - 28. juli klokkan 10 til mikudagin 30. juli klokkan 12
Áarvegur, Mylnugøta, Tórsgøta, Vágsbotnur og Niels Finsens gøta eru stongd frá Sjónleikarhúsinum oman á Vaglið. Somuleiðis eru Tinghúsvegurin (niðan til Bøkjarabrekku), Sverrisgøta, Áarvegur, Bryggjubakki, Undir Bryggjubakka, Steinatún og Bøkjarabrekka stongd saman við parti av Jóanesar Paturssonar gøtu.
Innkoyringin til parkeringsøkið á Skálatrøð verður úr Bøgøtu, og útkoyringin verður niðan eftir Sigmundargøtu. Bøgøta verður sostatt stongd fyri ferðslu av Skálatrøð. Hetta tíðarskeiðið er ferðsla ikki loyvd eftir Niels Winthers gøtu og Bøkjarabrekku tvørturum Steinatún. Bara býarbussarnir, bygdaleiðirnar og frammanundan góðkend akfør eru undantikin
Tak bussin á ólavsøku
Bussleiðin á ólavsøku
Bussleiðin koyrir eftir serstakari ferðaætlan ólavsøkuaftan og ólavsøkudag. Trýst á leinkið niðanfyri, so sært tú ferðaætlanina. Vilt tú vita, hvar bussarnir eru beint nú, kanst tú síggja tað á sonakortinum »Hvar er bussurin?«.
Parkering
Tað ber til at seta bilin frá sær á Skálatrøð. Innkoyringin til Skálatrøð er tó broytt soleiðis, at tú skalt koyra oman eftir Gríms Kambans gøtu og Bøgøtu og snara inn niðanfyri Smiðjuna í Lítluvík fyri at sleppa inn á parkeringsøkið á Skálatrøð. Ein fyribils innkoyring er gjørd við Smiðjuna í Lítluvík.
Bilar, ið fara av Skálatrøð, sleppa bara niðan eftir Sigmundargøtu.
Trygdin á ólavsøku
Á ólavsøku skipar Tórshavnar kommuna fyri trygdarátøkum í samstarvi við aðrar myndugleikar.
Ferðsluforðingar eru settar upp kring miðbýin, og um kvøldið og náttina ólavsøkuaftan og ólavsøkudag ganga samarittar hjá Reyðakrossi runt í býnum, soleiðis at tað ber til at veita skjóta hjálp, um tørvur er á tí. Samarittarnir halda til í Posthúskjallaranum í Tórsgøtu 8.
Í Steinatúni verður skipað fyri vaktarhaldi, so bussleiðin kann virka ótarnað, og í Vágsbotni er vaktarhald framvið sjóvarmálan.
Undir midnáttarsanginum savnast tilbúgvingin á loftinum í Ráðhúsinum fyri at hava eftirlit við mannamúgvuni á Vaglinum.
Stuðlið ítróttinum
Vilt tú stuðla ítróttinum á ólavsøku?
Vilt tú stuðla ítróttarfeløgunum á ólavsøku, skalt tú leita tær oman á gongugøtuna, parkeringplássið í Tórsgøtu og Vágsbotn, har ítróttarfeløg hava básar við sølu og spæli. Við Betri banka í gongugøtuni standa tjøldini hjá Neistanum og FC Hoyvík, og hinumegin vegin við býráðssalin stendur tjaldið hjá HB og pylsuvognurin hjá AB.
Á parkeringsplássinum niðast í Tórsgøtu eru tjøldini hjá H71, Havnar badmintonfelag og Kyndli. Og í Vágsbotni er Havnar Tennisfelag.
KÍF skipar harafturat fyri tivoli í Gundadalshøllini saman við Tatanka.
Hvar finni eg vesini í miðbýnum?
Á ólavsøku er roynt at bøta um vesiumstøðurnar í miðbýnum. Umframt almennu vesini í Finsen, Steinatúni og Undir Bryggjubakka, eru vesivognar settir upp í Tórsgøtu og á Skálatrøð. Haraftrat eru átta kabinur settar upp í Vágsbotni undir Jomfrúbakkanum.
Vesini eru opin til klokkan 04 og verða javnan reingjørd.
Snarskivan
Upplatingartíðir
| Monday | 9 | - | 16 |
| Tuesday | 9 | - | 16 |
| Wednesday | 9 | - | 16 |
| Thursday | 9 | - | 16 |
| Friday | 9 | - | 15 |