Á fiskitúrinum læra næmingarnir nakað um sjógv og fiskiskap. Allir flokkar fara sínámillum at kappast um, hvør flokkur fær flest fiskar, og um, hvør næmingur í kommununi fær størsta fiskin.
Ein fiskitúrur við Westward Ho kann fyrireikast í lærugreinini »Náttúra & tøkni«. Næmingarnir kunnu til dømis arbeiða við evnunum »fiskur«, »sjógvur« og »veiðihættir« sum fyrireiking til túrin.
Tann meira verkligi parturin gongur síðani fyri seg umborð á Westward Ho. Við at samansjóða tað ástøðiliga og tað verkliga gerst undirvísingin meira ítøkilig og spennandi.
Er veiðan góð, ber til at nýta fiskin í lærugreinini »Heimkunnleiki«. Næmingarnir kunnu til dømis gera knettir og frikadellur burturúr fiskinum. Er fongurin góður, kunnu næmingarnir eisini taka nakrar fiskar við heim.
Næmingar kunnu sum fyrireiking granska toskatalvuna og talvuna við vanligastu fiskasløgunum undir Føroyum. Talvurnar finna tit niðanfyri:
Vanlig fiskasløg undir Føroyum
Næmingarnir í Sankta Frans Skúla, sum fara at fiska, gera pilkar og beitir til túrin saman við lærarunum. Navnið á einstaka næminginum verður síðan sett á hvørt settið av pilkum og beitum. Hetta hava næmingarnir við sær, tá ið teir fara at fiska.
Aftaná fiskitúrin fara næmingarnir í køkin, har teir flekja fiskin og steikja fløk. Síðan eta næmingarnir døgurða saman, og hevur flokkurin fingið nógvan fisk, fáa lærararnir í skúlanum eisini ein bita.
Einans tvinnar siglandi sluppir eru eftir av teimum umleið 150 sluppunum, føroyingar keyptu úr Stóra Bretlandi frá 1870-unum og fram til aftaná seinna heimsbardaga. Onnur er Johanna í Vági við havnarkenningartekni TG 326, og hin er Westward Ho í Tórshavn við havnarkenningartekni TN 54.
Tórshavnar kommuna hevur átt Westward Ho síðan 2005. Tað er áhugafelagsskapurin Sluppvinir, sum rekur og heldur sluppina við líka.
Sluppvinirnir hava skipað fiskikappingina millum allar 6. flokkar í Tórshavnar kommunu síðan 2009.
Tú kanst lesa meira um sluppina og áhugafelagsskapin Sluppvinir her:
Westward Ho hevur avtalu við veitara, ið selur ein »fiskapakka« til flokkarnar, sum fara út við Westward Ho at fiska. Í pakkanum, ið ikki er so dýrur, er hóskandi útgerð til fiskitúrin. Pakkin kann tillagast eftir tørvi hjá flokki ella næmingi.
Næmingarnir kunnu annars í flokkinum gera teymar, pilkar og annað fyri á tann hátt at fyrireika fiskitúrin.
Á flot við Westward Ho í august 2024.
Fiskitúrarnir eru skipaðir sum ein fiskikapping millum allar 6. flokkar í Tórshavnar kommunu.
Hvør flokkur fiskar í umleið tveir tímar. Vit fiska í bakborðs síðu við tráðu og pilki, og í mesta lagi 12 tráður kunnu vera úti í senn. Fiskur minni enn 30 cm telur ikki við og verður sleptur út aftur.
Skiparin skrásetir talið av fiskum og vektina á størsta fiskinum.
Tann næmingurin av øllum, sum fær størsta fiskin í 2026, vinnur eina tráðu, sum hann fær handað í september mánaði. Veitari letur og handar næminginum tráðu.
Tann flokkurin, sum fær flest fiskar og sostatt vinnur kappingina, fær í september mánaði handað steyp til ognar. Steypið verður handað á viðkomandi skúla, og tað er borgarstjórin í Tórshavnar kommunu, sum handar flokkinum vinnarasteypið.
Fiskikappingin hevur verið fastur táttur síðan 2009. Hesir skúlar hava vunnið fiskikappingina:
2009 Argja skúli
2010 Argja skúli
2011 Hoyvíkar skúli, 6.a
2012 Sankta Frans skúli, 6.a
2013 Sankta Frans skúli, 6.b
2014 Hoyvíkar skúli, 6.a
2015 Skúlin á Fløtum, 6.e
2016 Sankta Frans skúli, 6.a
2017 Skúlin á Argjahamri
2018 Sankta Frans skúli, 6.b
2019 Kollafjarðar skúli
2020 Kollafjarðar skúli
2021 Sankta Frans skúli, 6.a
2022 Sankta Frans skúli, 6.b
2023 Skúlin á Fløtum, 6.b
2024 Kollafjarðar skúli
2025 Hoyvíkar skúli
