Saman um grønu framtíðina

Grundarlag og bakgrund

Nýggi umhvørvispolitikkurin hjá Tórshavnar kommunu er úrslitið av drúgvari tilgongd við mongum forkanningum.

Politikkurin er gjørdur við støði í altjóða verðurlagssáttmálanum frá 1992, Parissáttmálanum frá 2015, heimsmálunum hjá ST fyri burðardygga menning og teimum landspolitisku málunum, sum eru at finna í føroysku veðurlagslógini. Politikkurin tekur somuleiðis støði í Kommunuætlanini og øðrum politikkum hjá kommununi, so sum Ferðavinnupolitikkinum og Vinnupolitikkinum umframt Grønu Leiðini frá 2016 og Orkupolitikkinum.

Harumframt byggir umhvørvispolitikkurin á borgarafund, fund við staðbundnu nevndirnar, verkstovur, frágreiðingar, samrøður við viðkomandi partar og talgildan pall, har borgarar høvdu møguleika at koma við íkasti.

Fleiri átøk eru sett í verk í kommununi seinastu árini, sum hava lækkað CO2-útlátið á fleiri økjum. Til dømis verða munandi fleiri fermetrar av kommunalum bygningum hitaðir við grønari orku í dag sammett við 2016. Tá ið tosað verður um burturkast, sæst ein ávís gongd rætta vegin frá 2016 til 2024, tó at broytingarnar eru smáar og tørvur framvegis er á at minka burturkastið og økja endurnýtsluna.

Samanlagt vísa viðurskiftini eina kommunu, sum støðugt arbeiðir fram ímóti eini grønari framtíð. Kommunan vil tó gera meira fyri at fáa vøkstur, býarmenning og burðardygd at ganga hond í hond. Við vitanarmenning, neyvum dátugrundarlagi og málrættaðum átøkum strembar Tórshavnar kommuna komandi árini eftir at tryggja, at umhvørvislig, fíggjarlig og sosial burðardygd ganga upp í eina hægri eind.

Eitt týdningarmikið amboð í umhvørvispolitikkinum er virkisætlanin, ið útgreinar, hvussu umhvørvismálini verða rokkin og átøkini útint. Í virkisætlanini er tíðar- og kostnaðarmeting umframt áseting um, hvør hevur ábyrgd av at útinna einstøku átøkini.

Høvuðsmál

Við umhvørvispolitikkinum fær umhvørvið eitt týdningarmikið pláss í øllum avgerðum hjá Tórshavnar kommunu. Kommunan setir krøv til sín sjálvs, veitarar, samstarvspartar og borgarar. Eisini fer kommunan at arbeiða fyri at fáa góð samstørv í lag við landsmyndugleikar, vinnulív, vitanarstovnar, áhugafeløg og borgarar, soleiðis at vit saman kunnu røkka langt á umhvørvisleið.

Umhvørvispolitikkurin leggur dent á trý høvuðsøki, ið eru deild í 19 lutmál, sum kommunan hevur sett sær fyri at røkka. Fyri at røkka lutmálunum eru ítøkilig átøk ásett, ið skulu fremjast komandi árini. Tú finnur nærri kunning um einstøku átøkini, og hvør hevur ábyrgd av teimum, í politikkinum.

Borgaraluttøka

Øll skulu vera við, skal tað eydnast kommununi at gerast veðurlagsneutral í 2040. Bæði vinna, feløg, kommunan og borgararnir. Borgararnir áttu sostatt sín týðandi lut í tilgongdini at gera umhvørvispolitikkin. Kommunan skipaði fyri borgarafundi og útvegaði ein talgildan pall, soleiðis at fólk kundu gera viðmerkingar og senda kommununi hugskot. Niðanfyri sært tú nøkur av teimum evnunum, sum upptaka borgarar.