Stilla upp til ungdómsráðsvalið 2026

Í mars skulu vit velja nýtt ungdómsráð í Tórshavnar kommunu. Býrt tú í Tórshavnar kommunu, og ert tú millum 16 og 25 ár valdagin 24. apríl, ert tú vælkomin at stilla upp. Fráboðanarfreistin er týsdagin 24. februar 2026. Les her, hvussu tú gert.

Høvuðsuppgávan hjá ungdómsráðnum er at umboða ungdómin í ungdómspolitiskum spurningum og vera millumlið ímillum tey ungu og politikararnar. Tað vil millum annað siga at geva politikarunum ráð, innlit og vegleiðing og at vera við til at tryggja, at atlit verða tikin til yngri borgarar, tá ið avgerðir verða tiknar.

Ungdómsráðið skal eisini í so stóran mun sum møguligt vera umboðað í arbeiðsbólkum og nevndum, ið eru viðkomandi fyri ungdómin.

Tú kanst lesa meira um ungdómsráðið niðanfyri og í viðtøkunum niðast á hesari síðuni.

Hví skal eg stilla upp?

Tí at ung vita best, hvat ung hava tørv á og ynski um, og Tórshavnar kommuna ynskir at hoyra tykkara sjónarmið.

Hetta er tykkara møguleiki at fáa veruliga ávirkan á hægsta stað í kommununi, og ikki minst at luttaka í týdningarmiklum og mennandi arbeiði. At sita í ungdómsráðnum er læruríkt, stuttligt og spennandi, og tú hittir og samstarvar við onnur ung, sum eisini ynskja at gera mun.

Um Ungdómsráðið

Hvussu nógv sita í ungdómsráðnum?

Fimm fólk skulu veljast í ráðið, umframt fimm varafólk, sum kunnu traðka til, um ein av limunum í ráðnum ikki fær møtt á fundi ella líknandi.

Hvussu arbeiðir ungdómsráðið?

Ungdómsráðið skipar sítt arbeiðir sjálvt. Tað avgerð, nær og hvussu ofta fundir verða hildnir, og hvør skráin til fundirnar er.

Tórshavnar kommuna veitir høli til fundir og eina peningajáttan, umframt vegleiðing og skrivarahjálp.

Fær mann løn?

Arbeiðið í ungdómsráðnum er sjálvboðið, men fundarpeningur verður latin sambært almennum reglum. Fyri fundir upp til tríggjar tímar fær man 707 krónur í fundarsamsýning.

Hvussu stilli eg upp?

Hevur tú hug til at gera tína ávirkan galdandi og stilla upp til ungdómsráðið, skalt tú fylla út valevnisfráboðanina, sum sæst niðanfyri. Skjalið fæst eisini í Snarskivuni, á Vaglinum 11, í Havn. Saman við fráboðanini skulu undirskriftir fylgja við frá fimm stillarum, sum somuleiðis mugu lúka treytirnar fyri valrætti til ungdómsráðið.

Freistin fyri at lata fráboðanina inn er týsdagin 24. februar 2026. Tú kanst annaðhvørt senda fráboðanina til torshavn@torshavn.fo ella lata hana inn á Snarskivuni á Vaglinum 11 í Havn. Snarskivan er opin mánadag til hósdag klokkan 9-16 og fríggjadagar klokkan 9-15.

Hevur tú spurningar um eitthvørt, ert tú vælkomin at seta teg í samband við Sunnuvu Bæk, fulltrúa á Mentamáladeildini, á telefon 30 20 10.

Valevnisfráboðan til ungdómráðsvalið 2026

Um valið

Valið fer fram í tíðarskeiðnum 10.-24. mars 2026, treytað av, at nóg nógv valevni stilla upp til at manna nevndina. Veljast skulu fimm limir og fimm varalimir.

Valið fer fram talgilt á Vanganum ella við brævatkvøðu í Snarskivuni. Fært tú sum veljari ikki brúkt hesar møguleikar, kanst tú boða Tórshavnar kommunu frá og brævatkvøða heima við hús. Nærri kunning um hesi viðurskifti verða at frætta eftir 24. februar, tá greitt er, um valið verður, ella um neyðugt verður at leingja uppstillingarfreistina fyri at fáa fleiri at stilla upp.

Regluverk

Viðtøkurnar fyri Tórshavnar Ungdómsráð sært tú her:

Viðtøkur fyri Tórshavnar Ungdómsráð

Mentamáladeildin

Vaglið 11
100 Tórshavn

Tel. 30 20 10
torshavn@torshavn.fo

Les um Mentamáladeildina

Upplatingartíðir

Mánadag	9	-	16
Týsdag	9	-	16
Mikudag	9	-	16
Hósdag	9	-	16
Fríggjadag	9	-	15