Tinghúsvegur 4
100 Tórshavn
torshavn@torshavn.fo
Sjálvgreiðsla
Leita
Lat aftur
Tórshavnar ungdómsráð
Markus Precious Køtlum
Markus
Eg eri 23 ára gamal og búgvi í Havn. Eg valdi at stilla upp til Tórshavnar ungdómsráð, tí eg ynski at gera ein veruligan mun fyri børn og ung í kommununi – serliga við at skapa møguleikar, sum eg sjálvur saknaði, tá eg var yngri. Eg brenni fyri ungum, mentan og frítíðarmøguleikum.
Eitt av mínum hjartamálum er at arbeiða fram ímóti at skapa eitt opið stað til ung, sum ikki er knýtt at átrúnaði ella alkoholi – eitt stað, har øll kunnu kenna seg vælkomin. Eg trúgvi, at hetta kann gera ein stóran mun fyri trivnaðin hjá ungum í Havn.
Eg havi nógv hugskot og nógva orku til at menna tey undir røttum karmum, og eg eri til reiðar at leggja arbeiði í at gera tey til veruleika.
Eg havi verið vinnurekandi í útivið seks ár og havi verið við til at byggja upp alternativar ítróttagreinir sum klintring/bouldering, skateboarding og parkour. Eg gekk á ítróttarháskúla 2018/19 og síðan á búskaparbreyt 2019–22. Í dag eri eg formaður í Parkourfelagnum, ein leiklutur eg havi havt síðan 2022.
Gabriella Vang
Gabriella
Eg valdi at stilla upp, tí eg havi stóran áhuga í menningini av okkara kommunu, herundir áhugamálini hjá ungum. Eg eri 17 ár og gangi á náttúrubreyt á Glasi á fyrsta ári. Eg síggi fram til saman við hinum í ungdómsráðnum at kunna eyðmerkja, viðgera og kjakast um ungdóm, ungdómslív, samfelag, politikk og leiklutin hjá teimum ungu í kommununi.
Eitt nú kundi eg hugsa mær, at ungdómsráðið hevði nakrar verkstovur saman við umsiting og stovnum innan mentanar-, býarskipanar- og ungdómsøki fyri at fáa nærri innlit í virksemið hjá teimum og at hava samrøður um møgulig uppskot til átøk, ið kunnu gera kommununa til eitt enn betri stað fyri tey ungu.
Sum heild haldi eg, at vit hava eina væl virkandi kommunu, men tað er umráðandi, at ungdómurin fær høvi at ummæla viðkomandi kommunal nevndar- og býráðsmál út sjónarhorninum hjá teimum ungu.
Maisól Elisa Ísheim Hentze
Maisól
Eg eri 18 ára gomul, og búgvi í Hoyvík. Eg gangi í 2.g á búskaparbreyt á Glasi, og eri limur í næmingaráðnum. Áðrenn eg byrjaði á Glasi, gekk eg í Hoyvíkar skúla og var forkvinna í næmingaráðnum har. Eftir fólkaskúlan flutti eg niður til Danmarkar og gekk á einum donskum tónleikaeftirskúla, har eg hitti nógv ung. Í frítíðini gangi eg til akkordeon á Musikkskúlanum og arbeiði sum tænari á Hafnia.
Mær hevur altíð dámt væl politikk, og í 8. flokki slapp eg at royna meg á tingsins røðarapalli í sambandi við Ungdómstingið. Eftir tað helt eg nakrar røður, millum annað á femifagnaðinum í 2022 og á 70 ára stovningardegnum hjá Havnar kvinnufelag. Í røðunum tosaði eg um kvinnurættindi millum ungar kvinnur, sum er eitt av mínum hjartamálum.
Í ungdómsráðnum ætli eg mær at arbeiða fyri at ung lesandi í Havn skula trívast betur. Eg vil hjálpa politikkarum at raðfesta lestrarumhvørvið og lestrarbústaðir til ung í Havn. Afturat tí mangla ung lesandi eitt stað, har øll kunna møtast.
Tey yngru hava Klubb 188, Argjaskotið og Margarinfabrikkina. Vit eldru mangla eitt miðpunkt, sum ikki er ein partur av religiøsa felagsskapinum ella ballingarlívinum, men har øll kunna møtast og eru vælkomin.
Sjúrður Elias Heinason Eysturoy
Sjúrður
Eg eri 18 ára gamal og gangi í 2.g á náttúrubreyt á Glasi. Eg havi gjørt heilt nógv av ítrótti alt mítt lív, serliga innan badminton og kappróður. Eg eri í næmingaráðnum á Glasir, landsnevndini hjá Unga Tjóðveldi og aðalstjórnarlimur hjá Tjóðveldinum ígjøgnum Unga Tjóðveldi.
Eg brenni fyri, at vit styrkja um samveruna millum ung, sum tíverri er farin tann skeiva vegin millum annað orsaka av sosialum miðlum. Eisini ynski eg at gera fleiri frítíðartilboð fyri ung, har serligt fokus er lagt á at styrkja um lestrarumhvørvið í Tórshavnar kommunu.
Eg eri sera spentur at vera við í ungdómsráðnum í Tórshavnar kommunu og gleði meg at gera Tórshavnar kommunu til eitt stað, har ung trívast og hava hug at liva. Eg stillaði upp til valið, tí eg sá at har vóru fleiri trupuleikar sum umfevna tey ungu í Tórshavnar kommunu.
Fríði Leitisskarð
Fríði
Eg havi valt at stilla upp til ungdómsráðið fyri at geva ungum í okkara kommunu eina sterka rødd. Serliga vil eg arbeiða fyri, at bygdir sum Kaldbak, Kollafjørður og Nólsoy eisini verða hoyrdar og fáa góðar møguleikar saman við restini av kommununi.
Mær liggur á hjarta at vera við til at gera kommununa til eitt enn betri stað fyri ung – bæði tá tað snýr seg um arbeiði, møguleikar og trivnað. Eg trúgvi upp á gott samstarv og opna samrøðu, og eg vil gera mítt besta fyri at umboða ungdómin á ein arbeiðssaman, ábyrgdarfullan og nærverandi hátt.
Eg eri 23 ára gamal, timburmanslærlingur og virkin í politiskum ungdómsarbeiði.
Regluverk
Viðtøkurnar fyri Tórshavnar Ungdómsráð sært tú her: