Ælabogabreytin hvørvur: SEV fer at grava í Gundadali

Tórshavnar kommuna hevur givið SEV graviloyvi til at gera eitt leiðingsarbeiði í Gundadali.

Talan er um eitt arbeiði, sum fer at ganga ígjøgnum ælabogabreytina, sum tað annars hevur verið nakað av kjaki um í miðlunum.

SEV hevur havt hetta graviloyvið áður, men av tí at hetta arbeiðið hongur saman við grevstrararbeiðið tvørtur um R.C. Effersøes gøtu, bað SEV um at fáa graviloyvið útsett.

Tí var tað heldur ikki í andsøgn við loyvið at mála ælabogabreytina, eisini tí at ælabogabreytin einans skuldi vera fyribils. SEV hevur virt ælabogabreytina og hevur tí eisini sjálvboðið útsett arbeiðið, so breytin kundi vera har í nakrar vikur.

Mánadagin verður farið undir at fresa ælabogabreytina burtur, og síðani verður ein grøv grivin at leggja nýggju leiðingarnar hjá SEV í. Tá tað arbeiðið er liðugt, verður asfalterað aftur, men breytin verður ikki málað á aftur á hesum sinni.