Havnar Dartfelag nýggj høli
- Vit í Tórshavnar Kommunu royna alla tíðina at betra um møguleikarnar hjá okkara ítróttarfeløgum, nú var tað tykkara tørn at fáa betri hølisumstøður, og tað hava tit fingið við hesum hølunum í Skansastovu, segði Annfinn Brekkstein, formaður í mentamálanevndini, tá hølini nú vórðu al,ent tikin í nýtslu.
- Tykkara felag er vaksi nógv seinastu árini, og nú hava tit 100 limir. Havnar Dartfelag er eitt virkið felag, tit hava skipað fyri altjóða kapping her í Føroyum við stórari luttøku.
- Limir úr Havnar Dartfelag hava eisini gjørt vart við seg í kappingum uttanlands, har ein av tykkara limum fekk framúr gott úrslit, so eisini her hava vit føroyingar víst framúr góð úrslit. Tillukku við tí.
- Tað er ógvuliga umráðandi at skapa karmar til frítíðarvirksemi av alskyns slag, fyri at okkara borgarar, okkara ungdómar, hava eitt breitt úrval av frítíðaraktiviteti at velja ímillum at fara til.
Tórshavnar Kommuna vil alla tíðina menna og víðka um møguleikarnar hjá ítróttinum og øðrum frítíðaraktiviteti. Eg fari tí at ynskja tykkum hjartaliga tillukku við nýggju hølunum, segði Annfinn Brekkstein.