Nýggjar stovur tiknar í nýtslu
Í gjár var hátíðarhald á Dagstovninum Hans Andrias Djurhuus, nú allar stovurnar eru lidnar. Heðin Mortensen, borgarstjóri, helt røðu og fegnaðist um at síggja os nógv fólk í góðum hýri.
- Í 1894 var lýsing í Føringatíðindum um, at ein barnagoymsla byrjaði 15 mars, har børnini kundu vera, meðan foreldrini vóru til arbeiðis. Tað eru skjótt 130 ár síðani, og nógv er broytt síðani tá.
- Tórshavnar kommuna hevur í dag omanfyri 1200 barnagarðspláss og omanfyri 500 vøggustovupláss. Hetta, ið vit síggja í dag, er nýggjasta stigi fyri at betra um karmarnar á dagstovnaøkinum.
--
- Eitt eru bygningar og stovur, - líka so týdningarmikil eru tit, góðu starvsfólk. Tit taka tykkum av tí, ið eg haldi, vit kunnu kalla “grundleggjandi gullið” í samfelagnum – børnunum.
- Hetta er eitt virðismikið og álvarsligt starv, ið tit hava. Tí tit taka tykkum av framtíðini í Føroyum.
- Tí vóni eg, at kommunan, við hesum nýggju stovunum, kann betra um umstøðurnar hjá bæði tykkum og børnunum.
- Nú liðugt er, er plássið á stovninum økt við 30 plássum.
--
- Stovnurin er handaður kommununi uppá klokkuslettið, - uttan manglar. Øll loyvi fyriliggja eisini til rakstur.
- Eg fari at takka Articon og undirveitarum fyri vælgjørt arbeiði.
- Eisini fari eg at takka Unnie Justinussen, sum vegna kommununa hevur havt eftirlit við øllum arbeiðinum.
--
- Hans Andrias Djurhuus – tað er ikki ein og hvør í føroyskari søgu mentan. Flestu okkara munnu kenna onkran av sangum hansara, - um tað eru barnasangir ella sjómansrímur.
- Eg giti, at tit her á stovninum javnan syngja onkrar av barnarímum hansara.
- Fríggjadagin vóru 140 ár liðin, síðani Hans Andrias Djurhuus varð borin í heim. Neyvan mundi hann gruna, at sangir hansara fóru at runga á einum dagstovni, sum eitur Hans Andrias Djurhuus.
--
- Um eina løtu kemur Steinbjørn, stovnsleiðarin, at siga nøkur orð. - Eg kann avdúka, at Steinbjørn júst hevur havt 20 ára starvsdag hjá Tórshavnar kommunu. – Hjartaliga til lukku, Steinbjørn, og bestu ynski í framtíðini.
- Eg vóni, at tú, starvsfólk og børn fara at trívast væl í hesum nýggju stovunum.
- Takk fyri øll somul, og hjartaliga til lukku við nýggju og stásiligu stovninum, segði Heðin Mortensen, borgarstjóri.
